Lembang’eya ma jugeno man ma teng’o yiyoyic

Jumulembe pa Yehova gidieng’ lee ikum juyic wagi. (1 Pethro 2:17) Ju ma dupa m’i kindwa giwinjiri tap calu ma nyamego Tannis ma kwo i ng’om mi Kenya uwinjere ko. Eyero kumae: “Amaru ning’eyo lembe m’ubenwang’u umego ku nyimego para mi wang’ ng’om zoo.” Tannis ku milioni dupa mange mi Jumulembe ginwang’u lembang’eyane nenedi? Niai i oro 2013, watuc nitimo kumeno nikadhu kud i kusika mwa mir Internet jw.org, i thengene ma julwong’o nia Odi lembang’eya.

Odi lembang’eya maeno miyo rapor ma jugeno iwi Jumulembe pa Yehova, kum thiwiwec ma wok kud i iye weco iwi lembe ma calu ve wok pa Biblia ma jung’iyo iye kendo, tic ma timere i saa mi peko ma wok rek, proje mi giedo, man lembe mange ma pigi tek. Enyutho iwa bende pir umego ku nyimego mwa ma jutwiyogi pi yiyoyic migi. I Odi lembang’eya maeno junwang’u bende lembe m’utimere ma tielocwiny mi kampany mi lembanyong’a man mi lembe m’utimere i Poy pi tho pa Yesu. Dong’ ng’a dhe ma sayu thiwiwec ma nyen maenogi man ke juyikogi nenedi?

Ning’iyo man nidwoko lembang’eya ma tung’ tung’

Ju ma neno lembe mi Odi lembang’eya maeno utie biro mi service des relations publiques (SRP). Departema maeno nwang’ere i kabedo mwa ma dit mi wang’ ng’om zoo man etimo ticne i the telowic pa Komite mi jutel wi tic mi Guriri m’utelowic. SRP utie kud umego ku nyimego ma kadhu 100 ma ju ma pol m’i kindgi utie ju ma gimiyiri ku berocwinygi ma gibetimo niai kud i pacu migi. Dhanu maeno uketho i iye jukiew, ju ma timo sayusac, jubodho, man julok dhok. Jumange lundo weco ku judongo pa gavmenti, jururieko, juponji man gineno lembe ma nyen mi media. Bureaux des relations publiques (BRP) ma kadhu 80 i Bethel ma tung’ tung’ mi wang’ ng’om zoo konyo SRP.

Pi niyiko lembang’eya acel, SRP timo tic ceng’ini ceng’ini ku BRP. Umego mwa ging’iyo wang’ acel lembe ma pire tek, gitimo sayusac iwi lembene, man i ng’eye ke gicoko ndhu lembang’eya ma jugeno. Lembuno copo ketho i iye penji ku dwokowang’e, man niweco ku jururieko. Ing’ey ma gicoko ndhu lembuno ceke, gikiewo thiwi lembang’eyane, judok jung’iyo iye, jusome kendo, jukoro iye ku fotho man juore i bang’ Komite mi jutel wi tic kara ging’ii iye ketho juwodhe.

Wec mi dwoko foyofoc

Juyic wadwa giwinjiri nenedi pi Odi lembang’eya? Nyamego Cheryl mi ng’om mi Philippines, uyero kumae: “Abed amaru nicaku dhu riyo para ma kubang’ ceng’ ku somo lembang’eya iwi dilo pa Yehova man iwi dhanu pare.”

Jusom mwa ma pol giweco pi tung’ tung’ m’utie i kind Odi lembang’eya mi jw.org ku lembang’eya mi media mange. Tatiana mi ng’om mi Kazakhstan, uyero kumae: “Atie ku foyofoc nia aromo geno lembang’eya mi jw.org, kum etie ma jugeno man mandha.” Nyamego moko ma nyinge Alma mi ng’om mi Mexique uyero kumae: “Ka juporo lembang’eya ma swa ma e ma nyotho wi dhanu ku Odi lembang’eya mi jw.org, junwang’u nia Odi lembang’eya lundo tielocwinyjo mi tuko ngo.”

Jugeno ngo Odi lembang’eya agena kende; ento bende etie ma teng’o yiyoyic. Bernard mi ng’om mi Kenya uyero kumae: “Odi lembang’eya konya nineno umego ku nyimego mi wang’ ng’om zoo calu wat para ma ndhe, m’umbe nidieng’ pi kaka ma gikwo i iye. Atie ayika nikwanu nying’gi man lembe ma gibekadhu kud i iye i rwo para.” Nyamego moko ma nyinge Bybron ma nwang’ere de i ng’om mi Kenya, uyero kumae: “Wang’ ma pol kan aneno thiwiwec iwi Biblia ma jung’iyo iye kendo uwok i dhok mange, abedo kud anyong’a mi tuko ngo! Thiwiwec maeno poyo wiya nia Yehova umbe kud akoyakoya.”

Kadok lembang’eya ma jukoro iwi umego mwa ma jubenyayu ragedo i kumgi de copo tielo cwinywa. Jackline mi ng’om mi Kenya uyero kumae: “Niparu pi tegocwiny ma gibenyutho udwoko yiyoyic para tek mandha. Wang’ ma pol abed aii ning’eyo nia ang’o ndhe ma bekonyogi niciro. E anwang’u nia gin ma bekonyogi utie lembe ma ‘thindho’ ma calu ve rwo, somo Biblia, man kadok wer; eno gire m’utie lembe m’ubekonyo umego mwa nicungo ma tek.”

Nyamego moko ma nyinge Beatriz mi ng’om mi Costa Rica ufoyo lee dit ku lembang’eya m’uweco iwi lembe ma timere i saa mi peko ma wok rek. Eyero kumae: “Odi lembang’eya uketho aneno kite ma dilo mwa pong’o ko yeny mir umego ku nyimego mwa m’umbe galu, cuu mandha, man i ayi mi mer mi tuko ngo. Eno uketho ayiyo andha nia eni utie dilo pa Yehova.”

Etie iwa anyong’a ma rukani ninwang’u lembang’eya iwi umego ku nyimego mwa mi wang’ ng’om zoo! Nwang’u lembuno cicopere ngo m’umbe giramiya mwu pi tic mi wang’ ng’om zoo, ma m’i kindgi ma pol umiyere nikadhu kud i kite ma nwang’ere i donate.jw.org. Wafoyo lee dit pi giramiya peri ma ku berocwiny.