Wer ma ketho wacoro ceng’ini ku Mungu

Mizik utie giramiya ma ber mi tuko ngo m’uai i bang’ Yehova. Etie kud atelatela ma lee iwi paru mwa, eromo wilo kite mwa, man eromo yawu kumwa. Eno tie tap lembe m’urombo ku wer mwa ma segi. I andha, wer maeno giromo timo lembe dupa nisagu, niwacu giromo ketho wacoro ceng’ini ku Yehova.

Niai i oro 2014, juwodho wer ma segi ma kadhu 70, man kawoni dong’ i dhok ma kadhu 500, junwang’u werne moko acel kokoro. Re nyo ibed ipenjiri nia ‘ng’a ma timo tic iwi wer maeno, man juwodhogi ke nenedi?’

Kite m’umego giyiko ko werne

Ju ma wodho wer ma segi utie ungu mi mizik ma timo tic m’uneno piny ma winja man manena, ma ticne ke gitime i the telowic pa Komite mi ponji mi Guriri m’utelowic. Ungu mi mizikne uketho i iye umego ku nyimego 13 ma gikonyo pi nithungo werne, niwodhe, niyiko dwal, man nitimo lembe mange ma pigi tek. M’umedo maeno, Komite mi ponji uyiyo nia dhanu ma gimiyiri ku berocwinygi ma gitimo niai kud i pacu migi de gidik cing’gi i tic maeno. Dhanu ma gimiyiri gigi mi wang’ ng’om zoo uketho i iye juthung wer, jugoy mizik, man juruwer. Umego ku nyimego maeno gitiyo ku bodho migi ku jwigiri, man giyenyo ngo nia jumii igi yung pi tic ma gibetimo.

Juwodho wer ma segi nenedi? Mi kwong’o, Komite mi ponji ng’iyo giragora ma werne bicungo i wiye, man kite ma ju ma biwinjo werne gibiwinjiri ko. Ju ma timo i ungu mi mizik dok dwoko ticne i bang’ juthung wer, man jukiew wec mi werne. M’umedo maeno, jumaku werne moko pi nipime. Komite mi ponji neno i nyathi wer ma jupimone, man emiyo paru moko m’ukwayere pi niyike nisagu. I ng’eye, ju ma timo i ungu mi mizik dok yike dong’ ma cuu mandha man gimake wang’ ma tokcen. Jumaku wer maenogi i kabedo ma tung’ tung’, m’uketho i iye i Bethel, man i pacu mir umego ma gitiye ku jamtic m’ukwayere pi nimaku dwal.

Pi nithungo man nimaku wer ma segi, umego mwa gitiyo kud ayi program ma tung’ tung’ mi ordinater. Bende, ticne kwayu jamtic dupa ma tung’ tung’ mi mizik, calu ve macin mi jebo man mi wodho dwal, mi medo dwal man mikro. Mikro acel copo camu dolar ma niai 100 nitundo dolar 1 000 (U.S). I oro 2020, watiyo ku dolar 116 000 (U.S.) pi ning’iewo jamtic mi maku mizik.

Jutimo tego ma rukani pi nigwoko sente? Kakare nicoko ungu ma dit mi mizik i Bethel, ju ma dupa m’i kind dhanu ma gimiyiri ku berocwinygi gitimo niai kud i pacu migi. M’umedo maeno, kakare ma nia jucok juruwer dupa gibin ku kumgi pi nimaku dwandgi, umego mwa githungo werne man giwodho mizik ma nwang’u gibetiyo ko ku program mi ordinater.

“Wer maeni udwoko yiyoyic para tek”

Umego ku nyimego gimaru nibewinjo wer ma segi. Tara, ma kwo i ng’om mir Allemagne uyero kumae: “Kinde ma kan atie kud adieng’acwiny, wer maeno juko cwinya. Niwinjo werne i dhok para mir anyoli, ketho awinjara ve Yehova ubegwaka.” Umego moko ma nyinge Dmitry mi Kazakhstan uyero kumae: “Amaru niwinjo wer maenogi man abedo mbe ku lworo ma nia gicwala nitimo lembe ma rac calu ma wer mi ng’om maeni becwalu ko dhanu. Bende, wer maeno gikonya niketho wiya i kum lembe mi thenge mi tipo.”

Delia, ma kwo i ng’om mir Afrique du Sud, ukoro kite m’ewinjere ko pi wer ma segi eno kumae: “Gidoko ira ni gin ma dwoko yiyoyic para tek. Kinde m’abewinjara ku can kunoke abenwang’ara i wang’ lembe ma tek, wer moko bedo nuti kokoro ma konya ninyego ma ber mandha ku pekonegi. Wang’ ma pol, ndhu nyathi mido mi dwand mizikne ca kende ci, loko kite m‘abewinjara ko wang’acel!”

Wer moko ma segi jumaru lee dit. Lerato, ma kwo bende i ng’om mir Afrique du Sud, uyero kumae: “Wer ma thiwiye tie ‘Eni ceng’ini’ man ‘Ng’om ma nyen m’ubebino’ gikonya nineno kite m’abijolo ko mama m’amaru lee mandha kinde m’ebicer. Saa ceke ma kan abewinjo wer maenogi, aneno ve mama uberingini m’eyaru bote ebegwaka ko.”

Wer ma segi moko acel ubino ku kony lee mandha ni aradu moko mi ng’om mi Sri Lanka. Eyero kumae: “Japonjo para mi sians ucaya i wang’ awiya wada mi somo pilembe nia atie Jamulembe pa Yehova. Lewic umaka man akoso gin m’ayer. Kinde m’adok i pacu, mama utielocwinya nia acidh awinj wer ma thiwiye tie ‘Étudier rend fort.’ Werne ukonya nineno nia pire tie tek nitimo sayusac man niyiko jibu. Nindo m’ulubo, adok aweco ku japonjo para. Ewinja man eyero nia kawoni dong’ enyang’ ma ber mandha ikum yiyoyic mi Jumulembe pa Yehova. Afoyo dilo pa Yehova pi wer ma calu maeni ma tielocwinyjo m’ewodho iwa.”

Wanwang’u sente ma watie ku yenyne kani pi niwodho wer maeno zoo? Wanwang’e nikadhu kud i giramiya ma pi tic m’i wi ng’om zoo, ma m’i kindgi ma pol umiyere nikadhu kud i kite ma nwang’ere i donate.jw.org. Wafoyo lee dit pi giramiya peri ma ku berocwiny.