Yesu Kristo Tie Ng’a?

1. Kwo pa Yesu ucaku nenedi?

Tung’ ku dhanu mange ceke mi ng’om, i wang’ ninyolere iwi ng’om, Yesu ubino ng’atu mi kum mi tipo ma ebed ekwo ke i polo. (Yohana 8:23) Ebino acaki mi giracwiya ceke pa Mungu, man egam ekonyo tic mi cwio piny mange ceke. En kende ma Mungu ucwie ku cinge gire, pieno re ma julwong’e “nyodo ma kulong’.” (Yohana 1:14) Julwong’e bende “Lembe” kum ebino Jakok’wec pa Mungu ni giracwiya mange.​—Som Lembrieko 8:22, 23, 30; Jukolosai 1:15, 16.

2. Pirang’o Yesu ubino i ng’om?

Kara Yesu ubin i ng’om, Mungu ting’o kwo pare kud i polo man ekethe i usau-nyodo pa Nyayahudi ma sumba ma nyinge ubino Maria. Pieno, won mandha ubino ngo dhanu. (Luka 1:30-35) Yesu ubino i ng’om (1) pi niponjo lembe mandha iwi Mungu, (2) pi ninyutho iwa lapor i kite ma wacopo timo kudo yeny pa Mungu kadok wanwang’ra ku peko, man (3) pi nimio kwo pare maleng’ ni “jambgony.”​—Som Matayo 20:28.

3. Pirang’o watie ku yeny mi jambgony?

Jambgony kunoke Jambwar tie welpiny ma juculo pi ni wodho ng’atu moko kud i ariti mi tho m’enwang’ere iie. (Ai 21:29, 30) Tho ku tio ubino ngo i lemb’akeca pa Mungu pi dhanu. Pirang’o wayero kumeno? Mungu uyero ni Adamu, ng’atu ma nico ma kwong’a, nia ka ebitimo dubo ci, e ebigam tho. Pieno, ka nang’u Adamu utimo ngo dubo, nang’u etho de ngo. (Thangambere 2:16, 17; 5:5) Nimakre ku Biblia, dubo umondo i ng’om ni kum Adamu. Kumeno re ma nyikwai Adamu ceke ulagu dubo ku sukulia mi dubo pare ne ma ene tho. Pieno, watie ku yeny mi jambgony pi niwodhowa kunoke niwaruwa kud i matira ma walagu kud ibang’ Adamu, niwacu kud i tho.​—Som Jurumi 5:12; 6:23.

Ng’a ma nang’u copo culo jambgony pi nigonyowa kud i tho? Ka watho, waculo sukulia kunoke matira pi dubo mwa giwa kende. Ng’atu moko acel de mbe i kind dhanu ma leng’ ungo ma copo culo jambgony pi dubo mi jumange.​—Som Zaburi 49:7-9.

4. Pirang’o Yesu utho?

Tung’ kudwa, Yesu ubino ng’atu maleng’. Pieno, ecicopre ngo nia Yesu utho pi dubo pare gire kum edubo ngo kadok nyanok de. Ento Yesu utho pi dubo mi jumange. Mungu uoro wode ubin utho piwa, pi ninyutho nia emaruwa lee akeca. Yesu bende unyutho maru pare iwa kum eworo dwand won man ethiero kwo pare pi dubo mwa.​—Som Yohana 3:16; Jurumi 5:18, 19.

5. Yesu ubetimo ang’o kawono?

Kinde ma ebino iwi ng’om, Yesu ukeyo remokum, ecero jum’utho man ekonyo ju m’uneno can. Lembe maeno zoo ubino lanyuth mi gin m’ebitimo i nindo m’ubino ni dhanu ceke ma wor. (Matayo 15:30, 31; Yohana 5:28) Ing’ei tho pa Yesu, Mungu uketho ecer ni ng’atu mi kum mi tipo. (1 Petro 3:18) Yesu udok ukuro ku yor icing Mungu mir acwic ni tundo nindo ma Yehova umio ire copo mi bimo wi ng’om zoo. (Juebrania 10:12, 13) Kawono, Yesu bebimo ipolo calu Rwoth, man julub pare ke uberweyo lembanyong’a iwi lembe maeno i ng’om zoo.​—Som Daniel 7:13, 14; Matayo 24:14.

Ceng’ni eni, Yesu bitio ku copo pare m’etie kudo Rwoth pi nidaru can ceke man nikabu dhanu ceke m’ubenyayu can’ne. Ento dhanu ceke m’unyutho yioyic migi ibang’ Yesu pi niwore, gibikwo kud anyong’a i paradiso iwi ng’om.​—Som Zaburi 37:9-11.