PONJI MI 51
Icopo nyayu mutoro i Yehova nikadh’i wec peri nenedi?
Kinde ma Yehova ucwiyowa, emiyo iwa giramiya moko ma ber akeca, ma en e copo mi weco. Nyo Yehova dieng’ de i kum kite ma wabetiyo ko ku giramiyane? Eyo, edieng’ lee! (Som Yakobo 1:26.) Dong’ wacopo tiyo nenedi ku copo mwa mi weco i ayi ma binyayu mutoro i Yehova?
1. Wacikara nitiyo ku wec mwa nenedi?
Biblia ubekwayuwa kumae: “Wumeduru nitielo cwinywu i kindwu man niteng’uru i kindwu.” (1 Juthesaloniki 5:11) Nyo ing’eyo dhanu moko ma gitie ku yeny mi tielocwiny? Icopo timo ang’o kara giwinjiri ma beri? Keth ging’ey nia pigi tie tek lee i ii. Ku lapor, iromo nyutho igi lembe m’imaru i bang’gi. Nyo iromo paru pi giragora moko m’icopo nitielo ko cwiny ng’atini? Giragora upong’ swa m’iromo tiyo ko. Re poy nia ayi m’ibeyero ko lembe ni ng’atini copo bende nitielo cwinye lee magwei. Pieno, tim kero niweco saa ceke ku molo, ku yoo, man i ayi ma tielo cwinyjo.—Lembrieko 15:1.
2. Wacikara niuro kit wec ma nenedi?
Biblia uyero kumae: “Wec m’utop kud uwok ki kud i dhogwu.” (Som Juefeso 4:29.) Eno nyutho nia wacikara ngo nitiyo ku wec mir acidi, mi ming’ ming’, mir anywar, kadi ninyotho wec ni ng’atini. Wacikara bende niuro kura mi yero nying’ dhanu ma rac.—Som Lembrieko 16:28.
3. Ang’o ma bikonyowa kara wabed waweci i ayi ma gierojo?
Wang’ ma pol, lembe ma wabed waweco pire nyutho gin mandha m’upong’ i adundewa man i paru mwa. (Luka 6:45) Pieno, umaku waii nibeketho paru mwa zoo iwi lembe ma beco, niwacu ‘ma pwe, ma leng’, ma juromo maru, man ma jubeweco pigi ber.’ (Jufilipi 4:8) Kara lembene rombi iwa ke, wacikara ning’iyo jamb nambu, jamb galuwang’ mwa man jurimbwa ku rieko ma lee. (Lembrieko 13:20) Bende, etie ber nia i wang’ niweco, walar wapar cuu i gin ma wabiyero. Lar ipenjiri nia wec peri biketho jumange biwinjiri nenedi. Biblia uyero nia ‘wec ma vur vur e ve cob mi palamularu, ento leb ng’atu ma riek en e leng’kum.’—Lembrieko 12:18.
MED NYANG’ PERI
Wakenen ayi m’ukwayu wabed waweci ko kara wecne unyay mutoro i Yehova man utiel cwiny jumange.
4. Nen ber ku wec peri
Saa moko, wan ceke wabed wayero wec m’i ng’eye, ang’eyang’o dok mondo i iwa nia wayero kumeca pirang’o. (Yakobo 3:2) Som Jugalatia 5:22, 23, man i ng’eye wuwec iwi penji m’ulubo e:
Kara ibed itii ma ber ku wec peri, icopo rwo nia ibed ku kite ma kani i kind ma jukwanu i verse maeni? Kite ma jukwanu eno romo konyi nenedi?
Som 1 Jukorintho 15:33, man i ng’eye wuwec iwi penji m’ulubo e:
Nyo jurimo man ayi galuwang’ ma ng’atini ubeng’iyo copo bedo ku matoke moko iwi kit wec pare? Kekor.
Lembang’o ma copo bedo kud atelatela iwi wec m’ibetiyo ko?
Som Eklizia 3:1, 7, man i ng’eye wuwec iwi penji m’ulubo e:
Saa ma kani m’ukwayu nibedo ling’ kunoke nikekuro i wang’ niweco?
5. Bed iwec ma ber pi jumange
Waromo timo ang’o kara kud wabed watii ku wec ma kiero jumange kunoke niweco rac pigi? Nen VIDEO, man i ng’eye wuwec iwi penji m’ulubo e:
Pirang’o ang’eyang’o umondo i umego mi video maeni pi lembe m’eyero iwi jumange?
Etimo ang’o pi niweko kit wec ma tang’i?
Som Eklizia 7:16, man i ng’eye wuwec iwi penji m’ulubo e:
Wacikara nipoy i kum lembang’o ka waneno nia wabeciyero nying’ ng’atini raci?
Som Eklizia 7:21, 22, man i ng’eye wuwec iwi penji m’ulubo e:
Verse maeni copo konyi nenedi kara kud ikier akeca ka ng’atu moko uweco ma rac ku nyingi?
6. Kud ibed inyoth wec anyotha ni juruot peri
Yehova ubemito nia wabed wawec karacelo ku juruot mwa kunoke jupagiwa i ayi ma ber, ku woro man ku mer. Nen VIDEO, man i ng’eye wuwec iwi penji m’ulubo e:
Ang’o ma bikonyi kara ibed iwec ku woro ni dhanu mi ot peri?
Som Juefeso 4:31, 32, man i ng’eye wuwec iwi penji m’ulubo e:
Waromo tiyo ku kit wec ma nenedi kara juruot mwa giwinjiri ma beri?
Yehova unyutho thwolo thwolo kite m’ebewinjere ko i kum Wode ma Yesu. Som Matayo 17:5, man i ng’eye wuwec iwi penji m’ulubo e:
Ka wabeweco i bang’ juruot mwa man pigi, waromo lubo lapor pa Yehova nenedi?
Nwang’ saa mi befoyo dhanu mange
DHANU MOKO BEYERO KUMAE: “Atie agonya niweco kite m’amaru. Kan imaru ngo wec para, eno molo mogo para ngo.”
Nyo icwaku kit wec m’eno? Pirang’o iyero kumeno?
I ADUNDO
Wec mwa copo konyo jumange kunoke copo timogi rac. Pieno wacikara niparu cuu i lembe ma wamito yero, ning’eyo saa m’anzilo mi yere, man kite ma wabiyere ko.
Penji mi poyowic
Icopo tiyo ku wec peri i yore moko ma kani pi nikonyo dhanu mange?
Wacikara niuro kwond wec ma nenedi?
Ang’o ma bikonyowa nitiyo saa ceke ku wec ma mit man ma gierojo?
TIM SAYUSAC
Ang’o ma romo konyowa nibetiyo ku wec ma beco?
Nen gin ma copo konyi kara kud ibed itii ku wec ma tang’.
“Nyo etie rac andha nitiyo ku wec ma reco?” (Thiwiwec mi jw.org)
Nen kite m’icopo uro ko uwic mi yero nying’.
Nen ayi ma Yehova ukonyo ko jalwo moko kara ewek nitiyo ku wec ma reco.
“Acaku paru cuu mandha iwi ayi m’abetiyo ko ku kwo para” (Otkur ma Wiw, nindo 1, dwi mir 8, 2013)