Nyo ing’eyo ng’iyo lemandha?

1. Itie ku nen ma kani iwi lemandha?

DHANU pa Yehova gimaru lemandha ma nwang’ere i Biblia. Watuc nigiero yiyoyic mwa i wiye. (Rum. 10:17) Wayiyo ku cwinywa ceke nia Yehova uketho cokiri mi Jukristu ubed ni “mbegi man kathere mi lemandha.” (1 Tim. 3:15) Wajwigara bende kud anyong’a ni “dhanu ma gibetelo [wiwa],” ma gikoro iwa i lemandha mi Biblia man gimiyo iwa tielocwiny m’urombo ku yeny pa Mungu.—Ebr. 13:17.

2. Nimakere ku Yakobo 5:19, ariti ma kani ma romo nwang’uwa i ng’ey ma waponjo lemandha?

² Ento kadok i ng’ey ma wajolo lemandha man wayiyo nia watie ku yeny mi telowic m’ubeai i dilo pa Mungu de asu waromo kier bor. (Som Yakobo 5:19.) Sitani ubemito lee dit nia eketh wabay genogen ma watie ko iwi Biblia kunoke iwi telowic ma wacuku nwang’u niai kud i dilo pa Mungu.—Efe. 4:14.

3. Pirang’o ubekwayu wamok kikiki i kum lemandha? (Juefeso 6:13, 14)

³ Som Juefeso 6:13, 14. Kago eni, Wonabali bitiyo ku propagand ma kwiny pi niwingo wi thek ceke kara gijai i kum Yehova. (Nyu. 16:13, 14) Wang’eyo bende nia Sitani bimedo tego pi niwondo dhanu pa Yehova. (Nyu. 12:9) Pi thelembe maeno re ma pire tie tek lee nia waponj ning’iyo tung’ tung’ m’utie i kind lemandha ku vupo, man waponj niworo lemandhane. (Rum. 6:17; 1 Pet. 1:22) I saa mi masendi ma dit, both mwa bijengere iwi lembe maeno.

4. Wabiweco iwi lembang’o i thiwiwec maeni?

⁴ I thiwiwec maeni, wabiweco iwi kite ario m’ukwayu wabed ko ma copo konyowa ning’iyo lemandha mi Biblia man nijolo telowic m’ucuku ai kud i dilo pa Mungu. I ng’eye wabiweco iwi lembe adek ma copo konyowa kara wamedara nimoko kikiki i kum lemandha.

KITE M’UKWAYU WABED KO KARA WANG’II LEMANDHA

5. Lworo Yehova konyowa nenedi ning’iyo lemandha?

⁵ Lworo Yehova. Tek waponjo nilworo Yehova i ayi m’umaku piny, e wamare lee man wamito ngo watim gin moko acel de ma foyo ngo iye. Wabedo kud ava mi ponjo tung’ tung’ m’utie i kind gin ma ber ku gin ma rac man i kind lemandha ku vupo, kara wanyay anyong’a i iye. (Rie. 2:3-6; Ebr. 5:14) Wacikara ngo niweko lworo mi dhanu usag mer ma wamaru ko Yehova, pilembe wang’ ma pol gin ma foyo i dhanu foyo ngo i Yehova.

6. Lworo mi dhanu uketho judongo ma wijo apar mir Israel giwilo kum lemandha nenedi?

⁶ Tek wabed walworo dhanu nisagu Mungu, e wabikier kud i kum lemandha. Wakewec iwi lapor mi judongo ma wijo 12 ma gicidh gilibo ng’om ma Yehova ung’olo nia ebimiyo ni Juisrael. Julib apar m’i kindgi giweko lworo mi Jukanan usagu mer ma gimaru ko Yehova. Giyero ni Juisrael mange kumae: “Wacopo idho ngo i dhu dhanu nica, pilembe gi tek nisaguwa.” (Wel 13:27-31) I nen mi dhanu, Jukanan gibino tek nisagu Juisrael; ubino de andha kumeno. Ento ng’atu m’uwil ku Yehova re ma romo yero nia ecicopere ngo ni Juisrael niloyo judegi migi. Nwang’u ukwayu julib apar maeno giketh wigi i kum gin ma Yehova ubino kwayu Juisrael gitim. Nwang’u ukwayu bende ginyam i lembe iwi gin ma Yehova uai utimo igi nyanok i wang’e. E kumeno, nwang’u gicinyang’ nia tego mi Jukanan ubino susu ka jupore ku copo ma malu ngbir pa Yehova. Tung’ ku julib maeno ma gikoso yiyoyic, Yocuwa giku Kaleb gimito ginyay anyong’a i Yehova. Giyero ni udul dhanu kumae: “Tek anyong’a unego Yehova i kumwa, ebiterowa andha i ng’ombe man ebimiye iwa.”—Wel 14:6-9.

7. Wacopo medo lworo mwa yor i bang’ Yehova nenedi? (Nen bende cal.)

⁷ Pi nimedo lworo mwa yor i bang’ Yehova, ukwayu saa ceke ma wabemaku yub wabed wapar pi gin ma nyayu anyong’a i iye. (Zab. 16:8) Kinde m’ibesomo kpawa mi Biblia, penjiri kumae: “Ka nwang’u an de abino nuti saa ma lembe maeni ubetimere, nwang’u acimaku yub ma kani?” Ku lapor, kepar nia ibewinjo ku ithi rapor ma rac ma judongo ma wijo apar mir Israel gibemiyo. Nyo iromo yiyo raporne man iweko lworo mi dhanu meki, kunoke nyo mer m’imaru ko Yehova man ava m’itie ko mi nyayu anyong’a i iye re ma citelo yo? Dhanu m’utuk acel zoo mir Israel gituc ungo ning’iyo nia Yocuwa giku Kaleb gibeyero lemandha. Adwogine ubino nia ginwang’u ngo kaka mi mondo i Ng’om mi lembang’ola.—Wel 14:10, 22, 23.

8. Wacikara nitimo tego pi nicego kite ma kani, man pirang’o?

⁸ Jwigiri. Yehova nyutho lemandha ni dhanu ma jwigiri. (Mat. 11:25) Pi niponjo lemandha, watuc nijwigara man wajolo kony mi jumange. (Tic. 8:30, 31) Wacikara nibedo asu ku wang’wa kara ting’iri kud umond i iwa. Ting’iri copo cwaluwa nigeno nia cik mir ukungu mi Biblia man telowic mi dilo pa Yehova usagu ngo paru mwa.

9. Wacopo medara nibedo weg jwigiri nenedi?

⁹ Kara wamedara nibedo weg jwigiri, ukwayu wabed wapoy nia watie gin moko ngo i wang’ dwong’ pa Yehova. (Zab. 8:3, 4) Bende, wabed warwo pi nibedo dhanu ma jwigiri man ma winjo ponji. E kumeno, Yehova bikonyowa nibedieng’ ma kwong’a i kum paru pare ma wacuku nwang’u i Biblia man nikadhu kud i dilo pare. I saa mi som peri mi Biblia, bed isay lembe m’ubenyutho nia Yehova umaru jwigiri ento edagu ting’iri, kulula man kuhaya. Man bed i ii ku kero peri ceke nibedo won jwigiri kinde m’inwang’u rwom moko ma lee.

AYI MA WACOPO MOKO KO I KUM LEMANDHA

10. Yehova utiyo ku jukani pi nimiyo telowic ni dhanu pare?

¹⁰ Mediri nigeno telowic mi theokrasi. I rundi mi Juisrael, Yehova utiyo ku Musa man i ng’eye ku Yocuwa, pi nibemiyo telowic ni dhanu pare. (Yoc. 1:16, 17) Juisrael gibed ginwang’u mugisa saa ceke ma gibeneno dhanu maeno calu juor pa Yehova Mungu. Oro dak swa i ng’eye kinde ma fodi cokiri mi Jukristu ucaku acaka, jukwenda 12 re ma gibed gimiyo telowic. (Tic. 8:14, 15) I ng’eye judong cokiri mi Yeruzalem de umedogi. Woro telowic mi jumaco maeno ma weg yiyoyic uketho “cokiri umediri nidoko tek i yiyoyic man wendgi de uwotho medere kubang’ ceng’.” (Tic. 16:4, 5) I rundi ma tin, wan bende wanwang’u mugisa kinde ma wabeworo telowic mi theokrasi ma dilo pa Yehova ucuku miyo. Yehova romo winjere nenedi tek wakwero niwinjo dhanu m’eng’iyo utel wiwa? Pi nidwoko wang’ penji maeno, wakewecu iwi lembe m’utimere kinde ma Juisrael gibecimondo i Ng’om mi lembang’ola.

11. Lembang’o m’unwang’u dhanu mir Israel ma con ma gicayu Musa ma Yehova ung’iyo utel wigi? (Nen bende cal.)

¹¹ I saa mi woth mi Juisrael ma gibecidho ko i Ng’om mi lembang’ola, dhanu ma pigi yik gikwero Musa man gicayu rwom ma Yehova umiyo ire. Giyero kumae: “Cokiri e ceke tie leng’ [Musa kende ngo], gin pet, man Yehova n’i kindgi.” (Wel 16:1-3) Kadok nwang’u i wang’ Yehova ‘cokiri ceke’ ubino leng’ de, re eng’iyo Musa re m’utel wi dhanu pare. (Wel 16:28) Kinde ma jujai maeno gibino weco rac i kum Musa, eca gibino weco rac i kum Yehova. Giketho ngo wigi i kum yeny pa Yehova, ento i kum yeny migi gigi; gibino sayu gibed ku dito man pigi uyiki lee. Mungu ugoyo jutel wi jaine, man bende dhanu mange elufu swa m’ucwakugi. (Wel 16:30-35, 41, 49) Tin wacopo bedo kud andha nia anyong’a nego ngo Yehova i kum dhanu ma woro ngo telowic mi dilo pare.

12. Pirang’o ukwayu wamedara nigeno dilo pa Yehova?

¹² Ukwayu wamedara nigeno dilo pa Yehova. Kinde m’ubekwayere nia jutim alokaloka iwi kite ma wanyang’ ko i lemandha moko mi Biblia kunoke iwi kite ma tic mi Ker upangere ko, umego ma gi jutelwic gigalu ngo ku timo alokaloka m’ukwayerene. (Rie. 4:18) Gitimo kumeno pilembe gibemito ku kwong’a ginyay anyong’a i Yehova. Gitimo bende kero ma lee pi niketho yub ma gibemaku ujengere iwi Lembe pa Mungu, niwacu iwi ponji ma dhanu pa Yehova ceke gicikiri niworo.

13. “Ponji ma ber” utie ang’o, man wacikara nitimo ang’o?

¹³ “Mediri nimoko i kum ponji ma ber.” (2 Tim. 1:13) “Ponji ma ber” ubenyutho ponji mi Jukristu ma nwang’ere i Biblia. (Yoh. 17:17) Ponji maeno utie ukungu mi yiyoyic mwa ceke. Dilo pa Yehova udaru ponjowa nia wamok i kum ponjine. Saa ceke ma wabetimo kumeno, wabinwang’u mugisa.

14. Jukristu moko gijigo nimoko i kum “ponji ma ber” nenedi?

¹⁴ Ang’o ma romo timere ka wakier bor kud i kum “ponji ma ber”? Pi ninyang’, wakewec iwi lembe m’utimere i rundi ma kwong’a. Awiw moko ubino mew i kind Jukristu moko nia nindo pa Yehova udaru tundo. Copere nia barua moko ma jubino paru nia uai i bang’ jakwenda Paulo re m’uweco iwi lembene. M’umbe nisayu ka nyo awiw maeno ubino lemandha, Jukristu moko mi Thesaloniki giyiye ngbaku, man gicaku kadok nimewe. Ka nwang’u gipoy i kum lembe ma Paulo uponjo kogi kinde m’ebino karacelo kugi, nwang’u gibeweko ngo juwond wang’gi. (2 Thes. 2:1-5) Pieno, Paulo ujuko umego pare nia kud gibed giyii lembe ceke ma giwinjo. Man pi nikonyogi pi macen, edolo dhu barua mir ario m’ekiewo igi ku wec ma e: “Eni tie moth para m’akiewo ku cinga gira an a Paulo, etie bende ayi m’abed aketho ko cinga i the barua para ceke man ayi m’agoro kogi.”—2 Thes. 3:17.

15. Wacopo gwokara nenedi i kum vupo m’ubeyenyo nen ni lemandha? Kemii lapor moko. (Nen bende cal.)

¹⁵ Wec ma Paulo ukiewo ni Juthesaloniki ubemiyo iwa ponji ma kani? Kinde ma wawinjo lembe moko m’urombo ngo ku lembe ma waponjo i Biblia kunoke kinde ma wawinjo awiw iwi lembe moko, ukwayu watii ku ng’iyo i lembe. Ku lapor, i Union soviétique ma con judegi mwa gimiyo ni umego barua moko ma jubino paru nia uai kud i kabedo mwa ma dit. I baruane jubino cwalu umego mwa moko nia gicak the dilo mange ma n’i wiye gire. Baruane ubino nen ni lemandha. Ento umego ma weg yiyoyic giweko ngo juwond wang’gi. Ginyang’ nia lembe ma jukwayu i baruane urombo ngo ku gin ma giponjo. Tin, saa moko judegi mi lemandha gitiyo kud internet pi nisayu yore mi royo jiji i iwa man mi poko kindwa. Kakare ‘niweko juwing wiwa,’ ukwayu wagwokara. Nenedi? Nwang’u wabeng’iyo cuu i lembe ma wawinjo man ma wasomo ka nyo erombo ku lemandha ma wadaru ponjo.—2 Thes. 2:2; 1 Yoh. 4:1.

16. Nimakere ku Jurumi 16:17, 18, wacikara nitimo ang’o kinde ma jumoko gikier kud i kum lemandha?

¹⁶ Mediri nibedo i acel ku dhanu ma gibegwoko bedoleng’ migi ni Yehova. Mungu ubemito watim ire thier i acel. Wabimedara nibedo i acel ke nwang’u wamoko i kum lemandha. Ju ceke ma gibekier kud i kum lemandha ginyayu pokiri i cokiri, uketho Mungu umiyo iwa cimowang’ ma nia ‘wakoc bor kugi.’ Kan ungo, wan de wabikier kud i kum lemandha.—Som Jurumi 16:17, 18.

17. Wanwang’u bero ma kani tek wang’iyo lemandha man wamoko kikiki i kume?

¹⁷ Tek wang’iyo lemandha man wamoko kikiki i kume, wabibedo museme man ku yotkum ma cuu i thenge mi tipo. (Efe. 4:15, 16) Wabibedo agwoka i kum ponji ku propagand ma reco pa Sitani, man Yehova bigwokowa i saa mi masendi ma dit. Dong’ mediri nimoko kikiki i kum gin m’atira, “e Mungu mi kwiyocwiny bibedo karacelo [kudi].”—Filip. 4:8, 9.