Wacopo miyo juk ma cuu nenedi?

1. Ng’a m’ukwayu umii juk? Kekor.

NYO ibed imaru nimiyo juk ni jumange? Dhanu moko gimaru. Jumange lundo gilworo nimiyo juk kunoke giwinjiri rac saa ma gibemiye. Ento wan ceke saa moko mito wamii juk. Pirang’o? Pilembe Yesu uyero nia jubing’iyo julub pare mandha nikum mer ma ginyutho i kindgi. (Yoh. 13:35) Yo acel ma wanyutho ko ni umego ku nyimego mwa nia wamarugi ke utie nimiyo igi juk ka gitie ku yenyne. Lembe pa Mungu de uyero nia “mer ma ber” caku kunoke dongo nikum “juk mandha.”—Rie. 27:9.

2. Judong cokiri gicikiri nibedo ku copo mi timo ang’o, man pirang’o? (Nen bende sanduku ma thiwiye tie “Nimiyo juk i saa mi coko m’i kind yenga.”)

² Asagane ukwayu judong cokiri re ma gibed gimii juk ma cuu ni jumange. Nikadhu kud i bang’ Yesu, Yehova ung’iyogi pi nigwoko rombe mi cokiri pare. (1 Pet. 5:2, 3) Acel m’i kind yo ma gitimo ko kumeno utie nikadhu kud i juk m’ujengere iwi Biblia ma gimiyo i saa mi korolembe migi. Gicikiri bende nimiyo juk ni rombeman acel acel, kadok ni ju m’uweko dwol, niwacu ju m’uweko Yehova, kara gidwog i cokiri. Dong’ judong cokiri ku jumange ceke mi cokiri gicopo miyo juk ma cuu nenedi?

3. (a) Wacopo timo ang’o pi nibedo jumii juk ma cuu? (Isaya 9:6; nen bende sanduku ma thiwiye tie “Lub lapor pa Yesu kinde m’ibemiyo juk.”) (b) Wabineno ang’o i thiwiwec maeni?

³ Pi nibedo jumii juk ma cuu, wacopo nwang’u ponji lee i lapor mi dhanu ma juweco pigi i Biblia, asagane Yesu. Kud i kind nying’ mi dito ma jumiyo ire, moko tie “Jamii juk ma wang’u ijo.” (Som Isaya 9:6.) I thiwiwec maeni, wabineno gin ma wacopo timo ka jukwayu juk i bang’wa, man gin ma wacopo timo kan ubemito nia wamii juk ma jukwayuwa ngo. Wabineno bende nia pirang’o pire tie tek nimiyo juk i saane man i ayi ma cuu.

KA JUKWAYU JUK I BANG’WA

4-5. Ka ng’atu moko ukwayu juk i bang’wa, ubemito wakewapenjara ku penji ma kani? Kemii lapor moko.

⁴ Ka ng’atu moko ukwayu juk i bang’wa, ubemito watim ang’o? Waromo paru nia egenowa man waromo mito nia wakonye ndhu ndhu. Ento ukwayu wakepenjara kumae: ‘Nyo andha aromo nimiyo juk i lembe maeni?’ Saa moko ayi ma ber m’usagu zoo ma wacopo konyo ko ng’atini utie nimiyo ngo ire juk ento niore i bang’ ng’atu m’ung’eyo cuu lembe m’ebenwang’ere ko.

⁵ Kepar nia jarimbi moko ma ceng’ini utie ku twoyo moko ma pek. Ekoro iri nia ebesayu kit thieth ma copo konye man ekweyi nia in de ikemii paru peri iwi lembene. Andha iromo maru kit thieth moko lee, re kan itie ngo munganga man iponjiri ngo iwi ayi mi thiedho kit twoyo parene, yo ma ber m’usagu zoo utie nikonye enwang’ ng’atu ma cuu ma romo konye.

6. Pirang’o romo kwayu wakekur i wang’ nimiyo juk?

⁶ Kadok nwang’u wabeparu nia waromo nimiyo juk iwi lembe moko de, re saa moko eromo bedo ber nia wakewek kare moko ukadhi i wang’ niweco. Pirang’o? Lembrieko 15:28 uyero nia “ng’atu ma pwe nyamu i lembe i wang’ nidwoko lembe.” Dong’ ka wabeparu nia wang’eyo wang’ penjine ke? Asu romo kwayu wating’ saa moko pi nitimo sayusac, nirwo man ninyamu i lembe. E kumeno, juk ma wabimiyo birombo ku paru pa Yehova iwi lembene. Wakenenu lapor pa jabila Nathan.

7. Lapor pa jabila Nathan ubemiyo iri ponji ma kani?

⁷ Saa moko kinde m’Ubimo Daudi ubino weco ku jabila Nathan, enyutho ire nia ebemito egier hekalu ni Yehova. Nathan ucwaku paru pare ndhu ndhu. Re nwang’u ukwayu elar epenj Yehova. Pirang’o? Pilembe Yehova ubino mito ngo nia Daudi re m’ugier ire hekalu. (1 Kei. 17:1-4) Calu ma lapor maeni ubenyutho, ka jukwayu juk i bang’wa etie ngo lembe mi rieko niweco “m’umbe niparu i lembe.”—Yak. 1:19.

8. Ukwayu wabed ku wang’wa kinde ma wabemiyo juk pi thelembe mange ma kani?

⁸ Thelembe mange m’ubenyutho nia mito wabed ku wang’wa ka wabemiyo juk ni ng’atu moko utie nia theng kosa moko bibedo i wiwa ka juk ma wamiyone ukelo matoke ma rac. M’umbe jiji, pire tie tek lee nia wabed wapar i lembe kilili i wang’ nimiyo juk.

KA JUKWAYU NGO NIA WAMII JUK

9. I wang’ nimiyo juk ni ng’atu moko, ukwayu judong cokiri gilar ginyang’ cuu i kum ang’o? (Jugalatia 6:1)

⁹ Saa moko kwayu judong cokiri gimak yub mi miyo juk ni umego kunoke nyamego moko m’ukwanyu “yo ma rac.” (Som Jugalatia 6:1.) Nyathi korolembe m’iwi verse maeni uyero nia ng’atu ma kumeno “umaku gengi ma rac, kadok nwang’u fodi nyo epodho ngo i dubo ma pek de.” Lembakeca mi judong cokiri utie nikonye kara emedere niwotho i yo ma terojo i kwo ma rondo ku rondo. (Yak. 5:19, 20) Kara juk migi ukel adwogi ma ber, ukwayu gilar ginyang’ cuu nia andha ng’atune ukwanyu yo ma rac. Kud giwil nia Yehova uweko ng’atuman m’i kindwa ubed umak yub nimakere ku pidocwiny pare gire. (Rum. 14:1-4) Dong’ kan andha umego moko ukwanyu yo ma rac man judong cokiri ging’iyo nia mito gimii ire juk ke?

10-12. Ukwayu judong cokiri gitim ang’o ka gibemiyo juk ni ng’atu m’ukwayu ngo? Kemii lapor moko. (Nen bende cal.)

¹⁰ Ebedo yot ungo ni judong cokiri nimiyo juk ni ng’atu m’ukwayugi ngo. Giromo nwang’iri ku peko ma kani? Jakwenda Paulo uyero nia ng’atu moko romo kwanyu yo ma rac m’enyang’ ungo. Pieno ka jumiyo ire juk, saa moko ecopo nyang’ ungo i thelembe mi jukne. Dong’ ukwayu judong cokiri gilar gikony ng’atune ubed ayika nijolo juk.

¹¹ Nimiyo juk ni ng’atu m’ukwayu ngo ubedo ve nipidho kodhi i ng’om m’utal. I wang’ nicoyo kodhi i iye, jarafur caku ku goyo iye. Eno ketho ebedo ayika pi kodhi. I ng’eye, jarafur coyo kunoke epidho kodhi pare. Tokcenne, ekwoyo pii kara kodhi utwii ma ber. Kumeno bende, i wang’ ma jadit cokiri umii juk ni ng’atu moko m’ukwayu ngo, etie ber nia elar etim lembe moko kara ng’atune ubed ayika niwinjo juk pare. Ku lapor, mito ekur saa ma ber pi niweco kude, enyuth ire nia ebedieng’ kude man nia etie ku lembe moko m’ebemito giwec i wiye. Tek jung’eyo jadit cokirine ni ng’atu ma nyutho mer man ma timo bero ni jumange, ebibedo yot ni jumange nijolo juk pare.

¹² Saa ma gibeweco, kwayu jadit cokiri umedere niyiko i ng’om, niwacu enyuth nia eng’eyo nia dhanu zoo timo kosa man nia saa moko gibedo ku yeny mi juk. (Rum. 3:23) E ku yoo man ku woro ma dit, eromo nyutho thwolo thwolo nimakere ku Lembagora kite ma ng’atune ukwanyu ko yo ma rac. Kan umegone uyiyo nia andha ekier, jadit cokiri romo “coyo kodhi,” niwacu eromo koro ire i ayi ma yot gin m’ukwayu etim pi niyiko lembene. Tokcenne, “ebikwoyo pii” iwi kodhi m’ecoyo, niwacu ebifoyo umegone lee mandha man ebirwo karacelo kude.—Yak. 5:15.

13. Judong cokiri gicopo timo ang’o pi ninyang’ nia ng’atu ma gimiyo ire juk unyang’ cuu i jukne?

¹³ Saa moko, lembe ma jamii juk ubeyero ku lembe ma ng’atu ma jubemiyo ire juk ubewinjo bedo lembe ario m’ukoc. Judong cokiri gicopo timo ang’o kara lembuno kud uwoki? Giromo penjo ng’atune ku penji mi rieko re ku woro. (Ekl. 12:11) Dwokowang’ lembe pare bikonyo jamii juk ninyang’ ka nyo andha enyang’ i juk ma jumiyo ire.

NIMIYO JUK I SAANE MAN I AYI MA CUU

14. Nyo ukwayu wamii juk kinde ma ng’eicwiny umakuwa? Kekor.

¹⁴ Wan ceke watie ku dub’alaga, pieno saa moko wayero kunoke watimo lembe ma kiero jumange. (Kol. 3:13) Lembe pa Mungu de uyero nia saa moko waromo ketho ng’eicwiny maku jumange. (Efe. 4:26) Ento wacikara ngo nimiyo juk kinde ma ng’eicwiny ubethukini i iwa. Pirang’o? Pilembe “ng’eicwiny pa dhanu timo ngo bedopwe pa Mungu.” (Yak. 1:20) Ka wabemiyo juk ku ng’eicwiny i iwa, wabinyotho lembe anyotha kakare niyike ayika. Re eno ubenyutho ngo nia wacikara ngo ninyutho paru mwa man kite ma wabewinjara ko ni ng’atu m’unyayu ng’eicwiny i iwa. Ento wacopo weco ma ber ka wakewakuro kumwa ukwiyo. Lapor pa Elihu m’umiyo juk ma ber ni Yob, copo miyo iwa ponji moko ma pire tek.

15. Lapor pa Elihu ubemiyo iwa ponji ma kani? (Nen bende cal.)

¹⁵ Elihu ukuro nindo ma lee kinde m’ebewinjo kite ma Yob ubecero ko bang’e i wang’ adote mi jurimbe m’ubino juko cwinye i ayi ma cuu ngo. Kisa unego Elihu i kum Yob. Ento en de ng’eicwiny umake pilembe Yob ucwayu vupo iwi Yehova man ebino cero kwa bang’e gire. Re kadok kumeno de, Elihu ukuro nitundo ma wec uwok i wiye man eweco de ku molo man ku woro ma thuc kinde m’ebemiyo juk ni Yob. (Yob 32:2; 33:1-7) Lapor pare ubeponjowa ku lemandha ma pire tek lee ma e: Juk wok ber ka jumiye i saane man i ayi ma cuu, niwacu ku woro man ku mer.—Ekl. 3:1, 7.

MEDIRI NIMIYO JUK MAN NIJOLO JUK

16. Zaburi 32:8 ubeponjowa ku lembang’o?

¹⁶ Giragora ma thiwiwec mwa ucungo i wiye uyero nia ‘Yehova miyo iwa juk ma nwang’u wang’e n’i wiwa.’ (Som Zaburi 32:8.) Eno ubenyutho nia kony m’ekonyo kowa cok ungo. Emiyo iwa juk amiya kende ngo, ento ekonyowa bende nitiyo kude. Ukwayu wan de walub lapor pare. Ka wanwang’u rwom mi miyo juk ni jumange, ukwayu wang’wa umedere nibedo i wigi man wamii igi kony ma gitie ku yenyne kara gitii ku jukne ma ber.

17. Ka judong cokiri gibemiyo juk ma tap man m’ujengere iwi Biblia, ginyutho nia gitie ve ang’o? Kekor. (Isaya 32:1, 2)

¹⁷ Kawoni re ma watie ku yeny mi miyo man mi jolo juk nikadhu m’i wang’e zoo. (2 Tim. 3:1) Judong cokiri ma miyo juk ma tap man m’ujengere iwi Biblia gitie ve “kulo m’umol i ng’om langa.” (Som Isaya 32:1, 2.) Jurimbwa ma ging’eyo gin ma wabemito wawinji ma re giyero iwa gin ma watie ku yeny mi winjo, gimiyo iwa giramiya ma valerne lee calu “pom mi mola ma kwar i ajeni mi mola ma tar.” (Rie. 25:11) Wek wan ceke wamedara niponjo nibedo ku rieko ma watie ku yenyne pi nimiyo man nijolo juk ma ber.