Biblia uyero lembang’o iwi ciko rimo?

Lembe ma Biblia udwoko

Biblia ung’olo nia wacikara ngo nicamu rimo kadok nicike i kumwa. Pieno, wacikara ngo nicamu rimo, man niyio nia judwok rimo i kumwa kunoke thenge ma dongo mi rimo. Kenen lembe ma giragora ma tung’ tung’ m’ulubo e uyero:

• Thangambere 9:4. I ng’ei pii m’uumo ng’om, Mungu uyio ni Noa ku juruot pare nia gicak camu ring’o ento ekwero igi nia kud gicam rimo. Mungu uyero igi kumae: “Ento ring’o ku kwone, ma en e rimone, kud wucam.” Niai i rundi maeca nitundo tin, dhanu ceke gicikiri niworo cik maeno pilembe wan ceke watie nyikwai Noa.

• Lembe mi Julawi 17:14. “Kud wucam rimo mi ring’kum moko ki; kum kwo mi ring’kum ceke ene rimone: ng’atu ma tek ucame jubikabe woko.” Mungu neno rimo ni kwo man etie pare. Kadok nwang’u Mungu umio cik maeno ni thek mir Israel de, re cikne ubenyutho nia i wang’e, pire tie tek lee dit niworo cik m’emio iwi camu rimo.

• Tic mi Jukwenda 15:20. ‘Wuceruru . . . kum rimo.’ Mungu umio ni Jukristu cik ma rom m’elar emio ni Noa. Lembatada unyutho nia Jukristu mi rundi ma kwong’a gibed gicamu ngo rimo man gibed gitio ngo kude pi thieth.

Pirang’o Mungu ung’olo iwa nia wacerara i kum rimo?

Ju ma neno lembe mi leng’kum ginwang’u nia ciko rimo tie kud ariti lee. Ento thelembe ma pire tek m’uketho Mungu ung’olo iwa nia wacerara i kum rimo utie pilembe rimo nyutho kwo, ma tie gin ma pire tek mandha i wang’e.​—Lembe mi Julawi 17:11; Jukolosai 1:20.