Pirang’o Jumulembe pa Yehova gilwong’o ngo ot ma gicokiri i iye nia kanisa?

I Biblia, saa moko wec mi dhu Jugiriki ma juloko nia “kanisa,” nyutho ungu mi dhanu moko ma gibeworo Mungu ento ungo ot ma gicokiri i iye.

Kenen lapor ma e: Kinde ma Paulo ubino kiewo barua pare ni Jukristu mi Roma, ecwalu moth pare ni won ot moko ma nyinge Akila ku min ot pare Prisila man emedo kumae: “Wumoth bende cokiri ma n’i ot migi.” (Jurumi 16:5) Paulo ubino ngo ku paru mi cwalu moth pare ni ot ma jugiero. Ento ebino cwalu moth pare ni dhanu niwacu ju ma gicokiri i ot nica.a

Eno re m’uketho kakare nilwong’o ot ma wacokara i iye nia kanisa, watiyo ku wec ma nia “Ot Ker.”

Pirang’o julwong’o nia “Ot Ker mi Jumulembe pa Yehova”?

Lwong’o maeno urombo ma ber mandha ku thelembe ma e:

• Giedo maeno utie ot, kunoke kabedo ma jucokiri i iye.

• Wacokara pi niworo Yehova, Mungu ma nyinge nwang’ere i Biblia man watuco kunoke wayero pire.​—Zaburi 83:18; Isaya 43:12.

• Wacokara bende pi niponjo pi Ker pa Mungu, ma Yesu de ubed uweco pire wang’ ma pol.​—Matayo 6:9, 10; 24:14; Luka 4:43.

Itie ajola pi nicidho liewo Ot Ker ma ceng’ini kudi man nineno ku weng’i kite ma Jumulembe pa Yehova gitelo ko wi coko migi.