Nyathin ma jung’olo pire

Yosefu giku Maria gidong’ i Bethlehem kakare nidok i Nazareti. Kinde ma Yesu udaru nindo abora ing’ei nyoliri pare, jutimo yaa ikume calku Cik ma Mungu umio ni nyithindho mir Israel. (Lembe mi Julawi 12:2, 3) I nindo marom eca re ma jubed jucaku ie nying’ nyathin ma nico. E gicaku nying’ wodgi Yesu calu ma malaika Gabriel ular uyero.

Ing’ei dwi acel ku wie, Yesu udoko ku nindo 40, niai ma junyole. Junyodo pare kawoni gitere kani? Gitere i hekalu i Yerusalem. Pi nitundo kuca i hekalu, gitimo kilometre ma nyanok kende niai i bang’gi. Cik uyero nia ka dhaku moko unyolo nyathin, ing’ei nindo 40, ecikere nitero lam mi dwokiri leng’ pire i hekalu.​—Lembe mi Julawi 12:4-8.

Maria de utimo kumeno. Pi nithiero lamne, etero winyo ma thindho ario. Lembuno ubeketho wanyang’ ikum jukupiny ma Yosefu giku Maria gibino ko. Nimakere ku Cik, jucikiri nithiero nyog urombo ma oro pare acel kunoke winyo. Ento ka min nyathin ne umbe ku copo mi nwang’u nyog urombo, eromo nithiero akuru nyathuk ario kunoke amam ario. Eno tap gin ma Maria de uthiero.

Kinde ma Yosefu giku Maria gitundo i hekalu, ng’atu moko m’utii ubino i bang’gi. Nying’ ng’atune tie Simeon. Mungu ular unyutho ire nia iwang’ tho pare, ebineno Kristu kunoke Masiya ma Yehova ung’olo pire. Ceng’ nica tipo maleng’ pa Mungu utelo wi Simeon nicidho i hekalu, kuca ewok enwang’u Yosefu giku Maria gibedo karacelo ku nyathin migi. E Simeon uwok uting’o nyathinne i kore.

Kinde ma fodi nyathinne nikore, efoyo Mungu, ewacu kumae: “Rwoth, kawono iyio jamiru peri cidh, Calku lembe peri, i kwiocwiny; kum wang’a neno both peri, m’iyiko i nyim wang’ kodhidhanu ceke; en e der mi nyuthonyuth ni Thekdhanumange, man dwong’ mi dhanu peri Israel.”​—Luka 2:29-32.

I Yosefu ku Maria uwang’ lii, kinde ma giwinjo lembe maeno. E Simeon umio mugisa igi man eyero ni Maria nia juketho wode “ni podho ku ai mi dupa i Israel,” man nia can mi lembene bibedo ire ve cob mi palamularu.​—Luka 2:34.

Ng’atu mange bende ubedo nuti saa maeno. Nyinge tie Ana, etie jabila ma dhaku, oro pare tie 84. Ebed eweko ngo nibedo i hekalu. En bende saa maeno ebino ibang’ Yosefu ku Maria, man nyathi Yesu. Ana bende ucaku nidwoko foyofoc ni Mungu man niweco pi Yesu ni dhanu ceke ma gibiwinje.

Kepar kit mutoro ma Yosefu ku Maria gibino ko i hekalu pi lembe maeno! M’umbe jiji, lembe maeno uketho ginyang’ nia nyathin migi utie andha Ng’atu ma Mungu ung’olo pire.