Gang’kidi mi Yeruzalem

I rundi pa Ezra, Jaisrael moko ubino nuti ma nyinge Nehemia m’ubino jatic p’ubimo Artacasta. Ebed ekwo i adhura mi Cucan i ng’om mi Persi. Umin Nehemia moko ugam uai i Yuda man utundo ku kwenda ma rac, eyero kumae: ‘Dhanu ma gidok i Yeruzalem gitie i ariti. Gang’kidi man dhugang’ mir adhura ma dhanu mi Babeli unyotho fodi jugierogi ngo kendo.’ Can umondo i Nehemia, uketho emito ecidh i Yeruzalem pi nikonyo tic. Pieno, erwo kara ubimo romo yiyo nia ecidhi.

I ng’eye ubimo uneno Nehemia ubedo ku can. Ewacu ire kumae: ‘Fodi nwang’u aneni ngo m’itie ku can kumeni. Lembang’o ma rac?’ Nehemia udwoko ire kumae: ‘Aromo bedo ku can ungo ke m’adhura mwa mi Yeruzalem udong’ ni uvuru?’ E ubimo upenje kumae: ‘Ibemito atim iri ang’o?’ Ndhu ndhu nica, Nehemia urwo yor i iye. E edwoko kumae: ‘Timba wek acidh agier kendo gang’kidi mi Yeruzalem.’ Ubimo Artacasta uyero ni Nehemia nia ecopo cidho, man emaku yub kara jugwok Nehemia i woth pare ma bor maeno. Egam eketho Nehemia ni jabim mi Yuda man emiyo ire bende bau mi guro dhugang’.

Kinde ma Nehemia utundo i Yeruzalem, eliewo gang’kidi mir adhurane. I ng’eye, ecoko julam ku jubim karacelo man ewacu igi kumae: ‘Eni tie lembe ma rac dit; mito waceku tic.’ E dhanu ceke ucwaku parune man gicaku tic mi giero kendo gang’kidi.

Ento jumoko m’i kind judegi mi nyithindho mir Israel gicaku nywarugi kumae: ‘Kaki kunoke nzer de copo rwombo gang’kidi ma wubegiero no.’ Jurugiedo gikwanu ngo ku wec maeno mir anywar, ento gimediri ku tic. Gang’kidi uidho malu man ebino ma tek.

Judegine gipangu nia gibiai kud i ng’ete ma tung’ tung’ man gibiloy ku lwiny mbwang’ iwi Yeruzalem. Kinde ma Juyahudi giwinjo pi gamba ma jubecamu i kumgi, lworo umakugi ma rac. Ento Nehemia uwacu igi kumae: ‘Lworo kud unegwu. Yehova ni kudwa.’ Eketho jukur pi nigwoko jutic, e judegi migi ubino mbe ku copo mi kelo lwiny i wigi.

Pi nindo 52 kende ci, gang’kidi ku dhugang’ne ugam uthum. Nehemia ulwong’o Julawi ceke gibin i Yeruzalem pi nithiero gang’kidine ni Yehova. Ekethogi i ungu ario ma tung’ tung’ mi juruwer. Gigam giidho gang’kidi ku wi mangasi mi dhugang’ ma ni kum pii ma dhenyini man giwotho pi nidhoko adhura; jumoko gicidho yor i ng’ete acel, jumange ke yor i ng’etene ma kucelo. Gikudho agwara, gigoyo vul kud adungu man giwer ni Yehova. Ezra uwotho kud ungu acel man Nehemia ke uwotho kud ungu ma kucelo nitundo gicidh girombo i hekalu. Dhanu ceke, niwacu jumaco, jumamon man awiya githiero lam ni Yehova man gitimo foc. Mutoro ma gibino ko uketho giwer man dwandgi uwinjere bor.