PONJI MI 39
Ubimo ma kwong’a mir Israel
Yehova umiyo jupoklembe pi nitelo wi nyithindho mir Israel, ento gimito emii igi ubimo. Giyero ni Samwel kumae: ‘Thek m’utwodowa ceke gitie ku jubim. Wan de wabemito ubimo.’ Samwel unwang’u nia gitimo rac ma gikwayu ubimo, e erwo i bang’ Yehova iwi lembene. Yehova uwacu ire kumae: ‘Dhanu gikwero in ungo, ento gikwero an. Yer igi nia abimiyo igi ubimo, re ging’ey nia ubimone bikwayu gitim ire lembe dupa.’ Kadok nwang’u Samwel unyutho lembe maeno igi de, giwacu kumae: ‘Lemoko mbe. Wan wamito mwa ubimo!’
Yehova uyero ni Samwel nia ng’atu moko ma nyinge Saul re ma bibedo ubimo ma kwong’a. Kinde ma Saul ucidho niliewo Samwel i Rama, Samwel uwok ukonjo mo i wiye, eno unyutho nia Yehova uwire kara edok ubimo.
I ng’eye, Samwel ucoko dhu nyithindho mir Israel pi ninyutho igi ubimo migi ma nyen. Re jusayu Saul kpe. Nyo ing’eyo nia pirang’o jugam jusaye kpe? Pilembe epondo i kind ter. Kinde ma junwang’u Saul, jutere i kind dhanu man juketho ecungo i diere. Saul udongo ma bor nikadhu dhanu ceke, man ebino leng’. Samwel uwacu ni dhanu kumae: ‘Wunen ubimo ma Yehova ung’iyo.’ E dhanu gikok kumae: ‘Ubimo kwo nja!’
Ku kwong’a, ubimo Saul ubed uworo lembe ma Samwel ubeyero, man ebed eworo Yehova. Re i ng’eye Saul udok ulokere. Ku lapor, nindo moko Saul uthiero lam ma ke nwang’u eno ubino ngo tic pare. Samwel ular uwacu nia ekure cil m’ebitundo; ento calu m’ebino galu, Saul uthiero lam en gire. Samwel utimo ang’o saa m’etundo? Ewacu ni Saul kumae: ‘Nwang’u icikiri niworo dwand Yehova.’ Nyo Saul unwang’u ponji i kum kosa pare?
Nindo moko i ng’eye, saa ma Saul ubecikiedo lwiny i dhu Juamalek, Samwel uwacu ire nia ewok eneggi pet. Ento Saul ung’iyo nia kwayu ngo eneg ubimo Agag. Yehova uyero ni Samwel kumae: ‘Saul uweka, man eworo ngo lembe m’ayero.’ Can ugam umondo lee mandha i Samwel, man ewacu ni Saul kumae: ‘Calu m’ikwero woro Yehova, ebing’iyo ubimo mange.’ Kinde ma Samwel umito cidho, Saul umaku dhu bongu pare, e bongu pa Samwel uyec i cinge. Samwel uwacu ni Saul kumae: ‘Tap calu ma bongu maeni uyec, Yehova umayu ker kud i beng’i.’ Nwang’u Yehova ubecimiyo ker ni ng’atu mange ma bimare man biwore.
“Woro ber ma sagu lam.”—1 Samwel 15:22