Pirang’o Jumulembe pa Yehova gitiyo ngo ku musalaba pi niworo Mungu?

Dhanu dupa giparu nia, i wang’ ng’om zoo gin ma nyutho nia ng’atini utie Jakristu utie musalaba. Kadok nwang’u wa Jumulembe pa Yehova watie Jukristu de, re watiyo ngo ku musalaba pi niworo Mungu. Pirang’o?

Thelembene acel utie nia Biblia unyutho ya junego ngo Yesu iwi musalaba, ento iwi yen. M’umedo maeno, Biblia ucimo wang’ Jukristu ku tego nia ‘kud girwo ni ayi gin m’acwiya,’ eno utie bende ku thelembe ma nia kud gitii ku musalaba pi niworo Mungu.​—1 Jukorinto 10:14; 1 Yohana 5:21.

M’usagu zoo, Yesu uyero kumae: “Ni kum lembe maeni dhanu ceke bing’eyo nia wu julubna, tek wumeruru i kindwu.” (Yohana 13:34, 35) Ku wec maeno Yesu unyutho nia, utie ngo musalaba kunoke cal moko re ma biketho jubing’iyo julub pare mandha, ento utie mer ma cwalu ng’atini nikethere kaka jumange.