Biblia uyero lembang’o iwi theyo kiedo?
Lembe ma Biblia udwoko
Biblia uweco pi theyo kiedo i kumjo wang’ acel kende i buku mi Lembe mi Julawi 19:28, eyero kumae: “Kud wuthei ayi i kumwu.” Mungu umiyo cik maeni ni nyithindho mir Israel kara gibed tung’ ku dhanu m’udhokogi, ma gibed gikubo nying’ mungu m’aranga migi kunoke ayi mi mungune i kumgi. (Poi mi cik 14:2) Kadok nwang’u Jukristu gimbe i the Cik ma jumiyo ni nyithindho mir Israel de, re pire tie tek ning’iyo i cik mir ukungu m’uketho jumiyo Cik maeno.
Nyo Jakristu romo ketho juthey kiedo kunoke cal moko i kume?
Giragora m’ulubo e romo konye niparu i lembe cuu:
“Jumamon gicikiri nikendo kendi ma . . . cuu.” (1 Timoteo 2:9) Cik mir ukungu maeni ugwaku kum jumamon ku jumaco ceke. Wacikara niworo pidoic mi dhanu mange, man wacikara ngo nitelo nen mi dhanu i ayi m’umaku piny ungo i wiwa giwa.
Jumoko giketho kiedo kara jung’eygi kunoke pi ninyutho nia gitie agonya, jumange lundo giketho kiedo i kumgi pi ninyutho nia gitie rwoth iwi kumgi. Ento, Biblia ubecwalu Jukristu kumae: “Wuthier kumwu ubed calu lam ma kwo, ma leng’ man ma Mungu yiyo; man wutii ku copo mwu mi paru i lembe pi nitimo ire.” (Jurumi 12:1) Tii ku ‘copo peri mi paru i lembe’ pi ning’iyo cuu nia pirang’o imito juketh kiedo i kumi. Kan utie pilembe ibelubo tok lembe moko m’utundo ma nyen kunoke imito inyuth nia itie acel m’i kind ungu moko, poi nia kite m’iwinjiri ko saa maeni bikadhu akadha ento kiedo ma jubeketho i kumi bidong’ pi njaa. Ning’iyo cuu i thelembe m’ubecweli romo konyi nitimo ng’iyong’ic mi rieko.—Lembrieko 4:7.
“Pidoic mi ju ma kud amora ni yo kum udul piny kende; ento ku ba dhanu ceke ma ting’o lembe vur vur etundo kum canpiny kende.” (Lembrieko 21:5) Ng’atini copo maku yub pio pio nia juketh kiedo i kume, ento ecopo bedo kud atelatela ma lee iwi winjiri pare ku jumange man iwi tic. Nikabu kiedo kud i kumjo camu sente ma lee, man etie bende lith. Sayusac man kuloka mi kabu kiedo cen kud i kumjo m’ubemew unyutho nia ang’eyang’o dog mondo i dhanu ma dupa ma giketho kiedo i kumgi.