Umego m’aradu, wudok Jukristu m’uteng’ini

1. Jakristu ma co ucikere nitimo ang’o kara lembe uwoth ire ma beri?

UBIMO Daudi uyero ni Suleman kumae: “Bed tek, man inyuthri giri nia in i nico.” (1 Ub. 2:1-3) Etie ber ni Jukristu ma co ma tin zoo nitiyo ku juk maeno. Pi nitimo kumeno, gicikiri niworo cik pa Mungu man nitiyo ku cik mir ukungu mi Biblia i gin ceke ma gibetimo. (Luka 2:52) Pirang’o pire tie tek lee nia umego m’aradu gidok Jukristu m’uteng’ini?

2-3. Pirang’o pire tie tek ni umego m’aradu nidoko Jakristu m’uteng’ini?

² Umego gitie ku rwom dupa ma pigi tek i kind juruot man i cokiri. Umego m’aradu, m’umbe jiji idaru paru pi rwom m’iromo bedo ko i anyim. Saa moko nyo ibemito icak tic mi saa ceke, idok jakony tic, man i ng’eye jadit cokiri. Iromo ng’iyo bende nigamu dhaku man ninyolo awiya. (Efe. 6:4; 1 Tim. 3:1) Pi nitundo i kum lembakeca maenogi man nipong’ogi ma ber, ukwayu ibed Jakristu m’uteng’ini i tipo.b

³ Ang’o ma copo konyi nidoko Jakristu m’uteng’ini? Bodho moko tie ma pigi tek m’ukwayu iponj ning’eyo cuu. Dong’ icopo timo ang’o niai kawoni pi nibedo ayika nipong’o ma ber rwom moko ci m’ibinwang’u i anyimi?

LEMBE M’UKWAYU ITIM PI NITENG’INI I TIPO

4. Icopo nwang’u lapor ma beco m’ukwayu ilubi kani? (Nen bende cal.)

⁴ Ng’ii lapor ma ber m’ukwayu ilubi. I Biblia junwang’u lapor dupa ma beco mir aradu ma co m’icopo lubo. Aradu maeno mi rundi ma con gigam gimaru Mungu man gipong’o rwom ma tung’ tung’ pi nigwoko dhanu pare. Icopo nwang’u bende lapor ma beco mi Jukristu ma co m’uteng’ini i kind jupewu man i cokiri peri. (Ebr. 13:7) Icopo lubo kadok lapor ma pwe pa Yesu Kristu. (1 Pet. 2:21) Kinde m’ibeponjo lembe i wigi, nyam i lembe iwi kurayung migi ma beco. (Ebr. 12:1, 2) I ng’eye, say kite m’ibilubo ko lapor migine.

5. Icopo ponjo nibedo ku copo mi paru i lembe nenedi, man pirang’o pire tie teki? (Zaburi 119:9)

⁵ Ponj nibedo ku “copo mi paru i lembe” man gwoke. (Rie. 3:21, NWT) Ng’atu m’utie ku copo mi paru i lembe ng’iyo i lembe cuu i wang’ nimaku yub. Pieno, ponj nitimo kumeno man gwok ng’iyone. Pirang’o? Ng’om maeni upong’ kud aradu ma co ma giweko paru migi kunoke kite ma gibewinjiri ko re m’utel wi timo migi. (Rie. 7:7; 29:11) Televizio, film, man internet de copo bedo kud atelatela ma lee i wii. Dong’ icopo ponjo nibedo ku copo mi paru i lembe nenedi? Ku kwong’a, ponj cik mir ukungu mi Biblia man par pi bero ma gicopo miyo iri. I ng’eye, tii kugi pi nimaku yub ma nyayu anyong’a i Yehova. (Som Zaburi 119:9.) Kan iponjo nitimo kumeno, nwang’u idaru timo lembe ma pire tek lee ma bikonyi nidoko umego m’uteng’ini. (Rie. 2:11, 12; Ebr. 5:14) Wakewec iwi ayi ma copo mi paru i lembe bikonyi ko i lembe ario ma e: (1) i kite mi kwo ku nyimego, man (2) i kite mi maku yub iwi kendi.

6. Copo mi paru i lembe bikonyo umego m’aradu nenedi ninyutho woro ni nyimego?

⁶ Copo mi paru i lembe bikonyi ninyutho woro ni jumamon. Etie rac ungo ni umego m’aradu nibedo jarimb nyamego m’aradu. Ento umego m’aradu m’utie ku copo mi paru i lembe biyero, bikiewo, kunoke bitimo ngo gin moko ci ma romo ketho nyamego upar nia umegone ubemare, ndhu tekene ebemito andha nigame. (1 Tim. 5:1, 2) Tek gibeng’eyiri ku nyamego moko pi gamiri, ebi ii nia ng’atu moko mange ubed unuti i ng’etgi kinde ma gini karacelo, kara kudi nying’ nyamegone ucidere.—1 Kor. 6:18.

7. Copo mi paru i lembe bikonyo umego m’aradu nenedi kinde m’ebeng’iyo kendi man jamruko?

⁷ Yo mange ma jalawobi nyutho i iye nia etie ku copo mi paru i lembe, utie nwang’u ebetimo ng’iyong’ic ma ber iwi kendi man ruko. Wang’ ma pol, ju ma wodho ayi ma nyen mi kendi man ma yawu pire gibedo dhanu ma timo ngo ni Yehova kunoke ma timo lemsasa mi tarwang’. Paru migi mi lemsasane nen i ayi kendi ma rido kumjo kunoke ma ketho nico nen ve dhaku. Kan umego m’aradu m’ubeteng’ini i tipo ubeng’iyo gin m’ukwayu ekendi, ebiweko cik mir ukungu mi Biblia re m’utel wiye man ebilubo lapor ma ber mir umego mange. Ecopo penjere kumae: ‘Nyo ng’iyong’ic para nyutho nia wiya ubetiyo ma ber kunoke nia abeworo jumange? Nyo kit kendi para ketho jumange gineno yot yot nia abetimo ni Mungu?’ (1 Kor. 10:31-33; Tito 2:6) Umego m’aradu m’utie ku copo mi paru i lembe binwang’u bero i wang’ umego ku nyimego pare kende ngo, ento bende i wang’ Won m’i polo.

8. Umego m’aradu copo ponjo nibedo ng’atu ma jugeno nenedi?

⁸ Bed ng’atu ma jugeno. Jalawobi ma jugeno pong’o rwom ceke ma jumiyo i kore kakare kakare. (Luka 16:10) Wakewec iwi lapor ma pwe pa Yesu. Ebino ngo ng’atu ma wenjo lembe kunoke ma jaswa. Ento etimo gin ceke ma Yehova ukwayu i bang’e, kadok kinde m’ebino ire yot ungo. Egam emaru dhanu, asagane julub pare, man ebedo ayika nithiero kwo pare ngi pigi. (Yoh. 13:1) Calu Yesu, tim ma tek pi nitimo tic moko ci ma jumiyo i kori. Tek ing’eyo ngo ayi mi time, nyuth jwigiri man ikway kony i bang’ umego m’uteng’ini. Kud ibed itim tic ku nyap. (Rum. 12:11) Ento bed idar tic ma jumiyo iri man itime calu ve ibetime “ni Yehova, ento ungo ni dhanu.” (Kol. 3:23) Man calu itie ku dubalaga, bed inyuth jwigiri man iyii kosa peri.—Rie. 11:2.

PONJ BODHO MA BIKONYI

9. Pirang’o umego m’aradu ucikere niponjo bodho moko?

⁹ Pi nidoko Jakristu ma co m’uteng’ini, ukwayu iponj bodho moko ma bikonyi i kwo peri. Eno bikonyi nijolo rwom i cokiri, ninwang’u man nigwoko tic moko pi nipong’o yeny peri kunoke yeny mi juruot, man nibedo ku winjiri ma ber ku jumange. Wakewec iwi bodhone moko ma pigi tek.

10-11. Kan umego m’aradu uponjo somo man kiewo piny cuu, eno bimiyo bero ma kani ire man ni cokiri? (Zaburi 1:1-3) (Nen bende cal.)

¹⁰ Ponj nisomo man nikiewo piny cuu. Biblia uyero nia nico ma jamutoro man ma lembe wotho ire ma ber ting’o saa kubang’ ceng’ pi nisomo Lembe pa Mungu man ninyamu iye. (Som Zaburi 1:1-3.) Somo Biblia kubang’ ceng’ bikonye ning’eyo kite ma Yehova paru ko lembe, e en de ebicaku paru i lembe cuu i kwo pare. (Rie. 1:3, 4) Cokiri utie ku yeny mi jumaco ma kumeno. Pirang’o?

¹¹ Umego ku nyimego mwa gisayu telowic man juk m’ujengere iwi Biblia i bang’ umego m’uteng’ini. (Tito 1:9) Tek ing’eyo somo man kiewo piny cuu, ibibedo ku copo mi yiko korolembe man dwokowang’ penji ma bikonyo jumange man bitielo yiyoyic migi. Ibibekiewo bende paru ma beco i saa mi ponji peri ma segi, i saa mi coko, mi coko ma dit mi twodiri man coko ma dit mir adhura. Paru m’ikiewone bikonyi nitielo yiyoyic peri giri man nitielo cwiny jumange.

12. Ang’o ma bikonyi kara ing’ey niweco ma ber ku jumange?

¹² Ponj niweco ma ber ku dhanu. Ukwayu Jakristu ma co uponj niweco ma ber ku dhanu. Nico ma weco ma ber winjo jumange ka gibekoro paru migi man kite ma gibewinjiri ko, man enyang’ kugi. (Rie. 20:5) Ebedo ku copo mi nyang’ i lembe pa ng’atini nikadhu kud i ayi dwande, ayi pa wang’e, man i kite m’ebeyiko ko kume. Icopo ponjo ngo nitimo lembuno kan iting’o ngo saa mi bedo ku jumange. Tek saa ceke ibed itiyo ku jamtic mir elektronik pi niweco ku jumange, calu ve ku yore mi mesaj man yore mange, ebibedo iri tek niweco ku jumange ma ber dhok ku dhok. Pieno, bed inwang’ saa mi weco ku jumange dhok ku dhok.—2 Yoh. 12.

13. Umego m’aradu ucikere niponjo ang’o mange? (1 Timoteo 5:8) (Nen bende cal.)

¹³ Ponj nipong’o yeny peri giri. Nico ma Jakristu m’uteng’ini ucikere nibedo ku copo mi pong’o yeny pare gire man mi juode. (Som 1 Timoteo 5:8.) I ng’om moko, wego kunoke wedi mange ma ceng’ini re ma ponjo awiya ma co ku tic mi cing’. I ng’om mange lundo, awiya ma co giponjo tic mi cing’ kunoke bodho mange i somo mi sekonder. Lembe ma pire tek utie nia iponj bodho moko ma bikonyi ninwang’u tic. (Tic. 18:2, 3; 20:34; Efe. 4:28) Bende, wek jung’eyi ni ng’atu ma timo tic ma tek man ma daru tic m’ecaku. Tek itimo kumeno, ebibedo iri yot ninwang’u tic man nigwoke. Kurayung man bodho ma waai waneno no, pigi tie tek bende ni Jakristu ma co kara etuc nipong’o rwom mange m’ubekure i anyim. Dong’ wakewec iwi rwomne moko.

YIKIRI PI RWOM M’UBEKURI I ANYIM

14. Umego m’aradu copo yikere nenedi pi nicaku tic mi saa ceke?

¹⁴ Nitimo tic mi saa ceke. Ju ma pol m’i kind Jukristu ma co ma dong’ giteng’ini gicaku tic mi saa ceke ma nwang’u fodi gitie aradu. Tic pa jayab yo konyo umego m’aradu niponjo kite mi timo tic karacelo ku dhanu ma tung’ tung’. Ekonye bende ninwang’u sente man nitiyo kude ku rieko. (Filip. 4:11-13) Yo ma ber mi caku tic mi saa ceke utie nicaku ku tic pa jayab yo ma jakony. Ju ma dupa gitimo tic maeno pi kare moko; eno ukonyogi nibedo ayika nimaku tic pa jayab yo ma nja. I ng’eye, dhugola mi tic mange mi saa ceke uyabere igi, calu ve nitimo i tic mi giedo kunoke i Bethel.

15-16. Umego m’aradu copo timo ang’o pi nidoko jakony tic man jadit cokiri?

¹⁵ Nibedo jakony tic kunoke jadit cokiri. Ukwayu umego ceke gibed ku lembakeca mi pong’o lembe m’ukwayere pi nidoko judong cokiri kara gikony umego ku nyimego migi. Biblia uyero nia tek umego moko ubeyenyo rwom maeno, nwang’u “ebeyenyo tic ma ber.” (1 Tim. 3:1) Re i wang’ nidoko jadit cokiri, ecikere nilar pong’o lembe m’ukwayere pi nidoko jakony tic. Jukony tic gikonyo judong cokiri i ayi dupa. Judong cokiri ku jukony tic ceke gikonyo umego ku nyimego migi ku jwigiri man girweyo lembanyong’a kud amora. Umego m’aradu gicopo romo nidoko jukony tic kadok fodi gitie ku oro ma niai 17 nitundo 19. Man jakony tic m’uromo andha ke copo doko jadit cokiri kadok ku oro 20.

¹⁶ Icopo timo ang’o pi ninwang’u rwom maenogi? Biblia ukwanu kende kende kurayung m’ukwayu ibed ko. Ento poy nia kurayungne ceke gijengiri iwi Biblia, iwi maru Yehova, juruot pewu man cokiri. (1 Tim. 3:1-13; Tito 1:6-9; 1 Pet. 5:2, 3) Tim kero inyang’ i igi acel acel. Rwo i bang’ Yehova ukonyi nicegogi.c

17. Umego m’aradu copo yikere nenedi pi nidoko won ot man jawi oti? (Nen bende cal.)

¹⁷ Nibedo won ot man jawi ot. Calu ma Yesu unyutho, umego moko m’uteng’ini ging’iyo nibedo jumusuma. (Mat. 19:12) Ento tek inwang’u nia mito igam dhaku, ng’ey nia rwom mi bedo won ot man jawi ot bimedere iri. (1 Kor. 11:3) Yehova ubekwayu nia won ot umar dhaku pare man epong’ yeny pare mi kum, mi tipo, man ebed enyang’ kude. (Efe. 5:28, 29) Kurayung man bodho ma waweco pigi i acaki mi thiwiwec maeni, calu ve niponjo nibedo ku copo mi paru i lembe, ninyutho woro ni jumamon, man nibedo ng’atu ma jugeno, bikonyi nibedo won ot ma ber. E ibibedo ayika nipong’o rwom pa won ot man pa jawi ot.

18. Umego m’aradu copo yikere nenedi pi nidoko wego?

¹⁸ Wego. I ng’ey m’igamu dhaku, ng’ey nia iromo doko wego. Lapor pa Yehova copo miyo iri ponji ma kani iwi kite mi bedo wego ma beri? Ponjine gi dupa. (Efe. 6:4) Yehova ubed uyero thwolo thwolo ni Wode ma Yesu nia emare, man nia anyong’a nege i kume. (Mat. 3:17) Tek idoko wego, bed itiel cwiny awiya peri thiri thiri nia imarugi. Bed ifoygi saa zoo pi lembe ma ber ma gibetimo. Wego ma lubo lapor pa Yehova gikonyo awiya migi nidoko Jukristu ma co ku ma mon m’uteng’ini. Kara iyikiri pi rwom maeno niai kawoni, bed idieng’ ku mer ku wedi peri man ku dhanu mi cokiri, man ponj nibeyero igi nia imarugi man nia pigi tie tek i ii. (Yoh. 15:9) Eno bikonyi nipong’o rwom m’ubekuri i anyim mi bedo won ot man wego. Ento pi kawoni, piri bibedo tek i Yehova man ibibedo ku kony ma lee ni jupewu man ni cokiri.

IBITIMO ANG’O KAWONI?

19-20. Ang’o ma bikonyo umego m’aradu nidoko Jukristu m’uteng’ini? (Nen cal m’i ng’eye.)

¹⁹ Umego m’aradu, wucopo doko ngo Jukristu m’uteng’ini mbwang’ kumeni. Ukwayu wung’ii lapor ma ber ma wubilubo, wuponj nibedo ku copo mi paru i lembe, wubed dhanu ma jugeno, wuponj bodho ma bikonyowu i kwo mwu, man wuyikuru pi rwom m’ubekurowu.

²⁰ Saa moko wii romo jebere kan iparu pi tic m’ubekuri i weng’i. Re icopo timogi ma ber. Poy nia Yehova tie ayika nikonyi. (Isa. 41:10, 13) Umego ku nyimego peri mi cokiri de gibikonyi. Tek itimo kero nidoko Jakristu m’uteng’ini, ibikwo kwo ma ber man mir anyong’a. Umego m’aradu, wamaruwu lee! Wek Yehova umed iwu mugisa kinde ma wubetimo ma tek kara wudok Jukristu m’uteng’ini.—Rie. 22:4.