Junyodo, wuponj awiya mwu ku lembe m’ukwayu ging’ei

Wabekwo i ng’om ma dhanu m’i ie gineno gin ma ber ni gin ma rac, ma rac ke ni gin ma ber. (Is 5:20) Lembe ma rac utie nia, dhanu moko gibetimo lembe ma Yehova udagu, m’uketho i ie timo ma reco mi sasa mi tarwang’ i kind co ku co kunoke mon ku mon. Aradu mi somo ku dhanu mange, gimito giwing wi aradu mwa mi cokiri kara gilub tokgi i timo ma rac. Icopo konyo awiya peri nenedi kara tek gibenwang’iri i wang’ abidhe ma kumeno ku mange de, givoi abidhene?

Kony awiya peri ging’ei cik mir ukungu pa Yehova. (La 18:3) Nok nok nimakere ku oro migi, nyuth igi gin ma Biblia uyero iwi ribiri. (Pc 6:7) Dong’ ke penjiri kumae: ‘Nyo adaru ponjo awiya para iwi kite ma cuu ma gicopo nyutho ko mer ni jumange? Nyo adaru nyutho igi nia pirang’o ukwayu gibed gikend kendi m’umaku piny, man kite ma giromo ketho ko jumange uwor lembe migi m’uneno gin? Nyo awiya para ging’eyo gin m’ukwayu gitim ka ng’atu moko mito nyutho igi cal mi pornografi, kunoke ubemito gitim lembe moko ma Yehova udagu?’ Ka gilar ging’eyo gin ma gicopo timo, eno bikonyogi kara kud gimond i peko. (Rie 27:12; Ek 7:12) Kan ibeponjo awiya peri, eno nwang’u ibenyutho nia ineno giralaga m’uai i bang’ Yehova ni gin ma pire tek.​—Zb 127:3.

NEN VIDEO MA THIWIE TIE GIER OT MA BICUNGO MATEK PI NJA​—GWOK AWIYA PERI IKUM ‘LEMBE MARECO,’ MAN I NG’EYE, DWOK WANG’ PENJI M’ULUBO E:

• 

  Pirang’o jumoko lworo niponjo awiya migi iwi lembe m’uneno ribiri?

• 

  Pirang’o ukwayu junyodo giponj awiya migi “[i twiny] man juk pa Rwoth”?​—Ef 6:4

• 

  Jamtic ma kani ma dilo pa Yehova uwodho, ma copo konyo junyodo niponjo awiya migi iwi lembe mi ribiri?​—w19.05 mba. 12, sanduku

• Pirang’o ukwayu ibed iwec thirithiri kud awiya peri ma fodi gimondo ngo i peko?