PONJI MI 50
Gin m’ukwayu itim kara anyong’a bed i ot peri—Thenge mir 2
Awiya gitie giramiya m’uai i bang’ Yehova. Ebemito junyodo gigwok giramiyane cuu, uketho emiyo juk mi rieko pi nikonyogi i lembe maeno. Emiyo juk ni awiya bende kara gin de gidik cinggi i anyong’a mi ot.
1. Juk ma Yehova umiyo ni junyodo
Yehova ubemito nia junyodo gimar awiya migi man gibed karacelo kugi wang’ ma pol. Ebemito bende nia junyodo gigwok awiya migi i kum lembe ma copo timogi rac man gibed gitii ku Biblia pi niponjogi. (Lembrieko 1:8) Ewacu ni wego kumae: “Wumeduru nitungo [awiya mwu] . . . nimakere ku telowic pa Yehova.” (Som Juefeso 6:4.) Anyong’a nego Yehova ka junyodo gibetungo awiya migi nimakere ku telowic pare man ka gibeweko ngo ticne i kor ng’atu mange.
2. Juk ma Yehova umiyo ni awiya
Ni awiya ke, Yehova umiyo juk ma e: “Wubed wor ni junyodo mwu.” (Som Jukolosai 3:20.) Kan awiya gibeworo junyodo migi, anyong’a nego Yehova man anyong’a nego bende junyodo lee dit. (Lembrieko 23:22-25) Yesu uweko lapor ma ber dit kinde m’ebino nyathin. Ebino mbe ku dubo, re eworo junyodo pare man ewinjo dwandgi.—Luka 2:51, 52.
3. Wucopo timo ang’o pi nibedo ceng’ini ku Yehova karacelo i ot mwu?
Kan itie janyodo, m’umbe jiji ibemito nia awiya peri gimar Yehova lee calu m’imare ko. Dong’ icopo timo ang’o kara lembene urombi? Biblia uyero kumae: ‘Ponj [lembe pa Yehova] cuu ni nyithindho peri, man iwec pi lembene kinde m’ibedo i ot peri, man kinde m’ibewotho i yo, man kinde m’ivuto, ku kinde m’iai malu.’ (Poi mi Cik 6:7) Wec ma juloko nia “niponjo cuu,” ubenyutho niroyo lembene iwi ng’atini, nibedok i wiye kendo kendo. Copere ing’eyo ma ber nia kara lembe moko kud urwiny iwi awiya peri, ubekwayu ibed idok i wiye kendo kendo. Giragora maeni bende ubekweyi nia wang’ ma pol ibed inwang’ saa pi nikoro pi Yehova ni awiya peri. Etie ber dit nikoyo saa moko athothi kubang’ yenga pi niponjo lembe iwi Yehova karacelo i ot mwu. Kadok awiya mbe de, wubinwang’u kony asu ka wubetimo kumeno kubang’ yenga.
MED NYANG’ PERI
Wakenen kawoni lembe moko ma romo konyo dhanu ceke mi ot kara gikwo ma cwinygi kwiyo man kud anyong’a.
4. Ponj awiya peri ku mer
Niponjo nyathin copo bedo lembe ma yot ungo. Dong’ juk ang’o ma Biblia umiyo ma romo konyi? Som Yakobo 1:19, 20, man i ng’eye wuwec iwi penji m’ulubo e:
Junyodo gicopo nyutho mer nenedi kinde ma gibeweco kud awiya migi?
Pirang’o janyodo ucikere ngo nitwinyo nyathin pare kinde m’etie ku kwinyo?a
5. Gwok awiya peri
Pi nigwoko awiya peri, pire tie tek lee nia ibed iwec ku nyathinman acel acel iwi lembe m’uneno ribiri. Eno romo bedo lembe ma yot ungo. Nen VIDEO, man i ng’eye wuwec iwi penji m’ulubo e:
Pirang’o etie pek ni junyodo moko niweco kud awiya migi iwi lembe mi ribiri?
Junyodo moko gituc nenedi niweco kud awiya migi iwi lembe mi ribiri?
Calu ma Biblia ular uyero, ng’om maeni pa Sitani ubemedere ameda nidoko rac. Som 2 Timoteo 3:1, 13, man i ng’eye wuwec iwi penji m’ulubo e:
I kind dhanu ma reco ma verse mir 13 uweco pigi, jumoko gibecuku maku awiya ku kero pi nitimo kugi tarwang’. Dong’ pirang’o pire tie tek nia junyodo giponj awiya migi iwi lembe mi ribiri man iwi kite ma giromo gwokiri ko i kum ju m’umito timogi raci?
Nyo ing’eyo?
Jumulembe pa Yehova gibewodho jamtic dupa m’ubekonyo junyodo pi niponjo awiya migi iwi lembe mi ribiri man nigwokogi i kum ju ma romo makugi ku kero. Jamticne moko ni e:
Gwok awiya peri (video)
Nwang’ ponji i bang’ Japonji ma dit, wic mir 10 man mi 32, (mi français)
“Kite m’iromo ponjo ko awiya peri iwi lembe mi ribiri” (Cew! Na. 5, 2016)
6. Wor junyodo peri
Awiya ma thindho ku m’aradu gicopo nyutho woro ni junyodo migi nikadhu kud i ayi ma gibeweco ko i bang’gi. Nen VIDEO, man i ng’eye wuwec iwi penji m’ulubo e:
Pirang’o ubekwayu nia nyathin kunoke aradu ubed uwec i bang’ junyodo pare ku woro?
Nyathin kunoke aradu copo weco ku junyodo pare nenedi i ayi m’unyutho nia ebeworogi?
Som Lembrieko 1:8, man i ng’eye wuwec iwi penji m’ulubo e:
Ka junyodo giyero ni nyathin migi gin m’ukwayu etim, ukwayu nyathin ne ujol lembene nenedi?
7. Juruot, wutim thier ni Yehova karacelo i ot mwu
Juruot mi Jumulembe pa Yehova gibed gikoyo saa moko kubang’ yenga pi nitimo thier ni Mungu (niponjo lembe i wiye) karacelo i ot migi. Lembang’o ma juromo timo i saa mi thier mi juruotne? Nen VIDEO, man i ng’eye wuwec iwi penji m’ulubo e:
Juruot giromo timo ang’o kara kud gikeng’ program mi thier mi juruot migi?
Janyodo copo timo ang’o kara thier mi juruot ubed ku kony ni juode man unyang’gi?—Nen cal mir acaki mi ponji maeni.
Lembang’o ma beketho ebedo tek iwu saa moko niponjo Lembe pa Mungu karacelo i ot mwu?
I Israel ma con, Yehova ugam ung’olo nia juruot gibed giponj Lembagora nja karacelo i ot migi. Som Poi mi Cik 6:6, 7, man i ng’eye wuwec iwi penji m’ulubo e:
Wuromo tiyo ku cik mi verse maeni nenedi?
Lembe ma wuromo timo i saa mi thier mi juruot:
Wuyik coko karacelo i ot mwu.
Wusom Biblia man wuwec iwi kpawa moko ma romo foyo i juruot.
Kan itie kud awiya ma thindho, toki kunoke wodhi iwi karathasi jamtuko moko mi Biblia ma juyiko pir awiya i jw.org.
Kan itie kud awiya m’udoko aradu, wuwec iwi thiwiwec moko mir aradu i jw.org.
Wung’ii lembe mi kpawa moko mi Biblia, man wutuke atuka calu m’egam ekadhu ko.
Wunen video moko mi jw.org man wuwec i wiye.
DHANU MOKO BEYERO KUMAE: “Wambe ku saa mi ponjo awiya mwa ku Biblia.”
In iromo yero ang’o?
I ADUNDO
Yehova ubemito nia junyodo gimar awiya migi, giponjgi, gitunggi man gigwokgi agwoka. Ebemito awiya gilund giwor junyodo migi, man junyodo kud awiya ceke ke gitim ire thier (giponj lembe i wiye) karacelo i ot migi.
Penji mi poyowic
Junyodo gicopo niponjo man nigwoko awiya migi nenedi?
Awiya gicopo nyutho woro nenedi ni junyodo migi?
Bero mi koyo saa moko kubang’ yenga pi niponjo lembe pa Mungu karacelo i ot utie ang’o?
TIM SAYUSAC
Lembe moko ma kani ma romo konyo nyathin peri kara edongi man eteng’ini ma beri?
“Lembe abusiel m’awiya gicikiri niponjo i kwo migi” (Cew! Na. 2, 2019)
Nen juk moko ma beco mi Biblia ma romo konyo ju ma gibegwoko junyodo migi m’udaru tii.
“Biblia uyero lembang’o iwi gwoko junyodo ma gitii?” (Thiwiwec mi jw.org)
Jalwo moko m’ukeung’eyo ngo kite mi tungo awiya, udoko ni wego mandhandha. Kenen gin m’ukonye.
Kenen gin ma romo konyo wego kara ebed ku winjiri ma ceng’ini mandha ku wode.
“Wego copo timo ang’o kara kindgi bed ceng’ini giku wode?” (Otkur ma Wiw, nindo 1, dwi mir 11, 2011)
a I Biblia, wec ma nia “twiny” nyutho niponjo nyathin, nitelo wiye, man nikonye kara ewek timo ma rac man edok ku paru man timo m’atira. Jucikiri ngo nimiyo twiny ku kwinyo kunoke ku gero.—Lembrieko 4:1.