PONJI MI 57
Kan ipodho i dubo ma pek, ukwayu itim ang’o?
Kadok imaru Yehova lee man ibetimo kero peri ceke niuro lembe m’edagu de, saa moko iromo timo kosa. Re dubo moko tie pek nisagu mange. (1 Jukorintho 6:9, 10) Dong’ kadok itimo dubo ma pek de, ng’ey nia Yehova umeri asu; etie ayika nitimo iri kisa man nikonyi.
1. Wacikara nitimo ang’o kara Yehova uwek dubo mwa?
Ka wamaru Yehova, cwinywa bipido lee mandha kinde ma wanyang’ nia wadaru timo dubo moko ma pek. Ento lembe ma e ma Yehova ung’olo, romo kwiyo cwinywa: “Kadok dubo mu bedo kwar ngbo, gibibedo tar calu pei.” (Isaya 1:18) Ka wayew man waloko cwinywa i andha, Yehova biweko dubo mwane ceke. Dong’ waromo loko cwinywa nenedi? Nwang’u watie ku can ma lee i adundewa pi lembe ma rac ma watimo, waweko nitimo lembene, man wakwayu Yehova utim iwa kisa. I ng’eye ke, nwang’u wabetimo kero ceke niwilo paru kunoke timo ma reco m’ucwaluwa i dubo, man wabeii nikwo nimakere ku cik ma leng’ pa Yehova.—Som Isaya 55:6, 7.
2. Yehova betiyo nenedi ku judong cokiri pi nikonyowa ka watimo dubo?
Tekene watimo dubo ma pek, Yehova ubeorowa nia ‘walwong’ judong cokiri.’ (Som Yakobo 5:14, 15.) Umego maeno ma Yehova ung’iyo man uketho piwa, gimare man gimaru rombe pare. Ging’eyo nikonyowa kara kindwa ku Yehova m’unyothere udok kakare.—Jugalatia 6:1.
Judong cokiri konyowa nenedi ka watimo dubo ma peki? Juario kunoke adek m’i kindgi bitiyo ku juk mi Biblia pi nitwinyowa. Gibimiyo iwa bende paru man telowic ma beco pi nikonyowa kara waur nitimo dubo kendo. Kan umego kunoke nyamego moko utimo dubo ma pek man eloko ngo cwinye, judong cokiri giwodhe cen kud i cokiri kara cokiri ubed agwoka kud i kum lembe ma reco.
MED NYANG’ PERI
Wakenen kawoni gin ma bikonyi ninyang’ cuu man ma bimedo foyofoc peri i kum ayi ma Yehova konyo kowa ka watimo dubo ma pek.
3. Lokocwiny konyowa nikey i thenge mi tipo
Dubo moko ci ma wabetimo nyayu can i Yehova; pieno ukwayu watuc dubone ire. Som Zaburi 32:1-5, man i ng’eye wuwec iwi penji m’ulubo e:
Pirang’o etie ber nia watuc dubo mwa ni Yehova kakare nikane akana?
M’uweko tuco dubo mwa i wang’ Yehova, wabinwang’u kwiyocwiny nwang’u wanyutho bende pi dubone ni judong cokiri pi ninwang’u kony migi. Nen VIDEO, man i ng’eye wuwec iwi penji m’ulubo e:
I video maeni, judong cokiri gikonyo Canon nenedi kara edwog i bang’ Yehova?
Wacikara nikoro lembe ceke ni judong cokiri man thwolo thwolo; kud walworgi pilembe tic migi tie nikonyowa. Som Yakobo 5:16, man i ng’eye wuwec iwi penji m’ulubo e:
Pirang’o ebibedo yot magwei ni judong cokiri nikonyowa cuu ka wanyutho igi lemandha man wakoro igi lembe thwolo thwolo?
Tuc dubo peri, kor lemandha ni judong cokiri, man jol kony ma Yehova umiyo iri ku mer
4. Yehova nyutho kisa ni judubo
Ka ng’atu moko utimo dubo ma pek man ekwero niworo cik pa Yehova i kwo pare, juwodhe cen kud i cokiri man wadikara ngo kude. Som 1 Jukorintho 5:6, 11, man i ng’eye wuwec iwi penji m’ulubo e:
Ka jujebo thobi i mogo, kwen timere nenedi? Dikiri ku jadubo m’ukwero niloko cwinye ke copo kelo adwogi ma kani i cokiri?
Pi nilubo lapor mi kisa ma Yehova nyutho ni judubo ma gitie ku kum mi dubalaga, judong cokiri gitimo kero migi ceke pi nikonyo ju ma juwodhogi kud i cokiri. Kadok nwang’u twiny ma jumiyo igi ubino lith lee de, re twinyne ukonyo ju dupa ninyang’ nia lembe ma gitimone ubino rac andha.—Zaburi 141:5.
Ayi ma Yehova tiyo ko ku judubo, ubenyutho nenedi nia etie ng’atu ma i lembe pare tek ungo, e jakisa man jameri?
5. Ka waloko cwinywa, Yehova biweko dubo mwa
Yesu utiyo ku lapor moko m’ubekonyowa ninyang’ nia Yehova winjere nenedi ka ng’atu m’udubo utuc niloko cwinye. Som Luka 15:1-7, man i ng’eye wuwec iwi penji m’ulubo e:
Lapor maeni ubeponji ku lembang’o iwi Yehova?
Som Ezekiel 33:11, man i ng’eye wuwec iwi penji m’ulubo e:
Pi ninyutho nia andha waloko cwinywa, ubekwayu watim ang’o ma pire tek lee?
Yehova ubedieng’ pi rombe pare lee dit calu ma jakwac bende dieng’ ko pi rombe pare
DHANU MOKO BEYERO KUMAE: “Abelworo nia kan atuco dubo para ni judong cokiri ci, e gibiwodha cen kud i cokiri.”
Icopo yero ang’o ni ng’atu m’utie ku paru maeno?
I ADUNDO
Ka watimo dubo ma pek man i ng’eye waloko cwinywa i andha man wabeii ku cwinywa ceke nitimo kwa lembe m’atira, Yehova biweko iwa.
Penji mi poyowic
Pirang’o etie ber nia watuc dubo mwa ni Yehova?
Kara Yehova uwek dubo mwa, wacikara nitimo ang’o?
Ka watimo dubo ma pek, pirang’o wacikara nisayu kony i bang’ judong cokiri?
TIM SAYUSAC
Nen kite ma Yehova unyutho ko kisa pare ma juweco pire i Isaya 1:18 ni jalwo moko.
Judong cokiri gitimo tego lee pi nikonyo ng’atu m’utimo dubo ma pek.
“Ayi mi nyutho mer man kisa ni ju m’utimo dubo ma pek” (Otkur ma Wiw, dwi mir 8, 2024)
Ayi mi nyutho mer man kisa ni judubo m’uloko ngo cwinygi.
“Ayi mi konyo ju ma juwodho kud i cokiri” (Otkur ma Wiw, dwi mir 8, 2024)
I kpawa ma thiwie ubeyero “Abino ku yeny mi dwogo i bang’ Yehova,” kenen kite ma jalwo moko m’ukeuwok kud i lemandha unwang’u nia Yehova udok ujole kendo ma ber.