Penji mi jusom

Dongo pa pond hekalu pa Suleman ubino rukani?

Pond hekalu ubino i ng’et kamondo mi Kamaleng’ mir hekalu. Nimakere ku Biblia—Lok mi ng’om ma nyen m’uwok i wang’ oro 2023, “pond ot ma n’i [wang’ hekalu] borne ubino bot pier ario, man emaku kalac mi ode, kadongone ke ubino dak pier ario.” (2 Kei. 3:4) Lok mange mi Biblia bende unyutho nia dongo pa pond hekalu ubino “bot dak pier ario,” niwacu ebino ot ma wiw mi metre 53.

Ento Lok mi ng’om ma nyen ma juwodho i oro 2023 uyero pi pond hekalu pa Suleman kumae: “Kadongone ke ubino [bot] pier ario,” kunoke metre ma romo 9.a Jutimo alokaloka maeno pi thelembe moko ma e:

Juweco ngo pi dongo pa pond hekalu i 1 Ubimo 6:3. I verse maeni, jagor ma Yeremia uweco pi bor man lac mi pond hekalu; eweco ngo pi dongone. I thek m’ulubo, ekoro i thucne lembe m’ugwaku kum jamkum hekalu mange ma dongo, calu ve Nam mi cuma m’atwaga, burwethi mi cwalu pii apar man mbegi ario mi mola m’ucungo yo woko mi pond hekalu. (1 Ub. 7:15-37) Tek andha dongo pa pond hekalu ubino metre ma kadhu 50 man ekadhu wi jamkum hekalu mange ceke, pirang’o ke Yeremia uweco ngo pi dongo pare? Kadok oro dak swa i ng’eye de jugor kpawa ma Juyahudi gikoro nia pond hekalu pa Suleman ugam ukadhu ngo wi jamkum hekalune mange.

Jururieko gitie ku jiji ka nyo andha kor ot mir hekalu ubino ku copo mi yeyo pond ot mi bot 120. Giedo mi kidi ku mi briki mi rundi ma con ma calu ve dhugang’ mir hekalu mi Misiri, ubed ubedo lac lee mandha yor i thegi man yor i wigi bedo diny. Ento hekalu pa Suleman ubino ngo kumeno. Jururieko giparu nia lac pa wang’ kor ode ugam ukadhu ngo bot 6 kunoke metre 2,7. Pieno, Theodor Busink m’utie jagor kpawa ma jaragiedo uyero kumae: “Calu ma wang’ kor ot [mi kamondo mir hekalu] ubino diny, [dongo pa] pond hekalu romo bedo ngo bot 120.”

Copere nia kosa moko mondo i gor mi 2 Lemkei 3:4 saa ma jubeloke ku cing’jo. Kadok nwang’u i gor moko ma con jukiewo “dak pier ario” i verse maeno de, re i gor mange ma juworo lee ma calu ve Kodeks Alekzandrinus m’uwok i rundi dage mir abic man Kodeks Ambrosianus m’uwok i rundi dage mir abusiel, jukiewo “bot pier ario.” Copere ang’o m’ucwalu jagor moko nikiewo “dak pier ario”? I andha, wec ma juloko “dak” man “bot” nen i ayi ma rom i dhu Juebrania. Pieno copere nia jagor moko ukiewo “dak” kakare nikiewo “bot.”

I andha, ka wabetimo tego ma kumeni pi ninyang’ cuu i lembe m’ugwaku kum hekalu pa Suleman, waketho wiwa asagane i kum gin m’hekalune ubenyutho, niwacu hekalu ma dit mi tipo. Watie ku foyofoc ma lee nia Yehova ulwong’o jutic pare ceke gibin giwore i hekalu maeno!—Ebr. 9:11-14; Nyu. 3:12; 7:9-17.