Thelembe mi kwo utie ang’o?

Lembe ma Biblia udwoko

Jucopo penjo penji dupa pi ning’eyo thelembe mi kwo, calu ve Pirang’o wabekwo iwi ng’om? Thelembe mi kwo para tie ang’o? Biblia unyutho nia thelembe mi kwo utie nibedo ku winjiri ma ceng’ini ku Mungu. Kenen lemandha moko mir ukungu ma Biblia unyutho piny e.

• Mungu tie Jacwic mwa. Biblia uwacu kumae: ‘En e Mungu m’utimowa, man wa pare.’​—Zaburi 100:3; Lembanyutha 4:11.

• Mungu utie ku lembakeca pi gin moko ci m’ecwiyo, uketho i iye wan.​—Isaya 45:18.

• Mungu ucwiyowa ku ‘yeny mi tipo,’ eno uketho i iye ava mi ng’eyo thelembe mi kwo mwa. (Matayo 5:3) Ebemito nia wapong’ ava maeno.​—Zaburi 145:16.

• Wapong’o yeny mwa mi tipo nwang’u wabetimo kero nibedo ku winjiri ma ceng’ini ku Mungu. Kadok nwang’u paru mi bedo jarimb Mungu romo winjere ni gin ma copere ngo ni dhanu moko de, re Biblia ubetielo cwinywa ku wec ma e: “Wucor ceng’ini i vut Mungu, man en de ebicoro ceng’ini i vutwu.”​—Yakobo 4:8; 2:23.

• Kara wabed jurimb Mungu, wacikara nikwo nimakere ku gin m’eyenyo i bang’wa. Biblia unyutho lembe maeno i Eklizia 12:13, ewacu kumae: “Lwor Mungu, man lwor lembang’ola pare; kum maeni en e gin m’umaku piny cu ni dhanu.”

• I nindo m’ubino, wabikwo ma ber nimakere ku lembakeca ma kwong’a ma Mungu ular ubino ko piwa kinde m’ebikabu masendi man ebimiyo kwo ma rondo ku rondo ni jurimbe, niwacu ju ma rwo ire.​—Zaburi 37:10, 11.