THENGE MIR 4
Kite mi tiyo ku sente
“Lembakeca kubang’e kubang’e cungo ku lembapora.”—Lembrieko 20:18
Wan ceke watie ku yeny pa sente pi nipong’o yeny ma tung’ tung’ mi juruot mwa. (Lembrieko 30:8) “Sente en e jamgwok.” (Eklizia 7:12) Calu wutie min ot ku won ot, saa moko ecopo bedo tek iwu niweco iwi lembe pa sente, re kud wuketh lemb sente ukel yakini i gamiri mwu. (Juefeso 4:32) Min ot ku won ot gicikiri nigeniri man nibedo karacelo pi nineno nia gibitiyo ku sente adi.
1 WUPANG LEMBE CU MANDHA
LEMBE MA BIBLIA YERO: “Ng’a mi kindwu, m’uyenyo egom ot ma wiu, ma k’elar ebed piny ungo ekwan wel piny, tek ebedo ku m’ecopo dare ko?” (Luka 14:28) Pire tie tek nia wupang karacelo kite m’ubitiyo ko ku sente mwu. (Amos 3:3) Wunen nia wutie ku yeny mi ng’iewo ang’o man nia wubitiyo ku sente adi pi ng’iewne. (Lembrieko 31:16) Etie ngo nia pilembe wutie ku sente ci, wucikuru ning’iewo piny ceke m’unen. Wutim kero niuro banja. Wunyoth kende kende sente m’utie ko.—Lembrieko 21:5; 22:7.
LEMBE M’ICOPO TIMO:
Ka wutie ku dong sente moko i thum pa dwi, wunen karacelo nia wucopo nitimo ang’o ku sentene
Ka wutie ku sente nyanok, kud wung’iew piny swa. Ku lapor, kakare nicidho nicamu i restora, wuted cam mwu giwu
2 YER LEMBE TERERE MAN I ANDHA
LEMBE MA BIBLIA YERO: ‘Iwa pid kum gin m’ubedo alili i wang’ Yehova kende ngo, endre i wang’ dhanu bende.’ (2 Jukorinto 8:21) Yer lembe mandha ni jadhogi mi gamiri nia inwang’u sente adi man itiyo kud adi.
Iwang’ nimaku yub moko ci ma dongo dongo, kelar iweci ku jadhogi mi gamiri. (Lembrieko 13:10) Niweco iwi kite mi tiyo ku sente bikonyowu kara anyong’a ubed i gamiri mwu. Kud inen sente m’inwang’u ni sente peri giri, ento nene ni sente mi juruot mwu.—1 Timoteo 5:8.
LEMBE M’ICOPO TIMO:
Wuwinjuru iwi wel sente ma ng’atuman copo nitiyo ko m’umbe nipenjo jadhoge mi gamiri
Kud wukur nia lembe ular uwoki ka wuwec iwi kite mi tiyo ku sente