• Ker pa Mungu tie ang’o?
    Icopo kwo kud anyong’a rondo ku rondo!—Buku mi ponjo Biblia
    • Ponji mi 31. Yesu Kristu tie Rwoth i polo i wang’ dwong’ pa Yehova.

      PONJI MI 31

      Ker pa Mungu tie ang’o?

      Thiwiwec kunoke lembe ma dit ma Biblia uweco i wiye akeca utie Ker pa Mungu. Yehova bitiyo ku Kerne pi niketho ng’om zoo udok kendo paradizo calu m’ekeco niai con. Re Ker pa Mungune tie ang’o? Wang’eyo nenedi nia Kerne ubebimo kawoni? Nyo lembe moko nuti ma Kerne udaru timo? Man i nindo m’ubino ke ebitimo lembang’o? Wabidwoko wang’ penji maeno ceke i ponji maeni ku m’ubelubo.

      1. Ker pa Mungu tie ang’o, man ng’a ma tie Rwoth mi Kerne?

      Ker pa Mungu tie bimobim kunoke gavmenti ma Yehova Mungu re m’uketho. Rwoth mi Kerne tie Yesu Kristu; ebebimo ke niai i polo ma tie kal mi Kerne. (Matayo 4:17; Yohana 18:36) Biblia uwacu pi Yesu kumae: “Ebibimo . . . pi nja.” (Luka 1:32, 33) Yesu re ma tie Rwoth kunoke Jabim mi Ker maeno; pieno, ebibimo iwi dhanu ceke mi ng’om.

      2. Jukani ma gibibimo giku Yesugi?

      Yesu Kristu tie Rwoth, re ebibimo en kende ngo. Dhanu mi “suru ceke, dhok ceke, kodhi dhanu ceke, man thek ceke . . . gibicamu ker” karacelo kude. (Lembanyutha 5:9, 10) Wend dhanune tie adi? Niai ma Yesu ubino i ng’om keni, dhanu ma gitie julub pare wendgi tie milion ma lee dit. Nyo dhanu maeno ceke gibibimo karacelo kude? Ungo. Dhanu elufu dak acel pier ang’wen wi ang’wen (144000) kende re ma bicidho i polo pi nibimo karacelo ku Yesu. (Som Lembanyutha 14:1-4.) Ento Jukristu mange ceke mi ng’om, gibibedo lwak mi Kerne.​—Zaburi 37:29.

      3. Ker pa Mungu tie ber nisagu bimobim ceke mi dhanu​—Nenedi?

      Jubim ma dhanu, kadok nyo gibeii nitimo lembe ma beco de, re gituc ungo nitimo lembe ceke ma gibemito gitim, pilembe gimbe ku copo. Pieno i ng’ei nindo, juwilogi ku jubim mange. Re jubim m’i ng’eygi de caku pong’o kwa yeny migi gigi kakare nipong’o yeny mi lwak. Ento Yesu ma tie Rwoth mi Ker pa Mungu lundo, ng’atu moko mbe ma biwile kud iwi Ker. Mungu ‘uketho ker ma binyothere ngo rondo ku rondo.’ (Daniel 2:44) Yesu tie Rwoth ma ber m’usagu zoo man ebibimo iwi ng’om ceke m’umbe akoyakoya acel de. Etie won mer, jabero, man ng’atu m’atira. Ebiponjo bende lwak dhanu pare kud ayi mi tiyo ku jumange i ayi ma rom, niwacu ku mer, ku bero, man i ayi m’atira.​—Som Isaya 11:9.

      MED NYANG’ PERI

      Wakenen kawoni nia pirang’o Ker pa Mungu re ma tie ber nisagu bimobim moko ci mi dhanu.

      Yesu Kristu ubebimo wi ng’om niai kud i komker pare i polo. Ju m’ebebimo kugi gibedo i ng’eye. Dwong’ pa Yehova uberieny i wigi.

      4. Ker pa Mungu tie ku tego ma lee man ebibimo wi ng’om zoo

      Yesu Kristu tie ku tego man copo nisagu jubim ceke ma dhanu m’ucaku bimo niai con. Som Matayo 28:18, man i ng’eye wuwec iwi penji m’ulubo e:

      • Ang’o m’unyutho nia Yesu tie ku dito m’usagu mi jubim mange ceke ma dhanu?

      Jubed juwilo jubim ma dhanu wang’ ma pol, man gin ceke gibimo kende kende iwi theng’ ng’om moko. Nyo Ker pa Mungu de tie kumeno? Som Daniel 7:14, man i ng’eye wuwec iwi penji m’ulubo e:

      • Pirang’o iparu nia etie lembe ma ber ning’eyo nia Ker pa Mungu tie Ker ma ‘binyothere ngo’?

      • Pirang’o iparu nia etie lembe ma ber ning’eyo nia Kerne bibimo wi ng’om zoo?

      5. Ker pa Mungu biwilo mi dhanu cen

      Pirang’o Ker pa Mungu biwilo bimobim ceke mi dhanu? Nen VIDEO, man i ng’eye wuwec iwi penji m’ulubo e.

      VIDEO: Ker pa Mungu tie ang’o?​—Thenge (1:41)

      • Bimobim mi dhanu utie kud adwogi ma kani?

      Som Eklizia 8:9, man i ng’eye wuwec iwi penji m’ulubo e:

      • Nyo ibeparu nia Ker pa Mungu ucikere niwilo bimobim mi dhanu e ceni? Pirang’o ibeparu kumeno?

      6. Jubim mi Ker pa Mungu gitie ju ma ginyang’ kudwa

      I ng’om keni, Rwoth mwa Yesu ubino dhanu ma ve wan, re m’umbe ku dubo. Pieno, ‘kisa copo nege i kum ng’ico mwa.’ (Juebrania 4:15) Dhanu elufu dak acel pier ang’wen wi ang’wen (144 000) bende ma giweg bedopwe man ma gibibimo karacelo ku Yesu, Yehova ung’iyogi “kud i suru ceke, dhok ceke, kodhi dhanu ceke, man thek ceke.”​—Lembanyutha 5:9.

      • Yesu ku ju m’ebibimo kugi ging’eyo peko mwa wa dhanu cuu mandha. Pirang’o ibeparu nia eno tie lembe ma ber dit iwa?

      Jumaco ku jumamon ma juwiro ku tipo gikwo i rundi ma tung’ tung’ man giai i suru de ma tung’ tung’.

      Yehova ung’iyo jumaco ku jumamon mi suru ceke kara gicidh gibim karacelo ku Yesu

      7. Ker pa Mungu utie ku cik ma beco dit nisagu mi dhanu

      Jubim maeni gibed giwodho cik ma tung’ tung’ pi nikonyo man nigwoko lwak mi ng’om migi. Ker pa Mungu bende utie ku cik ma lwak mi Kerne gicikiri niworo. Som 1 Jukorintho 6:9-11, man i ng’eye wuwec iwi penji m’ulubo e:

      • Iparu nia ng’om romo bedo nenedi ka nwang’u dhanu ceke giworo cik maeni ma Mungu umiyo iwi kurajo?a

      • Nyo iparu nia Yehova tie ku twero mi miyo cik maeno ni lwak mi Ker pare? Pirang’o iparu kumeno?

      • Ang’o m’unyutho nia kadok dhanu ma fodi pi kawoni gibeworo ngo cik maeno de giromo lokiri?​—Nen verse mir 11.

      Japolisi moko ubecero dhu mutukari kaka ma dhanu bekadhu lee i iye. Dhanu mi oro ma tung’ tung’ gibekadhu ndaki.

      Bimobim mi dhanu bewodho cik ma tung’ tung’ pi nigwoko man nikonyo lwak mi ng’om migi. Ker pa Mungu lundo utie ku cik ma beco nisagu zoo pi nigwoko man nikonyo lwak pare

      DHANU MOKO BEYERO KUMAE: “Ker pa Mungu nwang’ere i adunde dhanu?”

      • In ke iromo yero ang’o?

      I ADUNDO

      Ker pa Mungu tie bimobim kunoke gavmenti m’unuti andha i polo man ma bibimo wi ng’om zoo.

      Penji mi poyowic

      • Ng’a ma tie Rwoth mi Ker pa Mungu, man ebibimo ku jukani?

      • Pirang’o Ker pa Mungu tie ber nisagu bimobim ceke mi dhanu?

      • Yehova ubemito nia lwak mi Ker pare gitim ang’o?

      Lembe m’ukwayu itim

      TIM SAYUSAC

      Ker pa Mungu nwang’ere kani? Nen gin ma Yesu uponjo iwi lembuno.

      “Nyo Ker pa Mungu ni i adundewa?” (Thiwiwec mi jw.org)

      Pirang’o Jumulembe pa Yehova gimoko kikiki i kum Ker pa Mungu kakare nidiko cing’gi kunoke nicwaku bimobim mi dhanu?

      Gimoko i kum Ker pa Mungu kende (1:43)

      Nen lembe ma Biblia unyutho iwi dhanu elufu dak acel pier ang’wen wi ang’wen (144000) ma Yehova ung’iyo pi nicibimo karacelo ku Yesu i polo.

      “Jukani ma gicidho i polo?” (Thiwiwec mi jw.org)

      Ang’o m’ukonyo dhaku moko ninyang’ nia Mungu kende re ma bikelo lembe m’atira i ng’om keni?

      “Ayi m’atuc ninyang’ ko nia lembe m’atira ngo bithum” (Cew!, dwi mir 11, 2011)

      a Wabiweco iwi cikne moko m’uneno kurajo i thenge mir 3 mi buku maeni.

  • Ker pa Mungu dong’ ubebimo!
    Icopo kwo kud anyong’a rondo ku rondo!—Buku mi ponjo Biblia
    • Ponji mi 32. Yesu Kristu udoko Rwoth i polo man emaku uluth mi ker, ebebimo ko iwi ng’om.

      PONJI MI 32

      Ker pa Mungu dong’ ubebimo!

      Ker pa Mungu ucaku nibimo i polo i oro elufu acel dak abung’wen kud apar ang’wen (1914). Eno tie bende oro ma kajik ceng’, niwacu nindo ma tokcen mi bimobim mi dhanu, ucaku i iye. Wang’eyo lembuno nenedi? Wakenen gin ma Biblia ular uyero pi orone, lembe m’ubetimere i ng’om keni, man kura mi dhanu mi ng’ombe niai i oro 1914.

      1. Gin ma Biblia ular uyero

      Biblia ular uyero i buku pa Daniel nia Ker pa Mungu bicaku bimo kinde ma nindo ma julwong’o nia “nindo abiro” bithum i iye. (Daniel 4:16, 17) Oro dak ma lee i ng’eye, Yesu udok ulwong’o nindo ma rom eno nia “nindo ma juketho mi thek,” man enyutho nia fodi nwang’u nindone uthum ungo saa maeca. (Luka 21:24) Dong’ nindone udok uthum awene? Calu ma wabineno, edok ethum i oro 1914.

      2. Lembe m’ubetimere i ng’om man kura mi dhanu niai i oro 1914

      Nindo moko, julub pa Yesu gipenje kumae: “Ang’o ma bibedo giranyutha mi bedonuti peri man mi kajik mi ng’omi?” (Matayo 24:3) Kinde ma Yesu ubedwoko wang’ penji maeno, enyutho bende lembe dupa dit ma bicaku timere i ng’om keni i ng’ei m’ebidoko Rwoth mi Ker pa Mungu i polo. I kind lembene, moko tie lwiny, kec, man digidi. (Som Matayo 24:7.) M’uweko maeno, Biblia ular uyero bende nia kura mi dhanu mi “kajik ceng’” bidoko rac man “ma ciro tek.” (2 Timoteo 3:1-5) Lembe maeno ceke ubenen kamaleng’, asagane niai i oro 1914.

      3. Pirang’o ng’om ubenyothere magwei niai ma Ker pa Mungu ucaku nibimo?

      Nindo ma nok kende i ng’ei ma Yesu udoko Rwoth mi Ker pa Mungu i polo, ecaku kiedo lwiny i dhu Sitani ku pajogi pare. Eloyo Sitani ku jupare zoo. Biblia uwacu nia “jubolo [Sitani] piny i ng’om man jumalaika pare de jubologi karacelo kude.” (Lembanyutha 12:9, 10, 12) Sitani utie ku kwinyo ma lee dit pilembe eng’eyo nia ceng’ini eni jubinyothe cen. Pieno ebenyayu peko ku masendi ma tung’ tung’ i ng’om zoo. Eno re m’uketho lembe mi ng’om udoko rac akeca! Re lem ma ber utie nia Ker pa Mungu bidaru peko maeno pet.

      MED NYANG’ PERI

      Kawoni wabineno lembe m’ukonyowa ning’eyo nia Ker pa Mungu ucaku nibimo i oro 1914. Wabineno bende kite ma waromo nyutho ko nia wayiyo andha ya Ker pa Mungu ubebimo kawoni.

      4. Kwan ma jutimo niai i lembila mi Biblia ubenyutho nia juketho Ker i oro 1914

      Nen VIDEO.

      VIDEO: Ker pa Mungu ucaku bimo i oro 1914 (5:02)

      I rundi ma con, Mungu uketho Nebukadnezar m’ubino ubimo mi Babeli uleko lek moko, man i lekne, Mungu unyutho ire lembe ma bitimere i ng’eye. Ka wasomo lek maeno ku thelembene ma Daniel utuco i Biblia, wabinyang’ kamaleng’ nia ubimo eno uleko lembe ma bitimere i ker pare gire, man bende lembe m’uneno Ker pa Mungu.​—Som Daniel 4:17.a

      Som Daniel 4:20-26, man i ng’eye wutii ku lembe mi sanduku mi mbaya m’ulubo pi nidwoko wang’ penji m’ulubo e:

      • (A) Ubimo Nebukadnezar uneno ang’o i lek pare?​—Nen verse mi 20 ku mi 21.

      • (B) Nimakere ku lekne, lembang’o ma bitimo yen m’eneno?​—Nen verse mi 23.

      • (C) Lembang’o ma bidotimere kinde ma “nindo abiro” bithumi?​—Nen verse mi 26.

      Winjiri m’utie i kind yen ma Nebukadnezar uleko ku Ker pa Mungu

      LEMBILANE (Daniel 4:20-36)

      Bimobim

      (A) Yen ma dit mandha

      Yen ma dit mandha.

      Dhu bimobimne ujik

      (B) ‘Ng’ond yende piny,’ man wek ‘nindo abiro ukadhi’

      Cudho yen ma jutwiyo wiye ku thol mi cuma ku mi mola.

      Bimobimne udok kakare kubang’e

      (C) ‘Ker peri [bidok] giri kendo’

      Yen ma dit mandha.

      Kite ma lembilane upong’o ko wang’ ma kwong’a . . .

      • (D) Yen ubenyutho ng’a?​—Nen verse mi 22.

      • (E) Dhu bimobim pare ukeujik nenedi?​—Som Daniel 4:29-33.

      • (F) Kinde ma “nindo abiro” ugam uthum, lembang’o m’udok utimere ni Nebukadnezar?​—Som Daniel 4:34-36.

      KITE M’EPONG’O KO WANG’ MA KWONG’A

      Bimobim

      (D) Nebukadnezar m’ubimo mi Babeli

      Ubimo Nebukadnezar ucungo ku kuhaya.

      Dhu bimobimne ujik

      (E) I ng’ei oro mi 606 W.N.Y., rieko pa Nebukadnezar unyothere man edoko ve abelu, uketho etuc ungo nibimo pi oro abiro mandha

      Nebukadnezar uvuto i ng’om man ebecamu ithlum calu lei.

      Bimobimne udok kakare kubang’e

      (F) Rieko pa Nebukadnezar udwogo man edoko ni dhanu ma njwa calu m’i wang’e, e edok iwi ker pare kendo

      Ubimo Nebukadnezar ung’ayu wang’e i polo man erieyo cinge ario zoo yo kuca.

      Kite ma lembilane upong’o ko wang’ mir arionde . . .

      • (G) Yen ubenyutho jukani?​—Som 1 Lemkei 29:23.

      • (H) Dhu bimobim migi ujik nenedi? Wang’eyo nenedi nia kadok kinde ma Yesu ubino i ng’om keni de nwang’u fodi bimobimne udok ungo kakare kubang’e?​—Som Luka 21:24.

      • (I) Bimobimne udok kendo kubang’e awene man edok ke ku kakani?

      KITE M’EPONG’O KO WANG’ MIR ARIONDE

      Bimobim

      (G) Jubim m’ulwobiri iwi ker mi Israel man ma gibed gibimo kaka Mungu

      Jubim ma tung’ tung’ m’ulwobiri iwi komker mi Israel. Der uberieny i wigi.

      Dhu bimobimne ujik

      (H) Junyotho Yeruzalem, e the bimobim mi Jubim mi Israel ujik pi oro 2 520

      Mac ubewang’u Yeruzalem ma con i oro 607 W.N.Y. I ng’eye ke, oro 2 520 udok ukadhu.

      Bimobimne udok kakare kubang’e

      (I) Yesu udoko Rwoth mi Ker pa Mungu man ecaku bimo i polo

      Yesu ubebimo wi ng’om kud i komker pare i polo niai i oro 1914 N.N.Y. Der uberieny i wiye.

      Nindo abirone ugalu rukani?

      Theng Biblia moko bekonyowa ninyang’ ma ber i thenge mange. Ku lapor, buku mi Lembanyutha unyutho nia nindo adek ku nusu mi lembila utie ceng’ 1 260. (Lembanyutha 12:6, 14) Nindo abiro mi lembila ke utie ceng’ adek ku nusu wang’ ario, niwacu ceng’ 1 260 wang’ ario. Ka wadiko kwan maeno, wanwang’u ceng’ 2 520. Saa mange, Biblia betiyo ku wec ma nia “ceng’” kunoke nindo, pi ninyutho oro. (Ezekiel 4:6) I lembila mi “nindo abiro” mi buku pa Daniel bende lembene tie kumeno, niwacu ceng’ 2 520 ubenyutho oro 2 520.

      5. Niai i oro 1914, ng’om udoko rac ma sagu

      Nen VIDEO.

      VIDEO: Ng’om udoko rac ma sagu niai i oro 1914 (1:10)

      Yesu ular unyutho kite ma lembe bidoko rac ko i ng’om keni i ng’ei m’ebidoko Rwoth. Som Luka 21:9-11, man i ng’eye wuwec iwi penji m’ulubo e:

      • I kind lembe ma Biblia ukwanu, ma kani m’idaru neno ubetimere kunoke m’idaru winjo pire?

      Jakwenda Paulo ukoro kite ma kura mi dhanu bidoko ko i kajik ceng’ mi bimobim mi dhanu. Som 2 Timoteo 3:1-5, man i ng’eye wuwec iwi penji m’ulubo e:

      • I kind timo ma Biblia ukwanu, ma kani m’ineno dhanu utie ko kaka m’ikwo i iye?

      Cal: cal m’unyutho lembe m’ubetimere i ng’om man kura mi dhanu i kajik ceng’. 1. Jadit mi juaskari moko ucungo iwi bop man ebekok m’erieyo cinge arieya. 2. Udi urwombere i ng’ei digidi m’uyengo ng’om. 3. Avio mi lwiny. 4. Udul dhanu m’uumo dhoggi ku mask gibewotho woko. 5. Udi moko ario ma wiw i adhura mi New York umaku mac kinde ma jurunek ugudogi. 6. Jalwo moko ubetiyo ku yath mi mero. 7. Jalwo moko ukunjo cinge man ebekok ku kwinyo iwi dhaku pare. 8. Drog man kong’o ma tung’ tung’ ma merojo. 9. Mon moko ario m’ukendiri i ayi ma ng’om ukelo gibemaku fotho ma julwong’o selfi. 10. Jagoy mizik moko ucoko dhu dhanu lee mandha i konser. 11. Jaranek moko ubeng’uro bom ma julwong’o Koktay Molotov iwi dhanu.

      6. Nyuth ku timo nia iyiyo andha ya Ker pa Mungu ubebimo kawoni

      Som Matayo 24:3, 14, man i ng’eye wuwec iwi penji m’ulubo e:

      • Tic ma kani ma pire tek m’ubenyutho kamaleng’ nia Ker pa Mungu ubebimo eni de?

      • Icopo nyutho nenedi nia in de ibedikiri i tije?

      Ker pa Mungu dong’ ubebimo, man ceng’ini eni ebicaku bimo bende wi ng’om zoo. Som Juebrania 10:24, 25, man i ng’eye wuwec iwi penji m’ulubo e:

      • Calu ma “wabeneno nia ceng’ maeno udhingo,” wan ceke wacikara nitimo ang’o?

      Cal: 1. Japonj Biblia moko ucidho i coko mi Jumulembe pa Yehova. 2. Japonj Biblia ma rom eno uberweyo lembanyong’a ni ng’atu moko m’eng’eyere kude.

      Kan ing’eyo lembe moko ma romo nikonyo man nibodho kwo mi dhanu mange, icopo timo ang’o ku lembene?

      NG’ATU MOKO ROMO PENJI KUMAE: “Pirang’o Jumulembe pa Yehova gibed giwacu nia oro 1914 utie oro ma pire tek lee?”

      • Icopo dwoko nenedi?

      I ADUNDO

      Gin ma Biblia ular uyero, kwan ma jutimo niai i lembila mi Biblia, man lembe m’ubetimere i ng’om maeni ubenyutho kamaleng’ nia Ker pa Mungu dong’ ubebimo. Wabinyutho nia wayiyo andha lembuno nwang’u waberweyo pi Kerne man wabedikara i coko mwa ma tung’ tung’.

      Penji mi poyowic

      • Kinde ma nindo abiro ma Biblia ular uyero pire i buku pa Daniel uthum, lembang’o m’ugam utimere?

      • Ang’o m’uketho iyiyo nia Ker pa Mungu ucaku bimo andha i oro 1914?

      • Iromo nyutho nenedi nia iyiyo andha ya Ker pa Mungu dong’ ubebimo?

      Lembe m’ukwayu itim

      TIM SAYUSAC

      Nen lembe ma jurukiew kpawa man dhanu mange bende giyero iwi alokaloka m’ubetimere i ng’om maeni niai i oro 1914.

      “Kura mi dhanu unyothere akeca niai awene?” (Cew!, dwi mir 4, 2007)

      Lembila ma nwang’ere i Matayo 24:14 uloko kwo pa jalwo moko lee dit. Som lembe m’ekoro i thiwiwec ma e.

      “Agam amaru tuko mi Baseball nisagu lembe mange ceke!” (Otkur ma Wiw, Na. 3, 2017)

      Wang’eyo nenedi nia lembila ma nwang’ere i Daniel thek 4 uweco pi Ker pa Mungu?

      “Ker pa Mungu ucaku bimo niai awene? (Thenge mi 1)” (Otkur ma Wiw, nindo 1, dwi mir 10, 2014)

      Ang’o m’unyutho nia “nindo abiro” ma juweco pire i buku pa Daniel thek 4 uthum tap i oro 1914?

      “Ker pa Mungu ucaku bimo niai awene? (Thenge mir 2)” (Otkur ma Wiw, nindo 1, dwi mir 11, 2014)

      a Nen thiwiwec ario ma tokcen ma nwang’ere i thenge mi “Tim sayusac” i thum pa ponji maeni.

  • Lembe ma Ker pa Mungu bitimo
    Icopo kwo kud anyong’a rondo ku rondo!—Buku mi ponjo Biblia
    • Ponji mi 33. Dhanu m’ubekwo i ng’om m’udoko ni paradizo.

      PONJI MI 33

      Lembe ma Ker pa Mungu bitimo

      Ker pa Mungu dong’ ubebimo i polo; ceng’ini eni ebicaku bimo bende iwi ng’om keni man ebikelo alokaloka ma dongo. Wakenen lembe moko ma beco ma bitimere i the Kerne.

      1. Ker pa Mungu bikelo akwiyacwiny man lembe m’atira nenedi i ng’om keni?

      Yesu, ma tie Rwoth mi Ker pa Mungu, binyotho jutimrac man bimobim ceke mi ng’om i lwiny mi Armagedon. (Lembanyutha 16:14, 16) Saa maeca, lembe ma e ma Biblia ung’olo bigam timere i zoone. Eng’olo kumae: “Kum i nindo ma nyanok ci (niwacu edong’ nyanok kende), e judubo bibedo mbe.” (Zaburi 37:10) Nikadhu kud i Ker maeno, Yesu biketho akwiyacwiny man bedopwe, niwacu lembe m’atira, i ng’om zoo.​—Som Isaya 11:4.

      2. Kwo bidoko nenedi i ng’om keni kinde ma yeny pa Mungu bikwong’o timere i iye?

      I the Ker pa Mungu, “won bedopwe bicamu ng’om ni aba, man ebibedo i ie mi nja.” (Zaburi 37:29) Kepar nia ibekwo i ng’om ma dhanu ceke m’i iye gitie weg bedopwe, gitie dhanu m’atira, gimaru Yehova man gimariri i kindgi! Eno tie lembe ma bitimere andha. M’umedo maeno, ng’atu moko acel de mbe ma kume biremo, man dhanu ceke bikwo rondo ku rondo.

      3. I ng’ei ma jubinyotho judubo, Ker pa Mungu bidotimo lembang’o?

      I ng’ei nyotho judubo, Yesu bibimo pi oro elufu acel (1000). I kind nindo maeno, en karacelo ku dhanu elufu dak acel pier ang’wen wi ang’wen (144000) ma gibibimo kugi, gibikonyo dhanu m’i ng’om kara gidok leng’, niwacu m’umbe ku dubo i kumgi. I thum pa oro maeno, ng’om zoo bidoko paradizo, niwacu kabedo ma leng’ mandha. Dhanu mi iye ceke bikwo kud anyong’a pilembe nwang’u gibeworo cik pa Mungu. I ng’eye, Yesu bidwoko Kerne i cing Won ma Yehova. Saa maeca, ‘nying’ [Yehova] bibedo leng’’ nisagu m’i wang’e zoo. (Matayo 6:9, 10) Pirang’o? Pilembe nwang’u lembe daru nyuthere cuu mandha nia Yehova re ma tie Jabim ma cuu man ma dieng’ pi dhanu pare. E Yehova bigam nyotho Sitani ku pajogi pare man bende dhanu ceke m’ung’iyo nijai i kum bimobim Pare. (Lembanyutha 20:7-10) Lembe ma beco maeno ma Ker pa Mungu bitimo, bibedo rondo ku rondo.

      MED NYANG’ PERI

      Wakenen kawoni thelembe ma copo cwaluwa nibedo ku genogen ma tek nia Mungu bitiyo ku Ker pare pi nipong’o lembe ceke ma Biblia ung’olo pi nindo m’ubino.

      4. Ker pa Mungu bikabu bimobim mi dhanu

      “Dhanu bimo wi dhanu wagi pi nitime rac.” (Eklizia 8:9, NWT) Ento nikadh’i Ker pa Mungu, Yehova bidaru lembe maeno ma tie atira ngo.

      Som Daniel 2:44 man 2 Juthesaloniki 1:6-8, man i ng’eye wuwec iwi penji m’ulubo e:

      • Yehova giku Yesu ma Wode gibitimo nenedi gavmenti man jubim mi ng’om ku dhanu ceke m’ubediko cing’gi kugi?

      • Lembe m’iponjo iwi Yehova giku Yesu ubetielo cwinyi nenedi nia gibitimo lembe ma pwe man m’atira?

      Yesu ubebimo iwi ng’om m’udoko ni paradizo.

      5. Yesu tie Rwoth ma cuu mandha

      Calu Yesu re ma tie Rwoth mi Ker pa Mungu, ebitimo lembe dupa dit ma beco ni lwak mi Ker pare i ng’om keni. Nen VIDEO kara inyang’ nia Yesu udaru nyutho nia etie kud ava mi konyo dhanu, man kara inyang’ nia Mungu umiyo ire en tego ku copo mi timo kumeno.

      VIDEO: Yesu unyutho gin ma Ker pa Mungu bitimo (1:13)

      Lembe ma Yesu utimo kinde m’ebino i ng’om keni, ubedo kende kende abila mi lembe dupa ma beco ma Ker pa Mungu bitimo. Kenen mugisa ceke ma jurieyo kae man nyuth nia ibekuro ma kani dhe m’i kindgi kud ava ma dit. Som verse ma nwang’ere i dhu mugisaman pi nikonyi inyang’ i iye ma ber.

      KINDE M’EBINO I NG’OM KENI, YESU . . .

      KUD I POLO, YESU . . .

      • biketho dhanu ceke bikwo m’umbe remo. ​—Isaya 33:24.

      6. Wabikwo ma ber magwei i the Ker pa Mungu

      Ker pa Mungu bimiyo iwa kwo ma ber mandha ma Yehova ukeco pi dhanu niai con. Dhanu bikwo rondo ku rondo i ng’om ma bidoko ni paradizo. Nen VIDEO pi ning’eyo kite ma Yehova ubetiyo ko ku Wode ma Yesu pi nibino pong’o lembe m’ekeco pi dhanu.

      VIDEO: Abila mi lembe ma beco mi nindo m’ubino (4:38)

      Som Zaburi 145:16, man i ng’eye, wuwec iwi penji m’ulubo e:

      • Ning’eyo nia Yehova bipong’o yeny mi “gin ceke ma kwo kubang’e kubang’e” uketho ibewinjiri nenedi?

      DHANU MOKO BEYERO KUMAE: “Ka wan ceke wadiko cingwa ci, waromo daru peko mi ng’om.”

      • Peko ma kani ma dhanu copo daru ngo ma Ker pa Mungu kende re ma bidaru?

      I ADUNDO

      Ker pa Mungu bitimo lembe ceke ma Mungu ubemito. Ebidwoko ng’om zoo ni paradizo. Dhanu ma beco re ma bikwo i ng’ombe man gibiworo Yehova rondo ku rondo.

      Penji mi poyowic

      • Ker pa Mungu bidwoko nying’ Mungu leng’ nenedi?

      • Pirang’o wacopo bedo ku genogen nia Ker pa Mungu bipong’o lembe ceke ma Biblia ung’olo?

      • I kind lembe ceke ma beco ma Ker pa Mungu bitimo, ma kani dhe m’ibekuro kud ava nisagu?

      Lembe m’ukwayu itim

      TIM SAYUSAC

      Som thiwiwec ma e pi ning’eyo nia Armagedon utie ang’o.

      “Lwiny mir Armagedon tie ang’o? (Thiwiwec mi jw.org)

      Nen lembe ma bitimere i kind nindo ma Yesu ulwong’o nia “masendi ma dit.”​—Matayo 24:21.

      “Masendi ma dit utie ang’o?” (Thiwiwec mi jw.org)

      Nen kite ma juruot gicopo paru ko karacelo pi mugisa ma gibinwang’u i paradizo.

      Kepar nia in’i Paradizo (1:50)

      I thiwiwec ma e, “Con abed apenjara ku penji dupa,” nen kite ma ng’atu moko m’ugam ujai ni gavmenti utuc ninwang’u ko dwokowang’ penji m’ubino sende.

      “Biblia loko kwo” (Otkur ma Wiw, nindo 1, dwi mi 1, 2012)