Jukani ma gicidho i polo?
Lembe ma Biblia udwoko
Mungu ubeng’iyo wend Jukristu moko ma nok ma gigwoko bedoleng’ migi kara i ng’ei tho, gicer pi nicikwo i polo. (1 Pethro 1:3, 4) Kinde ma jung’iyogi, ukwayu gimediri nigwoko yiyoyic migi ubed tek man timo migi ubed leng’, kara girom pi ninwang’u giralaga migi mi polo.—Juefeso 5:5; Jufilipi 3:12-14.
Dhanu ma gibicidho i polo gibitimo ang’o kuca?
Karacelo ku Yesu, gibibedo jubim man julam pi oro 1 000. (Lembanyutha 5:9, 10; 20:6) Gin re ma gibibedo “polo ma nyen,” kunoke bimobim mi polo ma bibimo wi “ng’om ma nyen,” niwacu dhanu m’iwi ng’om. Jubim maeno mi polo, gibikonyo dhanu kara gidok i kwo m’atira ma Mungu ular ukeco ku kwong’a pi dhanu.—Isaya 65:17; 2 Pethro 3:13.
Dhanu adi ma gibicer pi nicikwo i polo?
Biblia unyutho nia dhanu 144 000 gibicer pi nicikwo i polo. (Lembanyutha 7:4) I ginmawokiwang’ ma nwang’ere i Lembanyutha 14:1-3, jakwenda Yohana uneno “Nyathi rombo ucungo iwi Got Sayuni, man karacelo kude dhanu elufu dak acel pier ang’wen wi ang’wen.” I ginmawokiwang’ maeno, “Nyathi rombo” ubenyutho Yesu m’ucer. (Yohana 1:29; 1 Pethro 1:19) “Got Sayuni” ke ubenyutho nia Yesu man dhanu 144 000 ma gibibimo karecelo kude i polo, gin’i kabedo ma malu nisagu.—Zaburi 2:6; Juebrania 12:22.
‘Ju ma julwong’o man ma jung’iyogi’ pi nibimo karacelo ku Kristu i Ker maeno, gitie “udul ma nok.” (Lembanyutha 17:14; Luka 12:32) Eno ubenyutho nia ka juporogi ku rombe mange pa Yesu, wendgi tie nyanok.—Yohana 10:16.
Paru ma cuu ngo ma dhanu gitie ko iwi ju ma gicidho i polo
Paru ma cuu ngo: Dhanu ceke ma beco gicidho i polo.
Lemandha: Mungu ung’olo kwo ma rondo ku rondo iwi ng’om ni dhanu dupa ma beco.—Zaburi 37:11, 29, 34.
Yesu uwacu kumae: “Ng’atu moko mbe m’uidho i polo.” (Yohana 3:13) I ayi maeno, enyutho nia dhanu ma beco ma githo ma nwang’u fodi ebino ngo, calu ve Abraham, Musa, Yob man Daudi, gicidho ngo i polo. (Tic mi Jukwenda 2:29, 34) Enre gitie ku genogen mi cer pi nikwo iwi ng’om.—Yob 14:13-15.
Julwong’o cer mi dhanu ma gibicikwo i polo nia “cer ma kwong’a.” (Lembanyutha 20:6) Eno ubenyutho nia cer mange bibedo nuti. Ebibedo cer m’i ng’om.
Bibla ubeponjo nia i the bimobim mi Ker pa Mungu, “tho bibedo nuti kendo ngo.” (Lembanyutha 21:3, 4) Lembang’ola maeno bitimere iwi ng’om, pilembe i polo niai con tho umbe nyanok de.
Paru ma cuu ngo: Ng’atuman ng’iyo gire ka nyo ebinwang’u kwo i polo kunoke iwi ng’om.
Lemandha: Mungu re ma ng’iyo nia Jukristu ma kani ma gigwoko bedoleng’ migi binwang’u “sukulia mi lwong’o ma malu,” niwacu genogen mi cikwo i polo. (Jufilipi 3:14) Etie ngo yeny pa ng’atini kunoke ava m’etie ko re ma ketho jung’iye.—Matayo 20:20-23.
Paru ma cuu ngo: Genogen mi kwo iwi ng’om utie gin ma kabang’e mbe, ma jumiyo kende kende ni dhanu ma giromo ngo nicidho i polo.
Lemandha: Mungu ulwong’o dhanu ma gibinwang’u kwo ma rondo ku rondo iwi ng’om nia “dhanu para,” “ju m’afoyo hai,” man “ju ma Yehova mio mugisa i wigi.” (Isaya 65:21-23) Gibinwang’u rwom mi pong’o lembakeca ma Mungu ular ubino ko ku kwong’a pi dhanu: nikwo rondo ku rondo m’umbe dubo i paradiso iwi ng’om.—Thangambere 1:28; Zaburi 115:16; Isaya 45:18.
Paru ma cuu ngo: Wel 144 000 ma juweco pire i buku mi Lembanyutha utie lapor.
Lemandha: Kadok nwang’u wel moko ma nwang’ere i buku mi Lembanyutha utie lapor de, re welne moko utie ngo lapor. Ku lapor, “nying’ apar ario mi jukwenda apar ario pa Nyathi rombo.” (Lembanyutha 21:14) Rom rom kumeno, kenen lembe moko ma romo konyi ninyang’ nia wel 144 000 utie ngo lapor.
Lembanyutha 7:4 unyutho “wend ju ma juketho ayi i kumgine [niwacu ju ma juyiyo igi nicikwo i polo], elufu dak acel pier ang’wen wi ang’wen (144 000).” I lembe ma rom ma jubeweco i wie i verse maeni, judok juweco iwi udul mange ma julwong’o nia “udul ma dit ma ng’atu moko mbe ma copo kwanu.” Dhanu maeno bende ma gitie “udul ma dit,” gibinwang’u both i bang’ Mungu. (Lembanyutha 7:9, 10) Ka nwang’u wel 144 000 utie lapor, nwang’u tung’ tung’ ubedo mbe i kind wel maeno kud udul ma wendgi kwanere ngo.a
M’umedo maeno, juwacu nia dhanu 144 000 maeno “jung’iewogi kud i kind dhanu calu landu wi mwoka.” (Lembanyutha 14:4) “Landu wi mwoka” tie gin moko ma nok mandha m’utie lanyuth mi gin ma lee. Pieno, etie lembe ma kakare nia ebenyutho wend dhanu ma karacelo ku Kristu, gibibimo wi udul ma kwanere ngo ma gibikwo iwi ng’om.—Lembanyutha 5:10.
a Rom rom kumeno, pi wel 144 000 ma nwang’ere i Lembanyutha 7:4, professeur Robert L. Thomas ukiewo kumae: “Etie wel ma tap, tung’ ku wel ma kwanere ngo ma nwang’ere i thek mir 7:9. Ka nwang’u etie lapor, nwang’u wel mange ceke m’i buku maeni utie lapor.”—(Revelation 1-7: An Exegetical Commentary, mbaya 474.)