Icopo timo ang’o pi nibedo jarimo mandha?

NYO saa moko idaru nweng’iri nia ibenyego ku peko peri kendi? Wabekwo i “nindo mi can ma ciro tek” ma copo ketho wawinjara nia cwinywa utur man nia watie kendwa. (2 Tim. 3:1) Ento, wambe ku yeny mi nyego ku peko mwa kendwa. Biblia unyutho nia pire tie tek nibedo ku jurimo mandha i “nindo mi can.”—Rie. 17:17, NWT.

KITE MA JURIMO MANDHA GICOPO KONYO KOWA

Jakwenda Paulo uwotho ku jurimbe moko i tic pare mi misioner, man gikonye i ayi dupa. (Kol. 4:7-11) Kinde ma jutwiyo Paulo i Roma, jurimbe gitimo lembe ma nwang’u ecopo timo ngo gire. Ku lapor, Epafrodito utero ire piny m’ebino ku yenyne m’umego ku nyimego mi Filipi gioro. (Filip. 4:18) Tikiko upoko barua ma Paulo ukiewo ni cokiri ma tung’ tung’. Ku kony mi jurimbe, Paulo utimo tic pare kadok kinde ma jubino kuro kume i ot kunoke kinde m’ebino kende i otkol. Tin ke icopo timo ang’o pi nibedo jarimo mandha?

Lapor ma tung’ tung’ mi rundi ma tin ubenyutho nia pire tie tek lee nibedo jarimo mandha. Wakewecu pi nyamego moko m’unyutho nia etie jarimo mandha ni Elisabet m’utie jayab yo moko mir Espagne. Saa ma junwang’u nia min Elisabet utie ku kanser ma dong’ ubecinege, nyamegone uoro ire mesaj dupa mi tielocwiny m’ujengere iwi verse mi Biblia. Elisabet uyero nia “mesaj maeno umiyo ire tego mi nyego ku nindoman m’umbe niwinjere nia etie kende.”—Rie. 18:24.

Wacopo dwoko mer m’i kindwa ku juyic wadwa doko tek nwang’u wabekonyogi pi nicidho i coko kunoke i tic mi lembanyong’a. Ku lapor, icopo konyo umego kunoke nyamego moko m’utii pi nicidho i coko kunoke i tic mi lembanyong’a. Tek itimo kumeno, wubitielo cwinywu i kindwu. (Rum. 1:12) Ento, juyic wadwa moko gimbe ku copo mi wok kud i pacu migi. Wacopo bedo igi ni jurimo mandha nenedi?

BED JARIMO MANDHA NI JU MA GIGONJO I PACU

Juyic wadwa moko gitie ku peko mi yotkum kunoke lembe mange m’ubecerogi nicidho i coko. Wakewecu iwi lapor pa David ma junwang’u nia utie ku kanser mi rimo. Emaku yadhe pi dwi ma kadhu abusiel. Ku kind thiethne, David giku Lidia ma min ot pare gibed gitimo coko ku yore mi video.

Jurimbgi mi cokiri ukonyogi nenedi? Nja i ng’ey coko, jumoko ma gitimo coko i Ot Ker gibed gitimo kero niweco ku David giku Lidia ku yore mi video. M’umedo maeno, ka David giku Lidia giculo jibu i coko, juyic waggi gidog gioro igi mesaj mi tielocwiny. Eno ubedo ku matoke ma kani? David giku Lidia gibed giwinjiri nia gitie ngo kendgi.

Wacopo maku yub mi rweyo karacelo ku ju ma gigonjo i pacu migi. Pieno wacopo timo nyathin alokaloka moko i program mwa. I ayi maeno, wabinyutho nia wawil ungo kugi. (Rie. 3:27) Ineno nenedi kan ipangu nirweyo kugi ku barua kunoke ku telefon? Judong cokiri gicopo pangu niketho ju m’ugonjo i pacu migi gilub coko mi tic mi lembanyong’a ku yore mi video. David giku Lidia gifoyo ku yub ma kumeno lee mandha. David ukoro kumae: “Nirombo kud umego ku nyimego mwa pi niweco pi saa ma nyanok man pi rwo kende ci umiyo amora lee mandha i kumwa.” M’umedo maeno, tek eromo bedo ngo lembe mir ariti man kan ecopere, saa moko iromo bepangu nicidho ku japonj Biblia yo pa jarwey moko m’ugonjo i pacu pi nitelo kude wi ponji mi Biblia.

Kinde ma waberweyo kud umego ku nyimego mwa ma gigonjo i pacu migi, watuc ning’eyogi cuu man waneno kite migi ma beco, man eno dwoko kindwa ceng’ini kugi. Ku lapor, kinde m’iberweyo ku dhanu ma kumeno man ibeneno kite ma gibetiyo ko ku Lembe pa Mungu ku bodho pi nimulo adunde dhanu, m’umbe jiji ibimarugi lee nisagu. Tek ibekonyo juyic wedu nicidho i coko man i lembanyong’a, ibinwang’u jurimo ma nyen.—2 Kor. 6:13.

Paulo unwang’u jukocwiny kinde ma jarimbe ma Tito ubino i vute. (2 Kor. 7:5-7) Kpawa maeni ubepoyo wiwa nia wacopo juko cwiny ju ma gin’i yeny ku wec mwa kende ngo, ento bende nwang’u wabebedo i vutgi man wabetimo gin ma wacopo pi nikonyogi.—1 Yoh. 3:18.

BED JARIMO MANDHA I SAA MI RAGEDO

Umego ku nyimego mwa mi Russie gitie lapor ma ber mi kite mi konyiri i kindjo. Wakewecu iwi lapor pa Sergey giku Tatyana ma min ot pare. I ng’ey ma polisi ukeyo i ot migi, gicidho kugi pi nicikiewo dhoggi. Jular jugonyo Tatyana man edok i pacu. Sergey ukoro kumae: “Saa ma [Tatyana] utundo i pacu, nyamego moko ma won tegocwiny utundo ndhu ndhu i pacu mwa. Jurimbwa dupa gibin gikonyowa ku pangu piny m’i ot mwa udok kakagi.”

Sergey umedo kumae: “Amaru Lembrieko 17:17 lee mandha. Giragora maeni uyero nia ‘jarimo mandha nyutho mer saa ceke, man etie umego ma junyolo pi nindo mi can.’ Anyang’ cuu i thelembe mi wec maeni i saa mi ragedo pilembe abino ku yeny mi jurimba lee pi ninyego kude. Yehova umiyo ira jurimo m’ukonya ku tegocwinygi.”a

Calu ma peko mi ng’om maeni ubemedere ameda, watie ku yeny mi kony mi jurimbwa lee mandha. Wabibedo ku yeny migi lee nisagu i saa mi masendi ma dit. Pieno, wek watimu kero wabed jurimo mandha niai kawoni!—1 Pet. 4:7, 8.