Nyo asu icopo nwang’u ponji ma nyen i ponji mir ukungu mi Biblia?

1. Ponji mi Biblia ubedo ku matoke ma kani i wii kinde m’iponjo lemandha wang’ ma kwong’a?

PONJI mir ukungu mi Biblia uloko kwo mwa. Ku lapor, kinde ma waponjo nia nying’ Mungu tie Yehova, kindwa ucaku doko ceng’ini kude. (Isa. 42:8) Kinde ma waponjo lembe iwi ju m’utho, paru ma nia wedi mwa ku jurimbwa m’utho gibesendiri uthum. (Ekl. 9:10) Man kinde ma waponjo lembe iwi Paradizo m’iwi ng’om ma Mungu ung’olo pire, lworo mir anyim uthum kud i iwa. Cwinywa udoko tek nia waromo kwo pi kare ma nok kende ngo, niwacu pi oro 70 kunoke 80, ento rondo ku rondo.—Zab. 37:29; 90:10.

2. 2 Pethro 1:12, 13 ubenyutho nenedi nia kadok Jukristu m’uteng’ini de giromo nwang’u bero i kum ponji mir ukungu mi Biblia?

² Ukwayu ngo wawil nyanok de ku valer mi ponji mir ukungu mi Biblia. Jakwenda Pethro ukiewo barua pare mir ario ni Jukristu ma nwang’u “ucungo ma tek i lemandha.” (Som 2 Pethro 1:12, 13.) Ento saa m’ebekiewo igi, nwang’u juponji mi vupo ku dhanu ma woro ngo Mungu gibemito wingo wigi kud i cokiri. (2 Pet. 2:1-3) Pethro ubino mito edwok umego ku nyimego pare udok tek kara gicung nging’ nging’ i wang’ ariti maeno. Pi nitimo kumeno, epoyo wigi i kum ponji moko ma nwang’u dong’ ging’eyo. Ponji maeno bikonyogi kara gimediri nigwoko bedoleng’ migi nitundo i ajiki.

3. Pirang’o ukwayu Jukristu ceke gimediri ninyamu i ponji mir ukungu mi Biblia ma giponjo niai con? Kemii lapor moko.

³ Kadok nwang’u wadoko Jukristu m’uteng’ini de, re asu waromo nwang’u ponji ma nyen i ponji mir ukungu mi Biblia. Wakemak lapor pa jaratedo ma jabodho ku ng’atu ma fodi ubeponjo tedo aponja. Giromo tiyo ku jam wang’ dek ma rom pi nitedo kit cam moko. Ento pi oro ma dupa, jaratedo ma jabodho uponjo ayi mi tiyo ku jam wang’ dek ma rom eno i ayi ma tung’ tung’ pi nitedo ayi cam ma nyen man ma mit. Rom rom kumeno, ju m’udaru timo ni Yehova pi oro ma dupa ku juponj Biblia ma nyen giromo neno lemandha mir ukungu mi Biblia i ayi m’ukoc. M’umbe jiji, niai ma walimo batizo lembe ma wakadhu kud i igi man ayi ma watimo ko ni Yehova uwiliri. Pieno, ka watiyo ku ponji ma wanwang’u niai con i lembe ma wabenwang’ara ko kawoni, waromo nwang’u ponji ma nyen man ma copo konyowa lee. Wakenenu ponji ma Jukristu m’uteng’ini gicopo nwang’u i ponji mir ukungu moko adek mi Biblia.

YEHOVA UTIE JACWIC

4. Niponjo lemandha ma nia Yehova re m’utie Jacwic ubedo ku matoke ma kani i wiwa?

⁴ “Ng’atu m’ugiero piny ceke utie Mungu.” (Ebr. 3:4) Wang’eyo nia Jacwic ma riek nisagu zoo man ma jategokpo re m’ucwiyo ng’om ku kit kwo ceke ma n’i wiye. Ecwiyo wan bende, pieno eng’eyowa acel acel. Ento m’usagu zoo, edieng’ piwa. Eng’eyo gin ma ber nisagu zoo piwa. Ning’eyo lemandha ma yot maeno ma nia Yehova re m’utie Jacwic uketho wang’eyo nia pirang’o wabekwo.

5. Lemandha ma kani ma copo konyowa niponjo ninyutho jwigiri? (Isaya 45:9-12)

⁵ Lemandha ma nia Yehova re m’utie Jacwic copo miyo iwa ponji ma nia pire tie tek ninyutho jwigiri. Ku lapor, i ng’ey ma Yob ucaku dieng’ kwa pire gire man pi dhanu mange, Yehova upoyo wiye nia Etie Jacwic ma jategokpo. (Yob 38:1-4) Poyowic maeno ukonye ninyang’ nia yo pa Mungu dit nisagu pa dhanu. I ng’eye, jabila Isaya udwogo iwi paru ma rom eno kinde m’ekiewo kumae: “Nyo ulobo copo yero ni Jacwii agulu kumae: ‘Ibecwiyo ang’o?’”—Som Isaya 45:9-12.

6. Pire tie tek ninyamu i lembe iwi rieko man tego pa Jacwic mwa asagane i saa ma kani? (Nen bende cal.)

⁶ Ka ng’atini udaru timo ni Yehova pi oro ma dupa, eromo caku genere lee kakare nilokere i bang’ Yehova man Lembe pare pi nisayu telowic. (Yob 37:23, 24) Dong’ ecopo nwang’u bero ma kani kan ebenyamu i lembe iwi rieko man tego pa Jacwic ma kaporne mbe? (Isa. 40:22; 55:8, 9) Lemandha mir ukungu maeno romo konye ninyutho jwigiri man niyiko paru pare.

7. Rahela utimo ang’o pi ning’iyo kud alokaloka?

⁷ Rahela ma kwo i Slovenia unwang’u nia niparu pi Jacwic pare ukonye nijolo alokaloka moko ma dilo mwa uwodho. Ekoro kumae: “Saa moko ebed ebedo yot ungo ira nijolo yub m’umego ma gibetelo wiwa gimaku. Ku lapor, kadok i ng’ey m’aneno Lembe ma nyen mir 8 m’uweco pi yir tikjoa, akeawinjara rac mandha saa m’aneno pi wang’ ma kwong’a umego moko ubemiyo korolembe ku yir tike. Pieno arwo i bang’ Yehova pi nikwaye ekonya ang’ii kud alokaloka maeno.” Rahela unyang’ nia calu ma Yehova utie Jacwic mi polo ku ng’om zoo, etie ku copo mi telo wi dilo pare i ayi m’atira. Tek etie iri tek ning’iyo ku lero moko kunoke nijolo telowic moko ma nyen, ineno nenedi ka ku jwigiri inyamu i lembe iwi rieko man tego ma dit pa Jacwic mwa?—Rum. 11:33-36.

PIRANG’O MUNGU UWEKO MASENDI UBEMEDERE ASU?

8. Niponjo thelembe m’uketho Mungu uweko masendi ubemedere asu umiyo iri bero ma kani?

⁸ Pirang’o Mungu uweko masendi ubemedere asu? Dhanu moko ma nwang’u dwokowang’ penji maeni uvoyogi ng’eicwiny umakugi i kum Mungu, jumoko ke giparu nia Mungu mbe ambea zoo! (Rie. 19:3) Re in iponjo nia dubo ma walagu man koso bedoleng’ re m’ubenyayu peko i kumwa, ento Yehova ngo. Iponjo bende nia cirocir ma Yehova ubenyutho ni dhanu umiyo kaka ni milioni dupa mi dhanu ning’eye man ning’eyo kite m’ebidaru ko masendi pi magwei. (2 Pet. 3:9, 15) Lemandha maeno ujuko cwinyi man uketho idoko jarimbe.

9. Saa ma kani ma romo kwayu nia wapoy pi thelembe m’uketho Yehova ubeweko masendi umedere asu?

⁹ Wang’eyo nia ukwayu wakur ku cirocir nindo ma Yehova bidaru i iye masendi. Re asu ka wabenwang’ara ku peko, ka jubesendowa mananu kunoke ka ng’atu moko ma wamaru utho, waromo penjara ka nyo pirang’o Yehova ubegalu ku daru masendi. (Hab. 1:2, 3) I saa ma kumeno, etie lembe mi rieko nia wapar pi thelembe m’uketho Yehova ubeweko won bedopwe unwang’ere ku masendi.b (Zab. 34:19) Ukwayu wapar bende pi lembakeca pare ma nia ebidaru masendi wang’ acel pi nja.

10. Ang’o m’ujuko cwiny Anne i ng’ey tho pa min?

¹⁰ Lemandha ma wang’eyo iwi masendi copo konyowa niciro. Anne ma kwo i cula mi Mayotte, i Océan Indien, ukoro kumae: “Oro moko i ng’ey tho pa mama, awinjara ku can ma lee. Ento saa ceke awotho poy nia Yehova ngo re m’ubenyayu masendi i kum dhanu. Etie kud ava ma lee mi daru kwond masendi ceke man mi cero wedi mwa ku jurimbwa. Ninyamu i lembe iwi lemandha maeno umiyo ira kwiyocwiny mir adunde man udwogo tego i kuma.”

11. Ning’eyo thelembe m’uketho Yehova uweko masendi ubemedere ubecwaluwa nitimo ang’o?

¹¹ Ning’eyo lemandha iwi thelembe m’uketho Mungu uweko masendi ubemedere copo cwaluwa nimedara ku tic mi rweyo lembanyong’a. I ng’ey ma Pethro ukoro nia cirocir pa Yehova umiyo both ni ju ceke m’uloko cwinygi, ekiewo kumae: “Wupar cuu nia wucikuru nibedo kit dhanu ma nenedi. Wubed dhanu ma kura migi leng’ man ma timo migi ubenyutho nia gimoko kikiki i kum Mungu.” (2 Pet. 3:11) Acel m’i kind ‘timo ma nyutho nia wamoko kikiki i kum Mungu’ utie tic mi rweyo lembanyong’a. Calu Wegwa, wan de wamaru dhanu. Wabemito nia gin de gibin gikwo i ng’om ma nyen man ma pwe pa Mungu. Ku cirocir, Yehova ubeweko kaka mi timo ire ni dhanu mi kabedo m’ikwo i iye. Etie iri rwom ma lee nitimo tic karacelo ku Mungu man nikonyo dhanu ma wendgi lee kara giponj ning’eye i wang’ m’ajiki utundi!—1 Kor. 3:9.

WABEKWO I “KAJIK CENG’”

12. Niponjo nia wabekwo i “kajik ceng’” umiyo iwa bero ma kani?

¹² Biblia ukoro tap tap ayi ma kura mi dhanu bibedo ko i “kajik ceng’.” (2 Tim. 3:1-5) Ka waneno lembe m’ubekadhu i ng’etwa ci wanyang’ nia lembila maeno ubepong’o. Timo mi dhanu m’ubenyothere magwei ubetego cwinywa nia wacopo geno Lembe pa Mungu.—2 Tim. 3:13-15.

13. Nimakere ku lapor pa Yesu ma nwang’ere i Luka 12:15-21, ukwayu wapenjara ku penji ma kani?

¹³ Ning’eyo lemandha ma nia wabekwo i nindo mi kajik ceng’ ketho watimo lembe ku pidoic mir ularng’adi. Wakenenu ponji ma wacopo nwang’u iwi lembuno i lapor ma Yesu umiyo i Luka 12:15-21. (Som.) Pirang’o julwong’o jalonyo maeno nia “jakasegu”? Ubino ngo pi lonyo pare, ento pilembe eketho ngo wiye i kum lembe ma pire tek nisagu; ecoko “lonyo ire gire ma ke i wang’ Mungu e jalonyo ngo.” Ebino lemkasegu nitimo kumeno pilembe nwang’u edong’ ku saa ma nyanok pi nikwo. Mungu uyero ire kumae: “Diewor ma tin eni jubipenjo kwo peri i beng’i.” Calu m’ajiki mi ng’om maeni udhingo, waromo penjara kumae: ‘Nyo lembakeca mi kwo para ubenyutho nia atie ku pidoic mir ularng’adi? Abekonyo awiya para giketh lembakeca ma nenedi i kwo migi? Nyo abetiyo ku tego para, ku saa para man ku jamcinga pi nikanu lonyo ira gira kunoke pi nikanu lonyo i polo?’

14. Calu ma lapor pa Miki ubenyutho, pirang’o pire utie tek nipoy nia wabekwo i nindo mi kajik ceng’i?

¹⁴ Ayi ma waneno ko kwo copo lokere ka waparu nia wabekwo i nindo mi kajik ceng’. Lembuno uwok ni nyamego moko ma nyinge Miki. Ekoro kumae: “Saa m’anwang’u diplom mi sekonder, abino mito lee dit nia anwang’ tic moko ma biketho ebicopere ira niponjo lembe iwi leya. Abino bende ku lembakeca mi bedo jayab yo ma nja man mi citimo kaka ma yeny utie lee i iye. Jurimba m’uteng’ini gimiyo ira juk ma nia akepar kilili ka nyo andha eromo copere ira nitimo tic m’amaru lee man nitundo i kum lembakeca para mi tipo. Gipoyo wiya nia ng’om maeni udhingo ajikine, man nia i ng’om ma nyen abibedo ku kaka mi ponjo lembe iwi leya ceke m’amaru niponjo lembe i wigi, ke pi nja. Pieno ang’iyo kit ponjiri ma copo camu ngo saa lee, ento ma copo konya niponjo bodho m’atie ku yenyne. Eno uketho anwang’u tic m’umiyo ira sente man m’uweko ira saa m’atie ku yenyne pi nitimo tic pa jayab yo ma nja man i ng’eye nidok i Équateur kaka ma yeny utie lee i iye.” Kawoni Miki karacelo ku won ot pare gibetimo i tic mi twodiri i ng’om maeno.

15. Calu ma lapor pa Yakobo unyutho, pirang’o ukwayu ngo cwinywa utur tek dhanu gibejolo ngo lembanyong’a? (Nen bende cal.)

¹⁵ Ukwayu ngo cwinywa utur tek ku kwong’a dhanu gijolo ngo lembanyong’a. Poy nia dhanu copo lokiri. Wakedwog iwi lapor pa Yakobo m’umin Yesu. Eneno Yesu kinde m’ebedongo, m’edoko Masiya man kinde m’ebeponjo nisagu dhanu mange ceke. Re edoko ngo jalub pa Yesu. Ndhu i ng’ey cer pa Yesu re m’edoko jalub pare ma won amora.c (Yoh. 7:5; Gal. 2:9) Pire tie tek nia kud waol ku wedi mwa ma fodi unyutho ngo nen ma ber man kud wawek nirweyo ni ju m’ular uwinjowa ngo. Poy nia wabekwo i nindo mi kajik ceng’, pieno mito wadhul tic mwa mi lembanyong’a. Lembe ma wabeyero ni wedi mwa kawoni romo loko kwo migi i ng’eye, saa moko nyo kadok i ng’ey ma masendi ma dit ucaku.d

MEDIRI NIFOYO YEHOVA PI POYOWIC PARE

16. Idaru nwang’u bero ma kani i kum poyowic pa Yehova? (Nen bende sanduku ma thiwiye tie “Tii kugi pi nikonyo jumange.”)

¹⁶ Kud i kind cam mi tipo ma wanwang’u, moko utie ma juyiko pi dhanu ma fodi uwinjo ngo lemandha mir ukungu mi Biblia. Ku lapor, juyiko korolembe mi dhanu ceke ma kubang’ yenga, thiwiwec ku video moko mi jw.org, man gazeti mi dhanu ceke pi ju ma gitie ngo Jumulembe pa Yehova. Re kadok kumeno de, wan zoo wanwang’u bero i kum poyowic maeno; giketho mer ma wamaru ko Yehova man yiyoyic ma watie ko i Lembe pare doko tek, man gikonyowa niponjo jumange ku lemandha mir ukungu ku bodho.—Zab. 19:7.

17. Ukwayu wapoy i kum ponji mir ukungu mi Biblia i saa ma kani?

¹⁷ Wa Jumulembe pa Yehova, anyong’a negowa lee ka wanwang’u lero iwi ayi ma wanyang’ ko i lemandha moko mi Biblia. Re watie bende ku foyofoc lee pi ponji mir ukungu mi Biblia m’utelowa i lemandha i acaki, kum cil tin de gicopo konyowa. Ka wabenwang’u nia wabeyenyo jengara iwi paru mwa kakare niworo telowic mi dilo pa Yehova, ukwayu wapoy ku jwigiri nia Jacwic mwa ma jategokpo man ma riek nisagu zoo re m’ubetelo wi dilo pare. Tek peko umulo kumwa kunoke kum ng’atu moko ma wamaru, kwayu wanyuth cirocir man wapar pi thelembe m’uketho Yehova uweko masendi ubemedere asu. Man ka wabeng’iyo ayi ma wabitiyo ko ku saa mwa man ku jamcingwa, mito wapoy nia wabekwo i dong kajik ceng’. Dong’ wamedara niweko poyowic pa Yehova udwokwa tek, umii amora i kumwa man udwokwa riek!