Kite ma Yehova konyo kowa niciro

1. Pirang’o watie ku yeny mi cirocir man ng’a ma romo konyowa? (1 Pethro 5:10)

I NINDO maeni mi kajik ceng’ ma lembe tek i iye, dhanu pa Yehova gitiye ku yeny mi cirocir. Jumoko gitie ku twoyo ma key ungo, jumange ke gitie ku can pi wedi migi ma gimaru m’utho. Jumange lundo gibenwang’iri ku ragedo ma wedi migi kunoke gavmenti re m’ubenyayu i kumgi. (Mat. 10:18, 36, 37) Cwinyi bed tek nia kadok nwang’u inyego ku pekone ma nenedi de, Yehova bikonyi niciro.—Som 1 Pethro 5:10.

2. Copo ma Jukristu giciro ko peko beai kakani?

² Niciro thelembene tie nigwoko bedoleng’ ni Yehova man nitimo ire kud anyong’a kadok wabenwang’ara ku peko, ka jubenyayu ragedo i kumwa kunoke wan’i wang’ abidhe. Pi niciro, ubekwayu wagen bende nia lembe bidoko miero. Cirocir mwa wa Jukristu ujengere ngo iwi tego mwa giwa; ento eai i bang’ Yehova ma tie ku copo mi miyo iwa “tego m’usagu ceke.” (2 Kor. 4:7) I thiwiwec maeni, wabiweco iwi piny ang’wen ma Yehova umiyo iwa ma copo konyowa niciro. Wabineno bende lembe ma wacopo timo kara wanwang’ bero ni kumgi.

RWO

3. Pirang’o wacopo yero nia rwo tie lembe mir udu?

³ Yehova utimo lembe moko mir udu ma copo konyowa niciro. Eyiyo nia warwo i bang’e kadok watie ku dubalaga. (Ebr. 4:16) Kepar nyanok: Wacopo rwo i bang’ Yehova saa moko ci man iwi lembe moko ci. Ecopo winjowa kadok nwang’u waberwo ku dhu kani, wan’i kabedo ma kani, man kadok wani bor kud umego mwa kunoke wan’i otkol. (Yon. 2:1, 2; Tic. 16:25, 26) Ka cwinywa ung’abere lee mandha ma dong’ wabenwang’u ngo wec ma wayer ko paru mwa de, re asu Yehova nyang’ i gin ma wamito yero. (Rum. 8:26, 27) Andha, rwo tie lembe mir udu!

4. Pirang’o wayero nia rwo ma wakwayu ko Yehova ukony kowa niciro urombo ku yeny pare?

⁴ I Biblia, Yehova utego cwinywa nia “gin moko ci ma tek wabekwayu i bang’e nimakere ku yeny pare, ewinjowa.” (1 Yoh. 5:14) Nyo wacopo kwayu Yehova ukonywa niciro? Eyo! Pilembe nitimo kumeno urombo ku yeny pare. Pirang’o wabeyero kumeno? Ka wabeciro amulaic, wamiyo kaka ma Yehova udwok ko wang’ cac pa Sitani Wonabali. (Rie. 27:11) M’umedo maeno, Biblia uyero nia Yehova tie kud ava mi ‘nyutho tego pare pi nikonyo ju m’adundegi tie zoo i bang’e.’ (2 Kei. 16:9) Pieno, cwinywa bed tek nia Yehova tie ku tego man ava mi konyowa niciro.—Isa. 30:18; 41:10; Luka 11:13.

5. Rwo copo miyo iwa kwiyocwiny mir adunde nenedi? (Isaya 26:3)

⁵ Biblia uyero nia saa ma waberwo kucwinywa ceke pir ang’abacwiny mwa, ‘e kwiyocwiny pa Mungu m’ukadhu gin ceke ma jucopo nyang’ i iye bigwoko adundewa man pidoiwa.’ (Filip. 4:7) Kepar nia eno thelembene tie ang’o. Dhanu ma gitimo ngo ni Yehova gipimo bodho ma tung’ tung’ pi ninwang’u kwiyocwiny mir adundegi. Ku lapor, jumoko kara giwinjiri ma ber gitimo kero giwodho paru ceke kud i wigi kara wigi udong’ thwolo. Eno ke utie ariti ma lee i thenge mi tipo. (Nen bende Matayo 12:43-45.) Man kadok nwang’u dhanu giwinjiri ma ber i ng’ey ma gitiyo ku bodho maeno de, re ginwang’u ngo kwiyocwiny mandha ma Yehova miyo m’utie kwiyocwiny ma ber m’usagu zoo. Kinde ma waberwo i bang’ Yehova, wanyutho nia wajengara zoo i wiye man emiyo iwa “kwiyocwiny ma thiri thiri.” (Som Isaya 26:3.) Yo acel ma Yehova miyo ko iwa kwiyocwinyne utie nia ekonyowa nipoy i kum lemandha ma jukocwiny ma waponjo i Lembe pare. Lemandha maeno ketho pidoic mwa man adundewa kwiyo pilembe wang’eyo nia Yehova dieng’ piwa man ebemito nia lembe uwoth iwa miero.—Zab. 62:1, 2.

6. Icopo timo ang’o kara rwo ukonyi lee? (Nen bende cal.)

⁶ Gin m’icopo timo. Saa m’ibeciro amulaic, “redh ter peri iwi Yehova” man kwaye emii iri kwiyocwiny pare. (Zab. 55:22) Kwaye emii iri bende rieko m’itie ku yenyne kara inyeg ku pekone. (Rie. 2:10, 11) M’umedo maeno, kwaye emii iri tego mi ciro man kud iwil bende nifoye. (Filip. 4:6) Par pi lembe m’ubenyutho nia Yehova ubekonyi i amulaic peri, man foye pi kony pare. Kud iwek amulaic m’ibenweng’iri ko uceri nineno mugisa m’ebemiyo iri.—Zab. 16:5, 6.

LEMBE PA MUNGU

7. Ponjo Biblia konyowa nenedi niciro?

⁷ Yehova umiyo iwa Lembe pare kara ukonyowa niciro. I iye wanwang’u verse dupa m’ubetego cwinywa nia ekonyowa. Wakewecu iwi lapor acel kende. Matayo 6:8 uyero kumae: “Wegwu ung’eyo yeny mwu kadok ma fodi wukwaye ngo.” Yesu re m’uyero wec maeno, man eng’eyo Yehova ma ber mandha nisagu ng’atu moko ci. Pieno wambe ku jiji moko nyanok de nia Yehova bipong’o yeny mwa saa ma wabenwang’ara ku peko. Biblia upong’ ku paru ma kumeno dupa ma copo miyo iwa tego kara wamedara niciro.—Zab. 94:19.

8. (a) Kemii lapor mi cik mir ukungu moko mi Biblia ma copo konyowa niciro. (b) Ang’o ma bikonyowa nipoy i kum cik mir ukungu mi Biblia kinde ma watie ku yenyne?

⁸ Cik mir ukungu mi Biblia copo konyowa niciro. I andha gicopo miyo iwa rieko ma watie ku yenyne pi nimaku yub ma beco. (Rie. 2:6, 7) Ku lapor, Biblia uyero nia kud wadieng’ i kum lembe ma bitimere i nindo m’ubino ento wajengara iwi Yehova kubang’ ceng’. (Mat. 6:34) Tek watie ku ng’iyo mi somo Lembagora man mi nyamu i lembe ma wabesomone, ebibedo iwa yot nipoy i kum cik mir ukungu ma watie ku yenyne, ke tap i saane.

9. Kpawa mi Biblia copo tego cwinywa nenedi nia Yehova bikonyowa?

⁹ I Biblia wanwang’u bende kpawa mi dhanu ma ve wan eni m’ugeno Yehova man ekonyogi. (Ebr. 11:32-34; Yak. 5:17) Saa ma wabeparu pir ayi ma Yehova ukonyo kogi eno tielo yiyoyic mwa nia ebikonyo wan de kum etie “kapondo mwa man tego mwa, Jakony ma junwang’u yot yot i saa mi can.” (Zab. 46:1) Ka wabenyamu i lembe iwi ayi ma Yehova ukonyo ko dhanu pare ma yang’ con, eno tielo cwinywa nikwanyu bang’ yiyoyic man cirocir migi.—Yak. 5:10, 11.

10. Icopo timo ang’o kara Lembe pa Mungu ukonyi lee?

¹⁰ Gin m’icopo timo. Som Biblia kubang’ ceng’, man gwok verse ma tung’ tung’ m’inwang’u nia copo konyi andha. Ju ma dupa ginwang’u bende nia nibeng’iyo i giragora ku bang’ ceng’ utie yore ma cuu mi caku nindo ku paru mi Biblia ma tielocwiny. Nyamego moko ma nyinge Mariea unwang’u nia eno tie lemandha saa ma junwang’u nia jurunyodo pare ario zoo tie ku Kancer. Ang’o m’ukonye niciro saa m’ebegwokogi i kind dwi ma tokcen mi kwo migi? Ekoro kumae: “Nja kugweno ang’iyo i paru mi nyathibuku Wang’iyu i Lembagora kubang’ ceng’ man anyamu iye. Ng’iyo maeno ukonya niparu pi Yehova man pi lembe ma beco m’eponjo kowa i Lembe pare kakare niparu kende kende pi peko m’abekadhu kud i iye.”—Zab. 61:2.

JUYIC WADWA

11. Pirang’o etie lembe ma tielo cwiny ning’eyo nia watie ngo kendwa saa ma wabeciro amulaic?

¹¹ Yehova umiyo iwa umego ku nyimego i wang’ ng’om zoo pi nikonyowa kara wacir. Ning’eyo kende kende nia ‘utumego mwa mi wang’ ng’om zoo de gibenwang’iri ku kit masendi ma rom’ tielo cwinywa nia watie kendwa ngo. (1 Pet. 5:9) Eno nyutho nia kadok wabenwang’ara ku peko ma nenedi de, wang’ey nia jumange de gidaru nwang’iri ku kit peko ma rom man giciro. Pieno wan de wacopo ciro.—Tic. 14:22.

12. Juyic wadwa copo konyowa nenedi, man wacopo timo ang’o igi? (2 Jukorintho 1:3, 4)

¹² Juyic wadwa copo tielo cwinywa kara wacir peko mwa. Jakwenda Paulo unwang’u nia eno tie lemandha. I waraga m’ekiewo, elwong’o nying’ ju m’ukonye saa ma en’i kol man efoyogi. Gijuko cwinye, gitielo cwinye man gibed gimiyo ire piny m’etie ku yenyne. (Filip. 2:25, 29, 30; Kol. 4:10, 11) Wan de tin wacopo nwang’ara ku lembe ma rom. Saa ma watie ku yeny pi niciro, umego ku nyimego mwa gikonyowa; man saa ma gitie ku yeny mi kony, wan de wakonyogi.—Som 2 Jukorintho 1:3, 4.

13. Ang’o m’ukonyo nyamego Maya niciro?

¹³ Nyamego moko ma n nyinge Maya i ng’om mi Russie, unwang’u tielocwiny lee mandha i bang’ umego ku nyimego. I oro 2020, bapolisi ukeyo i ot pare man gitere i wang’ pido pilembe eweco pi yiyoyic pare ku jumange. Maya ukoro kumae: “I saa maeno ma cwinya utur i iye, umego ku nyimego gibed gilwong’a man gikiewo ira barua pi nitielo cwinya nia gimara. Alar ang’eyo cuu nia an’i kind juruot ma lee m’umara. Ento niai i oro 2020, afoy ang’eyo lembe maeno dong’ cuu mandha.”

14. Icopo timo ang’o kara juyic wedu gikonyi lee? (Nen bende cal.)

¹⁴ Gin m’icopo timo. Kinde m’ibeciro amulaic, bed ceng’ini kud umego ku nyimego peri ma Jukristu. Lworo kud unegi nikwayu kony i bang’ judong cokiri. Gicopo bedo iri ni “kapondo ni yamu, kapondo ni koth ma kud avuvu.” (Isa. 32:2) Poy bende nia Jukristu wedu de gibeciro peko. Pieno nitimo bero ni ng’atu moko ma n’i yeny bikonyi kara ibed kud anyong’a man icir peko m’ibenweng’iri ko.—Tic. 20:35.

GENOGEN MWA

15. Genogen ukonyo Yesu nenedi man wan ke ecopo konyowa nenedi? (Juebrania 12:2)

¹⁵ Yehova umiyo iwa genogen ma nging’ nging’ pi nikonyowa kara wacir. (Rum. 15:13) Kepar pi kite ma genogen ukonyo ko Yesu niciro peko ma yawe mbe m’enwang’ere ko iwi ng’om. (Som Juebrania 12:2.) Yesu ugam ung’eyo nia nikadhu kud i gwoko bedoleng’ pare ebicero ba nying’ Yehova. Ebino kuro bende kud ava nidok i bang’ Won man yor i ng’ey kare nitimo karacelo kud umego pare i Ker mi polo. Rom rom kumeno, genogen mwa mi kwo i ng’om ma nyen konyowa niciro peko moko ci ma ng’om pa Sitani ubenyayu i kumwa.

16. Genogen ukonyo nyamego moko nenedi niciro, man lembe m’eyero ubemiyo iri ponji ma kani?

¹⁶ Kenen kite ma genogen mi Ker pa Mungu ukonyo ko nyamego moko mi Russie ma nyinge Alla ma jutwiyo won ot pare man jubole i kol. Saa ma lembe maeno utimere Alla uyero kumae: “Nirwo pi genogen mwa mi nindo m’ubino man ninyamu lembe i wiye ukonya kara cwinya kud utur nisagu. Anyang’ nia eno tie ngo ajiki mi lembe zoo. Yehova biloyo judegi pare man ebimiyo iwa sukulia.”

17. Wacopo dwoko foyofoc mwa nenedi pi genogen mwa m’ujengere iwi Biblia? (Nen bende cal.)

¹⁷ Gin m’icopo timo. Bed inwang’ saa mi paru pi lembe ma beco ma Yehova ugwoko iri i nindo m’ubino. Bed ipar pir ayi m’ibikwo ko i ng’om ma nyen pa Mungu man pi mugisa ma ibinwang’u. E ibineno nia amulaic moko ci ma wanwang’ara ko tin e utie “pi saa moko kende man there yot.” (2 Kor. 4:17) Bende ii ku kero peri ceke niweco pi yiyoyic peri ku ju mange. Kepar pir ayi m’etie ko tek ni ju m’ubetimo ngo ni Mungu ninyego ku peko i ng’om pa Sitani, m’umbe ning’eyo mugisa ma Mungu ung’olo pi nindo m’ubino! Icopo telo nen migi iwi genogen mi Ker pa Mungu kadok ku wec ma nok.

18. Pirang’o wacopo geno lembang’ola pa Yehova?

¹⁸ Ing’ey ma Yob uciro amulaic dupa m’umbe nidubo eyero ni Yehova kumae: “Kawoni ang’eyo nia itie ku copo mi timo lembe ceke man nia gin moko mbe m’ibeparu nitimo ma copere ngo iri.” (Yob 42:2) Yob unyang’ nia gin moko mbe ma copo cero Yehova ku pong’o lembakeca pare. Ning’eyo lembe maeno copo miyo iwa tego mi ciro amulaic. Kara wanyang’ i lembuno ma ber, wakemak lapor ma e: Dhaku moko cwinye utur pilembe thiedho twoyo pare uvoyo badocter dupa. Ento saa ma docter moko ma jugeno man m’ung’eyo tic cuu uwok unyang’ i twoyo pare man ekoro ire ayi m’ebitiedhe ko, e yamu ukudhe kadok nwang’u ebikey i ng’ey nindo moko de. Kawoni ecopo ciro peko pare yot yot pilembe etie ku genogen nia kume bikey. I ayi ma rom eno wan de wabiciro peko mwa tek cwinywa tek i kum genogen mwa mi Paradizo.

19. Ang’o ma watie ku yenyne pi niciro?

¹⁹ Calu ma waneno, Yehova konyowa niciro amulaic mwa nikadhu kud i rwo, Lembe pare, juyic wadwa, man genogen mwa. Tek watiyo cuu ku piny maeno ma Yehova umiyo iwa, eno bikonyowa niciro peko moko ci ma wacopo nwang’ara ko nitundo i nindo ma peko mi ng’om pa Sitani bijik i iye.—Filip. 4:13.