ለጽሑፎቻችን አድናቆት ይኑራችሁ
1 ንጉሥ ኢዮስያስ ቤተ መቅደሱን ለመጠገን የሚያስችል ዝግጅት እያደረገ በነበረበት ወቅት ሥራውን እንዲያከናውኑ የተሾሙትን ሰዎች “ታማኞች ስለሆኑም የተሰጣቸውን ገንዘብ መቆጣጠር አያስፈልግም” በማለት ስለ እነርሱ መልካም ቃል ተናግሮ ነበር። (2 ነገ. 22:3-7 አ.መ.ት ) እነዚህ ሰዎች በአደራ የተሰጣቸውን ንብረት የያዙበት መንገድ ቅዱስ ለሆኑ ነገሮች አድናቆት እንደነበራቸው ያሳያል። ዛሬም በተመሳሳይ የአምላክን ምሥራች በማወጁ ቅዱስ ሥራ ስንካፈል በእጃችን የተሰጡንን ንብረቶች በታማኝነት መያዝ ይኖርብናል።
2 በመስክ አገልግሎት:- ጽሑፎቻችን ለያዙት ጠቃሚ መልእክት ያለን አድናቆትና እነርሱን ለማዘጋጀት ስለሚወጣው ወጪ ያለን ግንዛቤ እንደ ውድ አድርገን እንድንይዛቸው ያነሳሳናል። ለመጽሐፍ ቅዱስ መልእክት ልባዊ አድናቆት ለሌላቸው ሰዎች ጽሑፎቻችንን እንዲሁ ማደል አይኖርብንም። አንድ ሰው ለምሥራቹ እምብዛም አድናቆት ካላሳየ በጽሑፎች ፋንታ ትራክት ልንሰጠው እንችላለን።
3 ጽሑፎችን የምናበረክተው ለያዙት መልእክት አክብሮት እንዳለን በሚያሳይ መንገድ መሆን አለበት። ጽሑፎች ጥቅም ላይ ሳይውሉ እንዳይባክኑ ለማድረግ ተጨማሪ ጽሑፍ ከመውሰዳችሁ በፊት እቤታችሁ ምን ያህል እንዳላችሁ አረጋግጡ። ከእያንዳንዱ እትም ትርፍ መጽሔት በእጃችሁ የሚቀር ከሆነ ከጉባኤው የምትወስዱትን የመጽሔት ብዛት ብትቀንሱ ጥሩ ይሆናል።
4 ለግል የምንጠቀምባቸው ጽሑፎች:- ማዘዝ የሚገባን በእርግጥ የሚያስፈልጉንን ጽሑፎች ብቻ ነው። በተለይ ዴሉክስ መጽሐፍ ቅዱሶች፣ ባለማጣቀሻ መጽሐፍ ቅዱስ እና እንደ ኮንኮርዳንስ፣ የመጠበቂያ ግንብ ማኅበር ጽሑፎች ማውጫ፣ ጠለቅ ብሎ ማስተዋል እና አዋጅ ነጋሪዎች ያሉትን በከፍተኛ ወጪ የሚዘጋጁ ትላልቅ ጽሑፎች በምናዝበት ጊዜ ምክንያታዊ መሆን ይገባናል።
5 በግል ቅጂዎቻችሁ ላይ ስማችሁንና አድራሻችሁን የመጻፍ ልማድ አላችሁ? እንዲህ ማድረጋችሁ የጠፉባችሁን ጽሑፎች ወዲያውኑ ከመተካታችሁ በፊት ፈልጋችሁ እንድታገኙ ይረዳችኋል። የመዝሙር መጽሐፋችሁ፣ መጽሐፍ ቅዱሳችሁ ወይም በጉባኤ የሚጠና ጽሑፍ ከጠፋባችሁ ምናልባት በጉባኤ ወይም በወረዳ ወይም በልዩ ስብሰባ ላይ ጠፍተው የተገኙ እቃዎች በሚቀመጡበት ሥፍራ ልታገኙት ትችላላችሁ።—ሉቃስ 15:8, 9
6 በጽሑፎቻችን አጠቃቀም ረገድ ጠንቃቃ ለመሆን ጥረት እናድርግ። ይህ ከይሖዋ በአደራ የተቀበልናቸውን የመንግሥቱን ንብረቶች በታማኝነት እንደምንይዝ የምናሳይበት መንገድ ነው።—ሉቃስ 16:10