የመታሰቢያውን በዓል የሚመለከቱ ማሳሰቢያዎች

በዚህ ዓመት የመታሰቢያው በዓል የሚከበረው ሐሙስ መጋቢት 24 ይሆናል። ሽማግሌዎች የሚከተሉትን ጉዳዮች ትኩረት ሰጥተው ሊያስቡባቸው ይገባል:-

◼ በዓሉ የሚጀምርበትን ሰዓት ስትወስኑ ፀሐይ ከመጥለቋ በፊት ቂጣውና ወይኑ መዞር እንደሌለባቸው አስታውሱ።

◼ ተናጋሪውን ጨምሮ ሁሉም ሰው በዓሉ የሚከበርበትን ትክክለኛ ሰዓትና ቦታ እንዲያውቅ መደረግ አለበት።

◼ ተገቢው ዓይነት ቂጣና ወይን ተዘጋጅቶ መቀመጥ አለበት።—የየካቲት 15, 2003 መጠበቂያ ግንብ ገጽ 14-15 ተመልከቱ።

◼ ሳህኖች፣ ብርጭቆዎች፣ ለበዓሉ ተስማሚ የሚሆን ጠረጴዛና የጠረጴዛ ልብስ ቀደም ብሎ ወደ አዳራሹ ማምጣትና በቦታው ማስቀመጥ ያስፈልጋል።

◼ የመንግሥት አዳራሹ ወይም ለበዓሉ የምትጠቀሙበት ሌላ የመሰብሰቢያ ቦታ አስቀድሞ በደንብ ሊጸዳ ይገባል።

◼ አስተናጋጆችም ሆኑ ቂጣና ወይኑን የሚያዞሩ ወንድሞች ቀደም ተብሎ ሊመረጡና የሥራ ድርሻቸው ምን እንደሆነ፣ ሥራቸውን በተገቢው መንገድ እንዴት እንደሚያከናውኑ እንዲሁም ሥርዓታማ የሆነ አለባበስና አበጣጠር አስፈላጊ መሆኑ ሊነገራቸው ይገባል።

◼ አቅመ ደካማ በመሆናቸው በበዓሉ ላይ መገኘት የማይችሉ ቅቡዓን ከቂጣውና ከወይኑ መካፈል የሚችሉበት ሁኔታ መመቻቸት ይኖርበታል።

◼ በመንግሥት አዳራሹ ከአንድ በላይ ጉባኤዎች የሚጠቀሙ ከሆነ በመግቢያዎች አካባቢ፣ በእግረኞች መንገድ ላይ እንዲሁም በመኪና ማቆሚያ ቦታዎች አላስፈላጊ ጭንቅንቅ እንዳይፈጠር በጉባኤዎቹ መካከል ጥሩ ቅንጅት ሊኖር ይገባል።