O Paˈarawan ato Hanoikor no Miso

1. O kahacecay tamdaw mamidemak to manan a masakalimlaan a saˈosi?

ANINI, o tamdamdaw mamidemak to cecay masakalimlaan a saˈosi: Mipiliˈ midama to Kawas ci Yihofaan, mihayi Cingranan o saˈakawangay mikowanay, anca mipiliˈ midama to ˈada no Kawas, oya mariˈangay a Akoma Satan. Itini tonini a demakan, awaay ko misatenokay, o mamipiliˈ ko tamdamdaw. Ano cima ko misaˈosian nangra a midama, mamifiyor to midaˈocay a hatokel nangra. (Matay 25:31-33, 46) Itini ‘taˈangayay padiing’ a tatokian, wa masawkit cangra milifok to ˈorip anca micada to sakalaˈafo.—Paˈarawan 7:14; 14:9-11; Icikil 9:4, 6.

2. (1) Hipray 10:35-39 pakalalokay kitaanan samaan ko pidemak? (2) O Paˈarawan pafeliay kitaanan to maanan a sapadama?

² ˈOsien ko Hipray 10:35-39. Ano maharekayto kiso mipiliˈ midama to pikowan ni Yihofa, o inanengay ko misaˈosian iso. Nohatini, makalimay kiso padama to roma tamdaw matatodong ko mipiliˈan. Sakalaˈosiaw nonini a patosokan, ngaˈay sakadademaken iso ko lalakaw no Paˈarawan padama cangranan. Onini a cudad cowa ko patalahkal aca to o manan ko teloc no misafelitay ci Yihofaan a tamdaw, mitadtadayho wa ira ko maanan makapahay a hatokel no madimadiay midama to pikowan no Kawas a tamdaw. O sasongilaˈen ita misimsim konini kalimlaan a kimad, mihaen wa matongal ko pisetek no falocoˈ ita padadotoc midoko ci Yihofaan. Roma i, wa ngaˈayho sakadademaken ita konini a kimad padama to tao matatodong ko misaˈosian, hanaca kiemel a tahatolas.

3. Onini a lalakaw mamilengo to maanan?

³ Onini a lalakaw mamilengo to ilaenoay a salicay: Ano midama to pikowan no Kawas ko tamdaw, wa ira ko maanan ˈodingaray a hatokel hani? Ano midama ko tamdaw to masowalay no Paˈarawan a kahngangay a ˈaˈadopen, wa ira ko maanan a teloc hani?

O MADIMADIAY TO KAWAS A TAMDAW WA IRA KO MAANAN A HATOKEL

4. Maˈaraway no tarokos ci Yohani ko manan a ˈopo a tamdaw malacafayay ci Yisan i kakarayan?

⁴ Itini mapolosi, maˈaraway no tarokos ci Yohani ko tosa ˈopo a tamdaw, midamaay cangra to pikowan ni Yihofa, hanaca micadaay to sapalifon ngaˈay milayap to midaˈocay a ˈorip. Saka cecay ˈopo a tamdaw 144,000 ko ˈaloman. (Paˈarawan 7:4) Cangra i mikitiniay i fafekang no sera a piliˈen no Kawas tayra i kakarayan, malacafay ci Yisan mikapot malo Hongti Kitakit. Oniya sifo mamikowan to polong no cikiw. (Paˈarawan 5:9, 10; 14:3, 4) Itini mapolosi, maˈaraway ni Yohani cangra malacafayay ci Yisan tomirengay i Cion a Lotok i kakarayan.—Paˈarawan 14:1.

5. Ilalomaˈ no 144,000 ‘maˈosaway a tamdaw’ cato ka halafin tatahalifa to maanan a demak hani?

⁵ Mikitini i lintad no tarokos misatapang, iraay ko masacaˈolay masaefanay a tamdaw mipiliˈan no Kawas malo 144,000 a tamdaw. (Luka 12:32; Loma 8:17) Kawra itini salikoray a romiˈad, 144,000 a tamdaw wa iraho ko miming maˈoripay itini i hekal. Onini ‘maˈosaway a tamdaw’ itini i ˈayaw no mifekad ko taˈangayay a padiing wa micada to tahadaˈocay a satopa, paihkalay to micadaay cangra to salikoray a pihayda no Kawas. (Paˈarawan 7:2, 3; 12:17) Dotoc, itini taˈangayay padiing a roma tatokian i, wa masaˈopo to tayra i kakarayan cangra, malacafay toya tahiraay i patay madimadi hanaca milifokay to sapalifon a tamdaw. Polong a 144,000 a tamdaw wa itini to i Hongti Kitakit no Kawas malacafay ci Yisan mala Hongti.—Matay 24:31; Paˈarawan 5:9, 10.

6-7. (1) Dotoc maˈaraway ni Yohani ko manan ˈopo a tamdaw? Pakayni tonini a ˈopo a tamdaw, mafanaˈay kita to manan? (2) ‘Maˈosaway tamdaw’ ato ‘taˈangayay ˈopo a tamdaw’ hano mamisinanot to lalakaw no Paˈarawan saka 7 fedengan hani?

⁶ Dotoc, maˈarawayho ni Yohani ko ‘taˈangayay ˈopo a tamdaw.’ Cowa ka lecad to 144,000 a tamdaw, onini taˈangayay ˈopo a tamdaw cowa ka saˈosi ko ˈaloman. (Paˈarawan 7:9, 10) Pakayni cangranan, mafanaˈayho kita to maanan hani? Sanay ko Paˈarawan: ‘Oniya tamdaw mikitiniay taˈangayay padiing a masadak. Tano remesan no tofor a siri cangra mikorac to rikoˈ no niyah.’ (Paˈarawan 7:14) Milakowit to taˈangayay padiing ko ‘taˈangayay ˈopo tamdaw’ ikor wa itini fafekang no sera maˈorip, milayap to kasapaan a sapalemed.—ˈOlic 37:9-11, 27-29; Taneng 2:21, 22; Paˈarawan 7:16, 17.

⁷ Ano mipiliˈan kita tayra i kakarayan, anca wa itini i fafekang no sera maˈorip hokira, o pitadtad no Paˈarawan saka 7 fedengan milingatay kitaanan. Maˈaraway iso ko niyah itiniay ilalomaˈ nonini a ‘sasing’ han? Ano mifekad konini a demak i, o madimadiay midoko to Kawas a tosa ˈopo a tamdaw maedeng o mamahemek. Itiya wa mahemek ko niyah mipiliˈay kita midama to pikowan ni Yihofa. Pakayni taˈangayay padiing, somowalayho ko Paˈarawan kitaanan to maanan hani?—Matay 24:21.

O MISAˈADAAY TO KAWAS A TAMDAW WA SAMAAN KO HATELOC

8. O manan a demak ko tahapinangan to misatapangay ko taˈangayay padiing? Itiya ˈalomanay a tamdaw wa samaan ko pidemak?

⁸ Itini fafekangay lalakaw mananamay ita, cato ka halafin polong a mikowanay no hekal wa miˈodis to Taˈangayay Papilon, oya polong mararaway pihakelongan no hekal. (Paˈarawan 17:16, 17) O tahapinangan konini to misatapangay ko taˈangayay padiing. Itiya, o mamisaˈosi ko ˈalomanay tamdaw misatapang midoko ci Yihofaan hokira? Cowa. Masafelitay, pasowalay ko Paˈarawan saka 6 fedengan kitaanan, tora kacalohan a tatokian, oya cowa pidoko ci Yihofaan a tamdaw papasayra i ‘taˈangayay lotok,’ o lekakawa no mirikecay ato misasingdiay micangacang to sadipot. Samanen cowa pipiliˈ cangra midama to Hongti Kitakit no Kawas, o misaˈadaay wa saan ko pinengneng ni Yihofa cangranan.—Luka 11:23; Paˈarawan 6:15-17.

9. Itini taˈangayay padiing a tatokian o finawlan no Kawas hano mahapinang ko kasasiroma to ˈalomanay? Pairaay konini to manan a teloc?

⁹ Itini taˈangayay padiing tonini pasangaray a tatokian, o madimadiay a finawlan ni Yihofa wa mahapinang ko kasasiroma to ˈalomanay. Toniya hekal edengan cangra ko cowa pidama to ‘ˈaˈadopen,’ tanektekay midoko to Kawas ci Yihofaan. (Paˈarawan 13:14-17) Pakayni tonini a lalangian, o misaˈadaay ci Yihofaan a tamdaw tada mangolaway. O makomoday a kalo kitakit wa matomay a miˈodis to itiniay i fafekang no sera a finawlan no Kawas. O roma a sapairasol no Fangcalay Cudad mitadtaday tonini a demak ci Makok a Kok mikidatay to saˈodis.—Icikil 38:14-16.

10. Mikitini Paˈarawan 19:19-21, pakayni piˈodis no ˈada samaanay ko harateng ni Yihofa hani?

¹⁰ Mihaen ko demak no ˈada, samaanay ko harateng ni Yihofa hani? Sanay Cingra: ‘O mamangolaw Kako.’ (Icikil 38:18, 21-23) Itini saka 19 fedengan no Paˈarawan mitadtaday to midotocay mifekad a demak. Wa ocoren ni Yihofa ko wawa Ningra ci Yis milidong to finawlan Ningra, hanaca mihadefek to ˈada maemin. O madimadiay coyoh ato 144,000 a tamdaw makakapot malo ‘kakarayan a sofitay’ malacafay ci Yisan milood. (Paˈarawan 17:14; 19:11-15) O salikoray a teloc nonini a kalalood: Polong misafelitay ci Yihofaan a tamdaw ato lekakawa mamasongilaˈ a mapalaˈafo.—ˈOsien ko Paˈarawan 19:19-21.

IKOR NO LALOOD MISIKAY TO RARAMOD

11. O maanan ko saˈakawangay a demak no Paˈarawan hani?

¹¹ Saharateratengen, o polong a ˈada no Kawas masongilaˈto a mapalaˈafo, hanaca o madimadiay midoko to Kawas a tamdaw wa maˈorip cangra, tada o kalipahakan a tatokian korira! Masongilaˈ mapalaˈafo ko Taˈangayay Papilon i, i kakarayan a ˈadingo a tireng maedeng o mamaacang a mahemek. Kawra ikakaay a kahemekan a demak i, itiniayho i lalikor! (Paˈarawan 19:1-3) Onini i, o saˈakawangay a demak no Paˈarawan—‘o pisikayan to raramod no tofor a siri a toki maraodayto.’—Paˈarawan 19:6-9.

12. Mikitini Paˈarawan 21:1, 2, o raramod no tofor a siri wa ihacowa misikay hani?

¹² O raramod no tofor a siri ihacowaay misikay hani? Itini ˈayaw no Armakiton a lalood, polong no 144,000 tamdaw tayraayto i kakarayan, kawra cowaho ko pisikayan to raramod a toki itiya. (ˈOsien ko Paˈarawan 21:1, 2.) Mahererek ko Armakiton a lalood, mapalahdaw ko polong a ˈada no Kawas ikor, wa itiya misikay to raramod no tofor a siri.—ˈOlic 45:3, 4, 13-17.   

13. O raramod no tofor a siri wa palaˈosi to maanan a demak hani?

¹³ O raramod no tofor a siri wa palaˈosi to maanan a demak hani? Malecad o mararamoday faˈinayan ato fafahiyan, onini a ‘raramod’ wa palacecay to Hongti ci Yis Kristo ato ‘fafahi’ ningra, oya 144,000 a tamdaw. Onini a kafahkaan a demak, o tahapinangan to mamikowan to konini faelohay a sifo to 1,000 miheca tonini a cikiw.—Paˈarawan 20:6.

O MALIKATAY KO TEDIL A NIYAROˈ ATO HANOIKOR NO MISO

14-15. Paˈarawan 21 fedengan palinian ko 144,000 a tamdaw to maanan? (Nengnengen ko papotalay coka.)

¹⁴ Dotoc, palinian no Paˈarawan 21 fedengan ko 144,000 tamdaw to makapahay a niyaroˈ, panganganan to ‘Faelohay Yirusalim.’ (Paˈarawan 21:2, 9) Onini a niyaroˈ ‘iraay ko 12 taˈeneran a fakeloh, i fafekang iraay ko ngangan no 12 tarokos no tofor a siri.’ Onini maedeng misolotay to harateng ni Yohani. Misamaanay hani? Samanen maˈaraway ningra ko ngangan no niyah i fafekang no cecay fakeloh, tada o taˈangayay a sakaliko konini!—Paˈarawan 21:10-14; Ifiso 2:20.

¹⁵ Onini tahapinangan a niyaroˈ cecayay aca. O masalipaay cira, o koˈedaw kakahad ˈakawang maroyaroyay. O lalan no niyaroˈ o tada ekim, o 12 fawahan o 12 cinco, o lowil ato taˈeneran sahtoay tano masakenaay a ˈodo milafa. (Paˈarawan 21:15-21) Kawra onini a niyaroˈ hato cangoˈotay to maanan. Sanay ci Yohani: “Awaay a maˈaraw toya niyaroˈ ko fangcalay sefi. Nawhani o todongto no fangcalay sefi ko Kawas ci Yihofa ato tofor a siri. Malomaanho ko nipipatedi no cidal ato folad toya niyaroˈ. Nawhani o ˈdil no Kawas ko patediay toya niyaroˈ, o tofor a siri ko todong no dawdaw noya niyaroˈ.” (Paˈarawan 21:22, 23) Ora palaˈosiay to ‘Faelohay Yirusalim’ a tamdaw ngaˈayay tayni i ˈaˈayaw ni Yihofa. (Hipray 7:27; Paˈarawan 22:3, 4) Mihaenay, ci Yihofa aci Yis o fangcalay sefi nonini a niyaroˈ.

16. Itini pikowan no Hongti Kitakit no Kawas to 1,000 a miheca, o tamdaw i fafekang no sera tatahalifa to maanan hani?

¹⁶ Iraay ko tokel tayra i kakarayan a tamdaw misongilaˈ miharateng toniya niyaroˈ, maedeng oha mamahemek. Kawra itiniay i fafekang no sera ko tokel maˈorip a tamdaw, o mamisinanot to tatodong nonini a niyaroˈ. Itini pikowan no Hongti Kitakit no Kawas to 1,000 a miheca, o Faelohay Yirusalim o papaira to kadofahay a sapalemed i tamdaw. Onini a sapalemed malecad maˈaraway ni Yohani ‘maˈalolay ko sakaˈorip a nanom a ˈalo,’ i tosa lawac no ˈalo iraay ko ‘sakaˈorip a kilang,’ o papah no kilang ‘ngaˈayay sapiadah to kalo a tamdaw.’ (Paˈarawan 22:1, 2) Polong a tamdaw i fafekang no sera o mamilifok tonini a sapalemed. Polong midofdofay to Kawas a tamdaw wa palidlid sato patikol a malefot, cowato ko mamisemsem ko tamdaw to adada ato roray, cowato ko mamalowis ko losaˈ i kasomadan.—Paˈarawan 21:3-5.

17. Itini Paˈarawan 20:11-13 paihkalay, cima ko mamilifok to sapalemed itini pikowan to 1,000 miheca tatokian hani?

¹⁷ Cima ko mamilifok tonini kasemeran a sapalemed hani? Salakat i, o maˈoripay milakowit to Armakiton a taˈangayay ˈopo a tamdaw, ato misofocan nangra a wawa itini i faelohay a hekal. Roma i, Paˈarawan 20 fedengan mikiˈokay, wa patikol maˈorip ko mapatayay a tamdaw. (ˈOsien ko Paˈarawan 20:11-13.) Oya maˈoripho madimadiay ci Yihofaan a ‘moecelay a tamdaw,’ atoya maˈoripho awaay ko toki mafanaˈ ci Yihofaan ‘cowa ka moecel a tamdaw,’ wa patikol maˈorip itini i fafekang no sera. (Dmak 24:15; Yohani 5:28, 29) Sakoniya sowal i, polong mapatayay a tamdaw wa itini i 1,000 miheca pikowan a tatokian patikol maˈorip hokira? Cowa, o romaroma tamdaw maˈoripho iraayto ko toki mafanaˈ ci Yihofaan, kawra kamayan cangra padotoc midemak to tatiihay demak, manaˈay midoko Cingranan, o sowal ato waywayan nangra paihkalay to awaay ko hatatodong nangra i lakoing maˈorip. O hatiniay a tamdaw caayto ko papatikol maˈorip.—Matay 25:46; 2 Tisalonika 1:9; Paˈarawan 17:8; 20:15.

SALIKORAYTO A SAPALIFET

18. Mahererek ko 1,000 miheca pikowan i, o pakayraan i fafekang no sera wa samaanto hani?

¹⁸ Mahererek ko 1,000 miheca pikowan i, polong a tamdaw i fafekang no sera patikolayto a malefot, cowato ko mamafiyor no mirocokan ci Ataman a raraw. (Loma 5:12) Itiya masongilaˈayto a mapalahdaw ko raraw, polong a tamdaw patikolayto malefot, itini tonini a tatodong, ‘maˈoripayto’ cangra maemin.—Paˈarawan 20:5.

19. I fafekangay no sera a tamdaw hano mamicada to salikoray a sapalifet hani?

¹⁹ Mafanaˈay kita, soˈlin micadaay ci Yis to masakenaay a sapalifet ni Satan, kamayan mitafo to madimadiay. Kawra, o kahacecay malefotay a tamdaw wa makahi mihaen to demak han? Itini mahererek ko pikowan to 1,000 miheca i, o papasadaken ci Satan itini awaay ko paraˈ a ofang. Itiya, polong i fafekangay no sera a tamdaw o tatahalifa to salikoray a sapalifet, o kahacecay a tamdaw o papaihkal to makahiyay ko niyah madimadi to Kawas hokira. (Paˈarawan 20:7) Oya madimadiay a tamdaw mamilifok to midaˈocay a ˈorip ato soˈliˈlinay a pasalat, kawra o mitowakangay a tamdaw wa malacafay ci Satanan ato tatiihay a coyoh ningra masongilaˈ a mapalaˈafo.—Loma 8:21; Paˈarawan 20:8-10.

20. Maharek minengneng to sapairasol no Paˈarawan ikor, samaanay ko harateng iso hani?

²⁰ Maharek minengneng to sapairasol no Paˈarawan ikor, samaanay ko harateng iso hani? Maˈaraw iso itiniay i lalomaˈ no sapairasol ko niyah, coko lipahakan nanay ko harateng han? Onini coko pairaay to kalim iso mitahidang to roma tamdaw malacafay midoko to Kawas han? (Paˈarawan 22:17) Mafanaˈ kita to mamifekad a kafahkaan a demak i kaˈayaw, tada mitemeray to falocoˈ, makalimay malecad to tarokos ci Yohanian mikifalocoˈ a pasowal: ‘Amin! Tapang Yisaw! Kataynito.’—Paˈarawan 22:20.