Misododan ni Yihofa ko Tamdaw—wa Misamaan Kita Mitodong Cingranan?

1-2. (1) I masamaanay a pakayraan, misodod to tao hano o pasangaray han hani? (2) Samaanay ci Tanis misodod to midokaˈay cingranan a tamdaw?

PASANGARAN nanay kiso misodod to tao han? ˈAlomanay tamdaw mahaenay ko harateng. O sowal no tao ato midemakan ano midokaˈ kitanan i, cowato ko madoloay misodod cingranan. Kawra, wa pakaremo kita to pidokaˈ no tao a makalim misodod. Nengnengen ita ko nalifetan no salikaka ci Tanis,a tahalifa cingra to pasangar i makalimay misodod. 2017 miheca, malahakelongay ci Tanis ato paro no lomaˈ tayra i Congpo minengneng. Minokayto i, iraay ko citosiya i kaˈayaw misongtolay to tosiya nangra. Awaayto ko kafanaˈan ni Tanis. Talipaˈelal cingra i ngaˈ mafanaˈay, faˈinay ningra ci Polayen mapatayayto, o pina a wawa ningra i, pakidemay ko dokaˈ. Mitikol ci Tanis to mifekaday a demak i, sanay: “Tada madokaˈay ko falocoˈ ako, coko kafanaˈan hano mifekad ko mahaenay a demak.” Ikor, mafanaˈ cingra cowa ko komaenay to epah ato etok cingra, cowa pinengneng to soci anca midemak to manan demakan koya parakatay. Kawra, mangolaway ci Tanis, mansa mitolon ci Yihofaan, micangacangay paladipayal to falocoˈ no niyah.

² Makokotay koniya parakatay to mipatayay to tamdaw, ano malaˈosi i, wa mapalit cingra. Kawra na mifanaˈ ko hoing ci Tanisan i, wa samaan ko pisayfang toniya tamdaw, milingatay to sasowalen ningra. Sanay ci Tanis: “I hoing miliyaw a pasowal to kadokaˈan karorayan ako a demak i, mahecaday to micicihayto kaherekho a mitaˈis a kadokaˈan, hanaca micinahanho ko dokaˈ.” Ikor no pina lipay, tayraay ci Tanis i hoing, maˈaraw koya midokaˈay pakapatay to paro no lomaˈ ningra a tamdaw. O manan ko sasowalen ni Tanis hani? Micangacangan ningra ko hankang sidaˈit toniya a parakatay.b Pasowal cingra ikor i, tangic sanay koya hankang sanay pasowal: “25 miheca kako a mala hankang, cowaho pakaˈaraw to mahaenay a demak. Madokaˈay a paro no lomaˈ micangacangay a pasidaˈit to midokaˈay a tamdaw! I hoing, cowaho pakaˈaraw kako to ‘olah’ ato ‘misododay’ a demak.”

3. Hano ngaˈay misodod ci Tanis hani?

³ Hano ngaˈay misodod ci Tanis hani? Samanen midotimay cingra to pisodod ni Yihofa to tamdaw a taˈarawan. (Mika 7:18) Mansa, midotim kita to samaanay ci Yihofa misodod kitaanan, wa makalim misodod to tao.

4. Makalimay ci Yihofa to sasamaanen ita ko demak hani? (Ifiso 4:32)

⁴ Mikifalocoˈay ci Yihofa misodod kitaanan, makalimay kitaanan mitodong Cingranan. (ˈOsien ko Ifiso 4:32.) Soˈlin midokaˈ ko tao kitaanan, kamayan makalim ci Yihofa kitaanan misodod to tao. (ˈOlic 86:5; Luka 17:4) Oniya lalakaw wa milengo to tolo a pakayraan, padama kitaanan misodod to tao.

SAKARETENGEN KO NAFALOCOˈAN NO NIYAH

5. Mikitini Taneng 12:18, ano madokaˈ kita i, wa masamaan ko harateng hani?

⁵ O misowalan no tao ato midemakan nangra i, alatek wa midokaˈ kitanan. Ano o paro no lomaˈ i, anca o widang ita i, oniya pidokaˈ tada pasangaray a cadaen. (ˈOlic 55:12-14) Nolatekay, hato o mipacokan no tamdaw ko lalikor ita. (ˈOsien ko Taneng 12:18.) Alatek cowa ka sapisikolaw a miemem kita, ano mihaen mahecaday to mapacokay a cowa ka sapihodocaw tora a sapipacok. Ano cowa ka pisakareteng to kadokaˈan no niyah, cowa ko mamaadah kora dokaˈ.

6. Ano madokaˈ i, alatek wa samaan ko harateng no mita hani?

⁶ Ano madokaˈ i, salakatay a maharatengay, o keter. Sanay ko Fangcalay Cudad, alatek wa maketer mangolaw kita. Kawra patalipaˈelalay ko Fangcalay Cudad, aka papiwontingen ko mahaenay harateng to niyah. (ˈOlic 4:4; Ifiso 4:26) Misamaanay hani? O mahaenay harateng wa mifekad ko waywayan, ano mangolaw awaay ko makapahay waywayan. (Yakop 1:20) Haratengen, mangolaw patalahkalay to nafalocoˈan, kawra kaketer sa i, kiso ko mamipiliˈ.

7. Ano madokaˈ i, alatek wa samaan ko nafalocoˈan no mita hani?

⁷ Cowa ko keter aca, alatek iraayho ko tatiihay nafalocoˈan. Tinakoen, salikaka ci Anni sanay: “Mimingho kako, miliyasan no wama ko wina a mararamod to misimaway takowanan a tamdaw, itiya hato mifalahanto kako. Ikor, iraayto ko romaroma wawa no wama, hato misafayaˈanto kako, iraayto ko mikotayay. Nano mimingho tahira i kalomahadan, hato o pakoyoc kako.” Cowa ka madimadi ko faˈinay ni Noelete salikaka cingranan. Mafanaˈ cingra ikor samaanay hani? Sanay ko sowal: “Nano wawa kami a malacafay molahad, hanaca malacafayay kami malo misakafahay. Tada midokaˈay cingra to falocoˈ ako!” O roma salikaka ci Naomi sanay: “Cowa ka haraterateng ako to mamidokaˈ ko faˈinay ako, mansa na mifanaˈ cingra to cowa ka tomerep minengneng to maˈodangay a ika cingra i, i falocoˈ ako, hano misakaniw cingra takowanan, eca ka madimadi to raramod!”

8. (1) Hano mamisodod kita to tao hani? (2) Ano misodod kita to tao i, wa milifok to manan a epoc hani? (Nengnengen ko sapatongal lalakaw “Ano Tangongol ko Pidokaˈ no Tao to Niyah . . . ”)

⁸ Ano samaan ko sowal ato midemakan no tao i, cowa ko miharatengan ita, kawra samaan misiˈayaw to pidokaˈ nangra wa ngaˈay kita misaˈosi, masiˈayaw ko pidokaˈ i, sangaˈayay a pakayraan misodod cingranan. Misamaanay hani? Samanen maolahay kita ci Yihofaan, makalimay Cingra kitanan mikifalocoˈ a misodod. Roma i, ano mikifalocoˈ sa kita a ˈinteh i, eca ka pisodod to tao, alatek wa midemakto to mafolaay a waywayan, alatek wa madokaˈ ko tireng no niyah. (Taneng 14:17, 29, 30) Nengnengen ko nalifetan no salikaka ci Kelistin, sanay cingra: “Ano tatiih sa ko falocoˈ ako i, wa saromiˈad sato maˈosenget tatiih ko pising, wa patelas sato a komaen midokaˈ to tireng. Maceriday kako tatiih ko fotiˈ, maceridayho eca ka ngaˈay ko pinangan, telocto i, mifiyoray to kangaˈay no faˈinay ato kalalaˈed to tao.”

9. Misamaanay hano falahen ita ko ˈinteh hani?

⁹ Soˈlin cowa ka miliˈay ko midokaˈay kitanan a tamdaw i, anca cowa pidemak to manan, wa ngaˈay kita misaˈicel miˈesal to kadokaˈan no niyah. Ya masowalay isawni ci Noelete salikaka sanay: “Halafinay kako misaˈicel, ngaˈ sakahmaw sato ko piˈinteh to iˈayaway a faˈinay ako. Ikor, ngaˈ sarihaday sato ko falocoˈ ako.” Falahan ko ˈinteh, ngaˈ eca ka toled sa ko falocoˈ no mita. Mahecad to misafaelohay palalan to niyah, ho paliyas to na madokaˈay a nokaˈorip, padadotoc misakapah to kaˈorip. (Taneng 11:17) Kawra ano mihaen kiso misaˈicel ikor, pasangaran misodod to midokaˈay i, wa misamaanho ko demak hani?

MIREMO TO TATIIHAY A HARATENG

10. Misamaanay hano pairaen ita ko toki a miadah to madokaˈay falocoˈ no niyah? (Nengnengen ko coka.)

¹⁰ Misamaan kiso palahdaw to madokaˈay a falocoˈ hani? O cecay a pakayraan, pairaen ko toki no niyah. O madokaˈay a tamdaw mapaadah i, misaaliay to toki ngaˈ maadah. Ano miadah to nafalocoˈan a dokaˈ i, mahecadayto. Salikor, wa mikifalocoˈ a misodod to tao.—Patnakay 3:3; 1 Pitiro 1:22.

11. Mitolon samaanay padama tisowanan makalim misodod to tao hani?

¹¹ Cangacangen ci Yihofa padama to niyah a misodod to tao.c I masowalay isawni a salikaka ci Anni mihaenay ko demak. Sanay cingra: “Cangacangen ako ci Yihofa misodod to kahacecay no paro no lomaˈ, samanen mararaway ko sowal ita ato demak nolatekay. Ikor patikamian ako ko wama ato fafahi ningra, a mifanaˈ to misododayto kako cangranan.” Ci Anni sanay, mihaen to demak cowa ko madoloay, kawra o sowal ningra: “Misaˈicelay kako mitodong ci Yihofaan a misodod cangranan, ho matemer ko falocoˈ nangra a makalim mafanaˈ ci Yihofaan.”

12. Hano pakasoˈlinen ita ci Yihofa, cowa kono niyah sa a harateng hani? (Taneng 3:5, 6)

¹² Pakasoˈlinen ci Yihofa, cowa ko sano niyah sa a harateng. (ˈOsien ko Taneng 3:5, 6.) Ano samaanto ko pakayraan i, mafanaˈay ci Yihofa to o manan ko sangaˈayay kitanan. (Isaya 55:8, 9) Cowa pisaali Cingra kitanan midemak to midokaˈay to niyah a demak. Pakalalokay ci Yihofa mikifalocoˈ a misodod, pakasoˈlinen ita mihaen to demak o sangaˈayay. (ˈOlic 40:4; Isaya 48:17, 18) Kawra ano tano niyah sa a harateng i, alatek wa pasangar misodod to tao. (Taneng 14:12; Yirimiya 17:9) Ya masowalay isawni ci Naomi a salikaka: “Mafanaˈ to minengnengay ko faˈinay to kaacekan a ika i, salakat cowa ko sapisododaw kako cingranan. Matalaway kako to sapiliyawaw midokaˈ ningra takowanan, calemcemay kako matawal ningra ko pidokaˈ ningra isaˈayaw. Hanaca wa cipinang ci Yihofa to nafalocoˈan ako, sanay kako. Ikor cipinangayto kako, cipinangay ci Yihofa to nafalocoˈan ako, kawra o pihayda ni Yihofa to harateng ako, cowa ka saan. Mafanaˈay Cingra to samaanay ko harateng no mako, mafanaˈayho to misaaliay to toki sapiadah to dokaˈ no falocoˈ, kawra makalimay Cingra takowanan a mikifalocoˈ misodod to tamdaw.”d

PAIRAEN KO TAWLIKAY A NAFALOCOˈAN

13. Mikitini Loma 12:18-21, wa misamaan ko demak ita?

¹³ Ano misodod kita to na midokaˈay kitanan a tamdaw i, hawadento a milengo cowa ka edeng, talaˈayaw kita a tawlik. Ano o salikaka ita cingra, o araaw ita i, wa malangaˈay kita cingranan. (Matay 5:23, 24) Wa falahen ita ko ˈinteh ato keter, paihkal to siniˈada a misodod cingranan. (ˈOsien ko Loma 12:18-21; 1 Pitiro 3:9) Sasamaan palaˈosi koniya demak hani?

14. Sasaˈicelen ita midemak ko manan? Misamaanay?

¹⁴ Misaˈicel kita tano ni Yihofa a pinengneng to midokaˈay kitanan a tamdaw. Oya makapahay no tamdaw ko minengnengan ni Yihofa. (2 Rayray 16:9; ˈOlic 130:3) Tocerid, o manan ko mamaˈaraw ita i tireng no tao, oriranan ko maˈaraway. Ano kilim han ita ko kadangocan no tao, oriranan ko maˈaraway ita. Kawra ano o makapahay ko kakilimen ita i, o makapahay ko makilimay, madoloayto a misodod to tao. Saan sa ko salikaka ci Ciyalote: “Haratengen koya midokaˈay takowanan a salikaka, adihayay ko makapahay capeling ningra, madoloayto a misodod cingranan.”

15. Fanaˈen cingra to o misododanto iso, hano o masakalimlaan hani?

¹⁵ O roma a pakayraan i, fanaˈen cingra to misododanto iso. Hano kalimlaan mihaen to demak hani? I masowalay isawni ci Naomi salikaka sanay: “Ya milicay ko faˈinay ako, ‘Misododanto iso kako han?’ sanay, ya papasowal kako to ‘Misododanto ako kiso,’ siked sanay i takolaw koniya sowal cowa ka hadak. Mahapinangay ako to cowa ka misasoˈlin misodod cingranan. Ikor to cecay a liyad, ngaˈayayto kako a pasowal cingranan: ‘Misododanto ako kiso.’ Maˈaraw cingra, hato tatomangicto, cowa ka haraterateng ako oniya kantangay a sowal tada mitemeray to falocoˈ no faˈinay. Ikor noniya sowal i, hato malahdaway to maemin sanay ko harateng ako. Ikorto i, patatikolayto ko pakasoˈlinay falocoˈ ako to faˈinay, mala o ngaˈayayto a widang kami.”

16. Pakayni i misododay, mananamay iso ko manan?

¹⁶ Mahemekay ci Yihofa kitanan misodod to tao. (Kolosay 3:13) Nolatekay pasangaran nanay kita mihaen to demak, mansa sasakaretengen ita miharateng ko nafalocoˈan no niyah, miremo to tatiihay a harateng, hanaca pairaen ko makapahay tawlikay a nafalocoˈan, mihaen wa madolo kita misodod to tao.—Nengnengen ko sapatongal lalakaw “Toloay ko Hapakayraan Padama Tisowanan Misodod to Tao.”

CERIDEN A MIHARATENG KO EPOC NO MISODODAY

17. O misododay pairaay to manan a haepoc?

¹⁷ Misodod to tamdaw wa adihay ko epoc, nengnengen ita ko pina. Saka cecay, todongen ita ko matomesay to siniˈada a kakarayan Wama ci Yihofa, pakahemek Cingranan. (Luka 6:36) Saka tosa, mihaen ko demak paihkalay to miakoˈiday ko niyah to pisodod ni Yihofa. (Matay 6:12) Saka tolo, wa talifak kita, wa malangaˈay ko kalalaˈed to tao.

18-19. Misodod to tao pairaay to manan a sapalemed hani?

¹⁸ Misodod to tao alatek wa ira ko cowa ka harateng ita a sapalemed. Liyawen ita minengneng ko nalifetan ni Tanis. Ikor mafanaˈayto cingra, oya parakatay na mahererek ko pisawkit i, sakinasoˈotaw sanay cingra. Kawra o pisodod no salikaka ci Tanis cingranan, patemeray to falocoˈ ningra, mihaenay oya parakatay a tamdaw misatapangay cingra ato Misawacayay Tamdaw ni Yihofa a mikingkiw.

¹⁹ Alatek misodod kita to tamdaw pasangaran nanay, kawra hamaan a matawal, ano misodod kiso pairaay to adihayay a sapalemed. (Matay 5:7) Mansa, nanay saˈicelen ita mitodong ci Yihofa, makalim misodod to tamdaw.