LALENGOEN LALAKAW 20
RADIW 7 Ci Yihofa O ˈIcel no Mita
Micangacang ci Yihofaan to Sahinom
‘Nanay o sapakahemek panokayen to sidaˈitay a Wama, pafeliay to kihcod a sahinom a Kawas.’—2 KORINTO 1:3.
KALIMLAAN NO LALAKAW
Nengnengen ci Yihofa samaanay a mihinom to malaholiway tayra i Papilon a Yutaya tamdaw, ato o manan ko mananamay ita.
1. Malaholiway a Yutaya tamdaw samaanayto ko kaˈorip nangra?
HARATENGEN hena, malaholiway tayra i Papilon a Yutaya tamdaw samaanay ko harateng. Maˈaraway nangra ko nikalaˈafo no niyaroˈ no niyah. Pakayniay i nanolitengan ato niyah a midemakan a raraw, mikitini i nalacolan malaholiw tayra i kafahalan a pala. (2 Rayray 36:15, 16, 20, 21) Itira iraay ko pasalat no kaˈorip nangra, kawra, malaholiw i kafahalan a pala tada matoledayto, cowa ko kaolahan nangra noka ˈorip koni. (Yirimiya 29:4-7) Samaanay ko harateng nangra toniya pakayraan hani? Ilalomaˈ iraay ko cecay mahaenay ko sowal: ‘Maroˈay kami i lawac no ˈalo i Papilon. Maharateng ko Cion maˈiwilay a tomangic.’ (ˈOlic 137:1) Matoleday ko malaholiway a tamdaw, misaaliay to sahinom, wa icowa cangra pakakilim to sahinom hani?
2-3. (1) Samaanay ko demak ni Yihofa to malaholiway a Yutaya tamdaw? (2) Oniya lalakaw mamilengo to manan?
2 O sidaˈitay a Kawas ci Yihofa o ‘pafeliay to kihcod a sahinom a Kawas,’ sapihinomaw to polong miingiday Cingranan a tamdaw. (2 Korinto 1:3) Mafanaˈay ci Yihofa, o roma malaholiway a tamdaw, hamamicada to saparikec Ningra a pasasiyor miingid Cingranan. (Isaya 59:20) Mihaenay maedeng ˈayaw no 100 a miheca, mikayatan ni Yihofa ko pairasolay ci Isaya miˈoningan to Isaya a cudad, o araaw i, mamihinom cangranan. Sanay ci Isaya miˈoning: ‘Saan ko Kawas namo: “Hinomen ko finawlan Ako, ka pihinom cangranan.”’ (Isaya 40:1)
3 Mahecad tora malaholiway Yutaya a tamdaw, maceriday kita sapicadaaw to sahinom. Oniya lalakaw mamilengo, o masamaanay ko pakayraan ni Yihofa mihinom to lalitengan a finawlan Ningra: (1) Mikiˈokay to hamamisodod to pasasiyoray a tamdaw, (2) paira to hatokel, (3) padama cangranan pakalowid to ciˈangiay. Wa milengoho, anini samaanay ci Yihofa i mahecaday a pakayraan a mihinom kitaanan.
MISODODAN NI YIHOFA KITA
4. Samanay ci Yihofa paihkal to matomesay ko siniˈada a falocoˈ Ningra? (Isaya 55:7)
4 O ‘siniˈadaay a Wama’ ci Yihofa. (2 Korinto 1:3; ˈosien ko Isaya 55:7.) Mihaenay mikiˈokay Cingra, wa hamamisodod toya pasasiyoray a Yutaya tamdaw. Saan Cingra: ‘Tano tahadaˈocay a madimadiay a olah Ako, siniˈada tisowanan.’ (Isaya 54:8) Misamaan ci Yihofa paihkal to matomesay ko siniˈadaay a falocoˈ Ningra hani? Soˈlin, pakayni i Yutaya a kitakit i, wa mitamorong ko Yutaya tamdaw to nano misafelitay to Kawas a teloc nangra, kawra mikiˈokay ci Yihofa, cowa ko tahadaˈoc materek i Papilon cangra, wa patikol cangra tora nalacolan. (Isaya 40:2) Onini a sowal tada mahinomay ko nai falocoˈay pasasiyor a tamdaw!
5. Palalinien to malaholiway a Yutaya tamdaw, mangalefay ira ko lalangian ita pakasoˈlin to siniˈadaay a Kawas ci Yihofa, misamaanay hani?
5 O manan ko mananamay ita? Ci Yihofa mahemekay misodod to finawlan Ningra. Palalinien to malaholiway a Yutaya tamdaw, mangalefay ira ko halalangian ita pakasoˈlin tonini a demak. Misamaanay hani? Samanen mafanaˈay kita to misododay ni Yihofa a lalangian. Mikayatan ni Yihofa ci Isaya mitilid to Fangcalay Cudad ikor no pina soˈot miheca i, micorcoran ni Yihofa ko kanonoˈan a Wawa Ningra tayni i hekal patafang to sapatefoc. Iraay ko misalalangian ni Yihofa, misodod to nai falocoˈay pasasiyor a mararaway tamdaw, misongilaˈ a ‘misipasip’ to raraw nangra. (Dmak 3:19; Isaya 1:18; Ifiso 1:7) Tada siniˈadaay to tamdaw a Kawas ci Yihofa!
6. Midotim to misamaanay ci Yihofa misodod kitaanan, o manan ko epoc hani? (Nengnengen ko coka.)
6 Ano pakayni i raraw ita, tada o sakacikiyam no falocoˈ ita i, wa ngaˈay mikitini i Isaya 55:7 micada to sahinom. O roma tamdaw alatek pakayniay mararaway a demak a pasasiyor, kawra padadotocayho a cikiyam ko falocoˈ. Ano tahasiˈayaway kita to teloc no nika raraw no niyah, wa pasangar a mifalah to hatiniay a harateng. Kawra ano mihayi kita to niyah a raraw, halo misalof to niyah, wa pakasoˈlin to misododanto ni Yihofa ko raraw ita. Ano misododho ci Yihofa kitaanan i, cowato ko mamaharateng ko raraw ita. (Nengnengen ko Yirimiya 31:34.) Cowato ka ciharateng ci Yihofa to na midemakan ita a raraw, hamaan haenen ita ko demak. Pakayni ci Yihofaan, o masakalimlaan i, nohatini misamaan ko demak ita, cowa ko nidemakan ita a mararaway. (Icikil 33:14-16) Cato ka halafin, sidaˈitay i kakarayan a Wama wa tahadaˈoc palahdaw to teloc no mararaway a demak no mita.
Pakayni ci Yihofaan i, o manan ko raraw ita isaˈayaw cowa ko masakalimlaan, ao nohatini o manan ko midemakan ita (Nengnengen ko saka 6 fatac)
7. Ano mihimed kita to raraw i, misamaan ko demak ngaˈ ira ko timolo micangacang to sapadama no malohemay malitengay?
7 Ano pakayniay mihimeday to pakidemay a raraw, eca ka ngaˈay ko makapahay falocoˈ i, samaanen ko demak hani? Pakalalokay ko Fangcalay Cudad kitanan, micangacang to sapadama no malohemay malitengay. (Yakop 5:14, 15) Soˈlin, mamihayi to raraw no niyah cowa ko madoloay. Kawra haratengen minilnilan ni Yihofa a malohemay malitengay papadama kitaanan, hanaca mahecaday cangra ci Yihofaan matomesay ko maolahay siniˈadaay a falocoˈ. Ano haratengen ita koniya tosa a demak, halo pasasiyor i, irato ko timolo ita mikilim to malohemay malitengay. Nengnengen ita ko nalifetan ni Aser,a na pakayni i raraw ningra a macariraw ko falocoˈ. Saan cingra: “Maedeng cecay a miheca, takaw sanay kako minengneng to maˈodangay kaacekan a lalakaw. Ikor tahatengilay kako to pakayniay i makapahay falocoˈ a kimad, milengoan ako ko fafahi ato malohemay malitengay to raraw no niyah. Mikitiya i sakahmaw sanayto ko harateng ako. Kawra, maharateng ko nidemakan a raraw i, kamayan masomad ko falocoˈ. Patalipaˈelalay ko malohemay malitengay takowanan, kamayan ci Yihofa makalim mala widang no mako, o olah ni Yihofa koni a mirikec takowanan. Mitemeray ko sowal nangra to falocoˈ ako, padama takowanan misalof to harateng no niyah.” Nohatini ci Aser o miceriday a misakafahay, o dama sikawdan cingra. Ano nai falocoˈ pasasiyor kita, wa mahemek ci Yihofa misodod kitaanan. Maharateng koninian i, tada mahinomay ko falocoˈ no mita!
PAFELIAY CI YIHOFA KITAANAN TO HATOKEL
8. (1) Pafelian ni Yihofa ko malaholiway a Yutaya tamdaw to manan a hatokel? (2) Mikitini i Isaya 40:29-31, o sapafeli no Kawas a hatokel, pakayra to nai falocoˈay pasasiyor a Yutaya tamdaw o manan ko epoc?
8 I pinengneng no tamdaw i, malaholiway a Yutaya tamdaw awaay ko hatokel. Samanen itiya ciˈicelay mikowanay to hekal a Papilon, cowa ka pitedal to malaholiway. (Isaya 14:17) Kawra pafelian ni Yihofa to hatokel ko finawlan Ningra. Mikiˈokay to hapapasalaten cangra, awaay ko maamaan a demak to hamamiconged Cingranan palaˈosi tonini a demak. (Isaya 44:26; 55:12) I pinengneng ni Yihofa, o Papilon hato alafoh no sera, fiwfiw han no fali awaayto. (Isaya 40:15) O sapafeli no Kawas a hatokel, o manan ko mamacada a epoc no Yutaya a tamdaw? Wa macada nangra ko sahinom. Iraayho ko roma a epoc. Saan ci Isaya: ‘Micaˈangaw a mitala ci Yihofaan a tamdaw, wa miliyaw tahacada to ˈicel.’ (ˈOsien ko Isaya 40:29-31.) Wa matomes ko ˈicel nangra, ‘matiya o kacerak no sapikpik no lidep a maefer.’
9. Malaholiway a Yutaya tamdaw, o manan ko lalangian a pakasoˈlin to wa pasalaten ni Yihofa cangra hani?
9 Coko pafeli aca to hatokel cangranan, mihadakanho ni Yihofa ko hawacay, oha ngangaˈay pakasoˈlin cangra to mamalaˈosi konini a hatokel. Haratengen hena, itiya o manan a sapairasol malaˈosiayto hani? Mafanaˈay ko malaholiway a Yutaya tamdaw, malowidayto no Asiriya ko kaˈamisan a Israil kitakit, palaholiwan ko itiyaay a tamdaw. (Isaya 8:4) Maˈaraway nangra ko Papilon a tamdaw mipalaˈafo to Yirusalim, malaholiwayto cangra tayra i Papilon. (Isaya 39:5-7) Mafanaˈayho cangra mipohawan no tamdaw ko mata ni Citikiya, patayra i Papilon. (Yirimiya 39:7; Icikil 12:12, 13) Malaˈosiayto ko sapairasol ni Yihofa. (Isaya 42:9; 46:10) Midotim ko Yutaya tamdaw toniya demak i, mangalefay ko pipakasoˈlin no falocoˈ to sakiˈok ni Yihofa, wa milifok cangra to pasalat!
10. Itini toniya salikoray a lintad, sasamaanen ita ko demak ngaˈ, ihkal a mahapinang ko sapafeli no Kawas a hatokel?
10 O manan ko mananamay ita? Ano malonay ko falocoˈ ita i, o sapafeli ni Yihofa a hatokel wa ngaˈay mahinom kita, pafeli to ˈicel. Soˈlin maˈoripay kita itini toniya matomesay ko fodifod a hekal, tahalifa to adihayay a sacoˈay, kawra hamaan a sawaden ita ko hatokel. Pafelien ni Yihofa kita to makapahay a hatokel, wa milifok to soˈlinay a dipayal ato rihaday tahadaˈoc. Haratengen konini a hatokel i falocoˈ no mita, ho ihkal a mahapinang koniya hatokel. O sapafeli no Kawas a hatokel mahecaday to manengnengay makapahay i papotal no sasingaran, ano cialafoh ko sasingaran i, cato ka hapinang ita ko makapahay i papotal. Sasamaanento ita ko demak ngaˈ hato “misisitan ko alafoh no sasingaran” hani? Ceriden ita miharateng, maˈorip i faelohay a hekal tada kasemeranto. Minengnengho kita milingatay to hanoikor a hatokel a lalakaw ato ika, mitengil to somowalay to lakoing a radiw. Fanaˈenho i satolon ci Yihofa, hinatalaay kita mamacada i lakoing a sapalemed.
11. Pakidem ko adada no cecay a fafahiyan salikaka, samaanay miliyaw milifok to haˈicel hani?
11 Nengnengen ita, o hatokel samaanay mihinom a paˈicel ci Ciyawian. Pakidemay ko adada ni Ciyawi, sanay cingra: “Ano matoled kako i, mifanaˈan ako ci Yihofa to nafalocoˈan, mafanaˈay kako cipinangay Cingra takowanan. Pacaˈofan ni Yihofa ko satolon ako, pafeli to ‘tadamaanay a ˈicel.’” (2 Korinto 4:7) Maceriday miharateng ci Ciyawi to maˈoripayto i lakoing ko niyah, itiyato i, wa ‘cowato ka pasowal ko finawlan to “adadaay kako.”’ (Isaya 33:24) Ano fanaˈan ita ci Yihofa to nafalocoˈan ita i, halo pamotek minengneng to hatokel no mita, wa miliyaw milifok to haˈicel.
12. O manan ko halalangian ita pakasoˈlin to sakiˈok ni Yihofa wa malaˈosi maemin? (Nengnengen ko coka.)
12 Mahecad militemoh to malaholiway a Yutaya tamdaw, adihayay ko sapafeli ni Yihofa kitaanan a lalangian, pakasoˈlin kita to sakiˈok Ningra wa malaˈosi. Haratengen ko malaˈosiayto a sapairasol. Tinakoen, manengnengay ita ko Ciˈicelay Mikowanay to Hekal a Padaka ato Ikok, ‘o roma ciˈicelay, o roma malonayay.’ (Taniil 2:42, 43) Matengilayho ita ko lihaf, ‘icowacowa iraay ko ˈatoray.’ O roma i, misawacayay kita itini i ‘kalo a kitakit ato kasangasaw.’ (Matay 24:7, 14) Onini a sapairasol matongalay ko pakasoˈlinay falocoˈ ita ci Yihofaan, pakasoˈlinho kita o sakiˈokho Ningra wa malaˈosi maemin.
Matatodongayto a sapairasol padamaay kitanan ira ko lalangian a pakasoˈlin, o mikiˈokanho ni Yihofa wa palaˈosien Ningra maemin (Nengnengen ko saka 12 fatac)
PADAMAEN NI YIHOFA KITA PAKALOWID TO ˈANGI
13. (1) ˈAyaw no mapasalat ko Yutaya tamdaw, wa tahasiˈayaw to manan a pasangar hani? (2) Mikitini i Isaya 41:10-13, samaanay ci Yihofa mihinom to malaholiway a Yutaya tamdaw?
13 Soˈlin pafelian ni Yihofa ko Yutaya tamdaw to mamiliyaw micada to pasalat a hatokel, mihinom cangranan, kawra mafanaˈay Cingra ˈayaw noninian i, wa tahasiˈayaw cangra to pasangaray a pakayraan. Pairasolayto ci Yihofa, itiya wa ira ko ciˈicelay a hongti, palaˈafo to i taliyokay no Papilon a kitakit, ikor miˈodis to Papilon. (Isaya 41:2-5) Itiyato i, i Papilonayho a Yutaya tamdaw, wa matalaw han? Paliˈayawayto ci Yihofa mihinom to finawlan Ningra: ‘Hamaan a matalaw, kalacafayan Ako kiso, hamaan cariraw, samanen o Kawas iso Kako.’ (ˈOsien ko Isaya 41:10-13.) Misamaanay hano ‘o Kawas iso Kako’ saan ci Yihofa hani? Cowa ko patalipaˈelalay Cingra to Yutaya tamdaw a midoko Cingranan, samanen mafanaˈayto cangra to mamihaen to demak. Patalipaˈelalay ci Yihofa cangranan, i tatihiay nangra Cingra, oha papadama cangranan.—ˈOlic 118:6.
14. Sapipadamaaw to Yutaya tamdaw pakalowid to ˈangi, o mananho ko midemakan ni Yihofa hani?
14 Sapipadamaaw to Yutaya tamdaw pakalowid to ˈangi, pakatalipaˈelalan ni Yihofa cangra, miharateng to mafanaˈay to kihcod a Kawas Cingra, hanaca awaay ko tolas no ˈicel. Papicaˈangawan ni Yihofa cangra a minengneng to foˈifoˈis, coko pisangaˈ aca Ningra toniya foˈifoˈis, mihacecayanho pangangan cangra. (Isaya 40:25-28) Ano mafanaˈay ci Yihofa to emin a ngangan no foˈis i, wa mafanaˈ Cingra to ngangan no midokoay Cingranan a tamdamdaw. O roma i, ano ciˈicelay ci Yihofa misangaˈ toniya kihcod a foˈifoˈis i, wa ciˈicel Cingra midipot to finawlan no Niyah. Mihaenay, malaholiway a Yutaya tamdaw, awaay ko halalangian a calemcem a matalaw.
15. Samaanay ci Yihofa padama to malaholiway a Yutaya tamdaw, pakayni to hamamifekad a demak talaˈayaw misaday?
15 Padamaenho ni Yihofa ko finawlan Ningra, misaday to hamamifekad a demak. Isaya saka 26 fedengan, mifanaˈ ko Kawas to finawlan Ningra: ‘Micomod tayni ilalomaˈ, miedef to fawahan. Milimekho to cecay liyad, tahira i kalahcian no ngolaw.’ (Isaya 26:20) Oniya sapairasol alatek itiniay i palaˈafo ni Cirus to Papilon i, malaˈosiayto. Mikakingkiway to likisi no Krisiya sanay, ci Cirus micomod i Papilon i, “miocor to sofitay mipatay to emin materekay i papotal a tamdaw.” Haratengen hena, tada matalaway ko itiraay a tamdaw! Kawra, ya malaholiway a Yutaya tamdaw pakayniay pidofdof to sakayat ni Yihofa a madipot ko ˈorip.
16. Hano caka pakidem a cariraw kita to mamafekad a demak? (Nengnengen ko coka.)
16 O manan ko mananamay ita? Cato ka halafin i, oha tahasiˈayaw kita to taˈangayay padiing. Misatapang ko taˈangayay padiing i, i hekalay a tamdaw i, sasifod sato a marawraw. Kawra o finawlan no Kawas cowa ko mamatalaw. Wa micaˈangaw kita a mitala, samanen mafanaˈay kita ci Yihofa o Kawas no mita, ‘wa kalikito a malidong’ kita. (Luka 21:28) Soˈlin makakadepay a kitakit miˈodis kitaanan i, cowa ko mamangiyangi kita a matalaw. Wa corcoren ni Yihofa ko coyoh midipot kitaanan, wa mikayatho to sakadipotaw no ˈorip ita. Misamaan kita mafanaˈ toniya sakayat hani? Cowaho ka fanaˈ kita nohatini, kawra alatek pakaynien i kasakopang. Itiyato i, o kasakopang alatek oha picomodan ita a ‘lalomaˈan,’ materek kita wa rihadayto kita. Nohatini misamaan kita misaday to mamifekad a taˈangayay padiing hani? Makakedec kita malacecay to salikaka, mahemek a midofdof to sakayat no likakawa, halo pakasoˈlin ci Yihofaan to mikayatan Ningra ko likakawa ita.—Hipray 10:24, 25; 13:17.
Ciˈicelay ci Yihofa milidong to finawlan no Niyah, ano midotim kita tonini i, wa cowato ka pakidem a cariraw i taˈangayay a padiing (Nengnengen ko saka 16 fatac)b
17. Misamaan kiso micangacang to sahinom ni Yihofa?
17 Soˈlin malaholiway itini Papilon a Yutaya tamdaw, cowa ko madoloay ko kaˈorip nangra, kawra pafelian ni Yihofa cangra to sahinom. Wa mihaen Cingra a padama kitanan. Anoikor o mananto a demak ko hamamifekad i, wa padadotoc kita micangacang to sahinom ni Yihofa. Pakasoˈlin to o matomesay ko siniˈada a Wama Cingra, mahemekay misodod to tamdaw, haratengenho ita kora sapafeli Ningra a hatokel. Ira ci Yihofa mala Kawas no mita, cowa ko mamatalaw kita!
RADIW 3 Tadiˈecen ko Kawas, O Nonoˈ, O ˈIcel
a Mifalican ko ngangan no tamdaw itini toni lalakaw.
b TATODONG NO COKA: O roma salikaka masaˈopoay. Manengneng nangra ko foˈifoˈis i kakarayan, maharatengay to awaay ko tolas no ˈicel ni Yihofa, matongalay ko pakasoˈlin ano icowato maˈorip ko finawlan Ningra, iraay ko ˈicel Ningra midipot cangranan.