Padadotoc Mikitini i Taˈeneran no Soˈlinay Kimad Milifok to Epoc

1. Isalakat mananamay iso a soˈlinay kimad no Fangcalay Cudad, samaanay mifiyor tisowanan hani?

MAHARATENGAYHO i salakat mananamay a soˈlinay kimad no Fangcalay Cudad samaanay mifalic to hakelong no ˈorip iso han? Mafanaˈto kiso to ngangan no Kawas ci Yihofa, misatapangayto ko kalawidang iso Cingranan. (Isaya 42:8) Mafanaˈayto kiso to samaanay ko demak no patay, cowato ka calemcem to mapatayay a salawina ato widang to hamamisemsem icowa. (Patnakay 9:10) Mananamay iso ko hatokel i Lakoing, cowato ka carirawen to hanoikoran. Oniya hatokel papipakasoˈlinay tisowanan, o hakelong no ˈorip cowa ko pito falo poloˈ ko mihecaan, oha ngangaˈay kiso tahadaˈoc a maˈorip!—ˈOlic 37:29; 90:10.

2. Hano patalipaˈelal ci Pitiro to halafinayto a miheca midoko to Kawas a Krisciyang, papiharateng to i salakat mananamay a soˈlinay kimad? (2 Pitiro 1:12, 13)

² Aka a tawalen ita tahadaˈoc, o taˈeneran no soˈlinay kimad no Fangcalay Cudad tada o kalimlaan. Pakayni tonini ngaˈay mikitini i saka 2 Pitiro a mahapinang. Mitilid ci Pitiro toniya tikami i, o kasakopang no Krisciyang iraay ko makaniway a singsi, sapikayhidaw cangra to tamdaw miliyas to soˈlinay kimad. (2 Pitiro 2:1-3) Sapipadamaaw ci Pitiro to salikaka misiˈayaw to mahaenay a sapalifet, oranto i, patikamiay sapipakalalokaw cangranan. Soˈlin oniya Krisciyang halafinayto a miheca mitawmec to soˈlinay kimad, kawra kamayan ci Pitiro patalipaˈelal cangranan, haratengen ko mananamay i salakat a soˈlinay kimad. (ˈOsien ko 2 Pitiro 1:12, 13.) Mafanaˈay ci Pitiro, oniya soˈlinay kimad kamayan a padama cangranan, ho madimadi cangra tahacerem.

3. Misamaanay hano o emin a Krisciyang toha papadadotoc a midotim to taˈeneran no soˈlinay kimad no Fangcalay Cudad? Patinakoen a mitadtad.

³ Alatek halafinayto a miheca kita midoko ci Yihofaan, soˈlin mahaen, wa kamayan kita mikitini i taˈeneran no Fangcalay Cudad a soˈlinay kimad mananam ko faelohay a demak. Tinakoen, o mitangtangay a congpo misakadademak to tatangtangen a cayliyaw i, alatek mahecadayto to mihatatanamayho a congpo. Kawra halafinayto a mihecaan a nalifetan, oniya congpo mafanaˈayto to sasamaan misakadademak toniya cayliyaw, mitangtangto masakenakenaay a faelohay a liyawli. Mahecadayto, ano midotim to soˈlinay kimad no Fangcalay Cudad i, halafinayto a mihecaan midoko ci Yihofaan a Krisciyang ato faelohay a minanam to Fangcalay Cudad a tamdaw alatek cowa ka hecad ko harateng. Misamaanay hani? Halafinto ko lingad no toki i, o pakayraan no mita ato mipaputisem a tatokian cowa ka hecad, adihayayto ko nalifetan. Itini toniya tatokian i, tikolen ita a miharateng ko taˈeneran no soˈlinay kimad, alatek wa irato ko faelohay noka cipinang. Dotoc wa milengo kita to tolo a taˈeneran no soˈlinay kimad, manengneng ko halafinay a miheca a mipaputisem a Krisciyang mikitini minanam to manan.

O MISANGAˈAY A TATAPANGAN CI YIHOFA

4. Mafanaˈ ci Yihofaan o Misangaˈay a Tatapangan, samaanay mifiyor kitanan hani?

⁴ Sanay ko Fangcalay Cudad: ‘O Kawas ko patirengay to polong a maamaan.’ (Hipray 3:4) Mananamay ita, ci Yihofa o malefotay ko ˈicel ato inaneng a Misangaˈay a Tatapangan, o cikiw ato maˈoripay i cikiw sahtoay o misangaˈan Ningra. Misangaˈan ni Yihofa kita, mansa cipinangay kitanan. Mafanaˈay Cingra to o manan ko sangaˈayay kitanan, hanaca ciharatengay kitanan. Cipinang ci Yihofaan o Misangaˈay a Tatapangan onini a taˈeneran no soˈlinay kimad, tangongolay ko noka pifiyor kitanan, paira to soˈlinay a epoc i hakelong no ˈorip ita.

5. Haratengen to o Misangaˈay a Tatapangan ci Yihofa, samaanay padama kitanan hani? (Isaya 45:9-12)

⁵ Haratengen to o Misangaˈay a Tatapangan ci Yihofa oniya soˈlinay kimad, oha papadama kitanan padadotoc a misapoener. Nengnengen ko tinakoan ni Yopu. Na pakidemay cingra misakareteng to harateng ato nafalocoˈan no niyah, patalipaˈelalan ni Yihofa cingra a miharateng to o cima ko malefotay ko ˈicel a Misangaˈay a Tatapangan. (Yopu 38:1-4) Onini padamaay cingranan a mihapinang, ci Yihofa i masamaamaanay a pakayraan ikakaay tono tamdaw a ciinaneng. Ikor o pairasolay ci Isaya paihkalay to mahecaday a harateng, sanay cingra: ‘Wa ngaˈay milicay ko ditaˈ to misakorengay “o manan ko misangaˈan iso” wa saan han?’—ˈOsien ko Isaya 45:9-12.

6. I masamaanay a pakayraan, oha mamikiriwiˈ kita a miharateng to saˈakawangay a saaroˈan no Misangaˈay a Tatapangan? (Nengnengen ko coka.)

⁶ Palidlid sato adihay ko nalifetan ita, alatek wa pakidem ko pisakareteng a minengneng to niyah, matawal to misolap to Fangcalay Cudad a micangacang to sakayat ni Yihofa. (Yopu 37:23, 24) Sasamaan ko demak ita ngaˈ pakaremo to mahaenay a pakayraan hani? Oha mamisongilaˈ kita a miharateng, o Misangaˈay a Tatapangan no mita tadamaanay, o taneng Ningra awaay ko mikikakaay. (Isaya 40:22; 55:8, 9) Oniya taˈeneran no soˈlinay kimad ngaˈayay padama kitanan misapoener, cowato pisakareteng to harateng no niyah.

7. Sapicadaaw to sasalof no likakawa, samaanay ko demak no fafahiyan salikaka ci Rahela hani?

⁷ Nengnengen ita ko itiniay i Selowiniya ko nalifetan no fafahiyan salikaka ci Rahela. Midotim to Misangaˈay a Tatapangan ci Yihofa oniya soˈlinay kimad, na padamaay cingranan micada to sasalof no likakawa. Sanay cingra: “Micada to saˈosi no mikeriday a faˈinayan salikaka, nolatekay cowa ko madoloay. Tinakoen, soˈliˈlin na matengilayto ako ko salasil no Malohemay Malitengay i Congpo ngaˈayay ko faˈinayan salikaka cingisngisa, kawra sakacecay pakaˈaraw kako to cingisngisay a faˈinayan salikaka a mikimad i, macekidan nanay kako. Oranto i, mitolonay kako ci Yihofaan, micangacang Cingranan padama takowanan mikifalocoˈ micada toniya sasalof.” Ikor mahapinangay ni Rahela fafahiyan salikaka, soˈlin o misangaˈay to kakarayan ato sera a Tatapangan ci Yihofa, mansa o iraay ko ˈicel tano sangaˈayay a pakayraan mikerid to likakawa no Niyah. Ano pasangaran nanay micada to sasalof no likakawa saan kiso i, hano caka pipalak to toki misinanot a midotim to taneng no Misangaˈay Tatapangan ato tadamaanay a ˈicel Ningra hani?—Loma 11:33-36.

HANO MIHAYI KO KAWAS TAHARORAY KO TAMDAW

8. Mafanaˈ to pihayi no Kawas taharoray ko tamdaw a lalangian, pakayni kitanan iraay ko manan a epoc hani?

⁸ Hano mihayi ko Kawas taharoray ko tamdaw hani? Samanen cowa ka kilim ko caˈof noniya salicay, mansa o roma tamdaw mirorohayto to Kawas, o roray ato pades sahtoay Cingra ko pairaay, o roma tamdaw miharateng to awaay ko Kawas materek sanay. (Taneng 19:3) Kawra, pakayni minanam to Fangcalay Cudad, mafanaˈayto kita o roray ato pades cowa ko nai Kawasay, o nano mirocokay to raraw ato pairaan no raraw a cowa ka lefot. Mananamayho ita, o pihayi ni Yihofa materek ko pades ato roray hatira ko halafin, o paihkalay to mihadidiay a falocoˈ to tamdaw. Mihaen, ngaˈ ˈaloman ko tamdaw ira ko toki mafanaˈ Cingranan, cipinang to sasamaan Cingra misongilaˈ palahdaw to roray ato pades noikor. (2 Pitiro 3:9, 15) Oniya soˈlinay kimad tada mihinomay kitanan, ciharateng sapiingidaw Cingranan.

9. I masamaanay a pakayraan, oha mamikiriwiˈ kita a miharateng to pihayi ni Yihofa taharoray ko tamdaw a lalangian?

⁹ Cipinangay kita, mitala ci Yihofaan mipalahdaw to roray ato pades i, misaaliayto mihadidiay no mita. Kawra, ano tahalifa kita ato i tatihiay a tamdaw to cowa ka sadafdaf a demak i, mapatay ko salawina anca tahalifa to pasangar, alatek wa macariraw kita, saan a miharateng: “Hano nayar sa ci Yihofa eca ka pisaysay hani?” (Hapakuk 1:2, 3) I mahaenay a tatokian i, mamisongilaˈ kita mitikol miharateng to pihayi ni Yihofa to moecelay tamdaw taharoray a lalangian.b (ˈOlic 34:19) Ngaˈayayho miharateng kita, maherekayto ci Yihofa misaˈosi toha papalahdawaw to roray ato pades, hanaca wa palaˈosien Ningra konini a araaw.

10. Samaanay ci Anni misiˈayaw to rarom no kapatay no wina ningra hani?

¹⁰ Mafanaˈ to Kawas hano mihayi to tamdaw taharoray, padamaay kitanan itini kapasangaran padadotoc a mihadidi. Nengnengen ko nalifetan no fafahiyan salikaka ci Anni, itiniay cingra i Mayote a Potipot no Intiya Riyar, ˈayaw no pina miheca mapatayay ko wina ningra. Sanay cingra: “Mapatay ko wina mararomay kako. Kawra, maceriday kako patalipaˈelal to niyah, o roray ato pades cowa ko ci Yihofa ko pairaay. Halo makalimay Cingra patatikol paˈorip to mapatayay tamdaw, palahdaw to kihcod a roray no hekal. Midotim toniya soˈlinay kimad tada taˈangayay ko sahinom takowanan. Nolatekay, cowa ka pakasoˈlin kako to niyah hano ngaˈay sa rihaday ko falocoˈ no mako.”

11. Cipinangto o ci Yihofa mihayiay to tamdaw taharoray a lalangian, sasamaan pakalalok kitanan kodait a mitosil hani?

¹¹ Cipinang to Kawas mihayi to tamdaw taharoray a lalangian, ngaˈay pakalalok kitanan kodait a mitosil. Itiniay i tikami ci Pitiro a mitadtad o pihadidi ni Yihofa pairaay to sakalidongaw ikor, pakalalokay to salikaka to hamamiharateng malo o masamaanay a tamdaw ko niyah, dotoc sanay cingra: ‘Ira ko makoracay a capeling, mangodoay to Kawas a waywayan.’ (2 Pitiro 3:11) O ‘mangodoay a waywayan’ mahawpay ko mitosilay. Mahecad to kakarayan a Wama, maolahay kita to i kilacay a tamdaw, makalim cangranan noikor ngaˈay a maˈorip i moecelay faelohay a hekal no Kawas. Anini padadotocay ci Yihofa mihadidi, ho ira ko pakayraan nangra midoko Cingranan. Ngaˈay kita mala kapot no Kawas matayal, misaˈicel padama to ˈalomanay a tamdaw i ˈayaw no kairaan no salikoray a romiˈad mafanaˈ Cingranan, tada o kalikoan no mita!—1 Korinto 3:9.

MAˈORIPAY KITA ITINITO I ‘SALIKORAYTO A ROMIˈAD’

12. Mafanaˈ kita to itiniayto i ‘salikorayto a romiˈad’ i, pakayni kitanan o manan ko epoc hani?

¹² Ihkalay mifanaˈ ko Fangcalay Cudad, itini toniya ‘salikorayto a romiˈad’ mamisamaanto ko waywayan ato harateng no tamdaw. (2 Timoti 3:1-5) Ano nengnengen ko i taliyokay a tamdaw, wa mahapinangto ita malaˈosiayto koniya sapairasol. Soˈlinayto, o aniniay a tamdaw mahecaday to sapairasol mangalef mangalef ko nika riˈang, pakasoˈlinay kita toninian o soˈlinayto ko Kimad no Kawas oha ngangaˈay a tiˈeren.—2 Timoti 3:13-15.

13. Maˈaraw ko masowalay i Luka 12:15-21 a sapatinako ikor, wa miharateng kita to o manan a salicay hani?

¹³ Mafanaˈ kita to maˈoripayto i salikorayto a romiˈad, wa ngaˈay padama kitanan padadotoc a macalohen. Pakayni tonini, nengnengen ita ko masowalay ni Yis a sapatinako i Luka 12:15-21. (ˈOsien.) Misamaanay oya sapatinako a cihafayay ‘cowa ka cipinangay’ han hani? Cihafayay cingra cowa ka saan, ao cowa ka mihapinang cingra to o manan ko masakalimlaan. O misakaretengan ningra o ‘sapitaring aca to hafay’ ningra, telocto ‘itini pinengneng no Kawas’ cowa ko cihafayay. Hano o pakidemay han koniya demak hani? Hananay no Kawas cingra: ‘Anini a dadaya wa mapatayto kiso.’ Mahapinangayto, oha mamisakadademak cingra to toki i masakalimlaan a demak. Anini, oniya a lekakawa wa mahererekto, cowato ka adihay ko maˈosaway ita a toki. Oha mamisinanot kita miharateng to niyah: “O mipatosokan no mako paihkalayto misakaretengay kako to kalimlaan a demak han? Padama kako to wawa patireng to patosokan paihkalay to manan hani? O toki, ˈicel, payci icowaan ako a misakadademak hani? O sapitaringaw ako to hafay i fafekang no sera, anca wa i kakarayan a mitaring to hafay han?”

14. Miharateng maˈoripay kita itini salikorayto a romiˈad, hano masakalimlaan hani? Tano nalifetan no fafahiyan salikaka ci Mici a mitadtad.

¹⁴ Roma i, misongilaˈ a miharateng to o salikorayto a romiˈad nohatini, wa ngaˈay mipadama kitanan mipiliˈ to sasamaan ko kaˈorip citaneng ko saˈosi. Iraay ko mahaenay nalifetan no fafahiyan salikaka ci Mici, sanay cingra: “Micodiyap i kawcong i, o miharatengan ako i, malo o mikakingkiway to ˈaˈadopen. Kawra, iraay ko patosokan ako malo o misakafahay, malinah tayra i cisaaliay to mitosilay a kilac a matayal. Mafanaˈ ko matenesay a salikaka to pakayraan ako ikor, patalipaˈelalay takowanan misongilaˈ a miharateng: Malo mikakingkiway to ˈaˈadopen ato mieminay to toki a matayal a tosa ko patosokan i, o matatodongay han? Patalipaˈelalayho cangra takowanan, o hererekan noniya lekakawa wa kalikito aira, i faelohayto a hekal noikor i, wa irato ko awaay ko tolas a toki no mako mikingkiw to masakenakenaay a ˈaˈadopen. Misongilaˈ a miharateng i, misaˈosiay kako mirienang to cecay a liyad, minanam to hasakatayal a inaneng. Ikor, mahelaayto ako ko matatodongay a tayal, misatapangayto misakafah, malinahay tayra i Ekuwato midama to itiraay mitosilay a tayal.” Nohatini, malacafayay ci Mici ato faˈinay i Ekuwato malo milisoˈay to kasakilac ko tayal.

15. Soˈlin cowa ka ngaˈay ko waywayan no tao, hano cowa ka ngaˈay misawad kita mitosil cangranan hani? Patinakoen a mitadtad. (Nengnengen ko coka.)

¹⁵ Miharateng maˈoripay kita itini salikorayto a romiˈad, wa padama kitanan itini pitosilan padadotoc a tawlik. Soˈlin milalang ko tao to ngaˈayay a lihaf, wa kamayan kita eca ka masomad a matoleden. Mamafalic ko tamdaw. Haratengen ko tinakoan ni Yis o safa ningra ci Yakop. Nano mimingan cingra kalacafayay ci Yisan a lomahad, maˈaraw ci Yis tano awaayto ko mikikakaay a pakayraan a pasifanaˈ, maˈaraway ningra ko adihayay a wacay misawacayto o ci Misiya ci Yis. Kawra, halafinayto a mihecaan, cowa pikotod cingra ci Yisan. Tahira patatikol ci Yis maˈorip ikor, ngaˈ malo nisawawaan cingra, ikor fanekfekayto!c (Yohani 7:5; Kalatiya 2:9) Mananamay ita, aka a misawad mitosil to i lomaˈay a tamdaw ato i kilacay a tamdaw. Soˈlin cowa ka olah cangra nohatini, mamikilim to hapakayraan paladaˈ cangranan to ngaˈayay lihaf. Haratengen, maˈoripay kita itini i salikorayto a romiˈad, o kacalohan ko mitosilay a tayal. Alatek to cecay a romiˈad, anca mifekad ko taˈangayay padiing ikor, wa maharateng nangra ko mitenakan ita a ngaˈayay lihaf, ikor alatek irato ko matatodongay a waywayan nangra.d

PAKAYNI I SAPATALIPAˈELAL NI YIHOFA A MIAKOˈID

16. O sapatalipaˈelal ni Yihofa samaanay ciepoc tisowanan? (Nengnengen ko sapatongal lalakaw “Tanonini a Lalakaw Padama to Tao.”)

¹⁶ O roma cihaleday to pakasoˈlinay falocoˈ a kakaenen, pakayniay i cowa ka fanaˈ to Fangcalay Cudad a tamdaw a misaday, tinakoen sakiˈalomanay a casi, pakapapotalay a kimad ato jw.org wangcan a pina a lalakaw ato ika. Soˈlin mahaen, wa ngaˈayho kita pakayni toniya lalakaw a ciepoc. Misinanot kita toniya nai ci Yihofaan a sapatalipaˈelal, ho matongal ko olah Cingranan, paˈicel to pakasoˈlinay falocoˈ to Fangcalay Cudad, tano sangaˈayay ciepocay a pakayraan pakafanaˈ to tao to soˈlinay kimad no Fangcalay Cudad.—ˈOlic 19:7.

17. I masamaanay a pakayraan, ngangaˈay kita miharateng to taˈeneran no soˈlinay kimad no Fangcalay Cudad hani?

¹⁷ Matengil ita ko pakayniay i faelohay ko pitadtad to soˈlinay a kimad i, tada mahemekan nanay, kawra wa pakayni kita i salakat misolotay kitanan a taˈeneran no soˈlinay kimad paihkal to miakoˈiday. Ano mahapinang ita ira ko sano niyahay a pinangan, cowa ka dolo micada to sakayat no likakawa i, o mamiharateng mikayatay toniya likakawa o malefotay ko ˈicel ato inaneng a Misangaˈay a Tatapangan, wa ngaˈay padama kitanan padadotoc a misapoener. Kita anca i taliyokay a tamdaw ano misiˈayaway to pasangar i, ngaˈayay midotim hano hayien ni Yihofa ko tamdaw a taharoray, ngaˈayay padama kitanan padadotoc a mihadidi. Ano miharatengay kita to hanoikoran a hadademaken, oha mamisongilaˈ a miharateng to maˈoripay kita i salikorayto a romiˈad, ngangaˈay padama kitanan padadotoc a macalohen, citaneng ko pisaˈosi. Nanay padadotoc kita mikitini ci Yihofaan a sapatalipaˈelal milifok to taneng ato sapakalalok, padadotoc a madimadi matayal saki Cingranan!