Soˈlinto Matoled ko Falocoˈ, Kamayan Kodait Caay ka Pisawad

1. Itini ilalomaˈ no likakawa ni Yihofa, malifokay ita ko maanan a sapalemed hani?

ITINI tonini pasangaray siˈayawen a mikiriwiˈay a lintad, masalalomaˈ no likakawa ni Yihofa soˈlinayto adihayay ko malifokay ita a sapalemed. Soˈliˈlin tatiih tatiihay ko pakayraan no hekal, kawra pafelian ni Yihofa kita to makedecay makakaolahay a kasakapot no salikaka. (ˈOlic 133:1) Padamaayho Cingra kitanan patanoktok to kalalaˈed ato paro no lomaˈ. (Ifiso 5:33–​6:1) Roma i, pafeliayho Cingra kitanan to taneng ato micalepay mihapinang to demak a inaneng, padama kitanan padadotoc rihaday ko falocoˈ.

2. Sasamaan ko pidemak ita hani? Misamaanay?

² Kawrira, mamisaˈicel kita ngaˈ ngaˈay padadotoc madimadi matayal saki Yihofaan. Misamaanay hani? Samanen nolatekay pakayniay kita i sasowalen no salikaka anca midemakan nangra a mapakararaw alatek, pakayniayho i pisaliyaliyaw mararaw to malecaday a raraw no niyah a matoleden ko falocoˈ alatek. Onini a lalakaw mamilengo (1) ano mapakararaw no salikaka kita i, (2) ano mapatoled no ramod kita i, (3) ano matoled kita to niyahan i, sasamaan kita padadotoc caay ka pisawad midoko ci Yihofaan. Onini lalakaw mamilengoho, sasamaan kita mitodong to iraay ko malecaday nalifetan a tamdaw i Fangcalay Cudad.

ANO MAPAKARARAW NO SALIKAKA KITA I

3. Mamisiˈayaw kita to maanan pasangaray demak alatek?

³ Masiˈayaway a pasangaray. O pinangan no romaroma salikaka caay ka olah kita alatek. O midemakan no roma salikaka pakatoleday kitanan alatek. O roma salikaka cowa pisikor to harateng ita, midokaˈay kitanan. O mikeriday faˈinayan salikaka mararaway ko pidemak alatek. Pakayni tonini pakayraan alatek cacisasa ko romaroma tamdaw to o likakawa no Kawas konini hokira, telocto i, alatek miliyasto cangra toya pakararaway cangranan a salikaka, anoca sawad sato mirienang to saˈopo, caayto ka ‘lacafay to salikaka midoko’ to Kawas. (Cifaniya 3:9) Mihaen o matanengay a demak koni han? O cecay tamdaw i Fangcalay Cudad na tahalifaay to malecaday pasangaray demak, nengnengen ita ko taˈarawan ningra.

4. Misiˈayaway ko tarokos ci Pawlo to maanan pasangaray demak hani?

⁴ Taˈarawan i Fangcalay Cudad. Tarokos ci Pawlo mafanaˈay to cowa ko malefotay ko salikaka. Hano mafanaˈ kita hani? Mala Krisciyang cingra caho ka halafin i, mapararaway no salikaka a minengneng cingra. (Dmak 9:​26) Ikor, o roma tamdaw milikafay i lalikor ningra. (2 Korinto 10:10) Maˈaraway ningra ko cecay mikeriday a faˈinayan salikaka mararaway ko pisaˈosi, onini a pisaˈosi papakapolin to tao. (Kalatiya 2:​11, 12) Roma i, o cecay ngaˈayay a kapot ningra ci Marko patoleday cingranan. (Dmak 15:​37, 38) Ci Pawlo cowa ka pakayni to mahaenay a demak, sawad sato micawmaˈ to patoleday cingranan a tamdaw. Iraay ko tawlikay a noka pinengneng ningra to salikaka, padadotocay a fanekfek matayal saki Yihofaan. Misamaanay hano kodait ci Pawlo caka pisawad hani?

5. Hano ngaˈay ci Pawlo mikedec to kalawidang ato salikaka hani? (Kolosay 3:​13, 14) (Nengnengen ko coka.)

⁵ Tangongolay ko olah ni Pawlo to salikaka, onini a olah pakalalokay cingranan misinanot to kangaˈayan no salikaka, ao cowa ko dangoc nangra, pakalalokay cingranan mikifalocoˈ misodod to salikaka, malecad misowalan ningra i Kolosay 3:​13, 14. (ˈOsien.) Nengnengen samaanay ci Pawlo micada ci Markoan. Sakinacecay ni Pawlo miliwko a mitosil i, oya kalacafayay cingranan a Marko kifatad sanay a miliyas. Kawra, pakayni toniya demak cowa ka haharateng sa ko falocoˈ ni Pawlo. Ikor, mitiliday ci Pawlo to damsayay a patikami to i Kolosayay a kasakopang, itini tikami ningra, pakahemekan ni Pawlo ci Marko o ngaˈayay a kapot cingra, somowalayho ‘taˈangayay ko sahinom’ ni Marko cingranan sanay. (Kolosay 4:​10, 11) Tiya mapalit ci Pawlo itini i Loma i, padetengay a mitahidang ci Markoan tayra mipadang cingranan. (2 Timoti 4:​11) Mahapinangay ita, misaˈicelay ci Pawlo mikedec to kalawidang ato salikaka, cowa piharateng to raraw nangra. Ngangaˈay kita mikitini ci Pawloan minanam to maanan hani?

6-7. Soˈliˈlin cowa ko malefotay ko salikaka, kawra sasamaan kita kodait eca ka pisawad patalahkal to maolahay kita cangranan hani? (1 Yohani 4:7)

⁶ O manan ko mananamay ita? Halamhamay ci Yihofa kitanan kodait a cowa pisawad maolah to salikaka. (ˈOsien ko 1 Yohani 4:7.) Soˈlin eca ka paihkal ko salikaka to capeling no Krisciyang, papakasoˈlin kita makalimay cangra midoedo to safalod no Fangcalay Cudad a midemak, pakasoˈlin cowa ko padetengay cangra midokaˈ kitanan. (Taneng 12:18) Haratengen hena, cowa ko malefotay kita, kawra maolahay ko Kawas kitanan, cowa ka pakayni Cingra i raraw no mita sawad sa misawidang kitanan, anca aˈinteh sa kitanan. (ˈOlic 103:9) Tada miakoˈiday kita Cingranan! Ciharatengay kita mahecad Cingranan makahi misodod to salikaka.​​—⁠Ifiso 4:32–​5:1.

⁷ Haratengen, mangata mangatato ko salikoray romiˈad i, misaaliay kita a makedec malacecay ato salikaka. O papakidem pakidem ko hakokay, latek papakayni kita pihakelongan a marofo i kapalitan, itiyato i, mamangalef ko pisaali ita to sadama no salikaka. (Taneng 17:17) Nengnengen ko nalifetan no salikaka ci Yosif,a o malohemay malitengay cingra i Sipanya, pakayniay i misatenokay saaroˈan mapalit cingra ato romaroma salikaka. Sowal sa cingra: “Itini kapalitan, matatekoay mapalit ko salikaka, madoloay a ira ko kalacongisan, mansa maminanam kami maloka mihadidi, mikifalocoˈ a misodod. Padamaay konini tamiyanan makakedec a malacecay, hanaca midipotay tamiyanan caka masamsam no romaroma mapalitay. Kinacecayay, madokaˈay ko kamay ako, mifedfedan a mitafo, hato cowato ka ngaˈay kako dademak, iraay ko cecay faˈinayan salikaka mipadangay takowanan a mifacaˈ, midimokosayho takowanan i romaroma a demakan. Itini i pisaalian ako a tatokian, paihkalay cingra to soˈliˈlinay a olah.” Mikitini i nalifetan no salikaka ci Yosif mahapinangay ita, ano ira ko pasangar i kalalaˈed to salikaka, kalamkamen a misaysay nohatini.

ANO MAPATOLED NO RAMOD KITA I

8. Mararamodayto a tamdaw tatahasiˈayaw to maanan a pasangaray alatek?

⁸ Masiˈayaway a pasangaray. Polong a raramod iraay ko mahaenay a pasangar. Ihkalay ko Fangcalay Cudad a somowal, o ‘mamaroray’ ko mararamoday tamdaw. (1 Korinto 7:​28) Misamaanay hani? Samanen o raramod hananay i, makakadepay ko tatosaay cowa ka lefot a tamdaw, makairaay cangra tono niyah a pinangan ato kaolahan, cowa ka lecad ko serangawan anca lalengawan nangra, hanaca ikor no mararamod ngaˈ mahapinangay ko maanan a demak. Onini a lalangian latek mamikidat to lacongis. Ano mifekad ko pasangaray i, makoiraay ko raraw nangra tatosa alatek, kawra cowa pikinsa cangra to niyahan alatek, cowa ka malacafay misaysay to pasangar, makamirorohay cangra, ka pisieked anca malacinowas ko sangaˈayay a sapisaysay pakayraan wa saanto cangra.b Dotoc nengnengen ita ko cecay taˈarawan i Fangcalay Cudad, o raramod ningra soˈlin tada tatiihay, kawra misaˈicelay cingra midama to raramod.

9. Ci Apikail misiˈayaway to maanan a pasangaray hani?

⁹ Taˈarawan i Fangcalay Cudad. Sowal no Fangcalay Cudad faˈinay ni Apikail ci Napal, mariˈangay mangilosay ko waywayan. (1 Samuil 25:3) Malacafay to mahaenay a tamdaw maˈorip, maedeng awaay ko raheker ni Apikail. Awaay ko pakayraan ningra misawad to hatiniay a raramod han? Soˈlinay iraayto. Kinacecayay, faˈinay ningra ci Napal misamsamay a milokes toya mamala hongti no Israil a Tafitian ato sofitay ningra, telocto ci Tafiti mikeriday to sofitay sapipatayaw ci Napalan. (1 Samuil 25:​9-​13) Nao ngangaˈay milaliw ci Apikail, papipatayen ci Tafiti ci Napalan. Kawra cowa ka pihaen to demak cingra, mingitangitay ci Tafitian, midipot to ˈorip no faˈinay ningra. (1 Samuil 25:​23-​27) Hano mihaen cingra to demak hani?

10. Soˈliˈlin cowa ka raheker ko kaˈorip no raramod ni Apikail, kawra kamayan misaˈicel mikedec to raramod, o manan ko lalangian hani?

¹⁰ Ci Apikail tangongolay ko olah ci Yihofaan, misakaretengay to palinian Ningra pakayni i raramod. Maedeng mafanaˈay ci Apikail tiya patireng ci Yihofa to mararamoday a limasmas i, samaanay ko kasomowal ci Ataman aci Ifaan. (Satapangan 2:​24) Mafanaˈay cingra fangcalay hananay ni Yihofa minengneng ko raramod, sapakahemekaw ci Yihofaan, mansa misaˈicelay a milidong to faˈinay ato paro no lomaˈ ningra. Kalamkamay midemak cingra miconged ci Tafitian, makahiayho miliˈay ci Tafitian to cowa ko raraw no niyah. Ci Apikail timoloay cowa pisateked ko falocoˈ, maedeng tada maolahay ci Yihofa cingranan. O mararamodayto a tamdaw sasamaan minanam ci Apikailan hani?

11. (1) Halamhamay ci Yihofa samaan ko pidemak no mararamoday tamdaw hani? (Ifiso 5:​33) (2) Fafahiyan salikaka ci Kamen misarocoday mikedec to raramod no niyah, mikitini nalifetan ningra mananamay iso ko maanan hani? (Nengnengen ko coka.)

¹¹ O manan ko mananamay ita? Palimoˈotan ni Yihofa ko mararamoday a tamdaw, soˈlinto cowa ka dolo ko kaˈorip no mararamoday, oha mamisakareteng to limasmas no mararamoday. Maˈaraw ni Yihofa cangra misaˈicel misaysay to pasangar, hanaca makakangodo, patalahkal to cowa pisateked a olah, maedeng tada masemeran nanay Cingra. (ˈOsien ko Ifiso 5:​33.) Nengnengen ko tinakoan no fafahiyan salikaka ci Kamen. Ikor no 6 miheca ciraramod cingra i, misatapangay minanam to Fangcalay Cudad, mipaputisemto cingra malo Misawacayay Tamdaw ni Yihofa. Sanay cingra: “Cowa ka olah ko faˈinay to pihakelongan ako, miharateng cingra miˈafasan ni Yihofa kako sanay. Milokesay cingra takowanan, patalawho to mamilikong takowanan.” Soˈlin hatira i, misaˈicelay ci Kamen mikedec to raramod no niyah. Ilalomaˈ no 50 mihecaan a tatokian, misaˈicelay cingra maolah ato mikangodo to faˈinay. Sowal sa cingra: “Palidlid sato mafanaˈ kako sasamaan midimokos to nafalocoˈan no faˈinay, mafanaˈ samaan a somowal ngaˈ madolo cingra micada. Maolahay kako ci Yihofaan, mafanaˈay to fangcalay hananay ni Yihofa minengneng ko raramod, mansa misarocoday kako midipot to raramod no niyah, cowa ka sapilikongaw to faˈinay.”c Ano iraay ko pasangar no raramod iso i, ngaˈayay pakasoˈlinen ci Yihofa to papadama tisowanan kodait a mihadidi.

ANO MATOLED TO NIYAHAN I

12. Ano pakidem ko raraw no mita i, wa samaan ko piharateng alatek?

¹² Masiˈayaway a pasangaray. Ano pakidem ko raraw no mita i, awaayto ko kapo ako wa saan a miharateng. Sowal no Fangcalay Cudad, mararaw ko tamdaw i, latek ‘madokaˈay ko falocoˈ.’ (ˈOlic 51:17) Salikaka ci Lopote halafinay a mihecaan a misaˈicel cingra, ikor iraayto ko tatodong malo dama sikawdan, kaadayayan i, pakidemay ko raraw ningra. Mafanaˈay cingra mitowakangay ko niyah ci Yihofaan, sowal ningra: “O kiyam no falocoˈ ako tada karetengay, mahecaday iraay ko taˈangayay fakeloh mipaekel to falocoˈ ako. Tada marorayay, tomangicay kako mitolon ci Yihofaan, kawra saan kako miharateng, tada patoleday kako Cingranan, mana mitengil Cingra to satolon ako hani?” Ano pakidem ko raraw no mita i, taˈangay ko somad no falocoˈ alatek, misatapang miharateng: “Misawadayto ci Yihofa takowanan, awaayto ko kapo ako midoko Cingranan” sanay. (ˈOlic 38:4) Ano iraay ko hatiraay harateng iso i, ngaˈayay saharateratengen ko taˈarawan i Fangcalay Cudad. Cingra i, na pakidemay ko raraw, kawra kamayan kodait cowa pisawad a midoko ci Yihofaan.

13. Tarokos ci Pitiro midemakay to maanan pakidemay a raraw hani? O maamaanan a demak ko mikidatay cingranan mararaw hani?

¹³ Taˈarawan i Fangcalay Cudad. ˈAyaw no mamapatay ci Yis toya dadaya, tarokos ci Pitiro dadotodotoc sanay mararaw ko demak, salikor midemakay to pakidemay a raraw i hakelong no ˈorip ningra. Salakat i, pakinaliay ci Pitiro a pakasoˈlin to niyah, mahiyo ko sowal, ano soˈlinto miliyas ko romaroma tarokos ci Yisan, cingra i, o papadadotoc a madimadi ci Yisan. (Marko 14:​27-​29) Dotoc i, itini Kisimani kinatoloay ci Yis a mitolon, patikol cingra i, maˈaraway ci Pitiro a mafotiˈ, cowa ka talipaˈelal. (Marko 14:​32, 37-​41) Ikor i, ta micepet ko mariˈangay tamdaw ci Yisan i, comikayay ci Pitiro a milaliw ci Yisan. (Marko 14:50) Salikor i, kinatoloay ci Pitiro pacaˈof to cowa ka fanaˈ kako ci Yisan sanay, pakayni toninian miˈekakay a pasowal. (Marko 14:​66-​71) Mafanaˈto ci Pitiro to pakidemay ko raraw ningra i, samaanay ko piharateng hani? ‘Ongong sanay a tomangic’ cingra, samanen tada cikiyamay ko falocoˈ ningra itiya alatek. (Marko 14:72) Haratengen hena, ikor no pina tatokian, patayento ko sangaˈayay widang ningra ci Yis i, hakowaay ko kaadada no falocoˈ ningra saw! Itiya ci Pitiro maedeng tada matoleday to niyahan.

14. Ci Pitiro hano kodait cowa ka pisawad a midoko ci Yihofaan hani? (Nengnengen ko coka.)

¹⁴ Hano ngaˈay ci Pitiro kodait cowa ka pisawad a midoko ci Yihofaan hani? Cowa ka pisieked to niyahan, ao tayraay i romaroma nisawawaan a mikalacafay, itiraay cangranan milifok to sahinom. (Luka 24:33) Roma i, patikolto ci Yis maˈorip i, paˈaraway ci Pitiroan, samanen sapipaˈicelaw cingra ci Pitiroan alatek. (Luka 24:34; 1 Korinto 15:5) Ikor, patorodan ni Yis konini a widang ningra to karetengay a ˈinorong, cowa pikimkim to nano raraw ningra isaˈayaw, padotocayho malo widang ningra. (Yohani 21:​15-​17) Mafanaˈto ci Pitiro to pakidemay ko raraw ningra i, cowa sapisawadaw to niyahan. Misamaanay hani? Samanen pakasoˈlinay cingra to Tapang ningra ci Yis cowa ka pisawad cingranan. Roma i, romaroma nisawawaan padadotocay a midama cingranan. Mikitini i nalifetan ni Pitiro mamananam ita ko maanan hani?

15. Halamhamay ci Yihofa kitanan pakasoˈlin to maanan hani? (ˈOlic 86:5; Loma 8:​38, 39) (Nengnengen ko coka.)

¹⁵ O manan ko mananamay ita? Halamhamay ci Yihofa kitanan pakasoˈlinen to tangongolay ko olah Ningra kitanan, makahiay a misodod kitanan. (ˈOsien ko ˈOlic 86:5; Loma 8:​38, 39.) Mararaw kita i, makesemay nanay ko falocoˈ, o matatodongay ko mahaenay a harateng, o pinangan koni. Nikawrira, aka miharateng to cowato ka sodod no Kawas kita, cowato ka olah kitanan. O kakalamkam kita mikilim to sapadama. Masowalay isawni a Lopote sanay ko sowal ningra: “Sakamararaw kako samanen mitiˈeray kako to ˈicel no niyah a micoˈay to sakayhid.” Mafanaˈayto cingra to papasayni i malohemay malitengay misaali to sapadama. Sanay cingra: “Mihaen kako to demak ikor i, tangsolay mahapinang to pakaynian ni Yihofa i malohemay malitengay pasowal takowanan, kamayan Cingra maolah takowanan. Cowa pisawad ko malohemay malitengay takowanan, padama takowanan mihapinang cowa pisawad ci Yihofa takowanan.” Ngangaˈay kita pakasoˈlin to tangongolay ko olah ni Yihofa kitanan, edeng ano mikifalocoˈ a pasasiyor kita, mikilim to sapadama, hanaca mikiemel a eca ka miliyaw a mararaw, o sasododen Ningra kita. (1 Yohani 1:​8, 9) Ano mararaw kita i, o mahaenay a harateng papadama kitanan miliyaw a talifak.

16. Hano misetek to falocoˈ kiso kodait a caka pisawad matayal saki Yihofaan hani?

¹⁶ Itini salikoray a romiˈad hamamisaˈicel kita matayal saki Yihofaan, misalimlaay ci Yihofa to kapisaˈicel ita. Ira ko sapadama ni Yihofa, soˈlinto matoled ko falocoˈ, ngangaˈay kita kodait a caka pisawad midoko Cingranan. Mapakararaw no salikaka i, saˈicelen ita maolah cangranan, misodod cangranan. Ira ko pasangaray a demak no raramod, ano misaˈicel kita a misaysay i, o paihkalay kita to maolahay ci Yihofaan, misakangodo to raramod. Ano pakidem ko raraw no mita i, cangacangen ko sapadama ni Yihofa, pakasoˈlin Cingranan to kamayan maolah kitanan, mamisodod kitanan, o papadadotoc kita madimadi matayal Cingranan. Edeng ano caka pisawad to makapahay a demak i, o mamalifok ita ko kadofahay a sapalifon.​​—⁠Kalatiya 6:9.