Sarihadayen ko Falocoˈ, Mihaydaan ni Yihofa Kiso!

1. O romaroma madimadiay midoko ci Yihofaan a tamdaw iraay ko masamaanay harateng alatek?

SOWAL no Fangcalay Cudad: ‘Maolahay ci Yihofa to finawlan Ningra.’ Mafanaˈ tonini parihadayay to falocoˈ no mita! (ˈOlic 149:4) Kawra nolatekay, o romaroma salikaka masofaway ko pinengneng to niyah, wa saan cangra miharateng alatek: “Soˈlinay ci Yihofa mihayda takowanan han?” Itini lintad no Fangcalay Cudad, ˈalomanay madimadiay midoko ci Yihofaan a tamdaw na iraay ko mahaenay a nafalocoˈan.​​—⁠1 Samuil 1:​6-​10; Yopu 29:​2, 4; ˈOlic 51:11.

2. Samaan ko pidemak ngaˈ mamilifok to pihayda ni Yihofa hani?

² Misongilaˈay paihkal ko Fangcalay Cudad, o cowa ka lefot a tamdaw ngangaˈay milifok to pihayda no Kawas. Sasamaan ko pidemak ita hani? Pakasoˈlinen ita a mihakelong ci Yis Kristo halo micada to paputisem. (Yohani 3:​16) Mihaen i, o patalahkalay kita to maherekayto pakayni i raraw no niyah a pasasiyor, halo miketon to sowal a midofdof to araaw no Kawas. (Dmak 2:​38; 3:​19) Misaka dademak kita toniya pina demak mitongal to olah ci Yihofaan, tada o kahemekan Ningra konini. Ano padadotoc kita misaˈicel milahci to miketonan ita a sowal patafang to tireng, o mamihayda ci Yihofa kitanan, malo o widangto Ningra kita.​​—⁠ˈOlic 25:14.

3. Onini a lalakaw mamilengo to maanan?

³ Ano hatiraay i, misamaanay o roma salikaka cowa ka mihayda ko Kawas cangranan saan miharateng hani? Pakaynian ni Yihofa to maanan a pakayraan patalahkal to pihayda Ningra hani? Sasamaan kita paˈicel to pakasoˈlinay falocoˈ no niyah, pakasoˈlin to mihaydaan ni Yihofa kita hani?

O ROMAROMA TAMDAW HANO COWA PIHAYDA CI YIHOFA CANGRANAN SAAN A MIHARATENG

4-5. Soˈlin awaay ko kapo no niyah saan kita miharateng, ngaˈayho pakasoˈlin to maanan?

⁴ O romaroma salikaka nano kaemangho awaay ko kapo no niyah saan. (ˈOlic 88:15) Sanay ko sowal no salikaka ci Atelian: “To hati:niay awaay ko kapo ako sanay to niyahan. Maharatengay ako kaemangho i, micangacangay kako ci Yihofaan paitinien i Lakoing a maˈorip ko paro no lomaˈ, kawra maedeng awaay ko tatodong ako micomod sa kako.” Ci Toni taˈangayto ngaˈ mafanaˈay to soˈlinay kimad, saan ko sowal ningra: “Wama wina ako cowa pasowal to maolahay cangra takowanan, anoca malikoen takowanan, sahtoay cowa ka ngaˈay ko midemakan ako saanto kako to niyahan.”

⁵ Nolatekay ciharatengay kiso to awaay ko epoc no niyah alatek, aka mapawan o ci Yihofa ko misolotay tisowanan tayra i tatihi Ningra. (Yohani 6:​44) Cipinangay Cingra to kemod no falocoˈ ita, pakaˈaraway Cingra to cowa ka ˈaraw ita a kangaˈayan no niyah. (1 Samuil 16:7; 2 Rayray 6:​30) Mihaenay ano na pasowalay Cingra, itini pinengneng Ningra o kalimlaan kita saan i, o papakasoˈlinen ita Cingra.​​—⁠1 Yohani 3:​19, 20.

6. Tarokos ci Pawlo pakayni to raraw no niyah iraay ko masamaanay harateng hani?

⁶ O roma salikaka ˈayaw no mafanaˈ to soˈlinay kimad i, midemakay to mararaway, telocto tahaniniay a cikiyamen ko falocoˈ nangra. (1 Pitiro 4:3) O romaroma salikaka cikiyamen ko falocoˈ i, samanen kamayan cangra pakayni sapicoˈayaw to mararaway a coos a marowien ko falocoˈ. Kiso i? Iraay ko mahaenay ˈangongolay a kiyam no falocoˈ han? Ano hatiraay i, haratengen ko papina madimadiay sikawdan no Kawas, maedeng o mamasayar ko falocoˈ iso, samanen iraay ko malecaday a harateng nangra. Tinakoen, tarokos ci Pawlo na miharatengay to tadancaay ko niyah, hato marorayen ko falocoˈ. (Loma 7:​24) O roma sa i, soˈlinto pasasiyoray cingra to nano raraw no niyah itiyaho, micadaayto to paputisem, kawra saanho ko sowal to niyahan ‘o samimingay kako i lalomaˈ no tarokos,’ “o satatiihay no ciraraway a tamdaw kako.”​​—⁠1 Korinto 15:9; 1 Timoti 1:​15.

7. Pakayni midemakan ita a raraw, aka mapawan kita to maanan hani?

⁷ Sidaˈitay a Wama i kakarayan mikiˈokay a pasowal, ano pasasiyor kita i, o sasododen Ningra kita. (ˈOlic 86:5) O papakasoˈlinen ita ko mikiˈokan ni Yihofa. Ano mikifalocoˈ kita pakayni i raraw no niyah a pasasiyor i, o papakasoˈlin to misododanto ni Yihofa kita.​​—⁠Kolosay 2:​13.

8-9. Ano cangoˈotay ko midemakan no niyah, caay ko mamilifok to pihayda ni Yihofa saan kita miharateng i, sasamaan misalof to mahaenay harateng hani?

⁸ Kita maemin sapisarocodaw matayal saki Yihofaan. Kawra, harateng no romaroma salikaka cangoˈotay ko midemakan no niyah, awaay ko pakayraan milifok to pihayda ni Yihofa sanay. Fafahiyan salikaka ci Amanta sanay ko sowal: “Sasaadihayenho ko midemakan ako, hongaˈ o sangaˈayay ko sapafeli ci Yihofaan saan miharateng. Tocerid sapidemakaw kako to mataˈlifay to ˈicel no niyah a demak, ano caka dangar a midemak matoleday ko niyah. Ano ci Yihofato maedeng matoleday saan kako miharateng.”

⁹ Ano cowaho ka edeng ko midemakan ako sa kiso miharateng, caay ko mamilifok to pihayda ni Yihofa saan i, sasamaan ko pisalof to harateng no niyah hani? Haratengen, ci Yihofa cowa ko pakinaliay ko saali a Kawas, cowa ko mamisaali Cingra kitanan to cowa ko mamadangar ita a demak. Ano misarocodayto kita i, o midemakan ita misalimlaan Ningra maemin. Roma i, haratengen ita koya misarocoday matayal ci Yihofaan a tamdaw i Fangcalay Cudad. Tinakoen, halafinay a tatokian, ci Pawlo marorayay a matayal to demak ni Yihofa. Maraayay ko nirakatan ningra a lalan, tayra icowacowa a pala, patireng to adihayay kasakopang. Ikorto, mafalicay ko pakayraan, caayto ka ngaˈay cingra matira to isalakatay, adihay ko mitosilay a demak. Pakayniay cingra a malahdaw ko pihayda no Kawas han? Cowa! Padadotocay cingra midemak to madangaray no niyah, palemedan ni Yihofa cingra. (Dmak 28:​30, 31) Malecaday, o midemakan ita saki Yihofaan, latek adihayay latek cowa ka adihay, pakayni kafalic no pakayraan cowato ka lecad. Nikawrira, pakayni ci Yihofaan, o masakalimlaan i, mikitini i araaw no falocoˈ ita matayal Cingranan. Dotoc nengnengen ita, samaanay ci Yihofa patalahkal to nika pihayda Ningra kitanan.

SAMAANAY CI YIHOFA PATALAHKAL TO PIHAYDA KITANAN

10. Sasamaan kita ‘pakatengil’ to patalahkalan ni Yihofa a pihayda kitanan hani? (Yohani 16:27)

¹⁰ Pakaynian i Fangcalay Cudad. Mahemekay ci Yihofa patalahkal to pihayda i kaolahan Ningra a tamdaw. Itini Fangcalay Cudad maˈosiay ita, na kinatosaay ci Yihofa pasowal ci Yisan, sowal sa o kaolahan Ningra ci Yis, o mihaydaan Ningra. (Matay 3:​17; 17:5) Sapakatengilaw kiso to paihkal ni Yihofa pihayda tisowanan han? Soˈliˈlin nohatini cowato ko mamikitini i kakarayan pangihaˈ Cingra, kawra pakaynian Ningra i Fangcalay Cudad a pasowal kiso. Mihaenay, ano ‘sapakatengilaw’ kiso to patalahkalan ni Yihofa to pihayda kitanan i, o cecay pakayraan i, fohaten ko Ratoh a Cudad, ˈosien ko damsayay a sowal ni Yis to nisawawaan. (ˈOsien ko Yohani 16:27.) Malefotay ci Yis a mitodong to capeling no i kakarayan a Wama, mansa ano maˈosi ita ko pipatalahkal ni Yis to pihayda i coka lefot kao madimadiay a nisawawaan i, malecad o matengilay ko patalahkalan ni Yihofa to pihayda kitanan.​​—⁠Yohani 15:​9, 15.

11. Tahalifa to sapalifet i, malahdawayto ko pihayda ni Yihofa, hano cowa ka ngaˈay mihaen ko harateng hani? (Yakop 1:​12)

¹¹ Pakaynian i nidemakan Ningra. Makalimay ci Yihofa sapadamaaw kitanan, tinakoen mikiˈokay Cingra mamidimokos to sakaˈorip ita. Kawra nolatekay pakihateran ni Yihofa tahalifa kita to roray, malecad to pipakihater Ningra tahalifa to sapalifet koya moecelay a Yopuan. (Yopu 1:​8-​11) Ano tahalifa kita to sapalifet i, aka miharateng to malahdawayto ko pihayda ni Yihofa to niyah, soˈlinay haw i, o sapalifet pairaay to hatoki ita misawacay hakowaay ko kaolah no niyah ci Yihofaan, hakowaay ko noka pitadiˈec Cingranan. (ˈOsien ko Yakop 1:​12.) Ano tahalifa kita to sapalifet i, matinakoay ita samaanay ci Yihofa padama kitanan padadotoc miemem, mahapinangayto hakowaay ko kaolah Ningra kitanan, hakowaay ko kaciharateng kitanan.

12. Mikitini nalifetan ni Temiteli mananamay ita ko maanan hani?

¹² Nengnengen ko nalifetan no faˈinayan salikaka ci Temiteli i Asiya. Malahdaw ko tayal ningra ikor, pinaay a folad cowa ka hela ningra ko faelohay tayal. Sapisakadademakaw cingra tonini a tatokian paihkal to hakowaay ko pitiˈer no niyah ci Yihofaan, misetekay to falocoˈ a sapipalakaw to adihayay toki mirienang to mitosilay demak. Kawra mataˈlifayto ko pina folad, caayho ka hela ko katayalan, ikor adadaay cingra, itira sanayto i takal a matiˈenang. Misatapang miharateng to cowa ko ngaˈayay a faˈinay ko niyah, cowa ko ngaˈayay a wama, cisasato ko falocoˈ to malahdawayto ko pihayda ni Yihofa to niyahan. O cecay dadaya, fafahiyan wawa ningra mihawikiday to cecay kalidokap tayra i kaˈayaw no takal ningra, itira tora kalidokap mitolican ko Isaya 30:15 a sinael: ‘Ano padadotoc a rihadayen, misarocod a mitiˈer Takowanan i, o caciˈicelto.’ Sowal sa ko fafahiyan wawa: “Wamaaw, ano masomadan nanay kiso i, haratengen konini sinael.” Talipaˈelal sato ci Temiteli to padadotocay ci Yihofa midimokos to paro no lomaˈ nangra, samanen iraay ko kakaenen nangra, iraay ko rikoˈ, iraay ko kaitiraan a lomaˈ. Sowal sa cingra: “O misaalian ako i, padadotoc a rihadayen, misarocod mitiˈer ci Yihofaan.” Kiso i, ano tahalifaay to malecaday a sapalifet, sarihadayen ko falocoˈ, tada ciharatengay ci Yihofa tisowanan, papadama tisowanan padadotoc a miemem.

13. Ci Yihofa pakayniay cimaanan patalahkal to pihayda Ningra kitanan hani? Mikowadan ni Yihofa cangra sasamaan ko pidemak hani?

¹³ Pakaynian i salikaka. Pakaynian ni Yihofa i salikaka patalahkal to mihaydaay Cingra kitanan. Tinakoen, mikowadan Ningra ko salikaka itini matatodongay a tatokian somowal to pakalalokay kitanan a sowal alatek. Itini i Asia cecay fafahiyan salikaka iraay ko mahaenay a nalifetan. Cecay laliyadan taˈangayay ko saroero ningra, samanen awaayto ko katayalan ningra, adadaayho to pakidemay a adada. Cowa ka hatira aca, o faˈinay ningra pakidemay ko raraw, hanaca malahdawayto ko malohemay malitengay a tatodong. Sanay konini a fafahiyan salikaka: “Cowa ka cipinang kako hano mifekad ko mahaenay a demak, miharateng kako manan ko raraw no niyah hani, cowato ka pihayda ci Yihofa takowanan hokira.” Onini a fafahiyan salikaka sapitinakoaw to mihaydaayho ci Yihofa cingranan, oranto pakayni tonini a demak micangacangay ci Yihofaan. Samaanay pacaˈof ci Yihofa to satolon ningra hani? Sanay ko sowal noniya fafahiyan salikaka: “Tayniay ko malohemay malitengay no kasakopang masasowal takowanan, halo padama takowanan pahapinang to kamayan maolah ci Yihofa takowanan.” Ikor cecay romiˈad, miliyaway haca konini a fafahiyan salikaka pasayra ci Yihofaan a micangacang. Sanay cingra: “Toya romiˈad, macadaay ako ko pinapina tikami no salikaka i kasakopang, tada mihinomay takowanan ko sowal nangra, matinakoto ako soˈlinay mitengilay ci Yihofa to satolon no mako.” Mikitini toniya nalifetan mahapinangay ita, marariday ci Yihofa pakayni i salikaka pakalalok kitanan, patalahkal to mihaydaay Cingra kitanan.​​—⁠ˈOlic 10:17.

14. Pakayniayho ci Yihofa to maanan a pakayraan patalahkal to pihayda Ningra kitanan hani?

¹⁴ Pakaynianho ni Yihofa i salikaka palimoˈot kitanan, pakayni ko pipatalahkal to olah ato pihayda kitanan. Tinakoen itini saka 1 hahekalan, mikayatan ni Yihofa ko tarokos ci Pawlo mitilid to 14 a tikami, itini tonini a tikami, mikitiniay ciolahay a falocoˈ ci Pawlo mihadak to ihkalay a sapalimoˈot i salikaka. Hano kayaten ni Yihofa ci Pawlo mihaen ko demak hani? Samanen o ngaˈayay a Wama ci Yihofa, ‘mirikecan Ningra ko kaolahan a [wawa].’ (Taneng 3:​11, 12) Mihaenay, ano ira ko misalalangiay to Fangcalay Cudad mihadak to limoˈot kitanan i, aka miharateng to malahdawayto ko pihayda ni Yihofa to niyahan, soˈlinay haw i, mitadtaday koni to tada maolahay ci Yihofa kitanan. (Hipray 12:6) Iraayho ko maanan demakan to paihkalay to mihaydaay ci Yihofa kitanan hani?

O ROMAROMA WACAY TO PIHAYDA NI YIHOFA KITANAN

15. (1) Papafelien ni Yihofa ko cima to fangcalay saocor hani? (2) O manan a wacay paihkalay to pihayda ni Yihofa kitanan hani?

¹⁵ Pafelian ni Yihofa to fangcalay saocor ko mihaydaan Ningra a tamdaw. (Matay 12:18) Ngaˈayay licayen ita ko niyah: “Itini kaˈorip ako patalahkalay to pina capeling no fangcalay saocor han?” Tinakoen, palalinien to ˈayawho noka fanaˈ iso to soˈlinay kimad i, matongalay ko pihadidi iso to tao han? Soˈlinay haw i, ano matongalay ko pipaihkal iso to capeling no fangcalay saocor i, o aadihay ko lalangian iso a pakasoˈlin to mihaydaan ni Yihofa kiso.​​—⁠Nengnengen ko sapatongal lalakaw “O Minaroˈan no Fangcalay Saocor Iraay ko . . . ”

16. Patorodan ni Yihofa to cimanan ko milasilay to ngaˈayay lihaf a tayal hani? Pakayni tonini a demak samaanay ko harateng iso hani? (1 Tisalonika 2:4)

¹⁶ Makahiay ci Yihofa patorod to mihaydaan Ningra a tamdaw to milasilay to ngaˈayay lihaf a tayal. (ˈOsien ko 1 Tisalonika 2:4.) O fafahiyan salikaka ci Ciyawslin pakayniay i mitosilay tayal matinako to pihayda ni Yihofa. Cecay romiˈad, mapalal cingra to papacem, matoleday ko falocoˈ. Sanay cingra: “Ano o mananto caay ka sapidemakaw kako, tada awaay ko kapo no niyah saan miharateng. Kawra o misakafahay kako, hanaca o pitosilan ako a toki koya romiˈad, oranto i, mitolonay kako to Kawas, dotoc masadakayto a mitosil.” Toya papacem, malitemohay ni Ciyawslin ko cecay fafahiyan ci Mali, ngaˈayay ko waywayan ningra, hanaca makahi a misatapang minanam to Fangcalay Cudad. Ikor no pina folad, sowal ni Mali ˈayaw no mikongkong ci Ciyawslin to fawahang ningra, padotocay cingra mitolon to Kawas. Tikolen ni Ciyawslin miharateng konini a nalifetan, sanay ko sowal: “Matinakoay ako hato pasowalay ci Yihofa takowanan: ‘Mihaydaan Ako kiso’ saan.” Manaokaniw, ano mitosil kita i, cowa ka sahto saan makahi ko tamdaw micada. Kawra ngaˈay pakasoˈlin kita, ano misarocod kita paladaˈ i tamdaw to ngaˈayay lihaf, o mamilifok to pihayda ni Yihofa.

17. Mikitini to sowal ni Wiki mananamay iso ko maanan hani? (ˈOlic 5:​12)

¹⁷ Ano haydaen ni Yihofa ko cecay tamdaw i, o papadama ci Yihofa cingranan mikitini i sapatefoc milifok to haepoc. (1 Timoti 2:​5, 6) Ano pakasoˈlin kita to sapatefoc, micadato to paputisem, kawra cowaho ka pihayda ci Yihofa takowanan ano saan a miharateng i, sasamaanto hani? Aka mapawan, o mahaenay a harateng ita aka pasoˈlinen, kawra ngangaˈay kita mitadiˈec ci Yihofaan. Itini pinengneng ni Yihofa, pakasoˈlinay to sapatefoc a tamdaw o moecelay, hanaca mikiˈokay Cingra to papalemeden cangra. (ˈOsien ko ˈOlic 5:​12; Loma 3:​26) Fafahiyan salikaka ci Wiki micalep a misimsim to pakayniay sapatefoc a demak ikor, mahapinangay ningra. Sanay cingra: “Ci Yihofa mihadidiay takowanan. . . . Kawra hato pasowalay kako ci Yihofaan: ‘O olah Iso caayho ka taˈangay, mansa cowa ka olah Kiso takowanan. O sapatefoc no Wawa Iso cowa ko mamitahepo to raraw ako.’ ” Midotimto ko salikaka ci Wiki to nika tada masakalimlaan ko sapatefoc a sapatelong ni Yihofa, misatapangayto cingra matinako ko olah ni Yihofa i cingranan. Malecaday, ano songilaˈen ita midotim ko pakayniay sapatefoc a demak i, mamatinako ita ko olah ni Yihofa kitanan, ato pihayda kitanan.

18. Ano padadotoc kita maolah to kakarayanay a Wama, ngaˈayto pakasoˈlin to maanan hani?

¹⁸ Soˈlin misaˈicelayto kita misaka dademak to fafekangay a sapaini, latekay kamayanho a matoled ko falocoˈ, cisasa to mihaydaay ci Yihofa kitanan hokira. Ano ira masadak ko mahaenay harateng i, aka mapawan, o mihaydaan ni Yihofa koya ‘padadotocay maolah Cingranan a tamdaw.’ (Yakop 1:​12) Mihaenay, ka padadotoc miingid ci Yihofaan, misinanot to wacay to mihaydaay Cingra tisowanan. Aka mapawan, ci Yihofa ‘cowa ka miraay to kahacecay a tamdaw.’​​—⁠Dmak 17:27.