Ti Biblia, ¿chem pengeleiñmu Jehová mu?

1. ¿Chumngelu mañumfiyiñ ta Jehová taiñ elueteu mu tati Biblia?

RUME mañumfiyiñ ta Jehová taiñ elueteu mu tati Biblia. ¿Chumngechi quelluafeiñmu tati Biblia? Eluqueiñmu cümeque ngülam taiñ chaftuafiel huesaque dungu, eluqueiñmu maneluhun ca quelluqueiñmu taiñ doi cüme quimafiel ta Jehová. Doi raquiduamliyiñ Chau Jehová ñi cüme piuquengen mu, feimu doi fülconaiñ quisu mu ca doi hueniyeafiyiñ (Sal. 25:14).

2. Cuifi mu ca famülque mu, ¿Jehová chumngechi quimeleiñmu ñi ineingen?

² Jehová ayüniei com che ñi quimaeteu. Cuifi mu, ¿Jehová chumngechi quimelelfi tañi pu che ñi ineingen? Fillque peuma mu, vision, ca huercüi tañi cümeque püllü (Núm. 12:6; Hech. 10:3, 4). Huelu famülque mu, huirintucungenofule tañi feipin, turpu quimlayafuiñ. Feimu Jehová huercüfi quiñeque huentru ñi huirintucual ñi feipin Biblia mu (Jer. 30:2). Chau Dios huelulcauquelai, feimu hulün mu ñi feipin Biblia mu, rume quelluafeimu (Sal. 18:30).

3. ¿Chumngelu am petu niefiyiñ Biblia fachantü? (Isaías 40:8).

³ (Papeltunge Isaías 40:8). Fütra cuifi mu ca fantepu mu, tati Biblia rumel quelluniequefi Jehová tañi pu che. Huelu fütra cuifi mu huirintucungei Biblia ca fillque chemcün meu huirintucungei, huelu tüfa huesañmauquefui, feimu ngehuetulai. Fei, ¿chumngelu am niefiyiñ tati Biblia fachantü? Jehová ñi duam mu, com ñi feipin Biblia copiangequefui. Culpachi huentru rume copiaquefulu Biblia, huelu cuñihun mu femingün tañi cüdau. Quiñe quimche feipi: “Tati Hebreo Huirintucun feita doi cüme copiangequefui chem lifru mu rume cuifi”. Feimu rüf maneluhuafuiñ com ñi feipin Biblia Jehová mu cüpai.

4. ¿Chem ngüneduamaiñ tüfachi troquiñ mu?

⁴ “Com tati cümeque dungu ca com tati tutengelu Chau Ngünechen mu cüpai” (Sant. 1:17). Quiñe che elueliyiñmu quiñe regalo, rüf quimnieneu tañi hueni, quimniei chem tañi duamnieel piafuiñ. Fei Jehová elueiñmu quiñe regalo: tati Biblia. Papeltufiliyiñ Biblia, quimürpuafuiñ Chau Dios taiñ cüme quimnieteu ca quimniei chem taiñ duamnieel. Fei tüfachi troquiñ mu, peaiñ Biblia quimeltueiñmu Chau Dios ñi quimün-ngen, norngen ca ñi piuqueyechefengen. Hunelu mu, ngüneduamaiñ ñi feipin Biblia Chau Dios ñi quimün-ngen.

BIBLIA PENGELI CHAU DIOS ÑI NIEN FENTREN QUIMÜN

5. Biblia niei Chau Dios ñi quimün, ¿chumngelu feipiafuiñ?

⁵ Jehová quimniei taiñ duamnieel cümeque ngülam, feimu elueiñmu tati Biblia. Biblia ñi ngülam rüf quelluchequei, cüme elcünutuafui pu che ñi mongen. Moisés huirintuculu tati hunenque lifru Biblia mu, feipifi pu Israel che: “Feitachi dungu pecan dungu no, inaniefilmi mongeleaimi” (Deut. 32:47). Pu Israel che inaniefule engün Jehová ñi feipin, ayüucüleafuingün ca cüme tripayafui com ñi dungu (Sal. 1:2, 3). Biblia cuifi huirintucungelu rume, petu quelluniefi tati pu che ñi cüme elcünutual ñi mongen. Peafuimi ti troquiñ “Ti Biblia cüme elcünutueyu ñi mongen” jw.org mu, tüfa peaimi quiñeque che chumngechi quellueyu Biblia (1 Tes. 2:13).

6. Biblia, ¿chumngelu trürlai caquelu lifru mu?

⁶ Quiñe lifru no rume trürlayafui Chau Dios ñi Dungu mu. ¿Chumngelu feipiafuiñ? Jehová mu cüpalu cai. Quisu com nehuen niei, rumel mülequei ca rume quimün-ngei. Famülque mu, petu papeltungequei cuifique lifru lalu rume tañi huirintucueteu, huelu tañi ngülam quelluhuequelafi tati pu che. Huelu Biblia tañi ngülam rumel quelluchequei, cuifi ca fantepu mu. Papeltuliyiñ ca raquiduamliyiñ Biblia ñi feipin mu, Jehová eluaiñmu ñi nehuen taiñ inayal ñi ngülam (Sal. 119:27; Mal. 3:16; Heb. 4:12). Chau Jehová, tati elcünulu tati Biblia, cüpa quellueimu eimi, fei ¿ayüpelayafuimi tami papeltuafiel?

7. Biblia, ¿chumngechi quiñeucünufi Jehová ñi pu che cuifi mu?

⁷ ¿Ca chumngechi quimafuiñ Biblia ñi nien Chau Dios ñi quimün? Tati Biblia quelluquefi Chau Ngünechen ñi troquiñche ñi quiñeucüleal. Raquiduamnge tüfa mu, pu Israel che conpulu ti feipicünuelchi mapu mu, püd tripaingün fill püle. Quiñeque adümuhuingün ñi challhuayal, caquelu eluhuingün ñi cuidayafiel culliñ, caquelu cüdauquefingün ti mapu. Pu Israel che ñi alü camapu ñi mülen mu engün quiñeque, feimu cüdautuquefuingün ñi peafiel caquelu Israel che. Fei ¿chumi Jehová? Mandaeyu ñi trahuluumequeal engün, fei ñi allcütuafiel ca doi quimafiel Chau Dios ñi Dungu (Deut. 31:10-13; Neh. 8:2, 8, 18). Feimu com pu Israel che fillque püle cüpalu, ¿ayüucülenoafulu ñi peutun mu engün? Femngechi quellueyu ta Jehová ñi quiñeucüleal engün. Pu cristiano mülelu hunen siglo mu ca quiñeucülefuingün. Feichi mu, ti trahunche mu mülequefui huentru ca domo caquerumelu ca quisu ñi quehun dungulu, huelu com falintuquefingün Chau Dios ñi Dungu, feimu quiñentrür poyequefingün ta Jehová. Com engün quelluquefuingün tati hue conlu ti trahunche mu, quelluquefuingün ñi adümal Chau Dios ñi Dungu ca trahuluuquefuingün fei engün (Hech. 2:42; 8:30, 31).

8. Jehová, ¿chumngechi quelluqueiñmu taiñ quiñeucüleal?

⁸ Famülque mu, Jehová Biblia mu quimeltuniefi tañi pu che ñi quiñeucüleal. Biblia mu quimafuiñ com ti rüf dungu Jehová mu. Cafei trahun mu ca fütraque trahun mu papeltuquefiyiñ tati Biblia ca doi quimürpuqueiñ Jehová mu. Feimu quimfali Jehová Biblia mu quelluniequeiñmu taiñ quiñentrür cüdahuelafiel (Sof. 3:9).

9. Taiñ adümafiel chem pin Biblia, ¿chumngechi chengeaiñ? (Lucas 10:21).

⁹ ¿Ca chumngechi pengelquei ñi quimün ta Jehová? Biblia mu alünque rupa huirintucungei ñom piuquengechi che müten ñi quimafiel (papeltunge Lucas 10:21). Com pu che cheu rume mülelu papeltuafui ti Biblia. Quiñe quimche feipi: “Tati Biblia doi papeltungequei, huelu ca femngechi doi estudiangequei”. Huelu ñom piuquengechi che müten quimürpuafui ca inayafui chem pin ta Biblia (2 Cor. 3:15, 16).

10. Biblia, ¿ca chumngechi pengeli Chau Dios ñi nien com quimün?

¹⁰ Biblia, ¿ca chumngechi pengeli Chau Dios ñi nien com quimün? Biblia mu Jehová ngülamtuqueiñmu ca yafültucuqueiñmu caque quiñeque iñchiñ. Papeltufiliyiñ Biblia, quimürpuafuiñ Jehová taiñ duamnieteu caque quiñeque iñchiñ (Is. 30:21). Raquiduamnge tüfa, rupan mu huesaque dungu mu, fei papeltuliyiñ Biblia ñi ngülam, tüfa tañi duamnieel piqueiñ. Huelu Biblia huirintucungelai eimi müten tami quimafiel, doi mai huirintucungei millonque che ñi quimal. Felefulu rume, huelu eimi ta quisu quelluafeimu tami duamnieel, ¿chumngechi am tüfa? Jehová mu cüpalu cai tati Biblia (2 Tim. 3:16, 17).

BIBLIA PENGELI CHAU DIOS ÑI NORNGEN

11. Huirintucungelu ta Biblia, ¿chumngechi Jehová pengeli tañi dullintuchequenon?

¹¹ Jehová nor Dios ngei (Deut. 32:4). Cafei Jehová dullintuchequelai (Hech. 10:34, 35; Rom. 2:11). ¿Chumngechi pengeli Biblia Jehová ñi dullintuchequenon? Biblia huirintucungei quisu ñi quehun ñi dunguquen fentrenque che. Hunenque 39 lifru Biblia mu doi huirintucungei hebreo quehun mu. Feichi quehun dunguquefui Jehová tañi troquiñche feichi antü mu. Huelu hunen siglo mu, alünque che dunguquefui griego quehun mu. Feimu 27 afchi lifru Biblia mu doi huirintucungei griego quehun mu. Jehová elcünulai quiñe quehun mu müten ñi huirintucungeal ti Biblia. Famülque mu, epe 8 mil millon pu che dunguqueingün quisu tañi quehun mu. Fei ¿chumngechi com quimafuiñ ta Jehová?

12. ¿Chumngechi femtripalei Daniel 12:4 epe afchi antü?

¹² Jehová feipicünui “tati rüf quimün alün-ngerpuai” epe afchi antü mu. Fentren che quimürpuai ca adümafi ñi chem pin ta Biblia (papeltunge Daniel 12:4). ¿Chumngechi fentrenque che quimürpufi ñi feipin Biblia? Biblia ca caquelu publicacion rulpadungungequei, entuhuiringequei ca elungequei fentrenque che. Biblia doi rulpadungungei caquelu lifru mu ca doi elungequei fentrenque che com huall mapu mu. Quiñeque negocio rume falin mu fendequei Biblia, huelu Jehová tañi pu che rulpadunguquei com tati Biblia ca quiñeque troquiñ doi 240 quehun dungu mu. Fei com pu che ayüle ñi nieal quiñe Biblia, nieafuingün ñi cullinoal rume. Fei com tuhun-ngechi che allcütuquefingün Chau Dios tañi cüme dungu petu ñi afnon ti antü (Mat. 24:14). Jehová am dullintuchequenolu, fei ayüniei fentrenque che ñi papeltuafiel tañi quimün ca ñi quimngeal ta quisu, ¿chumngelu femquei? Fei am rume piuqueyeniefilu ta pu che.

BIBLIA PENGELI CHAU DIOS ÑI PIUQUEYECHEQUEN

13. ¿Chumngelu feipiafuiñ Biblia pengeli Dios ñi piuqueyechequen? (Juan 21:25).

¹³ Tati Biblia ca pengeli Chau Dios ñi piuqueyechequen (1 Juan 4:8). Raquiduamnge tüfa, Chau Jehová quiñeque dungu tucui Biblia mu ca quiñeque dungu tuculafi. Biblia mu feipieiñmu chumngechi taiñ hueniyeafiel, taiñ ayüucüleal ca taiñ rumel mongeleal. Huelu Jehová tuculafi Biblia mu quiñeque dungu taiñ duamnienofiel. Tucui com taiñ duamnieel müten taiñ serfiafiel (papeltunge Juan 21:25).

14. Ñi feipin mu ta Biblia, ¿chumngechi pengeli Chau Jehová taiñ piuqueyenieteu?

¹⁴ Jehová, ¿ca chumngechi pengelqueiñmu taiñ piuqueyenieteu? Piuqueyenquechi feipiqueiñmu taiñ chumal. Biblia mu Chau Jehová “feita müten femaimi, tüfa femlayaimi” piquelaeiñmu. Huelu mai Jehová Biblia mu tucui ñi rupan quiñeque che, quiñeque profecia ca cümeque ngülam, femngechi inaduamfiliyiñ tüfa, cümeque dungu femafuiñ ca cüme yenieafuiñ taiñ mongen. Femngechi ñi feipin mu ta Biblia, elueiñmu nehuen taiñ piuqueyeafiel ta Jehová ca taiñ feyentuafiel.

15. 1) ¿Chumngechi pengeli Biblia Jehová mu taiñ rume falin-ngen? 2) Chumngechi ñi pengelün ti adentun, ¿chem che mu raquiduamcülei ti pichi malen, ti peñi ca ti papai? (Gén. 39:1, 10-12; 2 Rey. 5:1-3; Luc. 2:25-38).

¹⁵ Biblia ca pengeli iñchiñ taiñ rume falin-ngen Jehová ñi adquiñ mu, ¿chumngechi quimiyiñ? Biblia mu mülei quiñeque che ñi rupan, fei ‘iñchiñ reque duamcülequefui tañi piuque engün’ (Sant. 5:17). Com tüfa engün Jehová piuqueyenquechi dungueyu ca cuidaeyu. Taiñ inaduamfiel mu Jehová ñi chumfiel engün, fei quimiyiñ “Chau Jehová ñi rume poyechefengen ca ñi cutranpiuqueyechen” (Sant. 5:11).

16. Huelulcaulu quiñeque che, ¿chumi Jehová? Fei, ¿chem quimeltueiñmu iñchiñ? (Isaías 55:7).

¹⁶ ¿Ca chumngechi pengelquei Jehová ñi piuqueyechen? Biblia pengeli Chau Jehová quisucünulayaiñmu huelulcauliyiñ rume. Pu Israel che alünque rupa huelulcauquefuingün, huelu rüf repentiuhun mu engün, Jehová perdonaquefeyu ñi femün engün (papeltunge Isaías 55:7). Pu hunenque cristiano ca femngechi quimniefuingün Jehová ñi rume piuqueyenieteu engün. Corinto trahunche mu, mülefui quiñe peñi rume huesa culpai, huelu repentiutui tañi femün mu. Fei Pablo huirintuculelfi tati trahunche feiti peñi ñi perdonangeal ca ñi yafültucungeal (1 Cor. 5:1-5; 2 Cor. 2:6, 7). Afmatufali ñi femquen mu Jehová. Huesa culpan mu rume quiñe che cuifi, Jehová famentufemquelafi, huelu mai piuqueyen mu norümtuquefi ca quelluquefi ñi hueniyeutual engu. Fei ca femngechi femquei fachantü (Sant. 4:8-10).

FALINTUAFIYIÑ TATI BIBLIA

17. ¿Chumngelu fente falin-ngei ta Biblia?

¹⁷ Tati Biblia quiñe falin regalo taiñ elueteu Chau Dios, ¿chumngelu am fente falin-ngei ta Biblia? Feita quimeltuqueiñmu Chau Dios niei fentren quimün, norngei ca rume piuqueyequeiñmu. Ca Biblia mu Jehová mangeleiñmu taiñ quimafiel ca taiñ hueniyeafiel.

18. ¿Chumngechi pengelafuiñ taiñ mañumtufiel Jehová taiñ elueteu mu ta Biblia?

¹⁸ Biblia ta pecan dungu no, quiñe regalo taiñ elueteu Jehová (Sant. 1:17). Fei, ¿chumngechi pengelafuiñ taiñ rume mañumniefiel ta Jehová? Taiñ papeltufiel mu ta Biblia, ngillatuafiyiñ ta Jehová taiñ quelluaeteu cüme quimafiel chem taiñ enseñaeteu. Femliyiñ, Chau Jehová quelluaiñmu ca ‘peaiñ ti quimün Chau Ngünechen mu cüpalu’ (Prov. 2:5).