Taiñ Hunen Lonco Sacerdote Jesús cutranpiuqueyechequei

1, 2. 1) ¿Chemu Jehová huercüfi tañi Fotüm mapu mu? 2) ¿Chem ngüneduamafiyiñ tüfachi troquiñ mu? (Hebreos 5:7-9).

DOI 2 mil tripantu cuifi mu, Jehová huercüfi tañi saquin Fotüm mapu meu. ¿Chemu femi? Ñi montulafiel che culpan ca lan dungu mu, ca cüme elcünutuafiel com ñi huesalcan Huecüfü (Juan 3:16; 1 Juan 3:8). Jehová ca quimniefui ñi rupan Jesús mapu mu pepicayafeyu, femngechi tañi doi cutranpiuqueyecheal tañi Hunen Lonco Sacerdote ngen mu. Fei deu fautizaulu 29 tripantu mu, Jesús Hunen Lonco Sacerdote ngerpui.a

² Tüfachi troquiñ mu, ngüneduamaiñ chumngechi com ñi rupan Jesús mapu meu pepicaeyu ñi doi cutranpiuqueyecheal, femngechi ñi doi cüme Hunen Lonco Sacerdote ngerpual. Falin-ngei iñchiñ taiñ cüme quimürpuafiel ta tüfa, femngechi doi cüdautulayaiñ taiñ llellipuafiel Jehová ca hueniyeafiel, huesa duamcüleliyiñ rume taiñ culpan mu (papeltunge Hebreos 5:7-9).

CHAU DIOS ÑI SAQUIN FOTÜM CÜPAI MAPU MU

3, 4. Cüpalu Jesús mapu mu, ¿chumngechi caletui ñi mongen?

³ Quiñeque iñchiñ fütra caletui taiñ mongen. Quiñeque ca mapu chi amuiñ ca mülehuetulaiñ chi taiñ familia ca taiñ pu hueni iñchiñ. Rupan mu femngechi dungu, cüdaungeafui llemai. Huelu Jesús mai doi caletufui tañi mongen. Huenu mu müna falin püllüngefui, ca Jehová hunelu mu deumaeyu. Jesús rume piuqueyefeyu tañi Chau, feimu ayüucülequefui tañi trür cüdahun mu engu (Sal. 16:11; Prov. 8:30). Huelu Jesús ayühunquechi “elcünui com tañi nierquefel” huenu mu, fei ñi cüpayal mapu meu rangiñ culpan-ngechi che mu (Filip. 2:7).

⁴ Raquiduamaiñ chem ñi rupan pichichengelu müten ta Jesús. Tañi chau ca tañi ñuque pofrengequefui. ¿Chumngelu feipiafuiñ? Choyüngelu ta Jesús, tañi chau chalintucui 2 pichique üñüm müten (Lev. 12:8; Luc. 2:24). Ti huesa lonco ülmen Herodes quimlu ñi choyüngen ta Jesús, ayüfui ñi langümafiel. Tañi chau ca tañi ñuque tañi montulafiel Jesús, lefmahuingün Egipto mapu mu (Mat. 2:13, 15). ¡Fütra caletui ñi mongen ta Jesús!

5. ¿Chem ngüneduami Jesús mülepalu mapu mu? Ca, ¿chumngechi quellueyu ñi doi cutranpiuqueyecheal? (Ca inaduamnge ti adentun).

⁵ Mülepalu Jesús mapu mu, pei fentrenque che cutrancaumequelu. Jesús ca hueñancüpelai ñi larpun tañi piuqueyenieelchi che, quiñe tüfa tañi chau José peno. Amuldunguyaulu Jesús, quimfi cutrancülechi che, traumalelu, cüntrolelu ca quiñeque chau lalu tañi pu yall, fei cutranduamyefi com engün (Mat. 9:2, 6; 15:30; 20:34; Mar. 1:40, 41; Luc. 7:13). Jesús mülelu huenu mu, ca pequefui che ñi huesa rupamequen mapu mu. Huelu cüpalu mapu mu, doi pülle pefi ñi cutrancahun ta che, fei cutranpiuqueyefi (Is. 53:4). Inaduamlu Jesús fillque huesa dungu ñi rupan ta che, doi cüme quimtucui ñi chum duamcülen engün. Caquelu che reque, Jesús ca cansaquefui ca huesa duamquefui.

JESÚS DUAMTUQUEFUI COM PU CHE

6. Ñi feipin Isaías, ¿chem quimeltueiñmu Jesús ñi cutranpiuqueyechen mu? (Isaías 42:3).

⁶ Amuldunguyaulu Jesús, rume cutranpiuqueyefi pu illamcangelu. Femün mu, Jesús femtriparpui ñi feipicünuel Isaías. Tati Hebreo Huirintucun mu, quiñeque mu pu che cüme felen nielu ca pu nehuen-ngelu trürümngei fütra anümca mu cam cüme hutrucongeelchi planta reque (Sal. 92:12; Is. 61:3; Jer. 31:12). Pu quisulelu ca pu illamcangelu trürümngei deu huatrolechi rüngi reque ca epe chongcülechi mecha reque (papeltunge Isaías 42:3). Tüfachi pengelün dungu mu, Jehová feipicünui Jesús ñi cutranpiuqueyeafiel che falintungequenolu.

7, 8. Jesús, ¿chumngechi huechurpui ñi feipicünuel Isaías?

⁷ Isaías feipi: “Huatrocalayafi ti rüngi huesalcalelu. Chongümlayafi ti mecha müte üicülenolu”. Mateo pengeli ñi femtripan Jesús mu (Mat. 12:20). Jesús femi fentren afmatun dungu ñi quelluafiel pu huesalcangequelu ca pu nienolu maneluhun. Quimfi quiñe huentru huesa cutran nielu. Feitachi cutran ñi nien mu, inei no rume fülcontuquelafeyu. Feichi huentru tremonoalu troquiuquefui, feimu raquiduamquelafui rume tañi trahutual tañi familia ca tañi pu hueni engün (Luc. 5:12, 13). Jesús ca quimfi quiñe pilu huentru nehue cüme rulpaquelafui tañi dungun. Feitachi huentru pefiel mu caquelu che ñi nütramcamequen mu, ¿rume huesa duamquepelafui? (Mar. 7:32, 33).

⁸ Jesús ñi antü meu, fentrenque judio feipiquei pu cutrancülelu femngechi dungu rupaquefuingün quisu engün tañi huesalcan mu cam tañi pu chau ñi culpan meu (Juan 9:2). Tañi femngechi raquiduam tañi nien mu pu judio, fentren cutrancülechi che falinolu troquiuquefuingün. Huelu Jesús tremoltueyu engün ca quimeltueyu Jehová tañi falintueteu.

9. Ñi feipin Hebreos 4:15, 16, ¿chumngechi pengelqueiñmu Jesús tañi duamtuchequen?

⁹ (Papeltunge Hebreos 4:15, 16). Maneluhuafuiñ Jesús taiñ rumel cutranpiuqueyeaeteu. Quiñe che cutranpiuqueyechequelu pefiel mu cangelu che ñi cutrancaucülen, quisu femngechi rupamequelu troquiuquei. Femngechi femquei Jesús. Papeltufiel mu Biblia chumngechi Jesús ñi quelluquefiel pu che, quimfali fente ñi duamtuquefiel engün. Tremoltufiel mu che, Jesús “iñche ta huercüngelu feimu ta feman” pilai, doi mai rüf piuque mu llemai tripaquei tañi quelluafiel ta che. Jesús tremoltufilu ti lepra cutran nielu, duamnielafui tañi topayafiel ñi tremoltuafiel, huelu femi. ¿Fentren tripantu yeniepelafui inei no rume tañi topaquenoeteu? Cafei tremoltufilu ti pilu huentru, hunelu huichunentufi femngechi ñi tüngcüleal engu, fei hula tremoltufi. Ca raquiduamaiñ ñi chumfiel Jesús ti domo repentiutulu. Fei cüchuñmafi Jesús ñi namun tañi cülleñu mu. Quiñe fariseo huesa feipifi ti domo, huelu Jesús incañpefi tati domo ca norümtufi ti fariseo (Mat. 8:3; Mar. 7:33; Luc. 7:44). Jesús turpu famentulafi pu huesa cutrancülelu ca pu fütra culpalu. Quisu mangelfi tañi fülcontuaeteu ca pengelelfi tañi piuqueyefiel. Maneluhuafuiñ Jesús ca femngechi duamtuqueiñmu iñchiñ.

INAYENTUQUEFIYIÑ TAIÑ HUNEN LONCO SACERDOTE

10. ¿Chem quellu niei tati pu pilu ca tati pu traumalelu? (Ca inaduamnge ti adentun).

¹⁰ Ayüquelu am iñchiñ inayentuafiel Jesús, eluucülequeiñ taiñ piuqueyeafiel ca duamtuafiel pu che (1 Ped. 2:21; 3:8). Iñchiñ tremoltulayafuiñ tati pu pilulelu ca traumalelu, huelu ¿chumafuiñ? Quelluafuiñ engün tañi doi hueniyeafiel Jehová. Com tati lifru, tati revista deumangequei doi 100 seña quehun mu ñi quelluafiel pu pilungelu. Ca tañi quellungeal tati traumalelu ca pu nehue pelonolu, mülei publicacion huirintucungelu braille mu doi 60 quehun mu. Cafei doi 100 quehun mu, taiñ video mu quiñe che nütramcalerpui chem tañi rupamequen tati video mu. Com tüfachi dungu mu, quellungequei tati pu pilu ca tati pu trauma ñi hueniyeafiel Jehová ca Jesús.

11. Jehová ñi troquiñche, ¿chumngechi pengeli ñi duamtuquefiel itrofill che? (Hechos 2:5-7, 33; ca inaduamnge ti adentun).

¹¹ Jehová ñi troquiñche eluucülequei ñi quelluafiel fillque tuhun-ngechi che. Pentecostés 33 tripantu mu, Jesús elufi tañi pu discipulo Jehová tañi nehuen, femngechi ñi amuldungulelafiel pu che caque quiñeque tañi quehun meu (papeltunge Hechos 2:5-7, 33). Fachantü, ca femquei Jehová ñi troquiñche. Quelluquefi pu che fillque quehun dunguquelu ñi quimafiel ta Jehová. Feimu entuquei publicacion doi mil 100 quehun dungu mu. Quiñeque feitachi quehun pichin che müten dunguquei. Mülei publicacion doi 160 indigena quehun mu, mülei mapudungun, chedungun, rapa nui, quechua, aimara ca fentren caquelu. Taiñ publicacion ca mülei doi 20 romani quehun meu. Fentren che quimürpulu ti rüf dungu quisu tañi quehun meu, eluhuingün tañi serfiafiel Jehová.

12. ¿Ca chumquei Jehová ñi troquiñche ñi quelluafiel che?

¹² Ca femngechi Jehová ñi troquiñche quelluquefi pu rupalu fütraque nüyün cam cürüftucu mahun. Fentren peñi ca lamngen eluufemquei ñi quelluntucumeal. Jehová tañi troquiñche ca adcünuquei cheu ñi trahuluhuam pu che ñi doi quimafiel Jehová ñi piuqueyenieteu.

TAIÑ HUNEN LONCO SACERDOTE QUELLUAIÑMU

13. ¿Chumngechi quelluqueiñmu Jesús?

¹³ Jesús taiñ cuidaqueteu iñchiñ, feimu eluqueiñmeu com taiñ duamnieel taiñ hueniyenieafiel Jehová (Juan 10:14; Efes. 4:7). Quiñeque mu fente taiñ huesa duamcülen, quiñe epe chongcülechi mecha reque feleafuiñ cam quiñe deu huatrolechi rüngi reque. Huesa duamcüleafuiñ chi cutrancüleliyiñ, huelulcauliyiñ cam yafcaucüleliyiñ quiñe taiñ peñi, lamngen iñchiñ. Re raquiduamafuiñ chi taiñ huesa rupan mu, feimu cüdautuafuiñ taiñ loncontucual taiñ maneluhun. Huelu acordayaiñ, Jesús quimniei taiñ rupamequen ca taiñ chum duamelqueteu. Jesús am cutranpiuqueyeteu iñchiñ, feimu ayüquei taiñ quelluaeteu. Feimu Jesús eluafeiñmu Jehová tañi nehuen taiñ nehuentucuaeteu (Juan 16:7; Tito 3:6). Ca femngechi Jesús eluqueiñmu pu loncolelu ca caquelu peñi ca lamngen taiñ quelluaeteu ca taiñ yafültucuaeteu (Efes. 4:8).

14. ¿Chumafuiñ huesa duamcüleliyiñ?

¹⁴ Huesa duamcüleliyiñ, acordayaiñ Jesús taiñ Hunen Lonco Sacerdote ngen. Loncontucuaiñ, Jehová huercüfi Jesús mapu mu ñi lapayal iñchiñ mu. Huelu feica müten no, ca huercüfi ñi cüme ngüneduamafiel ñi chum duamcülen pu che. Feimu ngañhuadcüleliyiñ taiñ culpan mu cam taiñ huelulcahun mu, müchai müten Jesús eluuquei taiñ quelluaeteu (Heb. 4:15, 16).

15. ¿Chem quellueyu quiñe peñi ñi huiñotual trahunche mu?

¹⁵ Jesús ca adniequefi tañi pu che ñi quelluafiel pu püntütripalu, femngechi ñi huiñotual Jehová mu (Mat. 18:12, 13). Peaiñ ñi rupan ta Esteban.b Fei 12 tripantu yeniefui ñi entungen trahunche mu, fei quiñe antü amui trahun mu. Fei feipi: “Cüdautufun llemai, huelu ayüquefun ñi huiñotual Jehová ñi familia mu. Trahulu pu loncolelu iñchiñ, cüme duameleneu engün. Quiñeque mu falintuuquelafun tañi elcünufiel Jehová, fei fantepupelayan piquefun. Huelu pu loncolelu feipieneu Jehová ca Jesús ayüniei iñche tañi fentecünunoal pieneu. Lloungetulu iñche, ti trahunche piuqueyenquechi llohueneu iñche. Rupachi antü mu, tañi domo ca papelturpui Biblia, feula trür serfiquefiyu Jehová”. Ti trahunche quellufiel mu che ñi huiñotual, ¿rume ayüucülepelai Jesús?

16. ¿Chemu fente mañumcüleiñ Jesús ñi cutranpiuqueyechequen mu?

¹⁶ Mülepalu mapu mu, Jesús quellufi fentrenque che. Fachantü ca femngechi quelluaiñmu llemai duamliyiñ taiñ quellungeal. Ca cüpalechi antü mu, quellunieaiñmu taiñ culpafengehuenoal. Felei llemai, Jesús taiñ Hunen Lonco Sacerdote rume cutranpiuqueyechequei. Jehová elfalcünueyu fente taiñ piuqueyenieteu, feimu rume mañumniefiyiñ.