Chau Jehová dungufi ta Samuel

Ti hunen lonco sacerdote Elí niefui 2 fotüm: Hofní ca Finehás. Sacerdotengefuingu, fei cüdauquefuingu ngillatuhue tolto ruca mu. Huelu inaquelafuingu Chau Dios tañi feipin ca huesalcaquefuingu tati pu che. Pu Israel che chalintuculelquefuingün culliñ ta Chau Jehová, huelu Hofní ca Finehás ngencauquefuingu tati doi cümeque ilo mu. Elí quimniefui tañi huesa femquen engu, huelu norümtulafi. ¿Jehová cai chumlai rume? ¿Chem pimi?

Samuel doi pichicalu rume, trürlai ta Hofní ca Finehás, femquelafui huesaque dungu. Feimu Chau Jehová rume ayüucülefui tañi femquen mu. Pun meu umautumequelu Samuel allcüi quiñe dungun ñi üitueteu, huitrai, fei lefcülen pemefi ta Elí. Feipifi: “Fau mülen”. Huelu Elí feipieyu: “Mütrümlaeyu. Huiñotunge tami umautual”. Fei Samuel cudutui. Ca femngechi femi caquelu 2 rupa allcülu ñi mütrümngen. Feimu Elí quimtucui Chau Jehová ñi mütrümmequefiel ta Samuel. Fei, feipifi: “Huiño allcütulmi ti dungun, huiñoldunguaimi: ‘Feipien, Chau Jehová. Iñche ta eimi tami cüdaufe, allcütunieyu’”.

Cudutulu, Samuel ca huiño allcüi ñi üitungen: “¡Samuel! ¡Samuel!”. Feimu huiñoldungui: “Feipien, Chau Jehová. Iñche ta eimi tami cüdaufe, allcütunieyu”. Chau Jehová feipi: “Castigayafiñ ta Elí ca tañi familia, feipiafimi ta Elí. Quimniei ñi huesa femmequen tañi pu fotüm iñche tañi tolto ruca mu, huelu norümtulafi engu”. Hunlu, Samuel ca huiño nülafi ti puerta ti ngillatuhue tolto ruca mu. Mülefui ñi feipiafiel tati hunen lonco sacerdote ñi feipin Chau Jehová, huelu llicalefui. Fei Elí mütrümeyu ca ramtueyu: “Saquin fotüm, ¿chem feipieimu Chau Jehová?”. Feimu Samuel com entudungui.

Doi tremlu Samuel, amulei ñi huenihuen Chau Jehová engu. Com pu Israel che quimniefuingün Chau Jehová ñi dullifiel ta Samuel, fei ñi profeta ca juezngeal.