TROQUIÑ ÑI CHILLCATUNGEAL 20
ÜLCANTUN 7 Jehová mu cüpai ñi nehuen
Maneluunge Jehová tami yafültucuaeteu
Püramyengepe taiñ Fütra Chau cutranpiuqueyechequelu ca yafültucuchequelu (2 COR. 1:3).
¿CHEM QUIMAIÑ?
Entuaiñ falinque quimeltun chumngechi Jehová yafültucufi pu judio Babilonia mu.
1. Pu judio mülelu Babilonia mu, ¿chumngechi mongen yeniefuingün fei mu?
FENTREN tripantu mu pu judio feyentulafingün ta Jehová. Feimu Jehová elufi pu Babilonia che ñi lefcontuafiel pu judio ñi mapu ca ñi yeafiel engün Babilonia mu. ¿Chumngechi mongen yeniequefuingün üye mu? (2 Crón. 36:15, 16, 20, 21). Pu judio fentren dungu femquefuingün Babilonia mu (Jer. 29:4-7). Huelu tañi müleal fei mu cüdaungefui llemai. Feitachi mongen ayüquelafui tañi nieal engün. ¿Chum duamcülefuingün quisu engün? Quiñe judio yengelu ta Babilonia feipi: “Inaltu caque leufü mülelu Babilonia mu anücünuupuiñ. Fei acordafilu ta Sion ta iñchiñ, ngümaiñ” (Sal. 137:1). Quisu engün huesa duamcülefuingün, feimu duamnieingün tañi yafültucungeal. ¿Inei yafültucueyu engün?
2, 3. 1) Jehová, ¿chumi ñi yafültucuafiel pu judio? 2) ¿Chem peaiñ tüfachi troquiñ mu?
2 Biblia feipi Chau Jehová “itrofill dungu mu yafültucuchequei” (2 Cor. 1:3). Jehová piuqueyequefi tañi pu che, feimu eluucülei tañi yafültucuafiel engün. Jehová quimniefui pu judio mülepule Babilonia mu, quiñeque engün huiñoraquiduamtuafuingün ca huiño serfiafuingün ta Jehová (Is. 59:20). Feimu doi 100 tripantu petu ñi yengenon engün Babilonia mu, Jehová huercüfi Isaías tañi feipiafiel engün chem ñi huiriconcülen Isaías pingechi lifru mu. Femngechi Jehová yafültucuafui pu judio mülepualu Babilonia mu. Isaías feipi: “‘Yafültucuafimün, yafültucuafimün tañi pu che’ pi eimün tamün Dios” (Is. 40:1).
3 Feichi pu judio reque mülelu Babilonia mu, iñchiñ ca femngechi duamnieiñ taiñ yafültucungeal. Tüfachi troquiñ mu inaduamaiñ chumngechi Jehová yafültucufi feitachi pu judio: 1) feipicünufi engün tañi perdonayafiel pu rüf repentiulu, 2) elufi tañi pu che maneluhun, ca 3) quellufi engün tañi llicahuenoal. Ca peaiñ chumngechi Jehová yafültucuqueiñmu chumngechi ñi yafültucufiel tañi pu che cuifi.
JEHOVÁ PERDONAQUEIÑMU
4. Jehová, ¿chumngechi pengeli tañi cutranpiuqueyechen? (Isaías 55:7).
4 “Taiñ Fütra Chau rume cutranpiuqueyechequei” (2 Cor. 1:3). Jehová, ¿chumngechi pengelelfi pu judio tañi cutranpiuqueyefiel engün? Feipicünufi tañi perdonayafiel (papeltunge Isaías 55:7). Jehová ca feipifi engün tañi afquentu cutranpiuqueyeafiel engün (Is. 54:8). Pu judio mülerpuafuingün Babilonia mu fentren tripantu tañi feyentunofiel mu Jehová. Huelu quisu feipieyu tañi rumel mülenoal fei mu (Is. 40:2). Tüfa, ¿müna yafültucupelafui pu judio repentiulu ca ayülu ñi ayühuelafiel Jehová?
5. ¿Chumngelu doyelchi mai iñchiñ rüf maneluhuafuiñ taiñ perdonayaeteu Jehová?
5 ¿Chem quimeltueiñmu tüfa? Chau Jehová rüf perdonaquefi tañi pu serfiqueteu. Doyelchi mai iñchiñ doi maneluhuafuiñ taiñ perdonayaeteu ta Jehová. ¿Chumngelu am? Quimnieiñ ñi femün ta Jehová taiñ perdonayaeteu iñchiñ. Fentren tripantu rupalu ñi feipicünuel ta Isaías, Jehová huercüfi tañi Fotüm ñi layal mapu mu, femngechi ñi montulafiel com pu culpafe rüf repentiulu. Feimu Jesús ñi lan mu Jehová com rulpacünuafui taiñ culpan (Is. 1:18; Hech. 3:19; Efes. 1:7). Quimfali Jehová tañi rüf perdonachequen.
6. ¿Chumngelu yafültucuqueiñmu Jehová ñi rüf perdonachequen? (Ca inaduamnge ti adentun).
6 Quiñeque mu tunte repentiuliyiñ rume, huelu ca culpatuhuafuiñ taiñ huelulcahun cuifi mu. Doyelchi mai petu cutrancaucüleliyiñ taiñ huesa femün mu. Huelu ñi feipin Jehová Isaías 55:7 mu müna yafültucuafeiñmu. Deu feipiliyiñ taiñ culpan ca norcünutuliyiñ taiñ mongen, maneluhuaiñ Jehová deu perdonaeiñmu. Fei Jehová perdonachen mu, acordahuelai ñi huesa femün (ca ngüneduamnge Jeremías 31:34). Jehová raquiduamquiyahul-lai taiñ huesa femün cuifi, fei iñchiñ ca femlayaiñ quisu taiñ culpan mu. Jehová inaduamquefi taiñ femmequen famülque mu, huelu taiñ culpan cuifi mu no (Ezeq. 33:14-16). Taiñ culpan chengen mu huesa rupamequeiñ tati. Huelu Jehová pichiñma mu apümcayafi taiñ huesa rupamequen.
Jehová inaduamquelai taiñ cuifique culpan, doi falintufi taiñ femmequen. (Inaduamnge parrafo 6).
7. Culpaliyiñ, ¿chem quelluaiñmu taiñ entudungual?
7 Ellcanieliyiñ taiñ culpan dungu fei huesa duamcüleliyiñ, ¿chem mülei taiñ femal? Biblia feipiquei taiñ quintual quellu, feipiafiel pu loncolelu (Sant. 5:14, 15). Tüfa cüdautuafuiñ. Huelu mülei taiñ acordayal tüfachi pu loncolelu Jehová adniequeyu taiñ quelluaeteu. Fei engün pengelelaiñmu taiñ cutranpiuqueyenieteu Jehová reque. Loncontucunieliyiñ tüfa ca rüf repentiuliyiñ, eluhuaiñ taiñ nütramcayafiel pu loncolelu. Peaiñ ñi rupan taiñ peñi Arturo.a Quisu culpai, fei rume huesa duami tañi femün mu. Fei Jehová adcünufi pu loncolelu tañi yafültucuafiel. Taiñ peñi feipi: “Quiñe tripantu pequefuiñ podngechi adentun pornografia pingequelu. Huelu allcün quiñe hueupin, raquiduameleneu. Feimu entudungulfiñ tañi domo ca ti pu loncolelu. Doi cüme duamtun, huelu petu hueñancümequefun tañi huesa femün mu. Pu loncolelu raquiduameleneu Jehová petu cüpa hueniyenieneu ca norümtuchequei fente ñi piuqueyefiel mu pu che. Tañi cüme feipieteu engün yafültucueneu, fei quimtucun Jehová tañi rüf perdonaeteu”. Feula taiñ peñi Arturo precursor ca siervo ministerialngei. Rüf repentiuliyiñ taiñ culpan mu, Jehová eluhuai taiñ perdonayaeteu. Tüfa rume yafültucuqueiñmu.
JEHOVÁ HULQUEI MANELUHUN
8. 1) ¿Chem maneluhun feipicünufi pu judio Jehová? 2) Feitachi maneluhun, ¿chumngechi quellueyu pu repentiuchi judio? (Isaías 40:29-31).
8 Pu judio raquiduamafuingün tañi turpu huiñotunoal tañi mapu engün. Babilonia fütra gobierno, pu che tañi nüfiel turpu lifrecünuquelafui engün (Is. 14:17). Huelu Jehová elufi maneluhun tañi pu che. Feipicünufi tañi lifretripayal engün ca tañi huiñotual ñi mapu meu. Fei inei no rume catrütulayafui ñi femtripayal ñi dungu (Is. 44:26; 55:12). Jehová ñi adquiñ mu, Babilonia trufür reque mülequefui (Is. 40:15). ¿Chumngelu feipiafuiñ? Trufür pimungeyüm ngehuequetulai. Ca femngechi femafulu Jehová Babilonia mu. Femngechi cüdautulayafui tañi lifrenentuafiel tañi pu che. Fei Jehová ñi feipicünufiel pu judio, ¿chumngechi quellueyu engün? Rume yafültucueyu. Isaías ca feipi: “Pu maneluucülelu Jehová mu nehuencontuaingün” (papeltunge Isaías 40:29-31). Chumngechi quiñe ñamcu nehuen mu müpüpüraquei, ca femngechi pu judio nehuencontuafuingün tañi maneluhun mu engün.
9. Pu judio, ¿chumngelu maneluhuafuingün tañi lifrenentuaeteu Jehová?
9 Jehová cüme pengelelfi pu judio chumngelu ñi maneluucüleal tañi feipin mu. Feichi mu, pu judio deu inaduamquefuingün com ñi feipicünuel ta Jehová com femtripaquefui. Fei engün quimniefuingün pu Asiria che ñi huehuafiel ti mari troquiñ Israel mu ca tañi yeñmayafiel ñi pu che (Is. 8:4). Ca pequefuingün chumngechi pu Babilonia che ñi apümcafiel Jerusalén ca ñi yeñmafiel ti pu che Babilonia mu (Is. 39:5-7). Ca quimniefuingün chumngechi ti lonco ülmen Babilonia traumalfi tati lonco ülmen Sedequías ca yefi Babilonia mu (Jer. 39:7; Ezeq. 12:12, 13). Com ñi feipicünuel Jehová femtriparpui (Is. 42:9; 46:10). Pu judio inaduamlu engün com tüfa, doi maneluhuingün Jehová mu ñi lifrenentuaeteu Babilonia mu.
10. ¿Chem quelluaiñmu taiñ cüme maneluucüleal?
10 ¿Chem quimeltueiñmu tüfa? Hueñancüleliyiñ, taiñ maneluhun yafültucuqueiñmu. Famülque mu, caque antüngei doi huesa amulen huesaque dungu. Ca chaftuquefiyiñ nehuen-ngechi caiñe. Huelu mülelai taiñ huesa duamcüleal. Jehová feipicünueiñmu taiñ nieal afnoachi mongen quiñe cüme mülehue mu. Fei mu tüngcüleaiñ ca cuñihun-ngelayai ta mongen. Loncontucuaiñ ca piuquentucuaiñ tüfachi maneluhun. ¿Chumngelu falin-ngei tüfa? Raquiduamnge: huecun müna cümelcalei fill anümca. Cüpa lelihulfilmi huelu podcülele chi ventana, cüme pelayafuimi fente tañi cüme adngen. Liftufilmi ti ventana, feita cüme peaimi. Ca femngechi iñchiñ cüme pelayafuiñ reque taiñ maneluhun. Feimu, ¿chem mülei taiñ femal? Rumel elcünuqueaiñ tiempo taiñ raquiduamtucuafiel cüme mongen taiñ nieal hue mapu mu. Mülei fillque articulo, video ca ülcantun nütramcalu taiñ maneluhun mu, fei com ngüneduamafiyiñ. Ca llellipun mu feipiafiyiñ Jehová com ti cümeque dungu taiñ üngümnieel.
11. Quiñe lamngen huesa cutran nielu, ¿chem quellueyu tañi yafüluucüleal?
11 Peaiñ ñi rupan ti lamngen Joy pingelu. Quisu huesaque cutran niei nienolu lahuen, huelu ti maneluhun yafültucuqueyu. Taiñ lamngen feipi: “Fill huesa raquiduamcülelu iñche, feipiquefiñ Jehová tañi chum duamcülen. Quisu ta pepilqueneu. ¿Chumngechi quelluqueneu Jehová? Eluqueneu ñi fütra nehuen” (2 Cor. 4:7). Taiñ lamngen Joy ca peyenieuquei ti hue mapu mu. Feichi mu “inei no rume feipilayai: ‘Iñche cutrancülen’” (Is. 33:24). Nülanentulfiliyiñ taiñ piuque Jehová ca piuquentucunieliyiñ taiñ maneluhun, fei nehuencontuaiñ taiñ chaftuafiel huesaque dungu.
12. ¿Chumngelu maneluhuafuiñ Jehová ñi feipin mu? (Ca inaduamnge ti adentun).
12 Famülque mu, Jehová ca pengelelqueiñmu chumngelu taiñ maneluhual ñi feipin mu. Raquiduamnge quiñeque dungu ñi deu femtripamequen. Inaduamqueiñ ñi mülen quiñe fütra gobierno, ‘quiñeque dungu mu niei nehuen ca quiñeque mu nielai’ (Dan. 2:42, 43). Ca allcüqueiñ fill püle mülei fütraque nüyün ca com mapu püle amuldunguqueiñ (Mat. 24:7, 14). Deu ngüneduampeiñ chumngechi ñi femtripamequen Jehová tañi feipicünuel, feimu doi maneluuqueiñ ñi femtripayal cüpalechi antü mu.
Famülque mu inaduamqueiñ ñi femtripamequen Jehová ñi feipicünuel, feimu doi maneluuqueiñ ñi feipin mu. (Inaduamnge parrafo 12).
JEHOVÁ QUELLUQUEIÑMU TAIÑ LLICANOAL
13. 1) Fülcülepale ñi lifretripayal pu judio, ¿chem dungu mu chaftuaingün? 2) Jehová, ¿chumngechi yafültucufi pu judio? (Isaías 41:10-13).
13 Jehová yafültucufilu rume pu judio, huelu quimniefui ñi rupayal engün huesaque dungu mu acule ñi lifretripayal. Jehová feipicünui quiñe nehuen-ngechi lonco ülmen ñi lefcontuafiel ca ñi nüafiel fillque huaria inafülcülelu Babilonia mu. Fei hula ca femngechi femafi Babilonia (Is. 41:2-5). ¿Mülefui ñi llicaleal pu judio? Femlai. Jehová feipieyu: “Llicaquilnge, iñche am eimi mu mülen. Fill raquiduamcülequilnge, iñche am eimi tami Ngünechen” (papeltunge Isaías 41:10-13). Jehová, ¿chumngelu am feipifi pu judio “iñche am eimi tami Ngünechen”? ¿Feipimequefi tañi püramyengeal? Femlai. Cüpa feipifi tañi pülleleal fei engün mu ca ñi quelluaeteu (Sal. 118:6).
14. Jehová, ¿chumngechi quellufi pu judio tañi llicalenoal?
14 ¿Ca chumi Jehová tañi quelluafiel pu judio ñi llicalenoal? Acordalelfi engün fente tañi nehuen-ngen ca quimün-ngen. Ca feipifi engün tañi püraquintual ta huenu ca ñi adquintuafiel pu huangülen. Quisu re deumalafi müten, ca quimnieñmafi tañi üi engün (Is. 40:25-28). ¿Ca femngechi quimnoafulu am tañi üi tañi pu serfiqueteu? Cafei nielu am nehuen tañi deumayafiel pu huangülen, ca femngechi niei nehuen tañi quelluafiel tañi pu che. Rüfcünu, pu judio ngelafui tañi llicayal engün.
15. Jehová, ¿chumngechi pepicafi pu judio acule tañi lifretripayal engün?
15 Jehová ca feipifi pu judio tañi femal engün acule tañi lifretripayal engün. Isaías ñi lifru mu Jehová feipicünufi tañi pu che: “Amunge, iñche tañi pu che, concülenge ponhui ti catrüntucu ruca mu, ca racümcünunge ti hulngiñ tami furi püle. Pichintu ellcaucülenge fentepuule ñi rupan tati fütra illcun” (Is. 26:20). Ti lonco ülmen Ciro nüfilu Babilonia, ¿pu judio inapelafingün Jehová tañi huercüeteu? Quiñe cuifi historiador griego tuhun nielu feipi: “Conpulu Ciro Babilonia mu, huercüfi tañi pu soltau tañi langümafiel inei rume miyaulu huecun”. Pu che Babilonia mu mülelu ¿rume llicapelaingün? Huelu pu judio, ¿mongetripapelaingün ñi inafiel Jehová tañi huercüeteu?
16. ¿Chumngelu llicalayaiñ chem ñi rupayal fütra cutrancahun mu? (Ca inaduamnge ti adentun).
16 ¿Chem quimeltueiñmu tüfa? Pichiñma mu müleai quiñe fütra cutrancahun mapu mu. Conle, pu che quimlayai ñi chumal ca pellqueleai. Huelu iñchiñ llicalayaiñ, quimnielu am Jehová fei ta iñchiñ taiñ Dios. Maneluucüleiñ tati, quimnieiñ epeque aculei taiñ montulngeal (Luc. 21:28). Cafei lefcontueliyiñmu feichi pu troquiñche quiñeucülealu, maneluucüleaiñ müten Jehová mu. Jehová adcünuafi pu cümeque püllü taiñ incañpeaeteu ca feipiaiñmu taiñ chumal femngechi taiñ montuluhual. ¿Chumngechi feipingeaiñ taiñ chumal? Petu quimlaiñ. ¿Trahun mu feipingepelayaiñ? Ti trahunche fei ti “catrüntucu ruca” peno, tüfa mu cuñiutucungeaiñ. Fei, ¿chumngechi pepicaucüleafuiñ acule ti fütra cutrancahun? Fülconcüleaiñ taiñ pu peñi ca pu lamngen mu, eluucüleaiñ taiñ inayal chem taiñ feipieteu Jehová tañi troquiñche ca maneluucüleaiñ Jehová ñi adniefiel tañi troquiñche (Heb. 10:24, 25; 13:17).
Raquiduamliyiñ Jehová ñi fente nehuen-ngen, quelluaiñmu taiñ llicanoal acule ti fütra cutrancahun. (Inaduamnge parrafo 16).b
17. ¿Chumngechi eluhuaiñ taiñ yafültucuaeteu Jehová?
17 Pu judio cüdaungefui rume ñi mongen Babilonia mu, huelu Jehová yafültucueyu engün. Iñchiñ ca femngechi yafültucuaiñmu. Feimu chem rupaliyiñ rume, eluhuaiñ taiñ yafültucuaeteu ta Jehová. Maneluunge Jehová tañi rüf perdonaquefiel tañi pu che ca tami cuñiutucuqueteu. Piuquentucuaimi tami maneluhun ca acordanienge Jehová eimi tami Dios, feimu chem mu rume llicalelayaimi.
ÜLCANTUN 3 Jehová eluqueiñmu nehuen ca maneluhun
a Tüfachi troquiñ mu, ca üi tuculelngei ta quiñeque che.
b ¿CHEM PENGELI TI ADENTUN? Quiñe pichi troquiñ peñi, lamngen trahuluhuingün. Püraquintufilu engün pu huangülen, loncontucuingün Jehová ñi nehuen-ngen ca ñi incayafiel tañi pu che cheu rume mülele engün.