“ Eimi rume falin chengeimi”

1, 2. ¿Chumngechi ngüneduamafuiñ Jehová taiñ falintuqueteu?

CHAU JEHOVÁ rume falintuquefi tañi pu che. Huelu quiñeque engün falinolu troquiuqueingün. Tañi illamcangen mu chi femngechi raquiduamqueingün. Eimi ca femngechi dungu rupalmi, ¿chem quelluafeimu tami quimtucunieal Jehová tami falintuqueteu?

² Ngüneduamafuimi Biblia ñi nütram pengelquelu Jehová ñi rume falintuquefiel che. Jehová tañi Fotüm rume yamniequefi pu che ca cüme duamelquefi. Tañi femün mu pengelqueiñmu quisu ca tañi Chau ñi rume falintuquefiel pu müte falintuuquenolu (Juan 5:19; Heb. 1:3). Tüfachi troquiñ mu peaiñ epu dungu: 1) Jesús chumngechi pengelelfi pu che Jehová ñi falintueteu, ca 2) chem quelluafeiñmu iñchiñ taiñ maneluhual Jehová taiñ falintuqueteu (Ageo 2:7).

JESÚS, ¿CHUMNGECHI QUELLUFI PU CHE ÑI FALINTUHUAL?

3. Jesús, ¿chumngechi quellufi pu che Galilea mu?

³ Amuldunguyaulu Jesús Galilea mu, fentrenque che allcütumequeyu ca pu cutran amuquefuingün tañi tremoltungeal. Jesús “ngüneduami ñi allfülen ca ñi quisucünungen, ufisa reque nienolu camañ” (Mat. 9:36; peaimi fillque nota de estudio). Pu fariseo falinolu troquiquefui pu che, “Chau Ngünechen illamcaqueyu engün” piquefuingün (Juan 7:47-49; nota de estudio). Huelu Jesús eluucülequefui tañi quimeltuafiel pu che ca tañi tremoltuafiel, femngechi pengelelfi tañi falin-ngen engün (Mat. 9:35). Cafei ñi quelluafiel doi fentren che, pepicafi tañi pu apostol ñi quimeltucheal ca elfalcünufi ñi tremoltucheal (Mat. 10:5-8).

4. ¿Chem quimeltueimu chumngechi ñi troquifiel Jesús pu illamcangelu?

⁴ Jesús piuqueyenquechi dungufi pu che ca yamquefi engün, femngechi pengeli quisu ca tañi Chau ñi falintufiel pu illamcangelu. Serfifulmi Jehová, huelu falinolu troquihulmi, ngüneduamnge chumngechi Jesús ñi troquifiel tañi pu allcütuqueteu. Femülmi, ngüneduamaimi tami fente falin-ngen Jehová tañi adquiñ mu.

5. ¿Chem quimnieiñ ti domo Jesús ñi quimfiel Galilea mu?

⁵ Jesús enseñalafi müten fentrenque che, doi mai caque quiñeque che ca quimeltufi ca quellufi. Amuldunguyaulu Galilea mapu mu, Jesús quimfi quiñe domo cutrancülelu, 12 tripantu catrühuelai ñi mollfüñ (Mar. 5:25). Moisés ñi ley feipi ñi lifcülenon tañi cutran mu, feimu inei rume topaeliyu, ca lifcülenolu troquingeafui. Femngechi cutran tañi nien mu, ¿quisulequepelafui? Feimu trahuluuquelafui ñi poyeafiel Jehová caquelu che engün (Lev. 15:19, 25). Feitachi domo cutrancülelafui müten, ¿ca falinolu troquiupelafui? (Mar. 5:26).

6. ¿Chumi tati domo tañi tremotual?

⁶ Feitachi domo rume huesa cutrancülefulu ayüniefui tañi tremolaeteu Jesús, huelu chem pilafi rume. ¿Chemu feipilafi? Yehuelepelafui tañi huesa cutran tañi nien mu. Ca llicalepelafui Jesús ñi famentuaeteu ca lifcülelaimi piaeteu. Feimu “nünütufili müten tañi tacun, tremotuan” pi ti domo (Mar. 5:27, 28). Tañi feyentun mu feitachi domo tremoltueyu. Jesús feipi: “¿Inei nünütueneu ñi tacun?” pi, fei ti domo entudungui.

7. Jesús, ¿chumngechi quellufi feitachi domo cutrancaumequelu? (Marcos 5:34).

⁷ Jesús piuqueyenquechi dungufi ti domo ca yamün mu. Jesús pefi ti domo ñi müllmüllcülen tañi llican mu (Mar. 5:33). Quisu quimfulu ñi chum duamcülen ti domo, fei piuqueyenquechi yafültucufi. Feimu feipifi “ñahue”, femngechi pengelelfi tañi piuqueyeniefiel ca yamniefiel (papeltunge Marcos 5:34 ca ti nota). Feitachi domo müten ñahue pifi. ¿Feipipelafi pefilu fente tañi llicalen? ¿Rume cüme duampelai fente tañi cüme dungueteu ta Jesús? Jesús tremoltulafi müten, ca cüme duamelfi, femngechi ti domo huesa duamlai tañi topafiel mu Jesús ñi tacun. Jesús ayüniefui ñi quimal feitachi domo Jehová tañi piuqueyenieteu ca tañi ñahue reque troquieteu.

8. ¿Chem huesaque dungu rupafui taiñ lamngen Brasil mapu mu tuulu?

⁸ Fachantü, quiñeque Jehová tañi pu che huesa duamquei tañi cutrancülen mu. Nütramcahuaiñ quiñe lamngen María pingelu,a precursora regularngei Brasil mapu mu. Choyüngelu müten, nielafui tañi epu chang ca tañi man cuhu. Taiñ lamngen feipi: “Amulu colegio mu iñche, tañi pu compañ huesa duameleneu, ca üi tuculelquefeneu. Allfülmaeneu reque ñi piuque. Quiñeque mu, tañi familia cütu falinolu troquilquefeneu engün”.

9. ¿Chem quellueyu María ñi falintuhual?

⁹ ¿Chumngechi quellungei María? Testigongerpulu, tañi pu lamngen quellueyu ñi ngüneduamal Jehová tañi falintuqueteu. Fei feipi: “Fentren lamngen quelluqueneu, com üitulayafun engün. Tati trahunche iñche tañi familia ca müten, feimu com piuque mu mañumniefiñ Jehová”. Felei llemai, María quimtucui ñi falin-ngen Jehová tañi adquiñ mu tañi quelluqueteu mu pu peñi, pu lamngen.

10. ¿Chem huesaque dungu rupaquefui María Magdalena? (Ca inaduamnge ti adentun).

¹⁰ Ca raquiduamaiñ chumngechi Jesús quellufi María Magdalena. Feitachi domo conhuecüfülefui, 7 huesaque püllü niefui (Luc. 8:2). Tañi conhuecüfülen mu, ¿cangechi dungu femquepelafui? Feimu tati pu che famentuquefeyu chi. María Magdalena rume cutrancauquefui, ¿quisulelu troquiuquefui? Ca inei no rume piuqueyelaeneu ca quellulayaeneu piquefui. Jesús entuñmapelafi María pu huesaque püllü, fei María inanierpueyu. Huelu Jesús amulei ñi quellufiel tañi doi falintuhual.

11. Jesús, ¿chumngechi pengelelfi María Magdalena tañi falintuqueteu Jehová? (Ca inaduamnge ti adentun).

¹¹ Jesús mangelfi María Magdalena ñi compañaeteu amuldunguyaulu fillque lof mu, femngechi María Magdalena amulei ñi allcütuafiel Jesús ñi quimeltun.b Huiñomongetulu Jesús, feichi antü müten peufaluhui María Magdalena mu. Fei quiñe tati hunenque che pefilu Jesús deu huiñomongetulu. Jesús ca huercüfi ñi feipiafiel pu apostol tañi huiñomongetun. Felei llemai, Jesús femi fillque dungu ñi pengelelafiel María Magdalena tañi falintuqueteu Jehová (Juan 20:11-18).

12. ¿Chumngelu Lidia falinolu troquiuquefui?

¹² María Magdalena reque, fachantü fentren che famentungelu troquiuquei. Peaiñ ñi rupan taiñ lamngen Lidia España mu mülelu. Petu tañi choyünoeteu tañi ñuque, fei raquiduamcülefui ñi ancanentual ñi püñeñ. Pichi domongelu müten Lidia, tañi ñuque duamtuquelafeyu ca huesa piquefeyu. Fei feipi: “Tañi piuqueyenoeteu mu ñi ñuque, rume ayüquefun caquelu che tañi piuqueyeaeteu ca hueniyeaeteu. Tañi ñuque ñi duam mu, huesa che troquiuquefun. Feimu llicalequefun inei no rume tañi piuqueyenoaeteu”.

13. Lidia, ¿chumngechi quimürpui Jehová tañi falintuqueteu?

¹³ Lidia eluulu ñi quimafiel Jehová, doi cüme duamtui. Tañi llellipufiel Jehová, tañi papeltufiel Biblia rume quellueyu ca pu peñi, pu lamngen, femngechi ngüneduami Jehová tañi falintuqueteu. Fei feipi: “Tañi füta fentren rupa piuqueyeyu piqueneu. Ca rumel feipiqueneu cümeque dungu tañi peñmaqueteu. Tañi cümeque hueni ca femquei” pi. Tami trahunche mu, ¿inei am quelluafuimi ñi quimtucual Jehová tañi falintuqueteu?

FALINTUHUAIÑ CHUMNGECHI FALINTUQUEIÑMU JEHOVÁ

14. Ñi feipilen 1 Samuel 16:7, ¿chumngechi pequeiñmu Jehová? (Ca inaduamnge ti huichulechi dungu “¿Chumngelu Jehová fente falintuquefi tañi pu che?”).

¹⁴ Loncontucuaiñ, Jehová pequelaeiñmu chumngechi taiñ pequeteu pu che (papeltunge 1 Samuel 16:7). Jehová ngüneduamquelai taiñ ad, tunten plata cam tunten estudio taiñ nieel (Is. 55:8, 9). Eimi ca femaimi. Tami quimal tunte tami falin, ngüneduamlayaimi ñi chem pin pu che, doi mai chumngechi tami pequeteu Jehová. Cümeafui tami papeltual Biblia mu ñi rupan quiñeque poyequefilu Jehová. Quiñeque mu falinolu troquihuingün, huelu Jehová falintuqueyu. Quiñeque tüfa Elías, Noemí ca Ana. Tami mongen mu, Jehová fentren rupa pengelelqueimu chi fente tami piuqueyenieteu ca falintuqueteu. Cümeafui tami huirintucual chem tami rupan, femngechi tami acordayafiel. Ca quelluafeimu quintual informacion taiñ publicacion mu, femngechi tami falinolu troquiunoal.c

15. Jehová, ¿chumngelu fente falintufi Daniel? (Daniel 9:23).

¹⁵ Quimtucunieaimi tami serfiniefiel mu Jehová, fei falintueimu. Raquiduamaiñ ñi rupan Daniel. Epe puhul-lu 100 tripantu, rume cansalefui ca nehuen-ngehuelafui (Dan. 9:20, 21). Jehová, ¿chumngechi yafültucueyu? Huercüfi ti cüme püllü Gabriel ñi feipiafiel Daniel “rume falin chengeimi” ca allcütuñmangeimi tami llellipun (papeltunge Daniel 9:23). ¿Chumngelu Jehová fente falintufi Daniel? Daniel nor huentrungefui ca püntütripaquelafui Jehová mu (Ezeq. 14:14). Jehová elcünui tüfachi nütram Biblia mu taiñ yafültucuaeteu (Rom. 15:4). Jehová ca ngüneduamquei tami nor piuquengen ca tami serfiniefiel, feimu falintuqueimu ca allcütuñmaqueimu tami llellipun (Miq. 6:8, fillque nota; Heb. 6:10).

16. ¿Chem quelluafeimu tami Chau reque troquiafiel Jehová?

¹⁶ Quiñe Chau reque troquiafimi Jehová tami piuqueyenieteu. Quisu raquintucuniequelai tami huelulcan, doi mai ayüniei tami quelluaeteu (Sal. 130:3; Mat. 7:11; Luc. 12:6, 7). Raquiduamfiel mu tüfa, quellueyu fentren che müte falintuuquenolu. Raquiduamaiñ ñi rupan lamngen Michelle, España mu mülelu. Tañi füta fentren tripantu mu huesa piquefeyu, feimu piuqueyengenolu ca falinolu troquiuquefui. Fei feipi: “Falinolu troquiucülelu iñche, raquiduamquen tañi Chau Jehová ñi cuñiutucueteu ca piuqueyenquechi metanieteu” (Sal. 28:9). Cafei, quiñe lamngen Lauren pingelu, Sudáfrica mu mülelu feipi: “Jehová cüpaleneu quisu meu, ca fentren tripantu mu quellunieneu ñi amuleal tañi rüpü mu. Ca adniequeneu ñi quimeltucheal. Feimu, ¿falintunoafeteu iñche? piquen” (Juan 6:44).

17. ¿Chem quelluafeimu tami maneluucüleal Jehová tami füreneeteu? (Salmo 5:12; ca inaduamnge ti adentun).

¹⁷ Piuquentucunge Jehová tami füreneeteu (papeltunge Salmo 5:12). David feipi Jehová fürenefiel mu norngechi che, cuñiutucuquefi “quiñe fütra escudo mu reque”. Feimu loncontuculmi tami füreneeteu Jehová, cuñiutucuaimu tami raquiduam, fei tami falinolu troquiucülenoal. ¿Chumngechi quimafuimi cai tami fürenequeteu Jehová? Taiñ peel, Biblia mu Jehová feipieiñmu ñi falintuquefiel tañi pu poyequeteu. Ca adcünuquefi pu loncolelu, pu cümeque hueni ca caquelu che, femngechi pengelqueiñmu taiñ falintuqueteu. ¿Chum duamelafeimu cai tami poyeeteu caquelu che?

18. ¿Chumngelu rüfngelu troquiafiyiñ caquelu taiñ saquieteu?

¹⁸ Saquielmu feichi pu che tami piuqueyenieteu, huelulcalei ñi feipin pilayaimi, rüfngei tañi feipin engün. Raquiduamnge, Jehová ñi duam mu peno femngechi feipieimu tami acordalelaeteu fente tami falintunieteu. Lamngen Michelle taiñ nütramcapeel parrafo 16, feipi: “Ñochiquechi piuquentucurpufiñ tañi saquieteu caquelu lamngen. Cüdautuquen tañi feyentuafiel ñi feipin engün, huelu quimnien Chau Jehová ayüniei iñche tañi femal”. Pu loncolelu piuqueyenquechi pengelelqueyu tañi falintuqueteu Jehová. Feula taiñ lamngen precursoralei ca quelluntucuquei Betel cüdau mu.

19. ¿Chumngelu maneluhuafuimi Jehová tami falintuqueteu?

¹⁹ Jesús piuqueyenquechi feipiqueiñmu fente taiñ falintuqueteu taiñ Huenu Chau Jehová (Luc. 12:24). Feimu maneluhuafuiñ Jehová taiñ duamtuqueteu, rumel loncontucuaiñ tüfa. Ca quelluafiyiñ caquelu che ñi maneluhual Jehová tañi falintuqueteu.