¡TREPELUUCÜLENGE!
Ti religion coneltulei ti hueichan Ucrania mu, ¿chem pilei Biblia?
Pefinge ñi feipin quiñeque loncolechi religioso petu mülelu ti hueichan Ucrania mu:
“Ti loncolelu ti Iglesia Ortodoxa Rusa, ti Patriarca Cirilo, chem pilai rume ñi femmequen ta Rusia [...]. Tañi Iglesia re coila dungu feipiquei Ucrania mu. Tañi feipin mu ti Iglesia, fei Putin cümelu troquiquefi tañi müleal ta hueichan” (Tañi feipiel EUobserver 7 marzo, 2022).
‘Ti Patriarca Cirilo feipi Rusia ñi hueichamequefiel ta Ucrania ñi afal tati culpan dungu, feimu cümelu troquiquefi tañi femmequen ta Rusia’ (Tañi feipiel AP News, 8 marzo, 2022).
“Ti loncolelu Iglesia Ortodoxa de Ucrania, ti Metropolita Epifanio I de Kiev, lunes antü mu cümelcafi tati pu che ñi quehuatuafiel pu soltau Rusia tuhun nielu [...]. Feipi langümfile engün pu Rusia soltau culpalayaimün pifi” (Tañi feipiel Jerusalem Post, 16 marzo, 2022).
“Iñchiñ quelluntucuquefiyiñ ca cümelcaquefiyiñ pu soltau ca com pu che incañpequefilu ta Ucrania. Ngillatuqueiñ fei engün mu” (Tañi feipiel ti UCCRO,a 24 febrero, 2022).
¿Chem raquiduamqueimi? Pu religion, ¿cümepeafui mai ñi ngüchaltucuafiel pu che ñi coneltual hueichan mu? ¿Chem quimeltuquei Biblia?
Mülen mu hueichan, ¿chumquei ti religion?
Ti religion quintuquefui ti tüngün, huelu ca feipi ñi cümen coneltual hueichan mu, feimu ngüchaltucuquefi pu che ñi amual. Huelu cümelai tüfa. Iñchiñ pu Dunguquelu Ineingen Jehová pengelquefiyiñ pu che ñi cümenon ñi femquen tati pu religion. Peafiyiñ ñi huiriconcülen taiñ publicacion mu.
Ti articulo “Las cruzadas: ‘trágica ilusión’” pengeli ti Iglesia Católica Romana ñi duam mu fentren che langümngei. Dios ca Cristo ñi üi mu langümngeingün pingün.
Ti articulo “La Iglesia Católica y África” pengeli ti religion catrütulafi pu tribu ñi hueluquentu langümuunoal.
Ti articulo “¿Tiene la culpa la religión?”, “El papel de la religión en las guerras” ca “La religión toma partido”, ¿chem pengeli? Mülen mu hueichan, pu loncolelu ti Iglesia Católica, Ortodoxa ca Protestante quelluntucuquefi hueluque hueichamequelu.
Pu cristiano, ¿mülepei mai ñi coneltual hueichan mu?
¿Chem pi Jesús?: “Piuqueyefinge tami chafche chumngechi piuqueyeniehuimi ta eimi” (Mateo 22:39). “Piuqueyefimün tamün pu caiñe” (Mateo 5:44-47).
Raquiduamnge: quiñe religion feipifile pu che ñi langümcheal hueichan mu, ¿rüf inapefi mai ñi feipin ta Jesús ñi piuqueyecheal? Ayülmi tami quimal, papeltunge ti articulo “Los cristianos verdaderos y la guerra” ca “¿Es posible amar a un enemigo?”.
¿Chem pi Jesús?: “Iñche ñi lonco ülmen-ngen tuulai tüfachi mapu meu. Felefule, iñche nieafun che tañi incayaeteu iñche tañi hultucungenoafel” (Juan 18:36). “Com tati langümchequelu ta huaiqui meu, ca femngechi langümngeai ta huaiqui meu” (Mateo 26:47-52).
Raquiduamnge: cuifi mu pu cristiano hueichalaingün tañi incañpeafiel Jesús. Fei famülque mu, ¿mülepei mai taiñ coneltual ta hueichan mu? Cuifi mu pu cristiano inaquefingün Jesús tañi feipin ca tañi femün. Tami doi quimal papeltuafuimi ti articulo “El cristianismo y la guerra: ¿son compatibles?”.
Pu religion quelluntucuquelu ti hueichan, ¿chumngeaingün?
Pu religion re femfaluuqueingün ñi inaquefiel Jesús, Chau Dios famentueyu (Mateo 7:21-23; Tito 1:16).
Pu religion ñi duam mu, fentren che langümngei. Feimu Chau Dios culpantucueyu engün, femngechi feipi ti lifru Apocalipsis (Apocalipsis 18:21, 24). Tami doi quimal, papeltunge ti articulo “¿Qué es Babilonia la Grande?”.
Jesús feipi: “Com anümca hulquenolu cümeque fün, catrüngequei ca cütraltungequei” (Mateo 7:15-20). Ca femngechi pu religion coneltuquelu huesaque dungu mu, Chau Dios apümcayaeyu. Tami doi quimal papeltunge ti articulo “¡Se acerca el fin de la religión falsa!”.
Photo credits, huele püle: Photo by Sefa Karacan/Anadolu Agency/Getty Images; Man püle: Maxym Marusenko/NurPhoto via Getty Images
a Ti Consejo de Iglesias y Organizaciones Religiosas de Ucrania (UCCRO), fei ta quiñe troquiñche coneltulelu 15 iglesia. Feitachi 15 iglesia mu, mülei caquerume religion: ortodoxa, griega y catolica romana, protestante ca evangelica. Ca femngechi mülei judio ca musulman.