Ti Biblia müna kellufi ta Delia rupamekelu wedake dungu. Küpalechi küla chillkatun mu ngüneduamaiñ Biblia ñi kellukefiel fentren che ñi chaftual tañi weda rupameken. Fey kimtukuyngün fente ñi falin-ngen ti Biblia feychi kuyfi chemkün reke taiñ nütramkapeel nga, fey trürlay kuyfike lifru mu manelfalngewenolu rupan mu chi antü. ¿Chumngelu am (chemu) trürümfalngelay? ¿Rüf niepey may Chaw Dios ñi rakiduam müten? (1 Tesalonisense 2:13).

Eymi ka kimniepelaymi ñi pichiñmaken taiñ mongen ka taiñ rupaken fentren wedake dungu. Ngañwadkülelmi tami weda rupameken mu, ¿chem yafültukukeeymu ka elukeeymu kümeke ngülam?

Ngüneduamaiñ chumngechi kelluafeymu ti Biblia tami mongen tüfachi küla dungu mu:

1. tami famentual wedake dungu.

2. tami küme elkünutual tami weda duamelkeetew.

3. tami newenküleal rupalmi wedake dungu.

Küpalechi trokiñ ngüneduamay feychi küla dungu.

LAWENTUN DUNGU

TI BIBLIA KIÑE LAWENTUN LIFRU NO TATI, WELU FEYPI ÑI KIMKENOFEL PU CHE KUYFI TAÑI TREMOLEAL.

Ñi püntüleal pu kutrankülelu.

Moyse ñi ley dungu feypikefuy ñi püntüleal pu che lepra kutran nielu, kakelu che femkelafuy tüfa. Welu 700 tripantu kuyfi mu, fentren che tueyew wedake kutran, feychi mu müten pu lawentuchefe püntünentufingün pu kutran, tüfa kelluniefi ta che fantepu mu (Levítico kapitulo 13 ka 14).

Küchakuwüal dew ñi topafiel kiñe la.

150 tripantu kuyfi mu, pu lawentuchefe ngüneduamkefulu tati pu la, küchakuwükelafuyngün rume ñi ngüneduamal ta che, feymu lay fentren che. Welu Moyse tañi ley dungu eluñmakelafuy pu che topafilu kiñe la ñi poyeafiel ta Chaw Ngünechen kakelu che engün, doy may feypi pu che ñi liftungetual ko mew. Rüfkünu llemay tañi femkeel engün kellueyew ñi tremoleal (Números 19:11, 19).

Ñi chumngeal tati pod.

Fill tripantu doy 500.000 pichikeche lakeyngün pechay kutran mu, tüfa kontueyew mülelu kay ti me chew ñi mülenoafel. Welu Moyse tañi ley dungu feypikefuy tati pu che ñi rüngaltukual tañi me kamapu chew ñi mülekenon ta che (Deuteronomio 23:13).

Chumül ñi sirkunsidangeal.

Chaw Dios tañi ley dungu feypikefuy kiñe pichiche ñi sirkunsidangeal puwül-lu pura antü ñi choyüngen (llegün) (Levítico 12:3). Pu pichiche dew rupalu regle antü ñi choyüngen doy küme amulekey tañi katrümollfüñken. Fütra kuyfi mu pu che müte pepilkelafuy ti lawentun dungu, feymu doy kümekefuy rulpayal regle antü ñi sirkunsidangeal pu pichiche.

Duamfali pu che ñi küme duamküleal tañi tremoleal.

Pu kim lawentuchefe ka pu cientifico feypikey pu che ayüwkülelu, maneluwkülelu, mañumtuchekelu ka wiñoduamtuchekelu doy tremolekey. Biblia ta feypi: “Kiñe ayüwkülechi piwke küme lawen reke trüri, welu ti weda duamkülechi piwke ngañwadelmakeeyew ñi newen” (Proverbios 17:22).