Biblia kellukeeiñmu kuyfi tuwün-ngelu rume

RAKIDUAMNGE TÜFA: Pemefilmi kiñe papay, fey pengeleymu falinke chemkün ñi eluetew tañi kuyfike che yem, fey tüfa tañi chaway, ñi trarilongko ka tañi trapelakucha. Kiñeke tüfa perkanküley, wedañmawi ka trafotripaley pichike trokiñ. Welu kiñe tüfa rume tutelkaley, ka müna küme pengey tañi ñimikan, fey afmatufali. Feymu ramtufimi tati papay: “¿Fewla müten niefimi tüfa?”. “Femlay, rume kuyfi tuwün-ngey tati, ka turpu küme elkünutulafiñ”, pieymu. Ka feypi: “Fentren rupa tukukefiñ, kiñeke mu külchafkey ka trananagkey, welu trafokelay rume. Ka küpa weñeñmangekefun kütu”. Feymu afmatulen mu ramtuwafuymi: “¿Chumngechifel tüfa?”.

Ka femngechi feley ti Biblia. Doy kuyfi tuwün-ngey kakelu lifru mu. Rüfkünu may, müley kakelu doy kuyfike lifru, welu rupan mu chi tripantu wedañmawkey kakelu kuyfike chemkün reke. Kimfalngelu am weke dungu ciencia dungu mu kiñeke kuyfike lifru tañi feypikeel welulkaley. Ka tañi feypikeel lawentun mu rüf kellukelafi ta che, doy may kiñeke mu kuñiwün-ngey kütu. Ka femngechi kuyfike lifru ellaka mu reke felewelay, ñamümlu am kiñeke papel kam müte kimfalngenolu.

Welu Biblia trürümfalngelay. Tüfa eluwi ñi wirintukungeal doy 3.500 tripantu kuyfi mu, welu kaletulay. Fentren rupa pu che lüpümfi ti Biblia, illamkafi ka elungelafuy ñi papeltungeal, welu amuley ñi manelfalngen, doy may feypi fentren kümeke dungu ñi müleal, weftripalu rume fentren weke kimün (inaduamnge ti wichulechi dungu “¿Feypipey may ñi kimkenofel pu che kuyfi?”).

KÜMEKE NGÜLAM TAIÑ KELLUKEETEW

Famülke mu, ¿rüf kellupeafeiñmu may Biblia ñi kimeltukeel? Tami kimal ramtuwnge: “¿Chem am ti doy wedake dungu ñi rupakeel ta che? ¿Chuchi am doy llükafali?”. “Ti weychan, ñi wedalkalen ti Mapu, langümuwün, weñen, ka kakelu wedake dungu”, piafuymi. Fey ngüneduamnge ti kümeke ngülam mülelu Biblia mu, ka ramtuwnge: “Pu che inaniefule Biblia ñi ngülam, ¿doy küme mongen niepelayafuiñ may?”.

KÜMELKAWKÜLEAL KAKELU CHE ENGU

“Ayüwün niey tati ngülamtukefilu kom kakelu che ñi kümelkawkületuael, Ngünechen am ta ‘iñche ñi yall’ ñi piaetew” (Matew 5:9). “Tunten tamün pepilel, yafüluwmün tamün kümelkawküleael itrokom che eymün” (Romanu 12:18).

KUTRANDUAMYECHEAL KA WIÑODUAMATUCHEAL

“Ayüwün niey tati kutranduamyekefilu ta kakelu che, Ngünechen ta ka femngechi kutranduamyeaeyew ta kisu engün” (Matew 5:7). ‘Welukonkechi ñochi piwkengeaymün, ka wiñoduamawaymün kiñeke femle wesa dungu ñi lladkülkayafiel ta kangelu. Chumngechi ta ñidol wiñoduamatueymünmew, wiñoduamawaymün kay ta eymün’ (Kolosense 3:13).

TUTEWKÜLEAL PU CHE FILLKE TUWÜN-NGELU

Chaw Ngünechen “kiñe wentru mew müten ta elkünuy kom che mapu mew, tañi müleael kom mapu mew” (Hecho 17:26). ‘Ngünechen dullintukelafi [ngümintukelabi] kiñeke che müten ti pu kakelu mew. Chuchi tuwünchengeafuy rume, llowkefi kom tati feyentunieetew tati eluwkülelu ñi femael küme dungu’ (Hecho 10:34, 35).

KUÑIWTUKUNGEAL TI MAPU

“Femngechi ta Ñidol Ngünechen elkünufi tati wentru ti anümkawe Eden mew tañi küdawafiel ka tañi ngafüllafiel” (Génesis 2:15). Chaw Dios apümkayafi “tati pu üñfitukefilu ta mapu” (Apokalipsi 11:18).

DIÑMATUNOAL PLATA KA KON-NOAL PEKAN KUDUMUWÜN MU

“Kuñiwtukuwaymün ta eymün kom diñmatun dungu mew. Che ñi mongen ta kümelkalekelay tañi nien mew müten ta fentren chemkün” (Luka 12:15). “Ngelay tamün nütramyeafiel no rume tati wesake ñiwaluwün dungu, ka chem fill wesake dungu no rume kam ta diñmatun dungu no rume” (Efesio 5:3).

NOR CHENGEAL KA KÜME KÜDAWFENGEAL

“Ayüleiñ taiñ nor chengeael kom dungu mew” (Ebrew 13:18).“Tati weñekefulu, weñewekilpe; eluwpe tañi küdawael, tañi küme küdawael kisu tañi kuwü mew” (Efesio 4:28).

KELLUAFIEL TATI PU DUAMTULELU

‘Yafülafiel tati ngañwadkülelu, tamün kelluafiel tati yafüduamkülenolu ka tamün nieael ñochi piwke itrokom che mew’ (1 Tesalonisense 5:14). “Ñi kellungeael tati pu kuñifall ka ti pu lantu domo kutrankawkülelu ñi mongen mew” (Santiaw 1:27).

Biblia elukeeiñmu kümeke ngülam, welu ka kimeltukeeiñmu chumngechi falintuafiel ka inayafiel taiñ mongen mu. Kom pu che inaniefule tüfachi kümeke ngülam taiñ ngüneduampeel, ¿doy kümelkalenoafulu am iñchiñ Mapu mu? ¡Rüfkünu llemay Biblia ñi ngülam manelfali famülke mu! Fewla kay, ¿chumngechi kelluafeymu?

CHUMNGECHI KELLUAFEIÑMU BIBLIA FAMÜLKE MU

Jesus, ti doy kim wentrungelu feypi: “Ngünechen tañi kimün kimfali ñi femkeel mew” (Matew 11:19). Feymu küme tripale inayal ti kimün, kimfalkünungeay ñi manelfalngen. Fey rakiduamafuymi chi: “Biblia, ¿chumngechi kelluafenew ñi chaftual tañi weda rupameken?”. Ngüneduamaiñ kiñe rupan dungu.

Deliaa küme mongen niekefuy ka ayüwkülefuy. Welu wedake dungu rupay. Tañi üllcha püñeñ larkey, wüdawi tañi wentru engu ka fillalerpuy. Kidu feypi: “Rüf kimwetulan chumal tañi mongen mu, newen-ngewelan ka yafüngewelan rume, fey kimnielafun ñi chumlerpual tañi mongen”.

Delia turpu ngüneduamkelafuy fente ñi rüfngen Biblia ñi feypilen: “Taiñ mongen puwkey 70 tripantu, kam doy newenkülele ti che puwafuy 80 tripantu. Welu tüfa niey fill wedake dungu ka weñangkün; fey matu rupakey ka ngewetukelaiñ” (Salmo 90:10).

Ti Biblia müna kellufi ta Delia rupamekelu wedake dungu. Küpalechi küla chillkatun mu ngüneduamaiñ Biblia ñi kellukefiel fentren che ñi chaftual tañi weda rupameken. Fey kimtukuyngün fente ñi falin-ngen ti Biblia feychi kuyfi chemkün reke taiñ nütramkapeel nga, fey trürlay kuyfike lifru mu manelfalngewenolu rupan mu chi antü. ¿Chumngelu am (chemu) trürümfalngelay? ¿Rüf niepey may Chaw Dios ñi rakiduam müten? (1 Tesalonisense 2:13).

Eymi ka kimniepelaymi ñi pichiñmaken taiñ mongen ka taiñ rupaken fentren wedake dungu. Ngañwadkülelmi tami weda rupameken mu, ¿chem yafültukukeeymu ka elukeeymu kümeke ngülam?

Ngüneduamaiñ chumngechi kelluafeymu ti Biblia tami mongen tüfachi küla dungu mu:

1. tami famentual wedake dungu.

2. tami küme elkünutual tami weda duamelkeetew.

3. tami newenküleal rupalmi wedake dungu.

Küpalechi trokiñ ngüneduamay feychi küla dungu.