Küpa papeltufuymi chi tati Biblia, welu tami rakiduamken mu tüfachi che reke, duamwelaymi chi tami femal. Fentren che afeluwün-ngelu trokikefingün ñi papeltufiel Biblia. Welu, ¿ngüneduamfulmi kay tati Biblia tami kelluaetew ñi nieal kiñe ayüfal mongen tami ayüwküleal? Ka ¿kimürpulmi kay chumngechi papeltuafiel tami afeluwnoaetew? ¿Doy eluwpeafuymi may tami ngüneduamafiel Biblia ñi feypiel?

Fentren che eluwlu ñi papeltuafiel tati Biblia, rume ayüfingün. Inaduamnge kiñeke ñi feypiel.

Esekiel nielu 20 tripantu püle, feypi: “Kuyfi, iñche felekefun kiñe che reke amulniefilu kiñe auto, welu rakiduamkenolu chew tañi amual. Welu ñi papeltufiel Biblia kellukeenew ñi nieal kiñe ayüfal mongen. Ti Biblia niey falinke ngülam ñi inayafiel fill antü”.

Kiñe üllcha domo nielu 20 tripantu püle, Frida pingelu, feypi: “Iñche lladküfemkefun. Welu ñi papeltufiel Biblia kelluenew ñi ngünewal. Femngechi doy küme yewkülen kakelu che engu, feymu fewla nien doy weni”.

Ti papay Eunice 50 tripantu nielu, feypi ti Biblia mew: “Kellunieenew ñi doy küme chengeal, tañi elkünual ñi wedake wimtun”.

Tüfachi pu che ka rume fentren che reke, tami papeltufiel Biblia kelluafeymu tami nieal doy ayüwün-ngechi mongen (Isaías 48:⁠17, 18). Fillke dungu mu kelluafeymu ta Biblia, kiñeke tüfa: 1) küme dullial tami chumal, 2) tami nieal kümeke weni, 3) tami chaftuafiel ti afeluwün-ngechi dungu, ka 4) tami kimürpuafiel ti rüf dungu Chaw Ngünechen mu, tüfa tati doy falin-ngelu. Biblia tañi ngülam Chaw Ngünechen mu küpay ka kidu turpu wülkelay wedake ngülam, feymu refalta inalayafimi.

Rume fali tami eluwal ñi papeltufiel. Feymu tami afeluwnoal ti papeltun mu ka tami ayüwmafiel, ¿chem kelluafeymu?

¿Chumngechi doy ayüwmafimi tami papeltufiel Biblia ka tami doy kelluaetew? Inaduamnge tüfachi kechu ngülam ñi kellukefiel ta fentren che.

Pepikange chew tami papeltual. Kintunge chew tami tüngküleal. Mülekilpe chem no rume tami katrütuaetew tami papeltun. Küme pelontule ti mülewe ka füshkülele, fey doy kelluaeymu tami papeltufiel.

Küme rakiduam mu papeltunge. Tati Biblia taiñ Wenu Chaw mu küpay, feymu tami kelluaetew ti papeltun, müley tami rakiduamal kiñe pichiche reke eluwkülelu ñi kimeltuetew tañi poyen chaw. Feymu tami kimeltuaetew ta Chaw Ngünechen, kiñe pülekünunge chem weda rakiduam tami niefel ti Biblia mu (Salmo 25:⁠4).

Wüne ngillatunge. Chaw Ngünechen ñi rakiduam müley ti Biblia mew, feymu duamnieiñ tañi kellun taiñ adümnieafiel. Kidu ‘eluafi tañi newen tüfey engün tañi ngillatuetew’ (Luka 11:⁠13). Tüfa kelluaeymu tami kimürpual chumngechi ñi rakiduamken ta Chaw Ngünechen. Rupalu chi antü mu, kelluaeymu tami kimafiel “Ngünechen tañi kimngekenofelchi dungu kütu” (1 Korintio 2:⁠10).

Re papeltukawlayaymi müten. Eluwlayaymi tami fentren papeltual müten. Rakiduamnienge tami papeltun mu. Ramtuwnge: “Tati che ñi papeltupefiel, ¿chumngey tañi femngen? ¿Chumngechi inayafun tüfa tañi mongen mu?”.

Rakiduamnge chem tami küpa diturpual. Tami papeltun mu, kintunge chem tami kelluaetew ti mongen mu, femngechi kümeke kimeltun entuaymi. Eluwafuymi tami doy kimal Chaw Ngünechen mu, doy küme chengeal, doy küme fütangeal kam doy küme domongeal. Fey dullinge (ngümintunge) kiñe trokiñ Biblia mu tami kelluaetew tüfachi dungu mew.⁠a

Tüfachi kechu ngülam kelluaeymu tami eluwal ti papeltun mu. Welu, ¿chumngechi doy ayüwmayafimi ti papeltun? Ti küpachi trokiñ mu müley kiñeke ngülam.

¿Chumngechi trokikefimi tami papeltufiel Biblia? ¿Afeluwkeymi? Kam ¿füshküduamelkeeymew? Chumngechi tami papeltufiel kelluaeymu tami küme duamal ka tami doy ayüwal ti papeltun mu. Inaduamaiñ chem chumal.

Kintunge kiñe Biblia manelfalngelu ka adümfalngelu. Dullilmi kiñe Biblia, adümfalngenolu kam wirintukungenolu chumngechi tati pu che ñi dunguken famülke mu, fey afeluwafuymi tami papeltufiel. Feymu kintunge kiñe Biblia adümfalngelu, fey ñi puwal tami piwke mu. Welu ka müley ñi manelfalngeal ka ñi küme rulpadungungeel.⁠a

Fillke elektroniko chemkün kelluafeymu. Famülke mu tati Biblia müley papel mu, welu kafey müleafuy tami elektroniko chemkün mu. Kiñeke Biblia papeltungeafuy internet mu, kam entungeafuy ñi papeltungeal komputador mu, tablet kam celular mew. Kiñeke nieyngün fillke kellun ñi inaduamal kakelu versikulo nüwkülelu kam trürümafiel kakelu rulpadungungeelchi Biblia. Newe ayünolmi tami papeltual, fey allkütuafuymi ti Biblia. Fentren che ayükey ñi allkütuafiel mikro mu amulelu, küchatumekelu kam kangelu küdaw mu ñi femngekeel. Tüfachi kellun mu dulliafuymi chuchi tami doy ayüfiel.

Allmalltunge ti fillke kellun tami chillkatuafiel ti Biblia. Tüfa kelluaeymu tami entual doy kümeke kimeltun tami papeltun mu. Müley fillke mapa pengelkelu ti mapu ñi nütramkangeel Biblia mu, tüfa kelluaeymu tami kimal chew ñi mülen tami papeltuel, ka tami rakiduamal chumngechi rupay ti dungu. Chem tripakelu tüfachi chillka mu kam jw.org mu, kelluafeymu tami küme inaduamafiel ti Biblia.

Fillke dungu femafuymi. Afeluwülmi tami papeltuafiel kom ti Biblia, Genesis puwal Apokalipsi mu, eluwafuymi ñi chillkatuafiel kiñe trokiñ tami ayüniefiel. Küpa kimülmi kiñe che Biblia mew nütramkangelu, chillkatuafuymi kiñeke trokiñ feychi che mu nütramkalu. Tati wichulechi dungu “Tami doy kimafiel ti Biblia, ngüneduamnge tati pu che ñi nütramkangeel tüfa mu”, pengeli epu dungu tami femafel. Kafey papeltuafuymi trokiñke dungu Biblia mu, kam chumngechi ñi rupan ti dungu. Mangeluwayiñ tami femürpual.

Tati Biblia kiñe pekan lifru no tati. Chaw Ngünechen tañi ngülam niey (2 Timotew 3:⁠16). Biblia ñi feypilen müna kelluafeiñmu, feymu feypi: “Ngünechen ñi dungu mongen dungu ka pepiluwün dungu” (Ebrew 4:⁠12). Ti Biblia epu dungu mew kümelkayafuy taiñ mongen: ngüyulkeeiñmew fill antü taiñ mongen mu, ka kellukeeiñmew taiñ kimafiel ta Chaw Ngünechen ka ñi feypikünuel (1 Timotew 4:⁠8, Santiaw 4:⁠8).

Kümelkakeeiñmu taiñ mongen. Ti Biblia kelluafeiñmew fillke falin dungu taiñ mongen mu. Wülkey kümeke ngülam tüfachi dungu mew:

• Küme yewküleal kakelu che engu (Efesio 4:⁠31, 32; 5:⁠22, 25, 28, 33).

• Taiñ küme feleal ka küme duamküleal (Proverbios 17:⁠22; Efesio 4:⁠26).

• Lif mongen yenieal (1 Korintio 6:⁠9, 10).

• Fillanoal (Proverbios 10:⁠4; 28:⁠19; Efesio 4:⁠28).⁠a

Kiñe we kurewen Asia mapu mu tuwlu, rume falintukefingu Biblia tañi ngülam. Fentren we niewlu reke, kidu engu mu küdawngefuy ñi küme yewküleal ka küme nütramkawal. Welu eluwingu ñi inayal Biblia tañi ngülam. ¿Chumngechi kellueyew tüfa? Ti wentru Vicente feypi: “Wedake dungu mülelu tayu kurewen-ngen mu, ñi papeltufiel Biblia kelluenew ñi küme elkünutuafiel piwkeyewün mu. Tayu inanieafiel Biblia ñi feypiel, doy ayüwküleyu”. Tañi domo Analu ka femngechi feypi: “Papeltufiel mu Biblia ñi inayentufalchi che kellukeeyumu. Fewla doy ayüwkülen ka ayükefiñ tayu kurewen-ngen ka tayu küpa diturpuel ti mongen mu”.

Kimafiel ta Chaw Ngünechen. Vicente nütramkalay kurewen dungu mu müten, ka feypi: “Papeltun mu ti Biblia, doy fülkonken ta Jewba mu, turpu femngechi felekelafun”. Vicente ñi feypiel rakiduamelkeeiñmu kiñe falin dungu mew: tati Biblia kelluafeymu tami doy kimafiel ta Chaw Ngünechen. Femngechi kidu tañi ngülam kelluafeymu tami mongen mu, ka weniyerpuafuymi ta Chaw Ngünechen. Fey ngüneduamaymi kidu ñi feypiel ti küpalechi antü mu, tami nierpual “tati rüfngechi mongen” turpu ñi afnoal (1 Timotew 6:⁠19). Tati Biblia müten eluafeymu tüfa.

Eluwülmi tami papeltuafiel ti Biblia ka afeluwnolmi, fey küme elkünutuñmayaeymu tami mongen ka kimürpuafimi ta Chaw Ngünechen. Welu papeltufilmi ti Biblia, kontupayafeymu chi fillke ramtun. Femngechi rupalmi, rakiduamnge ñi femün kiñe ülmen funsionario Etiopia mu tuwlu, mülelu 2.000 tripantu kuyfi mu. Kidu niefuy fentren ramtun Biblia mu. Fey Felipe, kiñe wentru inaniefilu ta Jesus ka adümniefilu ti Biblia, ramtueyew: “¿Ngüneduamfimi kay tami chillkatupeel?”. Fey ti funsionario feypifi: “¿Chumngechi am kimafun, ngenolu iney rume ñi feypiafetew ñi chem pifel ta tüfachi dungu?”.⁠b Fey eluwi ñi kimeltuaetew (Hecho 8:⁠30, 31, 34). Ka femngechi eymi doy küpa kimülmi Biblia mu, mangeluwayiñ tami feypintukual kiñe chillkatun Biblia taiñ pagina internet www.jw.org mu, kam wirintukuafuymi tati ngünenieelchi ruka doy püllelelu eymi mu ñi feypiel tüfachi chillka. Kafey feypiafuymi kiñe Dungukelu Iney Ngen Jewba tami pemeaetew, kam amuafuymi kiñe Trawünwe Ruka tami lof mew. ¿Chumngelu papeltunoafulu eymi ti Biblia, fey tami eluaetew kiñe doy küme mongen?