আপোনাৰ প্ৰচাৰ এলেকাত কাণেৰে শুনাত অক্ষম ব্যক্তিসকলক বিচাৰি উলিয়াবলৈ প্ৰচেষ্টা কৰক
১ যিহোৱাই সকলোকে আমন্ত্ৰণ জনাই এইদৰে কৈছে: “আহাঁ; . . . যিজনে ইচ্ছা কৰে, তেওঁ বিনামূল্যে জীৱন-জল গ্ৰহণ কৰক।” (প্ৰকা. ২২:১৭) যিহোৱাৰ সাক্ষীসকলৰ সংখ্যাত বৃদ্ধি হোৱা একাংশ ব্যক্তিসকল হৈছে কাণেৰে শুনাত অক্ষম। তেওঁলোকেও সেই আমন্ত্ৰণৰ প্ৰতি সহাৰি জনাইছে। যাৰ পৰিণামস্বৰূপে, সংযুক্ত ৰাষ্ট্ৰত থকা শাখা কাৰ্য্যলয়ৰ অন্তৰ্গত যোৱা ১৩ বছৰৰ ভিতৰত ২৭ খন সঙ্কেতিক ভাষাৰ মণ্ডলী আৰু প্ৰায় ৪৩ টা সঙ্কেতিক ভাষাৰ গ্ৰুপ স্থাপন কৰা হৈছে।
২ পৃথিৱীৰ বহুতো দেশত সঙ্কেতিক ভাষাৰ মণ্ডলী আৰু গ্ৰুপসমূহে তেওঁলোকৰ প্ৰচাৰ এলেকাত থকা কাণেৰে শুনি নোপোৱা বা কাণেৰে শুনাত অক্ষম হোৱা ব্যক্তিসকলক বিচাৰি উলিয়াবলৈ চেষ্টা কৰিছে আৰু এই প্ৰচেষ্টাত বৃহতভাৱে সফলতা পোৱা গৈছে। আমাৰ দেশ অৰ্থাৎ ভাৰততো তেনে লাখ সংখ্যক লোক আছে যিসকলে এতিয়াও শুভবাৰ্ত্তাৰ বিষয়ে একো জনা নাই। গতিকে তেনে এলেকাবোৰত সকলো প্ৰচেষ্টাৰ সৈতে কাৰ্য্য কৰাটো কিমান যে উল্লেখনীয়!
৩ আপুনি কেনেকৈ সহায় কৰিব পাৰে? আপুনি কেতিয়াবা সাৰ্বজনিক ক্ষেত্ৰবোৰত লোকসকলে সংকেতিক ভাষাত কথা কোৱা দেখিছেনে? আপোনাৰ কৰ্ম্মক্ষেত্ৰ বা স্কুলত, কাণেৰে শুনি নোপোৱা ব্যক্তি থকা এনে এটা পৰিয়ালৰ বিষয়ে জানেনে? আপুনি নিজৰ দৈনন্দিন কাৰ্য্যৰ সৈতে শুনাত অক্ষম হোৱা ব্যক্তিসকলক বিচাৰি উলিয়াৰ প্ৰতি সজাগ হওঁক। কিন্তু আপুনি কেনেকৈ নিশ্চিত হʼব যে তেওঁলোকে ৰাজ্যৰ বাৰ্ত্তাৰ প্ৰতি সঠিক মনোবৃত্তি দেখুৱাব?
৪ তেনে লোকসকলক সাক্ষী দিয়া: এগৰাকী অগ্ৰগামী ভনীয়ে তাইৰ প্ৰচাৰ এলেকাত বহুতো কাণেৰে শুনি নোপোৱা ব্যক্তিসকলৰ সৈতে সাক্ষাৎ কৰে। এদিনাখন তাই নিজৰ ঘৰৰ কাষতে থকা চুপাৰ মাৰ্কেটত বস্তু কিনি থাকোঁতে এগৰাকী কাণেৰে শুনি নোপোৱা মহিলাই এটুকুৰা কাগজত বস্তু এটাৰ নাম লিখি তাক বিচাৰি উলিয়াবলৈ সহায় বিচৰা দেখিলে। সেই অগ্ৰগামী ভনী গৰাকীয়ে কাণেৰে শুনাত অক্ষম হোৱা মহিলাগৰাকীক তাইক আৱশ্যক হোৱা বস্তুটো বিচাৰি উলিয়াবলৈ সহায় কৰিলে। তাৰ পাছত সেই ভনীগৰাকীয়ে প্ৰচাৰ এলেকাত লগ পোৱা কাণেৰে শুনাত অক্ষম হোৱা ব্যক্তিসকলক সহায় কৰিবলৈ সঙ্কেতিক ভাষা শিকিবলৈ ইচ্ছা প্ৰকাশ কৰি এটুকুৰা কাগজত লিখি কাগজটুকুৰা মহিলাগৰাকীক দিলে। তেতিয়া সেই মহিলাগৰাকীয়ে কাগজত লিখি অগ্ৰগামী ভনীগৰাকীক এইদৰে শুধিলে: “আপুনি কিয় কাণেৰে শুনাত অক্ষম হোৱা ব্যক্তিসকলক সহায় কৰিব বিচাৰিছে?” তেতিয়া ভনীগৰাকীয়ে উত্তৰত এইদৰে লিখিলে: “মই এগৰাকী যিহোৱাৰ সাক্ষী হোৱাৰ বাবে মোৰ এলেকাত থকা কাণেৰে শুনি নোপোৱা ব্যক্তিসকলে বাইবেলৰ বিষয়ে শিকাত সহায় কৰিবলৈ বিচাৰিছোঁ। যদি আপুনি মোক সঙ্কেতিক ভাষা শিকাই, তেতিয়াহʼলে মই আপোনাক বাইবেলৰ বিষয়ে জানিবলৈ সহায় কৰিবলৈ পাই আনন্দিত হʼম।” পাছলৈ ভনীগৰাকীয়ে এইদৰে কৈছিল: “যেতিয়া সেই মহিলাগৰাকীয়ে মোক ‘ঠিক আছে,’ বুলি কোৱাত মই কিমান যে আনন্দিত হৈছিলোঁ তাৰ বিষয়ে আপুনি কল্পনা কৰিব নোৱাৰে।” সেই ভনীগৰাকীয়ে মহিলাগৰাকীৰ ওচৰলৈ ছয় সপ্তাহ ধৰি প্ৰত্যেক সন্ধ্যাই গৈছিল। এইদৰে ভনী গৰাকীয়ে সঙ্কেতিক ভাষা শিকিলে আৰু সেই মহিলাগৰাকীয়েও সত্যৰ বিষয়ে শিকিল আৰু পাছলৈ বাপ্তিষ্মা লৈ এগৰাকী যিহোৱাৰ সাক্ষী হয়!
৫ যদি আপোনাৰ মণ্ডলীত কাণেৰে শুনি নোপোৱা ব্যক্তিসকলক আধ্যাত্মিকৰূপে সহায় কৰিবলৈ তেনে কোনো ভাই বা ভনী নাই তেনেহʼলে কি কৰিব পাৰা যায়? আপুনি তেনে ব্যক্তিসকলক কেনেকৈ সহায় কৰিব পাৰে? আপুনি কিয় তেনে ব্যক্তিসকলৰ ঘৰলৈ গৈ পৰিয়ালৰ আন সদস্যসকলক পুনৰ সাক্ষাৎ কৰিবলৈ চেষ্টা নকৰে? তেওঁলোকৰ পৰা আপুনি তেওঁলোকে ব্যৱহাৰ কৰা স্থানীয় সঙ্কেতিক ভাষাৰ বিষয়ে জানিবলৈ চেষ্টা কৰক। কিছুমান প্ৰচাৰকে স্থানীয় সঙ্কেতিক ভাষা শিকি তেনে ব্যক্তিসকলক আধ্যাত্মিকৰূপে সহায় কৰিবলৈ আগবাঢ়ি আহিছে। (পাঁচ. ১৬:৯, ১০) আমি কৰা আন্তৰিক চেষ্টা আৰু যিহোৱাৰ আশীৰ্ব্বাদৰ দ্বাৰা বহুতো উত্তম পৰিণাম লাভ কৰিবলৈ সক্ষম হʼব পাৰোঁ।
৬ গতিকে আপুনি আপোনাৰ প্ৰচাৰ এলেকাত কাণেৰে শুনি পোৱাত অক্ষম ব্যক্তিসকলক বিচাৰি উলিয়াবলৈ চেষ্টা কৰাৰ যোগেদি তেওঁলোকক বিনামূল্যে জীৱনৰ-জল গ্ৰহণ কৰাত সহায় কৰিব পাৰে।—মথি ১০:১১.