এই কাপোৰজোৰে মোক শুৱাইছেনে?

প্ৰথম ভূল: মিডিয়াত দেখুৱা ফেচনৰ অনুসৰি জীৱন-যাপন কৰা।

তেৰেচা নামৰ এগৰাকী কিশোৰীয়ে এইদৰে কৈছে: “এটা ফেচনক লৈ ইমানবোৰ বিজ্ঞাপন দিয়ে যে সেইবোৰক চাই-চাই কেতিয়াবা-কেতিয়াবা মই সেইবোৰৰ প্ৰতি আকৰ্ষিত হৈ যাওঁ। যেতিয়া এটা বিশেষ সাজ-পোছাক পিন্ধা সেই লোকসকলক বিজ্ঞাপনবোৰত বাৰে-বাৰে দেখুৱা হয়, তেতিয়া তেনে সাজ-পোছাক নিপিন্ধাকৈ থাকিব নোৱাৰোঁ।”

এনে বিজ্ঞাপনবোৰৰ পৰা মাত্ৰ ছোৱালীবোৰে আকৰ্ষিত নহয়। দি এভ্ৰিথিং গাইড টু ৰাইজিং এডʼলেচেন্ট বইচ্‌ (ইংৰাজী) নামৰ কিতাপখনে এইদৰে কৈছে: “ছোৱালীবোৰৰ দৰে লʼৰাবোৰো তেনেধৰণৰ ফেচনবোৰৰ জালত আকৰ্ষিত হয়। ব্যৱসায় জগতত বিজ্ঞাপনবোৰ এনেদৰে প্ৰস্তুত কৰা হয় যাতে সেইবোৰ চাই সৰু-সৰু লʼৰা-ছোৱালীবোৰো আকৰ্ষিত হয়।”

কি কৰিলে ভাল হʼব: বাইবেলত কোৱা হৈছে: “নিৰ্ব্বোধ লোকে সকলো কথা পতিয়ায়; কিন্ত্ত বুদ্ধিমান লোকে নিজ ভৰিৰ খোজ বিবেচনা কৰে।” (হিতোপদেশ ১৪:১৫) যেতিয়া আপুনি কোনো বিজ্ঞাপন চাই, সেই সময়ত এই সিদ্ধান্ত মনত ৰাখি তাৰ প্ৰতি সঠিকৰূপে বিবেচনা কৰক। উদাহৰণস্বৰূপে, যেতিয়া কোনো সাজ-পোছাকৰ বিষয়ে বিজ্ঞাপনে দেখুৱাই যে তেনেধৰণৰ কাপোৰ পিন্ধিলে আপোনাক “হট্‌” বা “চেক্সি” লাগিব, তেনেহʼলে নিজকে সোধক:

• ‘মোৰ ফেচনৰ পৰা প্ৰকৃততে কোনে লাভৱান হৈছে?’

• ‘এনেধৰণৰ কাপোৰ পিন্দিলে আনে মোক কি বুলি ভাৱিব?

• ‘মই বেলেগ ধৰণৰ জীৱন-যাপন কৰোঁনে বা মোৰ পৰিচয়নো কি?’

ফেচনৰ বিষয়ে পৰামৰ্শ: এটা ফেচনৰ বিষয়ে দিয়া বিজ্ঞাপন আৰু আন মিডিয়াবোৰত দিয়া সেই ফেচনৰ বিষয়ে জনোৱা কথাবোৰক সাৱধানে এসপ্তাহৰ বাবে নিৰিক্ষণ কৰক। তেওঁলোকে কেনেধৰণৰ সাজ-পোছাক পিন্ধিবলৈ উৎসাহিত কৰে? এই বিজ্ঞাপনবোৰে চতুৰতাৰে আপোনাক এইটো অনুভৱ কৰাই নে যে আপুনি সেই ফেচনৰ মতে চলাটো অতি আৱশ্যক? কাৰেন নামৰ এগৰাকী কিশোৰীয়ে এইদৰে কয়: “বিজ্ঞাপনে আমাক ভাৱিবলৈ বাধ্য কৰাই যে, আমি যাতে দামী-দামী কাপোৰ পিন্ধোঁ, আনতকৈ ধুনীয়া দেখোঁ আৰু নিজৰ সৌন্দৰ্য্যক লৈ অভিমান কৰোঁ। এই বিজ্ঞাপন বিক্ৰেতাসকলে সহজতে ডেকা যুৱক-যুৱতীসকলক নিজৰ ফান্দত পেলায়।”

দ্বিতীয় ভূল: আনৰ দৰে নতুন ফেচনবোৰ গ্ৰহণ কৰা।

মানুৱেল নামৰ এজন কিশোৰে এইদৰে কয়, “যেতিয়া কোনো এক বিশেষ কাপোৰৰ ষ্টাইল প্ৰচলন হয় তেতিয়া সকলোৱে তেনে ষ্টাইলৰ কাপোৰ পিন্ধিবলৈ আৰম্ভ কৰে। যদি আপুনি তেনেধৰণৰ কাপোৰ নিপিন্ধে, লোকসকলে আপোনাক ইতিকিং কৰিব।” আন্না নামৰ কিশোৰগৰাকীও এই কথাত সন্মত হৈ এইদৰে কৈছে, “লোকসকলে কোনো এটা ষ্টাইলক এইবাবে গ্ৰহণ নকৰে যে তেওঁলোকে ইয়াক বহুত ভাল পাই, কিন্তু তেওঁলোকে যাতে আনৰ পৰা পৃথক নেদেখে এইবাবেহে তেনে কৰে।”

কি কৰিলে ভাল হʼব: বাইবেলত কোৱা হৈছে: “তোমালোকে জগতৰ অনুৰূপ নহবা।” (ৰোমীয়া ১২:২) এই সিদ্ধান্ত মনত ৰাখি, আপুনি কাপোৰৰ বাচঁনি কৰাৰ সময়ত নিজকে সোধক:

• ‘এই কাপোৰজোৰ কিনিবলৈ মোক কিহে উৎসাহিত কৰিলে?’

• ‘ব্ৰেণ্ডেড কাপোৰ পিন্ধাটো মোৰ বাবে কিমান আৱশ্যক?’

• ‘কাপোৰৰ যোগেদি মই আনক নিজৰ ফালে আকৰ্ষিত কৰিব বিচাৰিছোঁ নে?’

ফেচনৰ বিষয়ে পৰামৰ্শ: এই ফেচনটো এতিয়া বহুত প্ৰচলিত (সকলোৱে পিন্ধে) বা এইটো পুৰণি হৈ গʼল (কোনেও নিপিন্ধে)। এইদৰে ভৱাৰ পৰিৱৰ্তে আপুনি এইটো ভাৱক যে তেনেধৰণৰ কাপোৰ পিন্ধিলে এইটো প্ৰমাণিত হʼবনে যে আপোনাৰ কাপোৰ বাচঁনিবোৰ সিদ্ধান্তৰ অনুসৰি সঠিক আৰু আপুনি ইয়াত আনন্দিত। যদি আপুনি নিজৰ সাজ-পোছাকৰ বাচঁনিক লৈ সন্তুষ্ট তেনেহʼলে আপুনি কেতিয়াও চিন্তিত নহʼব যে আনে আপোনাৰ বিষয়ে কি ভাৱে।