যোচিয়াৰ বন্ধু

ভাল কাম কৰা ইমান সহজ বুলি তুমি ভাবানে?— বহুতোলোকে ভাবে যে ই সহজ নহয়। বাইবেলে উল্লেখ কৰিছে যে যোচিয়া নামৰ এজন সৰু লʼৰাৰ বাবেও এনে কৰা সহজ নাছিল। কিন্তু তেওঁৰ কিছুমান বন্ধুৱে তেওঁক সহায় কৰিছিল। আহাঁ, আমি এতিয়া যোচিয়া আৰু তেওঁৰ বন্ধুসকলৰ বিষয়ে কিছু কথা শিকোঁ।

যোচিয়াৰ পিতৃৰ নাম আছিল আমোন আৰু তেওঁ যিহূদাৰ ৰজা আছিল। তেওঁ এজন দুষ্ট ৰজা আছিল আৰু মূৰ্ত্তিপূজা কৰিছিল। পিতৃৰ মৃত্যুৰ পাছত যোচিয়াই যিহূদাৰ ৰজা হৈছিল। সেই সময়ত তেওঁৰ বয়স মাত্ৰ আঠ বছৰ আছিল। তুমি কি ভাবা, নিজৰ পিতৃৰ দৰে যোচিয়াও দুষ্ট আছিল নেকি?— তেওঁ দুষ্ট নাছিল।

যোচিয়াই সৰুৰেপৰা যিহোৱাৰ বাক্য পালন কৰিব বিচাৰিছিল। সেইবাবে, কেৱল যিহোৱা ঈশ্বৰক ভালপোৱা লোকসকলৰ লগতহে তেওঁ বন্ধুত্ব কৰিছিল। যোচিয়াৰ বন্ধুসকলেও যি ভাল তাকে কৰিবলৈ সহায় কৰিছিল। যোচিয়াৰ বন্ধুকেইজন কোন আছিল বাৰু?

যোচিয়াৰ এজন বন্ধুৰ নাম হৈছে চফনিয়া আৰু তেওঁ এজন ভৱিষ্যতবক্তা আছিল। চফনিয়াই যিহূদাৰ লোকসকলক সতৰ্কবাণী কৰিছিল যে যদি তেওঁলোকে মূৰ্ত্তিপূজা কৰে, তেনেহʼলে তেওঁলোকৰ বিনাশ হʼব। যোচিয়াই চফনিয়াৰ কথা শুনিছিল। তেওঁ মূৰ্ত্তিপূজা কৰাৰ পৰিৱৰ্তে, যিহোৱা ঈশ্বৰক উপাসনা কৰিছিল।

যোচিয়াৰ আন এজন বন্ধুৰ নাম হৈছে যিৰিমিয়া। তেওঁ যোচিয়াৰ সমবয়সৰ আছিল। তেওঁলোক দুয়ো ভাল বন্ধু আছিল। সেইবাবে, যোচিয়াৰ মৃত্যুৰ পাছত যিৰিমিয়াই তেওঁৰ স্মৃতিত এক বিশেষ গীত ৰচিছিল। ঈশ্বৰৰ বাক্য পালন কৰিবলৈ আৰু তেওঁৰ দৃষ্টিত যি ভাল তাকে কৰিবলৈ যোচিয়া আৰু যিৰিমিয়াই এজনে-আনজনক সহায় কৰিছিল।

যোচিয়াৰ উদাহৰণৰপৰা তুমি কি শিকিলা?— সৰুৰেপৰা যোচিয়াই যি ভাল তাকে কৰিব বিচাৰিছিল। কেৱল যিহোৱা ঈশ্বৰক ভালপোৱা লোকসকলৰ লগতহে যে বন্ধুত্ব কৰা উচিত, এই বিষয়ে যোচিয়াই ভালদৰে জানিছিল। গতিকে তুমিও যিহোৱা ঈশ্বৰক ভালপোৱা আৰু যি ভাল তাকে কৰিবলৈ সহায় কৰা লোকসকলৰ লগত বন্ধুত্ব কৰা উচিত।