তীমথিয়ে লোকসকলক সহায় কৰিব বিচাৰিছিল

তীমথিয় এজন ডেকা লʼৰা আছিল আৰু তেওঁ লোকসকলক সহায় কৰি ভাল পাইছিল। লোকসকলক সহায় কৰিবলৈ তেওঁ বিভিন্ন ঠাইলৈ যাত্ৰা কৰিছিল। সেইবাবে, তেওঁৰ জীৱন ৰোমাঞ্চকৰ আছিল। তুমি ইয়াৰ বিষয়ে জানিব বিচাৰানে?—

তীমথিয়ে লুস্ত্ৰা নামৰ নগৰখনত ডাঙৰ-দীঘল হৈছিল। আইতা লোয়ী আৰু মাতৃ উনীকীয়ে তেওঁক সৰুৰেপৰা যিহোৱা ঈশ্বৰৰ বিষয়ে শিক্ষা দিছিল। ডাঙৰ হোৱাৰ লগে লগে তীমথিয়ে লোকসকলক যিহোৱা ঈশ্বৰৰ বিষয়ে জানিবলৈ সহায় কৰিব বিচাৰিছিল।

তীমথিয়ৰ ডেকা বয়সতে, পৌলে তেওঁৰ লগত বিভিন্ন ঠাইত ঘোষণা কাৰ্য্য কৰিবলৈ লগ ধৰিছিল। তীমথিয়ে লোকসকলক সহায় কৰিবলৈ পৌলৰ লগত যাবলৈ সন্মত হৈছিল।

তীমথিয়ে মাকিদনীয়া দেশৰ থিচলনীকী নামৰ নগৰখনত পৌলৰ লগত ঘোষণা কাৰ্য্য কৰিবলৈ গৈছিল। থিচলনীকী নগৰখন পাবলৈ প্ৰথমে তেওঁলোকে বহুদূৰ খোজকাঢ়ি যাবলগীয়া হৈছিল। ইয়াৰ পাছত তেওঁলোকে এখন জাহাজেৰে যাত্ৰা আৰম্ভ কৰিছিল। অৱশেষত তেওঁলোকে থিচলনীকীত উপস্থিত হৈছিল আৰু লোকসকলক যিহোৱা ঈশ্বৰৰ বিষয়ে জানিবলৈ সহায় কৰিছিল। কিন্তু কিছুমান লোকে পৌল আৰু তীমথিয়ৰ কাৰ্য্যক ভাল নাপাইছিল আৰু তেওঁলোকক ক্ষতি কৰিব বিচাৰিছিল। সেইবাবে, পৌল আৰু তীমথিয়ে সেই নগৰখন ত্যাগ কৰি অন্য ঠাইলৈ ঘোষণা কাৰ্য্য কৰিবলৈ গুচি গৈছিল।

কেইমাহমানৰ পাছত, পৌলে থিচলনীকীত থকা ভাই-ভনীসকলৰ পৰিস্থিতিৰ বিষয়ে খবৰ লʼবলৈ তীমথিয়ক পঠিয়াইছিল। সেই ভয়ানক নগৰখনলৈ পুনৰ যোৱাৰ বাবে সাহসৰ প্ৰয়োজন আছিল। কিন্তু তীমথিয়ে তালৈ গৈছিল, কাৰণ তেওঁ ভাই-ভনীসকলৰ বিষয়ে চিন্তা কৰিছিল। তাৰপৰা উভতি আহি তীমথিয়ে পৌলক জনাইছিল যে থিচলনীকীৰ ভাই-ভনীসকলে ভালে-কুশলে আছে।

বহুবছৰ ধৰি তীমথিয় আৰু পৌলে একেলগে ঘোষণা কাৰ্য্য কৰিছিল। পৌলে এবাৰ লিখিছিল যে তীমথিয়েই হৈছে এজন যোগ্য ব্যক্তি, যিয়ে মণ্ডলীৰ লোকসকলক সহায় কৰিব পাৰে। তীমথিয়ে যিহোৱা ঈশ্বৰ আৰু লোকসকলক ভাল পাইছিল।

তুমিও লোকসকলক ভালপোৱা নে? তুমি তেওঁলোকক যিহোৱা ঈশ্বৰৰ বিষয়ে শিকাব বিচাৰানে?— যদি এইদৰে কৰা, তেনেহʼলে তীমথিয়ৰ দৰে তুমিও এক ৰোমাঞ্চকৰ আৰু আনন্দপূৰ্ণ জীৱন লাভ কৰিব পাৰিবা।