RUT

1 Juezanakajj+ juzgapkäna uka tiemponjja, manqʼat pistʼañaw Israel markan utjäna. Ukapachaw mä chachajj warmipampi pä yoqanakapampejj Judá oraqenkir Belén+ markat sarjjapjjäna. Jupanakajj Moab+ oraqenkir camponakaruw extranjerjam jakir sarjjapjjäna. 2 Uka chachajja Elimélec* satänwa, warmipajj Noemí* satarakïnwa, yoqanakapasti Mahlón,* Kilión* satäpjjarakïnwa. Jupanakajj Efrata markatäpjjänwa, mä arunjja Judá oraqenkir Belén markatäpjjänwa. Moab oraqenkir camponakar purisajja, ukanwa jakjjapjjarakïna.

3 Mä qhawqha tiempotjja, Noemí warmin Elimélec chachapaw jiwjjäna. Noemí warmisti pä yoqapampikiw quedasjjäna. 4 Tiempompejja yoqanakapajj Moab oraqenkir warminakampiw casarasjjapjjäna, maynejj Orpá satänwa, maynisti Rut+ satarakïnwa. Jupanakajj niya tunka maranakaw ukan jakapjjäna. 5 Qhepatjja Mahlón, Kilión sat yoqanakapajj jiwjjapjjarakïnwa. Ukhamasti Noemí warmejj janiw chachanëjjänti ni yoqanakanëjjänsa. 6 Ukatwa yojjchʼanakapampejj Moab oraqenkir camponakat Belén markapar kuttʼawayjjäna. Jupasti Jehová Diosajj markapar manqʼañanak* churasin wasitat bendisjjatapwa istʼäna.

7 Pä yojjchʼanakapampi jakkäna uka markatwa Noemí warmejj sarjjäna. Judá oraqer kuttʼañatak thak sarkasajja, 8 yojjchʼanakaparojj akham sänwa: “Sarjjapjjam, kuttʼjjapjjam, mamanakaman utapar kuttʼjjapjjam. Kunjamtï jumanakajj jiwir yoqanakajarusa nayarusa munasiñat jan jaytjasirïpjjatam uñachtʼayapkistajja, ukhamarak Jehová Diosajj jumanakar uñachtʼaypan.+ 9 Jehová Diosajj sapa mayni jumanakar mä esposo churpan, ukhamat sum jakasipjjañamataki”+ sasa. Ukatsti jupanakarojj jampʼattʼänwa, yojjchʼanakapasti walpun jachapjjarakïna. 10 Jupanakajj kutin kutiniw akham sapjjarakïna: “Janiwa, janiw kuttʼapkäti. Nanakajj jumamp chikaw markamar jakir sarapjjä” sasa. 11 Noemí warmisti sarakïnwa: “Kuttʼjjapjjam wawanaka. ¿Kunatarak nayamp chik sarapjjasmasti? Nayajj janiw jukʼamp yoqanakanëjjäti, ukhamat jupanakamp casarasipjjañamataki.+ 12 Kuttʼjjapjjam wawanaka. Sarjjapjjam, wasitat casarasiñatakejj wali taykäjjtwa. Jichha arumpach chachanëjjasas wawanakanïrista ukasa, 13 ¿jupanakan jilsuñapkamat suyapjjasma? ¿Jupanak laykut wasitat jan casarasipkasma? Janiw wawanaka. Jehová Diosajj naya contrawa, kunjamsa ukajj jumanakar jan waltʼayapjjtam uk amuyasajj walpun llakista”+ sasa.

14 Yojjchʼanakapajj wasitat wal jachapjjäna. Ukatjja Orpá warmejj suegrapar jampʼattʼasajj sarjjänwa. Ukampis Rut warmejj janiw suegrapar jaytjkänti. 15 Noemí warmisti sänwa: “¡Uñtam! Yojjchʼa masimajj markaparuw kuttʼjje, diosanakaparuw kuttʼjjaraki. Jumajj jupamp chik kuttʼjjarakim” sasa.

16 Rut warmejj sarakïnwa: “Jan jumar jaytjañ mayistati, nayajj jumamp chikaw saräjja. Kawkirutï sarkäta ukaruw saräjja, kawkjantï iktʼkäta ukjanwa iktʼarakëjja. Markamajj markajäniwa, Diosamasti Diosajarakïniwa.+ 17 Kawkjantï jumajj jiwkäta ukjanwa nayajj jiwarakëjja, ukjanwa imapjjarakitani. Jiwañakiw jumamp nayampirojj jaljtayistani, janitï ukhamäkanejja Jehová Diosajj castiguitpan” sasa.

18 Noemisti Rut warmin jupamp chika wal sarañ munatap amuyasajja, janiw juparojj utamar kuttʼjjam sisjjänti. 19 Ukatsti jupanakajj Belén+ markar puriñkam sarasipkakïnwa. Uka markar puripjjäna ukhajja, markpachaw jupanakar uñjasajj wal musparapjjäna, warminakajj akham sapjjänwa: “¿Janit jupajj Noemí warmïki?” sasa. 20 Jupajj akham sasaw warminakar säna: “Jan Noemí* sapjjestati. Antisas Mara* sapjjeta, Taqe Chʼamani Diosajj llakinakampi nayar aynachtʼayatap layku.+ 21 Sarjjayät ukhajj taqe kunanïyätwa, jichhasti Jehová Diosajj chʼusa amparak kuttʼayanjjetu. ¿Kunatsa Noemí sapjjesta? Taqe Chʼamani Jehová Diosajj naya contrawa, jupaw llakinakan uñjasiyitu”+ sasa.

22 Ukhamwa Noemí warmejj Moab oraqenkir Rut yojjchʼapampejja, Moab+ oraqenkir camponakat kuttʼjjäna. Cebada yawthapiñ+ qalltasipkäna uka tiemponwa jupanakajj Belén markar puripjjäna.

2 Noemí warminjja, Elimélec chachap toqet mä familiarapaw utjäna. Jupajj Boaz+ satänwa, wali qamiri jaqerakïnwa.

2 Moabita Rut warmejj Noemí suegrapar akham sänwa: “Mirä amp suma, yapunakar khitakitaya, ukhamat yawirinakan qhepap sarasajj yapun jalaqtat grano puyanak* apthapiñajataki,+ jupanakajj khuyaptʼayapjjetaniwa” sasa. Noemí warmejj sarakïnwa: “Saraskakim wawa” sasa. 3 Ukatwa Rut warmejj yapunakar saräna, yawirinakan qhepap sarasaw yapun jalaqtat grano puyanak* apthapirakïna. Ukhamatwa Elimélec+ chachan Boaz+ sat familiarapan yapuparojj jan yatisin purïna. 4 Ukapachaw Boaz chachajj Belén markat purinisajj yawirinakapar akham säna: “Jehová Diosajj jumanakar yanaptʼpan”* sasa. Yawirinakapasti sapjjarakïnwa: “Jehová Diosajj jumar bendispan” sasa.

5 Ukatjja Boaz chachajj akham sasaw yawirinakjjar encargatäkäna uka waynarojj jisktʼäna: “¿Khiti familiat jutiris uka tawaq warmejja?” sasa. 6 Yawirinakjjar encargatäkäna uka waynajj sarakïnwa: “Uka tawaq warmejj Moab+ oraqetawa, Noemí warmimp chikaw Moab+ oraqenkir camponakat kuttʼani. 7 ‘Mirä, ¿yawirinakan jalaqtayat grano puyanak* pallthapisiskiristti?’+ sasaw jupajj jisktʼitu. Alwat jichhakamajj jan samartʼasaw trabajiraki. Jichhakiw chʼiwirtʼasiñ cheqar mä rat qontʼasi” sasa.

8 Ukatjja Boaz chachajj akham sasaw Rut warmir säna: “Wawa, istʼita. Grano puyanak* pallirejj jan yaqha yapunakar saramti, ni yaqha cheqarus saramti. Nayatak trabajipki uka tawaqonakat jan jitheqtamti.+ 9 Kawkinsa jupanakajj yawipjje uk uñjäta, ukatjja jupanakan ukaruw sararakïta. Trabajir waynanakarojj jumar jan kamsapjjañapatakiw* mayta. Umat pharjätam* ukhajja, uma wakullanakajj uchatäki ukaruw saräta, trabajir waynanakajj uchapkani uka umat umtʼarakïta” sasa.

10 Uk istʼasasti Rut warmejj qonqortʼasïnwa, oraqer puriñkam altʼasisajj akham sarakïnwa: “Nayajj yaqha markankirïtwa. ¿Kunatarak nayat khuyaptʼayasistasti? ¿Kunatsa nayat llakisirakta?”+ sasa. 11 Boaz chachajj jupar sarakïnwa: “Chachaman jiwatapat kunanaksa suegram laykojj lurta, kunjamsa jan uñtʼat markar jutañatakejj tatamsa, mamamsa, nasïwi oraqemsa jaytanta ukanak taqpach yatiyapjjetu.+ 12 Ukham luratamat Jehová Diosajj jumar bendispan,+ Israel markan Jehová Diosapat phoqatpach pago katoqarakim, jupampi jarkʼaqatäñatakiw* juttajja”+ sasa. 13 Rut warmejj sarakïnwa: “Tata, nayarojj wali khuyapayasiñampiw uñjistajja, janis servirimäkstjja jumajj mä servirimarjamaw suma arunakamp* chuymachtʼistajja” sasa.

14 Manqʼasiñ horasajja, Boaz chachajj akham sasaw Rut warmir säna: “Jutam, tʼantʼa manqtʼasim, tʼantʼamjja vinagrer chilltarakim” sasa. Jupasti iyaw sasaw yawirinakamp chik qontʼasïna. Ukatjja Boaz chachajj grano jampʼi wajjtʼäna. Jupasti katoqtʼasisajj sistʼasiñkamaw manqtʼasirakïna, mä jukʼsa jiltʼayarakïnwa. 15 Grano puyanak* pallthapiñatak+ sartkäna ukhajja, Boaz chachajj jupatak trabajir waynanakarojj akham sänwa: “Yawthapipkta uka puyanak taypit pallthapisiskpan, janiw jarkʼapjjätati.+ 16 Jumanakajj yawthapipkta uka grano puyanakat* jiltʼayarapipjjapunim, jupan pallthapisiñapataki. Jupar jarkʼañatakejj janiw kunsa sapjjätati” sasa.

17 Rut warmisti, jaypʼukamaw grano puyanak* pallthapïna.+ Pallthapkäna uka grano puyanak jawqʼsüna ukhajja, cebadajj niya 13 kilonakaw* pesäna. 18 Ukatjja cebada apjjarusisajj markaruw sarjjäna, kuntï pallthapkäna ukwa suegrapar uñachtʼayäna. Rut warmisti sistʼasiñkam manqtʼaskäna uka jiltʼwa suegrapar churarakïna.+

19 Suegrapajj akham sasaw jupar jisktʼäna: “¿Kawkinsa jichhürojj grano puyanak* pallthapinta? ¿Kawkinsa trabajinta? Jumat khuyaptʼayasir jaqejj bendisitäpan”+ sasa. Rut warmejj khititakis trabajïna ukjja, akham sasaw yatiyäna: “Jichhürojj Boaz sat chachatakiw trabajinta” sasa. 20 Ukatsti Noemí warmejj Rut yojjchʼaparojj akham sänwa: “Jakirinakarus jiwirinakarus munasiñat jan jaytjasirïtap uñachtʼayki uka Jehová Diosay uka chachar bendispan”+ sasa. Ukatjja saskakïnwa: “Uka chachajj familiarasawa,+ juparuw llakinakasan yanaptʼañapajj waktʼarakispa”*+ sasa. 21 Moabita Rut warmejj akham sänwa: “Uka chachajj akham sarakituwa: ‘Yapunakaj apthapiñ tukuyapkani ukhakamajja, nayatak trabajirinakamp chik quedasiskakim’+ sasa”. 22 Noemisti Rut yojjchʼaparojj akham sänwa: “Wawa, jupatak trabajiri tawaqonakamp chik saraskakim, yaqha yapunakanjja janiw waltʼayapkiristamti” sasa.

23 Rut warmisti Boaz chachatak trabajir tawaqonakat janiw jitheqtkänti, cebadampi trigompi yawthapiñ tukuyañkamaw grano puyanak* pallthapïna.+ Suegrapamp chikaw jupajj jakaskarakïna.+

3 Noemí suegrapajj akham sasaw Rut yojjchʼapar säna: “Wawa, nayaw mä chacha thaqarapïma,+ ukhamat sum jakasiñamataki. 2 Boaz chachajj familiarasawa.+ Jupatakiw trabajir tawaqonakamp chik trabajintajja. Jichha jaypʼthapirusti grano takiyañ cheqanwa jupajj cebada khuyuskani. 3 Jichhajj jareqtʼasim, suma olorani aceitempi usktʼasim, suma isimpi isthaptʼasisajj grano takiyañ cheqar saraqarakim. Boaz chachajj manqʼaña umtʼaña tukuyjjani ukhakamajja, janiw jupampejj uñjayasïtati. 4 Jupajj iktʼjjani ukhajja, kawkjansa iktʼani uk uñjäta, uka cheqar sarasajj kayu toqet jantäta, ukjanwa iktʼarakïta. Ukatsti jupaw kun lurañamas wakisini uk saskätam” sasa.

5 Uk satasti Rut warmejj sarakïnwa: “Kuntï siskista ukarjamaw lurä” sasa. 6 Ukatjja grano takiyañ cheqaruw jupajj saräna, kuntï suegrapajj siskäna ukarjamaw lurarakïna. 7 Ukañkamasti Boaz chachajj manqtʼasïnwa, umtʼasïnwa, wali kusisitarakïnwa. Ukatsti grano montón jakʼaruw ikir saräna. Uka qhepatjja Rut warmejj kʼachatak jupan ukarojj jakʼachasïna, kayu toqet jantasajj ukjaruw iktʼarakïna. 8 Chika arumäjjän ukhajja, Boaz chacharojj wal thayjäna. Qonthapisasti mä warmiruw kayup jakʼan iktʼat uñjarakïna. 9 Ukjjarusti jupajj sänwa: “¿Khitïtasa?” sasa. Rut warmejj sarakïnwa: “Nayajj Rut satätwa. Juman servirimarakïtwa. Jumaruw naya servirimar jarkʼaqañamajj* waktʼtamjja, kuna laykutejj familiajar llakinakapan yanaptʼañajj jumaruw waktʼtamjja”*+ sasa. 10 Uk satasti Boaz chachajj sarakïnwa: “Wawa, Jehová Diosajj jumar bendispan. Pobrëskpasa qamirïskpasa janiw wayna chacha thaqktati, ukhamatwa jichhajj munasiñat jan jaytjasirïtam nayrïr kutit sipans+ jukʼamp uñachtʼaytajja. 11 Wawa, jichhajj jan ajjsaramti. Kuntï siskta ukarjamaw luräjja,+ markpachaw* juman suma warmïtam yatiraki. 12 Cheqas Elimélec chachan familiarapjamajj familiamar llakinakapan yanaptʼañajj nayaruw waktʼitu.*+ Ukampis nayat sipans mayniruw juman familiamar llakinakapan yanaptʼañajj waktʼaspa,* jupajj jukʼamp jakʼa familiawa.+ 13 Jichha arumajj akankakim, jupatejj qharür alwajj mä familiarjamajj derechopat kuntï lurañapäki uk phoqani ukhajja, walikïniwa.+ Kunjamtï Jehová Diosajj cheqpachapun jakkir Diosäkejja, nayajj mä juramentompiw arsta, janitejj munkanejja, nayaw jumar yanaptʼäma. Qhanjtaniñapkamajj akjaruk iktʼam” sasa.

14 Ukhamasti Rut warmejj alwakamaw kayup jakʼan iktʼäna. Ukatjja jan khitimp uñjayasiñatakejj janïr sum qhanjtankipanwa sarthapïna. Boaz chachasti sänwa: “Jan khitis mä warmin aka grano takiyañ cheqar jutatap yatpanti” sasa. 15 Ukatjja sarakïnwa: “Awaytʼatäktas uk apanim, jantʼaktʼam” sasa. Rut warmisti jantʼaktʼänwa, Boaz chachasti niya 25 kilonak* cebada ukar warjjatäna, ukatsti qʼepjjaruyänwa. Ukatjja Boaz chachajj markaruw sarjjäna.

16 Rut warmisti suegrapan ukaruw sarjjarakïna, suegrapasti akham sänwa: “¿Kunjamakïnsa wawa?”* sasa. Ukjjarusti kunanaktï Boaz chachajj jupa layku lurkäna ukwa suegrapar yatiyäna. 17 Jupasti saskakïnwa: “Jupaw niya 25 kilonak* cebada churitu, ukatsti ‘suegraman ukarojj jan chʼusa amparak kuttʼamti’ sasaw sarakitu” sasa. 18 Suegrapajj sarakïnwa: “Wawa, jichhajj suytʼakim, taqe ukanakajj kunjamakïnis uk yatiñamkama, ukanak askichañatakejj kun lurañapatï wakiski ukjja jichhürpachaw jupajj lurani” sasa.

4 Boaz chachasti markan punkuparuw saräna,+ ukanwa qontʼasirakïna. Ukatjja Boaz chachajj jakʼa familiaraparuw* uka cheq pasir uñjäna,+ uka jaqerojj* akham sarakïnwa: “Jutam, akjar qontʼasim” sasa. Ukatwa jupajj ukjar sarasin qontʼasïna. 2 Ukjjarusti Boaz chachajj markankir tunka ancianonakaruw*+ jawsäna, jupanakarojj sarakïnwa: “Akjar qontʼasipjjam” sasa. Jupanakajj qontʼasipjjarakïnwa.

3 Boaz chachajj akham sasaw jakʼa familiarapar* säna:+ “Moab+ oraqenkir camponakat kuttʼanki uka Noemí warmiw Elimélec+ jilasankkäna uka oraqep alj-jjañapa. 4 Jumar uk yatiyañwa amuytʼaskayäta, ukatwa nayajj ak sirisma: ‘Taqe jaqenakana ukhamarak markankir ancianonak nayraqatapan alasiñamawa.+ Alasiñ munasajj alasim. Janitejj alasiñ munkätajja, awisjjeta. Cheqas jukʼamp jakʼa familiarapjamajja jumaruw alasiñajj waktʼtamjja, nayajj jumjjarurakïtwa’ sasa”. Jakʼa familiarapajj* sarakïnwa: “Ukhamajj nayaw alasëjja”+ sasa. 5 Boaz chachajj sarakïnwa: “Kunürutejj Noemí warmin oraqep alaskäta ukürojja, moabita Rut warmit alasiñamarakiwa, jupajj Noemí warmin jiwir yoqapan warmipänwa. Ukhamatwa jiwirin herenciapajj sutipankaskakini”+ sasa. 6 Ukjjarusti jakʼa familiarapajj* akham sänwa: “Janiw alaskiristti, alasajj pachpa herenciajsa aptʼasiristwa. Derechojat nayar waktʼkitu uk jum alasiskam, janiw nayajj alkäti” sasa.

7 Nayra tiemponakanjja, kuna lurañatï maynir waktʼki uk phoqjjatapa jan ukajj yaqhar pasayjjatap uñachtʼayañatakejj mä costumbrew Israel markan utjäna: mä chachajj wiskhup* apsusisaw+ maynir churañapäna, ukhamatwa Israel markan mä amtaru puripjjatap uñachtʼayapjjerïna. 8 Ukatwa uka jakʼa familiarapajj* wiskhup* apsusisajja, “jumak alasjjam” sasin Boaz chachar säna. 9 Ukatsti Boaz chachajj akham sasaw ancianonakarusa markankirinakarus säna: “Jichhürojj jumanakaw testigöpjjtajja,+ kunatï Elimélec, Kilión, Mahlón chachanakankkäna taqe ukanakwa nayajj Noemí warmit alasiskta. 10 Jiwir Mahlón chachan moabita Rut warmiparuw esposajäñapatak katusirakëjja. Ukhamatwa jiwirin oraqepajj wawanakapankaskakini,+ familiaranakapansa markankir jaqenak taypinsa* jiwir chachan sutipajj janiw armatäkaniti. Jumanakaw jichhürojj testigöpjjtajja”+ sasa.

11 Markan punkupankir taqe jaqenakasa ancianonakasa akham sasaw sapjjäna: “¡Nanakaw testigöpjjta! Utamar mantkani uka warmejj Jehová Diosan bendisitäpan. Jupajj Raquel, Lea warminakjamäpan, uka pä warminakatwa Israel markajj qalltäna.+ Jumajj Efrata+ markan nayrar sartaskakim, sutimajj Belén+ markpachan uñtʼatäpan. 12 Jehová Diosajj uka tawaq warmi taypi churkätam uka wawanakamajja,+ Pérez+ chachan familiapjamäpan, Pérez chachajj Tamarampin Judampin wawapänwa” sasa.

13 Ukhamasti Boaz chachajj Rut warmiruw katusïna, jupasti warmipäjjarakïnwa. Chacha warmjam ikthapisajja, Rut warmejj Jehová Diosan bendicionapampejj mä yoqall wawanëjjänwa. 14 Warminakasti Noemirojj akham sapjjänwa: “Jehová Diosajj jachʼañchatäpan, jupaw jumatakejj mä jakʼa familia* utjayaraptamjja. ¡Wawan sutipajj Israel markan uñtʼatäpan! 15 Uka wawaw jakañam chʼamañchi, juparakiw taykäjjäta ukhajj uñjaskätam. Uka wawajj yojjchʼaman wawapawa, yojjchʼamajj wal jumar munastamjja,+ jupajj paqallqo yoqanakat sipansa jukʼamp sumawa” sasa. 16 Noemisti wawarojj ichjjarusïnwa, sum uñjarakïna.* 17 Uta jakʼapankir warminakasti, uka wawarojj suti uchapjjäna. Jupanakajj sapjjarakïnwa: “Noemí warmitakejj mä wawaw nasirapi” sasa. Obed+ sasaw uka wawarojj sutiyapjjäna. Jupaw Jesé+ chachan awkipajja, Jesé chachasti Davidan awkiparaki.

18 Pérez+ chachan familiapajj akhamänwa: Pérez chachajj Hezrón+ chachan awkipänwa; 19 Hezronasti Ram chachan awkipänwa; Ram chachajj Aminadab+ chachan awkipänwa; 20 Aminadab+ chachajj Nahsón chachan awkipänwa; Nahsón chachajj Salmón chachan awkipänwa; 21 Salmonajj Boaz chachan awkipänwa; Boaz chachajj Obed chachan awkipänwa; 22 Obed chachajj Jesé+ chachan awkipänwa; Jesé chachasti Davidan awkiparakïnwa.+