LAMENTACIONES
א [álef]*
1 ¡Jaqe phoqäkäna uka Jerusalén markajj sapakiw qontʼasjje!+
¡Markanak taypin walja jaqenakanïkäna uka markajja mä viuda warmïkaspas ukhamaw tukuwayjje!+
¡Provincianak taypin princesäkäna ukajj esclavar tukuyatarakiwa!+
ב [bet]
2 Paqar arumaw jupajj wal jachi,+ jachanakapas ajanupatwa jalaraski.
Taqe munirinakapat janiw maynis jupar chuymachtʼañatakejj ukankjjapjjeti.+
Taqpach amigonakapaw jupar traicionapjje,+ jichhajj jupan enemigopäjjapjjewa.
ג [guímel]
3 Judá markajj yaqha markar apataw uñjasi,+ jupajj tʼaqesiyataw uñjasi, esclavjam tʼaqesiyataw uñjasiraki.+
Jupajj markanak taypinwa jakañapa,+ samartʼañatakejj janiw mä lugar jikjjatkiti.
Tʼaqesiyat uñjaskäna ukhaw taqpach arknaqerinakapajj jupar jikjjatapjjäna.
ד [dálet]
4 Sionar sarki uka thakinakajj wali llakitäpjjewa, kuna laykutejj janiw khitis fiestanakar jutjjapjjeti.+
Taqpach punkunakapajj qʼala tukjatawa,+ sacerdotenakapas wali llakitäpjjarakiwa.
Virgen tawaqonakapas wali llaktʼatäpjjewa, jupajj walpun tʼaqesi.
ה [he]
5 Enemigonakapaw jichhajj jupan patronapäjje, janiw kuna llakinakapas enemigonakapan utj-jjeti.+
Jehová Diosajja jupan walja juchanakap kawsaw llakisiña jupanakjjar apayani.+
Wawanakapajja enemigonakapamp preso apataw uñjasipjje.+
ו [waw]
6 Sionan phuchapan taqpach kʼajkiripajj tukusjjewa.+
Principenakapajja pastonak jan jikjjatir venadonakar* uñtasitäpjjewa,
arknaqerinakap nayraqatanjja jupanakajj qʼala qaritaw sarapjje.
ז [zayin]
7 Jerusalén markajja tʼaqesiyat urunakapansa jan utani uñjasiñ urunakapansa
nayra tiempon wali valorani yänakapajj* utjkäna taqe ukanakatwa amtasi.+
Kunapachatï jaqenakapajj enemigon amparapar jaltʼapkäna, janirak khiti yanapiris utjkäna ukhajja,+
ח [jet]
8 Jerusalenajj wali jachʼa juchwa luri.+
Ukatwa wali ajjtaskañar tukuwayjje.
Taqe khitinakatï nayrajj jupar jachʼañchapkäna ukanakajja jichhajj jiskʼachapjjewa, jupar qʼalala uñjapjjatap layku.+
Jupajj wal warari,+ phenqʼachataw kuttʼjjaraki.
ט [tet]
9 Jupan isipajj qʼañuchatawa.
Kunas jutïrin jupar pasani ukjja janiw jupajj amuykänti.+
Jupan tinkutapajj musparkañänwa, janiw jupar khiti chuymachiris utjkiti.
Jehová Dios Tata, kunjamsa nayajj tʼaqesta uk uñjakimaya, kuna laykutejj enemigojajj jachʼañchasiwa.+
י [yod]
10 Enemigojja jupan wali valorani yänakapwa* apasjje,+
kunjamsa yaqha markanakajj santuariopar mantapjjäna ukwa jupajj uñjäna,+
kawkïr markanakarutï congregacionamar jan mantapjjañapataki mä orden churkayäta uka markanakaruw jupajj mantir uñjäna.
כ [kaf]
11 Taqpach jaqenakapaw llakitäsipki, tʼantʼwa thaqasipkaraki.+
Wali valorani yänakapwa* mä jukʼa manqʼa laykojj churapjje, ukhamat jakaskakiñataki.
Jehová Dios Tata, uñjakimaya, nayajj jan kunatak servir warmir* uñtasitakëjjtwa.
ל [lámed]
12 Thaknam pasir taqe jaqenaka, ¿ukajj janis kunäkaspa ukhamakit jumanakatakejja?
¡Uñtapjjam, uñjapjjarakim!
¿Nayar tʼaqesiyapkitu ukham tʼaqesiñajj utjiti,
Jehová Diosajj wali colerasiñ urupan nayar tʼaqesiykitu ukhamajj utjiti?+
מ [mem]
13 Alajjpachatwa jupajj nina apayani, taqpach chʼakhanakaj nakhantayañataki,+ sapa chʼakhajaruw jupajj apnaqe.
Kayunakajatakejj mä qänwa* jupajj janatati, munkir jan munkiriw qhepar kuttʼayarakitu.
Jupajj sapärstʼat warmiruw tukuyitu.
Uru jurnälaw nayajj usutätjja.
נ [nun]
14 Juchanakajajja yukur uñtataw kunkaj muytpachar chinkatatajja, uka juchanakjja pachpa amparanakapampiw jupajj mä yukur chinkati.
Uka juchanakajajj kunkajar chinkatatawa, janiw chʼamas utj-jjetuti.
Khitinakarutï jan saykatkirista ukanakaruw Jehová Diosajj apjjaruyitu.+
ס [sámekh]
15 Naya taypin utjkäna taqe uka chʼaman chachanakaruw Jehová Diosajj apasjje.+
Wayna chachanakajar tukjañatakejja walja jaqenakaruw jupajj naya contra tantachthapi.+
Jehová Diosajja Judá markankir virgen imill wawaparuw takichasi, uvas chʼirwañ lugaranwa takichasi.+
ע [ayin]
16 Ukanakatwa nayajj jachaskta,+ nayranakajatjja jachanakaw jalaraski.
Kuna laykutejj taqe khitinakatï chuymachtʼapkitaspa jan ukajj chʼamañchtʼapkitaspa ukanakajja nayat wali jayankapjjewa.
Enemigon atipjatap laykojja wawanakajajj wali llakitäpjjewa.
פ [pe]
17 Sionajj amparanakapwa loqatati,+ jupar chuymachtʼirejj janiw khitis utjkiti.
Taqe khitinakatï Jacob muytpachankapki ukanakarojja Jacob contra saytʼapjjañapatakiw Jehová Diosajj mä orden churäna.+
Jupanakatakisti Jerusalenajj mä ajjtaskañaruw tuküna.+
צ [sadé]
18 Jehová Diosajj cheqaparuw nayarojj castiguitu,+ kuna laykutejj nayaw mandatonakap contrajj saytʼasta.+
Istʼapjjam, taqe markanaka, nayan tʼaqesitaj uñjapjjam.
Virgen tawaqonakajasa waynanakajasa preso apataw uñjasipjje.+
ק [qof]
19 Munirinakajaruw nayajj jawsta, ukampis jupanakajj traicionapjjetuwa.+
Markanjja sacerdotenakajasa ancianonakajas* jiwjjapjjewa,
jakañatak mä jukʼa manqʼa thaqkäwiw jiwjjapjje.+
ר [resh]
20 Jehová Dios Tata, uñtanikimaya, kuna laykutejj nayajj wali llaktʼatätwa.
Janiw nayajj kamachtʼasirjamäkti.
Naya manqhanjja chuymajajj qʼewtituwa, kuna laykutejj nayajj wali kutkatasirïyätwa.+
Anqanjja wawanakajaruw espadajj jiwarayi,+ uta manqhanjja jaqenakajj jiwarasipkarakiwa.
ש [shin]
21 Jaqenakajj nayan llaktʼasitanakajwa istʼapjje, janiw khitis nayar chuymachirejj utjkiti.
Jan waltʼäwin uñjasitajatjja taqe enemigonakajaw istʼapjje.
Jupanakajj wali kusisitäpjjewa, kuna laykutejj jumaw ukhaman uñjasiyistajja.+
Ukampis kuntï jupanakar lurañ jumajj arskayäta uka urojj purininiwa,+ uka urunjja jupanakajj nayjamarakiw uñjasipjjani.+
ת [taw]
22 Jupanakan jan wali luratanakapajj juman ukar purinpan, ukatjja jupanakar wal tʼaqesiyam,+
kunjamtï taqe juchanakajat nayar tʼaqesiykistajja ukhamarak jupanakar wal tʼaqesiyam.
Kuna laykutejj nayan llaktʼasitanakajajj waljapuniwa, chuymajas usuntatarakiwa.
א [álef]
2 ¡Jehová Diosajj Sionan phuchaparojj colerasiñapampiw imjjatäna, mä qenayampjamaw imjjatäna!
Israelan suma uñnaqtʼapjja alajjpachatwa oraqer jaqoqanïna.+
Colerasiñ urupanjja Diosajj kayunakap taktʼasiñapat+ janiw amtasjjänti.
ב [bet]
2 Jehová Diosajja jan sinttʼasisaw Jacobun taqe utjäwinakap tukjäna.
Colerasiñap laykojja Judá markankir phuchapan jachʼa torrenakapwa allinuküna.+
Reinorusa* principenakaparusa+ oraqeruw Diosajj liwinuküna,+ jiskʼacharakïna.
ג [guímel]
3 Wali colerasiñap laykojja Israel markan taqpach chʼamapwa apaqäna.
Kunapachatï enemigojj atackistäna ukhajja, janiw jupajj yanaptʼkistänti.+
Colerasiñapajj ninjamaw Jacob toqerojj nakhantaskakïna, jupa muytpachankkäna taqe ukanakwa nakhantarakïna.+
ד [dálet]
4 Mä enemigor uñtataw flechtʼañ arcop jupajj dobltʼäna, kupi amparapajja mä enemigjam atacañatak listokirakïnwa.+
Taqe khitinakatï wali munatäpkäna ukanakarojj jiwarayaskakïnwa.+
Sionan phuchapan carpaparojja+ mä ninjamaw colerasiñapjja warjjatanïna.+
ה [he]
5 Jehová Diosajj mä enemigjamaw tuküna,+
Israel markaruw tukjäna.
Taqe torrenakapwa tukjäna,
taqpach jachʼa torrenakapwa tukjarakïna.
Judá markankir phuchapanjja llakisiñanaksa jachañanaksa waljaptayarakïnwa.
ו [waw]
6 Ramanakamp lurat carpapjja jardinankir pajat lurat carparjamaw Diosajj tukji.+
Fiestapsa jupajj chhaqtayjjarakiwa.+
Jehová Diosajja fiestanaksa sábado urunaksa janiw Sionan amtayjjänti,
wali colerasitap laykojja reyirusa sacerdoterusa apanukjjewa.+
ז [zayin]
7 Jehová Diosajj altarap apanukjjänwa,
santuariopsa jiskʼacharakïnwa.+
Jachʼa torrenakapan murallanakapsa enemigonakapan amparanakaparuw katuyäna.+
Jehová Diosan utapanjja mä fiesta urunjamaw jupanakajj arnaqasipjjäna.+
ח [jet]
8 Jehová Diosajja Sionan phuchapan murallanakap tukjañwa amtäna.+
Markarojj mediñatak pitampiw midtʼäna.+
Tukjañ apaniñatakejja janiw jupajj amparap jarkʼkänti.
Jarkʼaqasiñatak murallanakarusa ukhamarak perqanakarus llakisiyiwa,
taqe ukanakajj niya allitattirpachawa.
ט [tet]
9 Punkunakapajj oraqeruw jithintjjapjje.+
Barranakapjja Diosajj tukjänwa, pʼakjarakïnwa.
Reyipasa principenakapasa markanak taypinkapjjewa.+
Janiw ley phoqerinakajj maynis utjkiti, profetanakapas janirakiw Jehová Diosatjja visionanak katoqjjapjjeti.+
י [yod]
10 Sionan phuchapan ancianonakapajja amukiw oraqen qontʼasipjje.+
Pʼeqenakapjjarojj laqʼampiw willjjatasipjje, llakisiñ isimpiw*+ uskusipjjaraki.
Jerusalenan virgen tawaqonakas oraqer puriñkamaw pʼeqenakap altʼasipjje.
כ [kaf]
11 Jachkäwejj nayranakajajj wali qaritawa.+
Janiw nayajj kamachtʼasirjamäkti.
Markajan phuchapajj tukjat uñjasitapatjja chuymajajj pʼakintatawa,+
wawanakana, asu wawanakan marka plazanakan desmayasipjjatapatjja chuymajajj pʼakintatawa.+
ל [lámed]
12 Jupanakajj mamanakaparojj akham sasipkakiwa: “Mamita, manqʼat awtjitu, umat pharjitu”*+ sasa.
Ukañkamasti marka plazanakankir usuchjat jaqenakjamaw desmayasipki,
mamanakapan amparanakapanwa jiwarasipkaraki.
מ [mem]
13 Jerusalenan phuchapa, ¿kunsa nayajj jumar uñachtʼayirisma?
Jerusalenan phuchapa, ¿kunarus jumarojj uñtayirisma?
Sionan virgen phuchapa, ¿jumar chuymachtʼañatakejj kunarus uñtayirisma?
Kuna laykutejj juman tukjat uñjasitamajj lamar qotjam jachʼawa.+ ¿Khitirak qolliristamsti?+
נ [nun]
14 Profetanakamajja falso visionanakampi inamay visionanakampwa uñjapjje,+
jupanakajj janiw pantjasitanakam qhanstayapkänti, ukhamat preso apat jan uñjasiñamataki,+
jan ukasti falso visionanaksa engañjir visionanaksa parlasipkakiyätamwa.+
ס [sámekh]
15 Taqe khitinakatï thaknam pasapki ukanakajja burlasisaw amparanakap tʼajjllirapjje.+
Sionan phuchapar uñjasajja wali musparataw khuyusipjje,+ akham sasaw pʼeqenakap khiwisipjjaraki:
“¿Aka markatti akham sapjjänjja: ‘Jan kuna kamachtʼata wali suma markapuniwa, taqpach oraqjjaru kusisiñ apanir markawa’ sasajja?”.+
פ [pe]
16 Taqe enemigonakamaw juma contrajj lakanakap jistʼarapjje.
Jupanakajj khuyusipjjewa, laka chʼakhanakapsa tʼurusipjjewa, akham sapjjarakiwa: “Juparojj tukjtanwa.+
¡Aka urwa jiwasajj suyaskayätanjja!+ ¡Purinjjewa, uñjaraktanwa!”+ sasa.
ע [ayin]
17 Jehová Diosajj kuntï amtkäna ukjja luränwa,+ arunakapsa phoqarakïnwa,+
nayra tiempon mä orden churkäna ukjja phoqänwa.+
Jan sinttʼasisaw tukjayätamjja.+
Enemigorojj jumat larusiñapatakiw jaytäna, enemigonakaman chʼamapsa jachʼañcharakïnwa.
צ [sadé]
18 Sionan phuchapa, markamankirinakajj Jehová Diosaruw artʼasipjje.
Uruy arumay jachanakajj wali chʼamamp jalir jawirjam jalpan.
Jan samartʼamti, janirak nayranakamajj jachañat samartʼpanti.
ק [qof]
19 ¡Sartasim! Arum paqar jacham.
Taqe kunanakatï chuymaman utjki ukanakjja jachtʼasisaw Jehová Diosar yatiyañama.
Wawanakaman jakañ vidap laykojj amparanakam jupa toqer loqtam,
manqʼat pistʼañ utjatap laykojja taqe esquin callenakanwa wawanakamajj desmayasipki.+
ר [resh]
20 Jehová Dios Tata, uñjam, wal tʼaqesiykta uka markar uñjam.
¿Warminakajj pachpa wawanakapar manqʼantasisipkakiniti, kʼumara nasir wawanakaparojj manqʼantasisipkakiniti?+
¿Sacerdotenakasa profetanakasa Jehová Diosan santuariopan jiwayatäpjjaniti?+
ש [shin]
21 Wawanakasa jilïrinakasa jiwataw callenakan liwirtasipki.+
Virgen tawaqonakajasa waynanakajasa espadampi jiwayatäpjjewa.+
Jumajj colerasiñ urumanwa jupanakar jiwaytajja, jan sinttʼasisaw jupanakar jiwaraytajja.+
ת [taw]
22 Kunanakatï wal sustjkitaspa ukjja taqe toqetwa jumajj jawsthaptajja, mä fiesta urutakis+ jaqenakar jawsthapkasma ukhama.
Jehová Diosan colerasiñ urupanjja janiw khitis escapkänti, janirakiw khitis salvaskänti.+
Khitinakarutï nayajj ususkayäta* uywkarakiyäta ukanakaruw enemigojajj tukjäna.+
א [álef]
3 Nayajj tʼaqesiñanak uñjir chachätwa, kuna laykutejj wal colerasitapatwa Diosajj jiwasar castiguistu.
2 Jupajj nayar alisnukusinwa chʼamakan sarnaqayitu, janiw qhanan sarnaqaykituti.+
3 Jupajja uru jurnälaw naya contrajja, kutin kutiniw jupajj naya contrajja.+
ב [bet]
4 Cuerpoj-jja debilaruw jupajj tukuyi, juparakiw jañchij tukusiyi.
Chʼakhanakajsa pʼakjiwa.
5 Naya muytpacharojj mä perqwa jupajj saytʼayi, kʼallkʼu venenompi+ ukhamarak problemanakampiw muytayarakitu.
6 Jupajj chʼamak lugaranakan quedasiñajatakiw obliguitu, kunjamtï walja tiempo jiwat jaqenakajj jikjjatasipki ukhama.
ג [guímel]
7 Jan escapañajatakejja perqanakampiw muyuntayitu.
Jathi cobre cadenanakampiw chinuntarakitu.+
8 Kunapachatï jan kamachtʼasirjamäsajj yanap mayiñatak artʼasta ukhajja, jupajj janiw oracionajar istʼkituti.+
9 Jupajja kʼutsut qalanakampiw thakinakaj jarkʼanti,
thakinakajsa qʼewinukuwa.+
ד [dálet]
10 Jupasti mä osor uñtasita, imantasit mä leonar uñtasitaw nayar atacañatakejj suyjjatitu.+
11 Munkir jan munkiriw thakinakat saranukuyitu, jiskʼa jiskʼa tukjarakitu.
Ina chʼusaruw tukuyarakitu.+
12 Jupajj flechtʼañ arcopwa dobltʼi, nayar waktʼayañatakiw wakichtʼasiraki.
ה [he]
13 Bolsapankir flechanakampiw jupajj riñonanakajar waktʼayitu.
14 Taqe markanakaw nayat larusipjje, uru jurnälaw jupanakajj cancionanakapampi nayat burlasipjje.
15 Kʼallkʼu manqʼanakjja jupajj manqʼayaskakitänwa, ajenjo+ kʼaskʼa umanaksa umayaskakitänwa.
ו [waw]
16 Jupajja cascajompiw laka chʼakhanakaj pʼakiritu,
qhellaruw+ jupajj nuktʼitu.
17 Sumankañatjja jumajj jarkʼistawa, kunatï sumäki ukatsa nayajj armasjjtwa.
18 Ukatwa nayajj akham sista: “Jachʼañchäwijajj tukusjjewa, Jehová Diosar suytʼaskayäta ukas tukusjjarakiwa” sasa.
ז [zayin]
19 Nayan tʼaqesitajatsa jan utanïtajatsa amtasikimaya,+ ajenjotsa kʼallkʼu venenotsa amtasikimaya.+
20 Jumajja nayat amtasitätawa, nayar yanaptʼañatakejj naya toqer altʼasinïtawa.+
21 Nayajj ukwa chuymajan amtasta, ukatwa jumarojj pacienciampi suytʼaskakïma.+
ח [jet]
22 Jehová Diosajj munasiñat jan jaytjasir Diosawa, ukatwa jiwasajj jan tukusktanti,+
kuna laykutejj jupan khuyapayasiñapajj janipuniw tukuskiti.+
23 Jupajja sapa alwaw khuyapayasirïtap uñachtʼayi.+ Jupajj confiykañapuniwa.
24 Nayajj akham sayätwa: “Jehová Diosaw nayan herenciajajja,+ ukatwa juparojj pacienciampi suytʼaskakëjja”+ sasa.
ט [tet]
25 Jehová Diosajja khititï jupar suytʼaskaki,+ jupar thaqaskaki+ ukatakejja suma Diosawa.
26 Jehová Diosampi salvatäñatakejja+ amuki* suytʼañaw jukʼamp sumajja.+
27 Mä jaqetakejja waynäkasin yuku apañaw jukʼamp sumajja.+
י [yod]
28 Kunapachatï Diosajj uka yukumpi jupar apjjatkani ukhajja, sapaki ukhamarak amukiw jupajj qontʼasiñapa.+
29 Oraqer puriñkam altʼaspan,+ inas ukhamat jupajj salvaschispa.+
30 Khititï jupar tʼajjllintki ukarojja, jupajj ajanup churpan. Insultatajj katoqaspan, kawkhakamatï katoqasirjamäki ukhakam katoqaspan.
כ [kaf]
31 Kuna laykutejj Jehová Diosajj janiw wiñayatak jaytanukkistaniti.+
32 Jupajj castigkchisa, wali munasiñat jan jaytjasirïtap laykojja khuyapayasiñapwa uñachtʼayani.+
33 Kuna laykutejj jaqenakan wawanakapar tʼaqesiyañasa llakisiyañasa janiw jupan chuymaparojj kusisiykiti.+
ל [lámed]
34 Oraqenkir preso katuntat taqe jaqenakar kayunakampi takjjatañasa,+
35 Jachʼa Dios nayraqatan mä jaqeru jan cheqaparjam uñjañasa,+
36 tribunalan mä jaqer engañjañasa,
Jehová Diosatakejja ukanakajj janipuniw walïkiti.
מ [mem]
37 ¿Khitirak mä kun arsusajj uk phoqasiyaspasti, janitï Jehová Diosajj mä orden churkchi ukhasti?
38 Jachʼa Diosan lakapatjja,
kunanakatï sumäki ukanakakiw mistu, janiw kunanakatï jan walïki ukanakajj mistkiti.
39 Juchapat jan walinakan uñjasisajja ¿kunatarak mä jaqejj* quejasiñapäspasti?+
נ [nun]
40 Kunjamsa sarnaqasktan uka toqet sum amuykiptʼañäni,+ ukatsti Jehová Diosan ukar kuttʼjjañäni.+
41 Alajjpachankir Diosar suma chuymamp ruwtʼasiñäni, amparanakas loqtasin akham sasin ruwtʼasiñäni:+
42 “Nanakajj juma contraw juchachasipjjta, juma contraw saytʼasipjjarakta,+ ukampis jumajj janiw nanakarojj perdonapkistati.+
ס [sámekh]
43 Wal colerasitamatjja jumajj janiw nanakan oracionanakaj istʼapkistati,*+
jumajj arknaqapjjestawa, jan sinttʼasisaw jiwayapjjarakistajja.+
44 Jumar jan jakʼachasipjjañajatakejj mä qenayampiw jarktʼapjjestajja, ukhamat oracionanakajajj jan pasañapataki.+
45 Markanak taypinjja basuraru jan kunatak serviriruw tukuyapjjestajja” sasa.
פ [pe]
46 Taqe enemigonakajaw nanak contrajj parlapjje.+
47 Ajjsarañajj nanakan utjakipuniwa, katuntataw uñjasipjjarakta,+ ina chʼusar tukuyata, qʼala tukjata ukhamaw uñjasipjjta.+
48 Markajan phuchapajj qʼala tukjata uñjasitapatjja nayranakajatjja jachajj umjamaw jalari.+
ע [ayin]
49 Nayranakajajj jan saytʼasa jan samartʼasaw wal jachapjje,+
50 Jehová Diosan uñtaniñapkama, alajjpachat uñtaniñapkama.+
51 Kunatï markajan taqe phuchanakapar paski uk uñjasajja nayajj wal tʼaqesta.+
צ [sadé]
52 Ina chʼusatakwa enemigonakajajj mä jamachʼirjam katuntapjjetu.
53 Jupanakajj mä pʼiyanwa jakañ vidaj tukjapjje, qalanakampis jaqjasipkakituwa.
54 Umanakaw qʼal chhaqtayapjjetäna, ukatwa nayajj akham sayäta: “¡Akaruw jakañ vidajajj tukusini!” sasa.
ק [qof]
55 Jehová Dios Tata, juman sutimatwa nayajj artʼasiyäta, wali manqha pʼiyatwa sutimat artʼasiyäta.+
56 Arujarojj istʼakimaya. Yanap mayiñatak artʼasitajarus istʼakimaya.
57 Jawsankayäsma uka uruw jumajj nayar jakʼachasistajja. Jumasti nayarojj akham sistawa: “Jan ajjsaramti” sasa.
ר [resh]
58 Jehová Dios Tata, jumaw tribunalan nayar arjjatistajja, jumaw jakañ vidaj salvistajja.+
59 Jehová Dios Tata, kuna jan waltï lurapkitu ukjja jumaw uñjtajja. Mirä amp suma, cheqaparjamay uñjita.+
60 Jupanakan taqe vengasitanakapjja jumajj uñjtawa, taqe kuna jan walinaktï naya contrajj amtapki ukanaksa uñjaraktawa.
ש [sin] jan ukajj [shin]
61 Jehová Dios Tata, jupanakan burlasitanakapjja jumajj istʼtawa, taqe kuna jan walinaktï naya contrajj amtapki ukanaksa istʼtawa,+
62 kunanaktï enemigonakajajj uru jurnäla naya contra parlapki ukanaksa kunanaktï uru jurnäla jamasan naya contra parlasipki ukanaksa jumajj istʼaraktawa.
63 ¡Jupanakar uñtam! ¡Qontʼatäsipkchisa saytʼatäsipkchisa cancionanakapanwa jupanakajj nayat burlasipjje!
ת [taw]
64 Jehová Dios Tata, luratanakaparjamaw jupanakarojj castigäta.
65 Jupanakan chuymanakap qalarayasaw jupanakar maldisïta.
66 Jehová Dios Tata, wali colerataw jupanakar arktäta, oraqetsa chhaqtayarakïtawa.
א [álef]
4 ¡Qorejj janiw llijtjjeti, suma qorejj janiw llijtjjeti!+
¡Sagrado qalanakajj+ taqpach calle esquinanakanwa willisisipki!+
ב [bet]
2 Sionan wali munat wawanakapajja, khitinakatï suma qorirjam uñjatäpkäna ukanakajja,
¡ñeqʼet lurat wakullanakjam uñjatäpjjewa,
sañu lurir jaqen amparanakapamp lurat wakullanakjam uñjatäpjjewa!
ג [guímel]
3 Chacal sat animalanakas qallunakaparojj ñuñuyasipkiwa,
ukampis markajan phuchapajj wali qhoruw* tukjje,+ wasarankir avestruz sat animalanakar uñtasitaw tukjje.+
ד [dálet]
4 Ñuñuskir wawanakajja umat pharjatäpjjatap* laykojj lajjranakapajj pachpa laka manqhaparuw lipʼkatjje.
Wawanakajj tʼantʼwa mayipjje,+ ukampis janiw khitis jupanakarojj tʼantʼa churkiti.+
ה [he]
5 Khitinakatï suma manqʼanak manqʼapkäna ukanakajja, jichhajj manqʼat awtjatäpjjatap laykojj callenakanwa jaqosipjje.+
Llijkir wila color isinakamp uskusis jilsupkäna ukanakajja+ jichhajj qhella montonanakanwa liwisipjje.
ו [waw]
6 Markajan phuchapan castigopajja,* juchapat castigatäkäna uka Sodoma+ markat sipansa jukʼamp jachʼawa,
Sodoma markajj mä ratunak tukjatänwa, janiw khitis yanaptʼkänti.+
ז [zayin]
7 Sionan phuchapan nazareonakapajja+ khunut sipansa jukʼamp qʼomäpjjänwa, lechet sipansa jukʼamp janqʼöpjjänwa.
Jañchinakapas coralanakat* sipansa jukʼamp wila coloränwa, jupanakajj llijtayat zafiro suma qalanakar uñtasitäpjjänwa.
ח [jet]
8 Jichhajja jupanakajj qesimat sipansa jukʼamp chʼiyaräpjjewa,
callenakansa janiw jupanakar uñtʼañjamäkiti.
Jañchinakapajj chʼakhanakaparuw lipʼkatjje,+ jañchinakapajj waña maderar uñtasitäpjjewa.
ט [tet]
9 Espadampi jiwayatäpki ukanakajja, manqʼatjam jiwapki ukanakat sipansa jukʼamp sumankapjjewa,+
manqʼañanak jan utjatapatjja jukʼat jukʼatwa jupanakajj tukusisipki.
י [yod]
10 Sinttʼasiri taykanakan amparanakapajja, pachpa wawanakaparuw phayantapjje.+
Kunapachatï markajan phuchapajj tukjatäskäna ukhajja, wawanakapaw jupanakan manqʼapänjja.+
כ [kaf]
11 Jehová Diosajj colerasitapwa uñachtʼayi,
wali colertʼasitapwa warjjatani.+
Sionanjja ninwa aqtayi, cimientonakapamppach nakhantir ninwa aqtayi.+
ל [lámed]
12 Oraqenkir reyinakasa oraqen taqe jakirinakasa,
Jerusalenan punkunakapnam enemigon mantaniñapjja janiw creyipkänti.+
מ [mem]
13 Ukajja profetanakapan juchanakapata, sacerdotenakapan pantjasipjjatapatwa pasäna,+
jupanakajja cheqap sarnaqer jaqenakan wilapjja marka taypinwa wartapjjäna.+
נ [nun]
14 Profetanakasa sacerdotenakasa juykhunakjamaw+ uks aksa callenakan sarnaqapjje,
jupanakajj wilampi qʼañuchatäpjjewa,+
ukhamajj janiw khitis jupanakan isinakap llamktʼkaspati.
ס [sámekh]
15 Jupanakarojj akham sasaw arnaqapjje: “¡Akat sarapjjam! ¡Qʼañunaka! ¡Akat sarjjapjjam! ¡Sarapjjam! ¡Jan llamktʼapjjestati!” sasa.
Kuna laykutejj jan utaniw jupanakajj quedasipjje, uks aksaw sarnaqapjje.
Markanakankir jaqenakajj akham sapjjewa: “Jupanakajj janiw jiwasamp chikajj akan quedasipkaspati.*+
פ [pe]
16 Jehová Diosaw jupanakarojj aywitatayi,+
Diosajj janiw mayampis jupanakarojj sum uñj-jjaniti.
Jaqenakasti sacerdotenakarojj janiw respetjjapjjaniti,+ janirakiw ancianonakarus sum uñj-jjapjjaniti”+ sasa.
ע [ayin]
17 Yanapa inamay thaqkäwejja nayranakajajj qaritäsipkakiwa.+
Jan salvapkitaspa uka markan yanaptʼapwa nanakajj kutin kutin thaqapjjayäta.+
צ [sadé]
18 Enemigonakasajj suyjjatapjjestänwa,+ ukatwa plazanakasan jan sarnaqañ puedkayätanti.
Jakañ vidasan tukuyäwipajj jakʼachasinjjewa, urunakasajj tukusjjewa, jiwasan tukuyäwisajj purinjjewa.
ק [qof]
19 Arknaqerinakasajja pakanakat sipansa jukʼamp ratukiw tʼijupjjäna.+
Jupanakajj qollunakanwa arknaqapjjestäna, wasaranwa suyjjatapjjarakistäna.
ר [resh]
20 Jakañ churir samanajja, mä arunjja Jehová Diosan ajllitapajja,+ jupanakan jachʼa pʼiyapan katuntatawa,+
Diosan ajllitapatjja akham sayätanwa: “Jupan chʼiwipanwa markanak taypin jakañäni” sasa.
ש [shin]
21 Uz oraqen jakiri Edoman+ phuchapa, jumajj kusisim, disfrutarakim.
Ukampis jumarojj tukjañan copapwa pasayapjjarakïtamjja,+ jumajj machantasïtawa, qʼalalätamsa uñachtʼayasirakïtawa.+
ת [taw]
22 Sionan phuchapa, pantjasitamat castigojj tukusjjewa.
Jupasti janiw mayampejj yaqha markarojj apjjätamti.+
Edoman phuchapa, jichhajj juman pantjasitamwa jupajj uñjani.
Juchanakamwa jupajj qhanstayani.+
5 Jehová Dios Tata, kunatï nanakar pasapkitu ukat amtasikimaya.
Kunjam jiskʼachatas nanakajj uñjasipjjta uk uñtanikimaya, uñjakimaya.+
2 Nanakan herenciajajj jan uñtʼatanakar apjjaruyatawa, utanakajas extranjeronakar apjjaruyatawa.+
3 Jan awkini wajchaw* quedasipjjta, taykanakajas viudanakäpjjewa.*+
4 Pachpa umanakajat umtʼañatakejj pagapjjañajawa,+ phayañ lawanakajsa alapjjañajawa.
5 Enemigonakajan arknaqataw uñjasipjjta, jupanakajj nanakar niya katuntirpachäpjjewa.
Wali qaritäjjapjjtwa, janiw samartʼayapkituti.+
6 Manqʼañatak tʼantʼa thaqasajja, Egipto+ toqempiru Asiria+ toqempiruw nanakajj amparanakaj loqtapjjta.
7 Juchachasipkäna uka nayra awkinakajajj janiw akankjjapjjeti, ukampis nanakaw jupanakan pantjasitanakapat jan walin uñjasipjjta.
8 Jichhajja servirinakaw nanakar apnaqjjapjjetu, janiw khitis jupanakan amparanakapat salvapkitaspati.
9 Wali armantat chachanakajj wasaran utjatap laykojja, jakañ vida aptʼasirpachaw nanakajj tʼantʼa jikjjatapjjta.+
10 Manqʼatjam tʼaqesipjjataj laykojja calenturanïpjjtwa, ukatwa jañchinakajajj mä hornor uñtasit wali achhijojja.+
11 Jupanakajja Sionanwa esposanakajarojj violapjje,* Judá oraqen utjki uka markanakanwa virgen tawaqonakajarojj violapjjaraki.+
12 Principenakajj amparanakapat warkkatatäpjjewa,+ ancianonakas janiw respetatäpkiti.+
13 Waynanakajj qhonwa apapjje, wawanakajj phayañ lawanak qʼeptʼasitaw lanktʼasipjjaraki.
14 Ancianonakajj janiw marka punkunkjjapjjeti,+ janirakiw waynanakas musicanakap tuktʼasjjapjjeti.+
15 Janiw chuymanakajan kusisiñajj utj-jjeti, thoqöwinakajajj llakisiñaruw tukjje.+
16 Pʼeqenakasatjja coronajj jalaqtjjewa, ¡ay nanakat kunakïkani, kuna laykutejj juchachasipjjtwa!
17 Ukanak kawsajja chuymanakajajj usuntatawa,+
ukanak kawsajja nayranakajajj chʼamaktʼawayjjewa,+
18 Sion Qollojj chʼusak jaytatätap laykuw ukhaman uñjasipjjta,+ jichhajj qamaqenakakiw* ukan sarnaqjjapjje.
19 Jehová Dios Tata, jumajj wiñayatakiw tronoman qontʼasïta.
Apnaqäwimajj wiñayatakiwa.+
20 ¿Kunatarak jumajj wiñayatak nanakat armasipjjestasti, kunatarak walja tiempo apanukupjjestasti?+
21 Jehová Dios Tata, juman ukar kuttʼayanipjjakitaya, nanakajj jankʼakiw juman ukarojj kuttʼanipjjäjja.+
Urunakaj-jja kunjamäkäntï nayra tiemponakajj ukhamaruy tukuyam.+
22 Ukampis jumajj qʼal apanukupjjestajja.
Nanakatakejj wali coleratakïsktawa.+
Lamentaciones libron mayat pusi capitulkamajja, llakkañ cancionanakawa, ukanakasti hebreo arut alfabetoparjam luratawa.
Jan ukajja, “tarujanakar”.
Jan ukajja, “cosasanakapajj”.
Jan ukajja, “jachʼañchasipjjänwa”.
Jan ukajja, “cosasanakapwa”.
Jan ukajja, “cosasanakapwa”.
“Warmir” sasinjja, Jerusalén markatwa parlaski.
Jan ukajja, “redwa”.
Jan ukajja, “jilïr irpirinakajas”.
Jan ukajja, “Gobiernorusa”.
“Llakisiñ isi” siski uk glosarion liytʼäta.
Variante: “wañjitu”.
Jan ukajja, “kʼumarkamak ususkayäta”.
Jan ukajja, “pacienciampi”.
Hebreo arunjja, “jakkir mä jaqejj”.
Hebreo arunjja, “janiw jumar jakʼachayasipkistati”.
Variante: “phiruw”.
Variante: “wañjatäpjjatap”.
Hebreo arunjja, “pantjasitapajja”.
“Coral” siski uk glosarion liytʼäta.
Jan ukajja, “Jupanakajj janiw extranjeronakjamajj akan jakapkaspati”.
Variante: “iñuw”.
Hebreo arunjja, “viudanakjamaw quedasipjje”.
Jan ukajja, “humillapjje”.
Jan ukajja, “zorronakakiw”.