HABACUC
1 Aka arunakajja Habacuc* profetajj mä visionan katoqkäna uka arunakawa:
2 Jehová Dios Tata, ¿kunapachkamarak yanap mayiñatak artʼasinkakïmasti? ¿Kunapacharak istʼitätasti?+
¿Kunapachkamarak nayajj yanap mayiskakïmasti? ¿Kunapacharak nuwasiñanakat salvitätasti?+
3 ¿Kunatsa ukataq jan walinak uñjayista?
¿Kunatsa jaqe masipar tʼaqesiyirinakarojj ukhamak uñchʼukta?
¿Kunatsa tukjäwinakasa nuwasiñanakasa naya nayraqatan utji?
¿Kunatsa ukataq chʼajjwañanakasa problemanakas utji?
4 Ukatwa leyirojj jan khitis istʼkiti,
janipuniw justiciajj utjkiti.
Jan wali jaqenakajja cheqap sarnaqer jaqenakaruw tʼaqesiyapjje,
ukatwa justiciajj janipun utjkiti.+
5 “¡Markanakar uñtapjjam, kunatï pasaski uk wali atencionamp uñtapjjam!
Lakas jistʼarata ukhamarak wali musparat uñtapjjam,
kuna laykutejj jumanakan urunakamanjja,
kuntï jan creyipkäta ukaw pasani, awisatpachas janiw creyipkätati.+
Jupanakajj oraqen utjki uka jachʼa oraqenakarojj jankʼakiw aywitatapjje,
ukhamat jan jupanakankki uka oraqenak katuntasiñataki.+
7 Jupanakajj wali ajjsarkañäpjjewa, jaqenakas jupanakat ajjsarayasipjjewa.
Jupanakajj pachpa leyipwa apsupjje, wali munañanïpjjarakiwa.+
8 Jupanakan caballonakapajj leopardo sat animalat sipansa jukʼamp ratuk tʼijurïpjjewa,
arum sarnaqer lobo* sat animalanakat sipansa jukʼamp qhorunakäpjjewa.*+
Guerrar sarir caballonakapajja wal tʼijupjje,
caballonakapajj wali jayatwa jutapjje.
Kunjamtï pakajj mä animalar katjañatakejj jaljjatkejja, ukhamarakiw jupanakajj jaljjatapjje.+
9 Taqeniw nuwasiñ amtampi jutapjje.+
Tantachasipjje ukhajja, inti jalsu toqet thaytʼanir thayar uñtasitäpjjewa,+
presonakapajja chʼallar uñtat waljapuniwa.
10 Jupanakajj reyinakatsa burlasipjjewa,
marka apnaqerinakatsa larusipjjewa.+
Jachʼa perqanakampi muyuntat taqe markanakatsa larusipjjewa,+
laqʼa montontʼasasti uknam mantasaw markar katuntapjje.
11 Jupanakajj thayar uñtataw sarantapjje, oraqnamaw pasapjjaraki,
ukampis jupanakajj juchanïpjjaniwa,+
kuna laykutejj diosapan yanaptʼapampis chʼamanïpkaspa ukhamwa jupanakajj amuyasipjje”.+
12 Jehová Dios Tata, ¿janit jumajj wiñayatpachajj utjkayäta?+
Nayan Diosaja, Santo Diosaja, jumajj jan jiwirïtawa.*+
Jehová Dios Tata, jumaw juzgañatakejj jupanakar uttʼaytajja,
nayan Qarqaja,*+ jumaw castigañatakejj* jupanakar uttʼaytajja.+
13 Kunanakatï jan walïki uk uñjañatakejja nayranakamajj wali qʼomawa,
kunatï jan walïki ukjja janiw ukhamak uñchʼukirïktati.+
Ukhamajj ¿kunatsa engañjir jaqenakarojj ukhamak uñchʼukta?+
Kunapachatï jan wali jaqejj jupat sipansa jukʼamp cheqap sarnaqer jaqerojj jan waltʼayki ukhajj ¿kunatsa ukhamak uñchʼukta?+
14 Jaqenakajja chawllanakarjama, jan apnaqerini qatatnaqtir animalanakarjam uñjatäpjjewa,
¿kunatsa ukanak ukhamak uñchʼukta?
15 Jupajj* taqeniruw mä anzuelompi apsu,
chawlla qatatsuñatak qänapampiw* jupanakarojj katu,
chawlla katuñ qänaparuw apthapiraki.
Ukatwa jupajj wal kusisi.+
16 Ukatwa jupajj chawlla qatatsuñatak qänaparojj* sacrificionak loqti,
chawlla katuñ qänaparus sacrificionakwa loqtaraki,*
kuna laykutejj uka qänanak utjatapatwa jupan manqʼañapajj waljajja,
manqʼañapas wali sumarakiwa.
17 Ukhamasti ¿jupajj chawlla qatatsuñatak qänapampejj* kutin kutin katuskakiniti?*
¿Markanakarojj jan sinttʼasis jiwarayaskakiniti?+
2 Guardia lurañ lugarajanjja nayajj saytʼatäskakïwa,+
jarkʼaqasiñatak murall patjjanwa saytʼasirakëjja.
Kuntï jupajj* naya taypejj siskani uk uñjañatakisa
cheqañchat uñjaskä ukhajj kamsäsa uk uñjañatakisa nayajj suytʼaskakïwa.
2 Ukatjja Jehová Diosajj akham sitänwa:
“Kunanaktï mä visionan uñjkta ukanakjja, tʼalpha qalanakar qellqantam,+
ukhamat khititejj jachʼat liytʼkani ukajja facilak liytʼañapataki.+
3 Kuna laykutejj uka visionan phoqasiñapatak señalat tiempojj faltaskiwa,
uka visionajj jankʼakiw phoqasini, kunjamatsa phoqasikipuniniwa.*
Qheptʼankchinisa,* ¡jumajj suyaskakim!+
Kunjamatsa phoqasikipuniniwa.
¡Janiw qheptʼankaniti!
4 Jachʼa jachʼa tukuri jaqer uñtam:
chuymapanjja jupajj janiw cheqapar sarnaqer jaqëkiti.
Ukampis cheqap sarnaqer jaqejja jan jaytjasirïtap* laykuw jakani.+
5 Niyakejjay vinojj traicioneröchejja,
jachʼa jachʼa tukur jaqejj kuntï lurañ amtki uk janiw phoqkaniti.
Jupajja Sepulturjam* wali awtjatawa.
Jiwañar uñtasitawa, janipuniw sistʼaskiti.
Taqe markanakarus tantachthapiskakiwa,
taqe markanaksa katuntasiskakiwa.+
6 ¿Janit taqe jupanakajj poesía arunaksa jan amuytʼañjam arunaksa jupa contrajj arsupkani?+
Jupanakajj akham sapjjaniwa:
‘¡Ay kunakïkani, jan jupankki ukanak imkatir jaqetjja,
khititejj manunïkasinsa jukʼamp manuntaski uka jaqetjja!
¿Kunapachkamas ukhamäskakini?
7 Jumajj manükta uka jaqenakajja, akatjamatwa juma contrajj saytʼasipjjani.
Jupanakajj sartasipjjaniwa, katthapisaw nuwjapjjarakïtam,
saqueysupjjarakïtamwa.+
8 Niyakejjay jumajj walja markanakar saqueystajja,
yaqha markanakajj jumarojj saqueysupjjarakïtamwa,+
kuna laykutejj jumajj jaqen wilapwa warttajja,
oraqsa tukjaraktawa,
markanakarusa ukan jakirinakarus tukjaraktawa.+
9 ¡Ay kunakïkani, engañjas ganancianak familiapatak* jikjjatir jaqetjja,
ukhamat tapachasitap alto lugarar uchañataki,
ukhamarak jan waltʼäwit escapañataki!
10 Kuna jan walinaktï lurañ amtkta ukajja, familiamarojj* phenqʼachiwa.
Walja markanakar qʼal tukjasajja juma contraw juchachastajja.+
11 Mä qalaw murallatpach artʼanini,
mä vigaw techotpach jupar jaysarakini.
12 ¡Ay kunakïkani, khititï wila wartasin mä marka lurki,
ukhamarak kunatï jan cheqapäki uk lurasin mä marka saytʼayki uka jaqetjja!
13 ¿Janit ejercitonakan Jehová Diosapajj markanakarojj wal trabajiyki, ukhamat luratanakapajj ninar jaqontatäpjjañapataki?
¿Janit jupajj markanakar inamayak qariyki?+
14 Oraqejja Jehová Diosan jachʼañchäwip toqet uñtʼañampi phoqtʼatäniwa,
kunjamtï umajj lamar qotar phoqantki ukhama.+
15 ¡Ay kunakïkani, khititejj wali coleratäki uka jaqetjja!
Jupajj amigonakaparuw alcoholani umañanak churi, ukhamat machjayañataki,
ukhamarak jupanakan qʼalaläpjjatap uñjañataki.
16 Jumajj jachʼañchatäñamp sistʼasiñat sipansa, phenqʼachatäñampiw sistʼasïta.
Machantasirakim, jan circuncidatätam* uñachtʼayarakim.*
Jehová Diosaw kupi amparapankki uka copat umtʼayätam,+
phenqʼachatäñaw jachʼañchäwimarojj imjjatani.
17 Kunjamtï jumajj Líbano qollunakar tukjktajja, ukham tukjatarakïyätawa,
animalanakar wal ajjsaraykäna uka tʼunjäwiw jumjjar jutani,
kuna laykutejj jumajj jaqen wilapwa warttajja,
oraqsa tukjaraktawa,
markanakarusa ukan jakirinakarus tukjaraktawa.+
18 ¿Kunatakirak mä idolojj servispasti,
mä jaqen luratakïchi ukhasti?
¿Kunatakirak metalat lurat mä idolosa kʼarinak yatichiris servispasti,
uka idolonak luriritejj uka idolonakar wal confiychi,
jan kunatak serviri jan parliri diosanak lurarakchi ukhasti?+
19 ¡Ay kunakïkani, khititejj mä jiskʼa maderar “¡sartasim!” sasin siski uka jaqetjja,
jan ukajja jan parlir mä qalar “¡sartasim!, ¡yatichapjjeta!” sasin siski uka jaqetjja!
20 Ukampis Jehová Diosajj santo templopankaskiwa.+
¡Jupa nayraqatanjja oraqenkir taqe jaqenakajj amukïpjjpan!’”.+
3 Habacuc profetan oracionapa, aka oracionajja llakkañ cancionanakampi arsut arunakawa:
2 Jehová Dios Tata, juma toqet parlir yatiyäwinakwa nayajj istʼta.
Jehová Dios Tata, kunanaktï jumajj lurkayäta ukanakajj wal nayar musparayitu.
¡Kunanaktï jumajj lurkayäta ukanakjja, akat jutir maranakarojj* mayamp lurakimaya!
Kunanaktï jumajj lurkayäta ukanakjja, akat jutir maranakarus* yatiyakimaya.
Jumajj coleraskäta ukhajja, nanakat amtasikimaya, khuyaptʼayasipjjakitaya.+
Alajjpachanakajj chʼamapampi phoqtʼatänwa,+
oraqesti jupar jachʼañchir jaqenakampi phoqtʼatarakïnwa.
4 Qhanapajj urun qhanapjamänwa.+
Wali kʼajtir pä qhananakaw amparapat mistüna,
uka amparapanwa chʼamapajj imantatäna.
5 Usunakajj jupa nayraqataw sarapjjäna,+
qhattʼasiñ munir calenturanakajj jupan qhepapwa sarapjjarakïna.
6 Jupajj saytʼasïna ukhajja, oraqejj khatatïnwa.+
May uñtasakiw markanakarojj khatatiyäna.+
Nayratpach utjkäna uka qollunakas tʼunjatäpjjänwa,
jaya tiempotpach utjkäna uka jiskʼa qollunakas altʼasipjjänwa.+
Nayra tiempotpach utjkäna uka thakinakanjamaw jupajj sarnaqe.
7 Cusán markankir carpanakapanjja jan waltʼäwinakwa nayajj uñjayäta.
Madián oraqenkir carpanakapan telanakapajj khatatipjjänwa.+
8 Jehová Dios Tata, ¿jawiranak contrati jumajj ukataq colerasta?
¿Jawiranak contrati jumajj ukataq colerasta?
Jan ukajj ¿lamar qotatakich wal colerasta?+
9 Jumajj flechtʼañ arcom apsusajj wakichtʼaraktawa.
Kuntï varanakamajj* mä juramentorjam lurapjjañapäki ukanak lurañatakejj listokïpjjewa.* (Sélah).
Jumaw oraqjja jawiranakampi jaljtaytajja.
10 Jumar uñjasajja qollunakajj wal usuyasitap laykuw qʼewinaqtapjjäna.+
Jalluw oraqerojj wal purjjatäna.
Manqha umanakan suynatapaw wali jachʼat istʼasïna.+
Amparanakapsa altoruw aytapjjäna.
11 Intisa phajjsisa alto utjäwipanwa quedasipjjäna.+
Flechanakamajj qhanar uñtataw mistunipjjäna.+
Lanzamajj mä lliju llijur uñtataw kʼajarakïna.
12 Wali colerataw jumajj oraqnam pasayätajja.
Wali colerataw markanakarojj granorjam taksuyätajja.
13 Markamar salvañatakiw jumajj mistuyätajja, ajllitamar salvañatakiw mistuyätajja.
Jan wali jaqen utapankir pʼeqtʼiriruw tʼunjtajja.
Uka utajja techot cimientonakkam tʼunjatänwa. (Sélah).
14 Kunapachatï jupanakajj mä jachʼa thayar uñtat naya contra mistunipkäna ukhajja,
guerran nuwasir jaqenakaparojj pachpa armanakapampiw jiwaytajja.
Jupanakajj tʼaqesiyat jaqer jamasat jiwayañjja wal munapjjäna.
15 Caballonakamampiw jumajj lamar qota paskatayätajja,
lamar qotankir jachʼa oladanak taypnamaw paskatayätajja.
16 Yatiyäwi istʼasajja nayajj khatatiyätwa,
ukanak istʼasajja lakajas khatatirakïnwa.
Chʼakhanakajas debiläjjarakïnwa,+
kayunakajas khatatirakïnwa.
Ukampis jan waltʼäwi uru puriniñapjja nayajj pacienciampiw suytʼäjja,+
kuna laykutejj atacasipkitu uka marka contraw uka urojj jutaski.
17 Higos qoqajj* janis panqarpan,
uvas yapunakajj janis achoqpan,
aceituna cosechajj janis utjpan,
camponakan janis manqʼañanakajj achpan,
ovejanakajj uyutsa chhaqarpan,
vacanakajj janis uyunakapan utjpan,
18 ukampis Jehová Dios laykojj nayajj wali kusisitäyäwa,
nayar salvir Diosaj laykojj wali kusisitäyäwa.+
19 Taqe Kunjjar Munañani Jehová Dios Tatituw nayan chʼamajajja,+
jupaw kayunakajarojj venadon* kayupjam wali tʼijtir tukuyani,
jupaw alto lugaranaksa taktʼayarakitani.+
Directorataki. Cuerdan instrumentonakajamp cantañataki.
Uka sutejja, inas “nakhaskir qhomantäwi” sañ munchi.
Uka animalajj qamaqer jan ukajja zorror uñtatawa, qamaqet sipansa jachʼarakiwa.
Variante: “phirunakäpjjewa”.
Ukajja, “nanakajj janiw jiwapkäti” sasaw jaqokipasirakispa.
Variante: “Jaqheja”.
Jan ukajja, “toqenoqañatakejj”.
“Jupajj” sasinjja, caldeo enemigonakatwa parlaski.
Jan ukajja, “redepampiw”.
Jan ukajja, “redeparojj”.
Jan ukajja, “sacrificionak jewqʼeyaraki”.
Jan ukajja, “redepampejj”.
Ukajja, “espadap apsuskakiniti” sasaw jaqokipasirakispa.
“Jupajj” sasinjja, inas Diosat parlaskchi.
Hebreo arunjja, “janiw kʼariskaniti”.
Jan ukajja, “Amuyatajj qheptʼanirjamäkchisa”.
Ukajja, “confiyatap” sasaw jaqokipasirakispa.
Jan ukajja, “Seoljam”. “Seol” siski uk glosarion liytʼäta.
Jan ukajja, “markapatak”.
Jan ukajja, “markamarojj”.
“Circuncisión” siski uk glosarion liytʼäta.
Ukajja, “uksar aksar liwinaqtarakim” sasaw jaqokipasirakispa.
Ukajja, “nanakan tiemponakajana” sasaw jaqokipasirakispa.
Ukajja, “nanakan tiemponakajana” sasaw jaqokipasirakispa.
“Sélah” siski uk glosarion liytʼäta.
Jan ukajja, “salvapjjewa”.
Ukajja, “flechanakamajj” sasaw jaqokipasirakispa.
Ukajja, “Tribunakan juramentompi arsutanakapajj yatiyasiwa” sasaw jaqokipasirakispa.
Jan ukajja, “arbolajj”.
Jan ukajja, “tarujan”. Ukajja, qachu venadotwa parlaski.