Bibliankir libron jakhupa 53: 2 Tesalonicenses
Qillqiri: Pablo
Kawkins qillqasïna: Corinto
Kuna marans tukuyasïna: 51 jakʼana
TESALÓNICA markankir jilat kullakanakar apóstol Pablon payïr carta qillqatapaxa, nayrïr cartax apayaskän niya uka qhipatakwa apayasirakïna. Pablox qillqkäna ukhaxa, Silvanompi ukat Timoteompix wasitatwa Tesalonicankir jilat kullakanakarux arunta apayapxäna, ukatwa payïr cartax nayrïr cartxaruw apayasïna, ukhamaraki Corinto markat qillqasïna uk yattanxa. Kimspachaniw nayrapachanakanxa cristiano tamanakar tumptʼirix sarapxirïna, ukampis uka Corinton jaya qamartʼawayasinxa, janiw wasitat kimspachanix jikisxapxpachänti, kunattix janiw kuna qillqatas uka tuqit utjkiti (2 Tes. 1:1; Hech. 18:5, 18). Kunjam jan waltʼäwinakansa Tesalónica markankir jilat kullakanakax sarnaqapxäna uka tuqit yatisawa Pablox jankʼaki chiqañchañataki qillqpachäna, ukaw qillqatapan amuyasi.
2 Tesalonicar qillqat aka payïr cartaxa, nayrïr cartjama Diosan amuytʼayataw ukat chiqarakiw sañatakix walja qhanañchäwinakaw utjarakiki. Ireneo chachasa (100 maranakanwa jakäna) ukhamaraki uka tiempon jakir yaqha qillqirinakasa aka cartatxa parlapxarakikiwa, sañäni, Justino Mártir sat chachaxa (100 maranakanwa jakarakïna) “ñanqha jaqit” parlasax 2 Tesalonicenses 2:3 qillqatatwa apspachäna. Diosan amuytʼayata libronakat parlir nayra qillqatanakanxa ukhamarakikiw Tesalonicar qillqat aka payïr cartaxa uñsti, kunjamtï nayrïr cartax uñstki ukhama. Papiro Chester Beatty 2 (P46) sat qillqatan janis jichhax uñstkchixa, nayrax ukan qillqatäpachänwa, kunattix paqallqu hojaw chhaqhata, ukat Tesalonicar qillqat nayrïr cartxanki uka chhaqhat pä hojankpachänwa.
3 ¿Kuna amtampis aka cartax Tesalonicankirinakar qillqaspachäna? Kuna jan waltʼäwinakatï utjkänxa uka tuqitwa Pablox iwxtʼäna, uka tuqit amuytʼasaw uk yattanxa, kunattixa Jesusan apnaqirjam jutañapax sinti jakʼankxiwa sasaw yaqhipanakax amuyunakaparjam sapxäna, ukatxa yaqhanakaruw uka amuyunakapxa yatichapxäna, ukhamatwa tamarux jan walin uñjasiyapxäna. Janiw kunatï jakañatakix munaski ukasa ni irnaqañsa munxapxänti uka amuyunakarjam istʼasaxa. Yaqhipanakaxa inas uka amuyurjamax jan irnaqasaki, ni kunas jakañataki munaski ukanaks thaqxapxchïnti (2 Tes. 3:11). Tesalonicankirinakar nayrïr cartapanxa Pablox Jesusan apnaqirjam jutañapatwa qillqäna, ukat kunapachatï jaqin amuyuparjam sarnaqirinakax uka carta liytʼasiri istʼapxäna ukhaxa, jankʼakiw amuyunakaparjamax Pablon arunakap qʼiwjayasax kʼarinak parlapxäna. Ukatxa, “[Jehová] Tatitun urupax purinxiwa” sas siski uka mä cartax Pablonkkaspas ukham sasaw yaqhipax amuyapxpachäna (2:1, 2).
4 Inas nayrïr carta Tesalonicar apkäna uka jilatax uka yatiyäwinak apanchïna, ukampis ukham yatiyäwinak istʼasawa Pablox jilat kullakanakapar sum qhanañchtʼañ munpachäna, kunattix jupanakar wal munasïna. Ukhamasti apóstol Pablox 51 maranwa jupampi chik sarnaqir pä jilatampix Corinto markankkasax Tesalónica markankir jilat kullakanakaparux qillqäna. Criston apnaqirjam jutañapat pantjasipxatapat qhanañchtʼasaxa, chiqa yatichäwinakat jan jithiqtapxañapatakiw chʼamañchtʼäna.
KUNATSA WALI ASKIXA
10 Jukʼa arunakampi qillqat aka cartaxa cristianonakataki walja aski yatichäwinakaniwa. Akïr wakiskir yatichäwinakat amuytʼañäni: Jehová Diosaw Qhispiyir Diosasaxa, ukat jupaw ajayupampi qʼumachirixa, ukat chiqa yatichäwirux iyawsañasawa (2:13); Diosan ‘markapar’ jan ukax Apnaqäwipar mantañataki askit uñtʼatäñatakixa mä cristianox kuna tʼaqhisiñanaksa aguantañapawa (1:4, 5); kunapachatï Jesusax ‘jutkani’ jan ukax apnaqirjam quntʼatäkani ukhaw cristianonakax Jesusampi tantachasipxani (2:1); suma yatiyäwinakar jan istʼirinakax kunjam uñjatäñapatix wakiski ukhamarjamaw Jehová Diosax taripani (1:5-8); jawsatanakaxa Diosan khuyapayasiñapatxa Cristo Jesusamp chika jachʼañchatäpxaniwa (1:12); suma yatiyäwinak yatiyasawa jupanakar jawsasi (2:14); iyawsañaxa wali wakiskiripuniwa (1:3, 4, 10, 11; 2:13; 3:2); Diosar luqtirjamaxa, maynix jupatak irnaqasiñapawa, jan irnaqkani ukhaxa, jayraptaspawa ukatxa yaqhan jakäwinakaparuw mitisispa (3:8-12); Diosar munasiñawa tʼaqhisiñanak aguantañ yanapistu (3:5). Jukʼa arunakampi qillqtʼata aka cartaxa, ¡walja sum chʼamañchtʼasir yatichäwinakaniwa!
11 Tesalónica markankir jilat kullakanakapax Diosampi sumankapxakispa, mä wawaki sarnaqapxaspa ukat tamansa jiltapxakispa uka tuqinakatwa Pablox llakisïna ukaw aka qillqatan uñachtʼayasi. Jehová Diosan urupat pantjasitanakapatwa qhanañchtʼäna, ukat nayraqatxa ‘ñanqha jaqiw’ uñstaniñapa “jupasti Diosan templopan quntʼasiñkamaw puriñapa Diosäkaspas ukhama’ sasaw sarakïna. Ukhamasti khitinakatï ‘Diosan apnaqäwipar mantañataki askit uñtʼatäpki’ ukanakaxa, janiw Jesusan alaxpachat jutañapat payachasipxañapäkiti. ‘Kunapachatïx jupax jupankirinakampi jachʼañchayasiri, ukhamaraki taqi iyawsirinakampi jachʼañchayasiri jutkani’ ukhaxa, jan mayampitaki jan walinak chhaqtayiriw jutani (2:3, 4; 1:5, 10).